TƖƖCHA 10 - WƖA TENIŊ

¹ Nanchʋɔsʋŋ sɩ jaŋ sʋʋ hɛ tʋlaalɩ lɛ dɩ ʋ sʋɔra lɔrɛ ŋɩɩ, ŋɩɩ tɩtɩa nɛ yaarɩŋ mʋa jaŋ wuo chei wʋjɩmɩŋ arɩ zile.

² Wʋjɩnna tʋɔbɩɩnaa yie kɛnʋ tʋʋlɛ nɛ ʋ ŋɩŋaa wɩaa ba bʋa lɛ. Ama nɩyaarɩŋ-na tʋɔbɩɩnaa kala nɛ dɩ ʋ ŋaa wʋlɔrʋŋ.

³ Dɩ ʋ nɛ paala vɛŋ wombiiŋ lɛ, ʋ yie ŋaa nɩyaarɩ wɩaa nɛ a dagɛ nʋʋkala arɩ ʋ yaara nɛ.

⁴ Dɩ ma kuoro nɛ na baanɩŋ ŋ nyuŋ, sɩ́ ŋ dɩchɩnɩŋ vɩa. Dɩ ŋ nɛ tɔrɛ ŋ niiŋ, ŋɩɩ jaŋ wuo leŋ dɩ wɩɩ-la fɩɛlɛ.

⁵ Wʋbɔŋ nɛ mɩ na dʋnɩa lɛ, kuoro sɩ ŋaa wɩaa piperigi:

⁶ Ba sɩ joŋ nɩyaaraa hɛ dɩ-balaa aŋ joŋ kɩaa tɩŋŋaa hɛ dɩ-biisiŋ.

⁷ Mɩ na yosuŋ dɩ ba jɩl janɩŋ, ka kuori biiriŋ vɩvɛŋ naasɩŋ lɛ a nagɛ yosi.

⁸ Nɩɩ-la kala sɩ lu buotuoŋ jaŋ foro tuu, nɩɩ-la ma kala sɩ yigi jeeŋ lo, dɩmɩŋ jaŋ dɩmʋ.

⁹ Nɩɩ-la kala sɩɩ yɛrɛ tabɩaa, ba jaŋ wuo pɩrʋ. Nɩɩ-kala sɩɩ yɛrɛ daasɩŋ, ba nɛ jaŋ wuo pɩrʋ.

¹⁰ Dɩ ŋ saaŋ nɛ gbule ka ŋ bɩ taa, see dɩ ŋ faasa hɛ doluŋ ka dɩ ʋ-na wuo keri kʋa. Ama wʋjɩmɩŋ nɛ jaŋ wori wɩɩŋ.

¹¹ Dɩ dɩmɩŋ nɛ dɩmɩŋ, ka dɩ ŋ-na ŋaa dɩ ʋ bugumi, nɩɩ-la sɩ bugumu bɩ nyʋʋrɩ kala na.

¹² Wʋjɩnna wʋbʋlaa yie leŋ ba zilu nɛ, ama nɩyaarɩŋ-na wʋbʋlaa yie chei ʋ tɩtɩa nɛ.

¹³ Nɩyaarɩŋ yie suomo bʋl wɩalɩŋ sɩ bɩ bʋbʋɔ kɛnɛ nɛ, ʋ dɩdɛrɩŋ ʋ bʋl wʋyaayasɩŋ.

¹⁴ Nɩyaarɩŋ nɛ yie bʋbʋl wɩaa kɩŋkɛŋ. Nʋʋkala bɩ jɩŋ wɩɩ-la sɩ jaŋ ŋaa chie, nʋʋkala bɩ jɩŋ wɩɩ-la sɩ jaŋ ŋaa ʋ sʋʋŋ harɩŋ.

¹⁵ Nɩyaarɩŋ yie tɩŋ tɩntɩŋŋaa a bɛsɩmɛ nɛ, ʋ paala bɩ dɩa wombiiŋ jɩŋ.

¹⁶ Wɩɩŋ puu tintee-la nɩaa kuoro sɩ nagɛ ŋaa bii-bie, ba sɩpaalaaraa ma ŋaa nɩaa sɩ yie sii chʋchʋɔ fɩɛla kala dɩ ba niiŋ chɔgɩlɛ kʋdiile lɛ.

¹⁷ Tintee-la nɩaa tʋɔŋ sɩ jaŋ tɔrɛ nɛ, kuoru-bie sɩ dii ba kuoruŋ, ba sɩpaalaaraa ma ŋaa nɩa sɩɩ dii kɩaa bʋa-la sɩ maga dɩ ba dii lɛ a kɛŋ doluŋ, a jɩma kɛŋ ba tɩtɩa a bɩ bugi.

¹⁸ Dɩ nʋʋ nɛ kɛŋ yarɩwɩɩŋ a bɩ ʋ dɩa nyuŋ ka beŋ, ʋ jaŋ chuori a tel.

¹⁹ Kʋdiilee nɛ yie leŋ nɩa tʋɔŋ tɔrɛ, kʋnyʋalaa ma leŋ nɩaa mʋmɔŋ, ama moribiee nɛ kɛmba kala kʋkɔ.

²⁰ Pʋpɔ ŋ sɩ́ wʋbɔŋ bʋl a tɩgɛ kuoro lɛ, koo a bʋl wʋbɔŋ a tɩgɛ kɩaa tɩɩna lɛ ŋ dɩpɩnɩŋ, bɛɛ wɩaa diibie jaŋ wuo kɛŋ wɩalɩŋ mʋ bʋl. Fillu dɔŋ ma jaŋ wuo mʋ bʋl wɩalɩŋ ŋ sɩ bʋla.