Taatɩs 1 - WƖA TENIŊ

¹ Mɩ-na Pɔɔl nɛ ŋmʋnsɛ teniŋ deeŋ aa pɩ ŋ-na Taatɩs. Mɩ ŋaa Wɩa tɩntɩnnʋ nɛ a ŋaa Yesu Kirisito nanzɔɔ ma. Wɩa nɛ lɩɩsɛmɛ dɩ mɩ pɛ nɩalɩŋ ʋ sɩ lɩɩsa lɛ dɩ ba wasa chɩŋ wɩalɩŋ ba sɩ laa dii lɛ, a wuo jɩŋ wʋtɩtɩɩ-la sɩɩ to Wɩa wombiiŋ.

² Nɩalɩŋ sɩɩ to Wɩa wombiiŋ deeŋ, baa yɩɛlɛ arɩ ba jaŋ kɛŋ mɩɩsɩ-la sɩ bɩ dɛrɛ. Wɩa fa bʋl wɩaa a tɩgɛ mɩɩsɩŋ deeŋ lɛ faafaa kala nɛ, ka dʋnɩa-na suomi. Wɩa bɩ wɩaa ka nyɩɛ, ʋ jaŋ ŋaa wɩɩ-la.

³ Bʋa-la lɛ Wɩa sɩ cho nɛ, ʋ joŋ wɩɩ-la a dagɛla ʋ Wʋzɔmɔ-la tʋɔŋ. Ŋɩɩ nɛ la Laataara Wɩa joŋ wɩɩŋ deeŋ a hɛ mɩ nɩsɩŋ lɛ dɩ mɩ laa bʋla pɩ nɩaa.

⁴ Mɩ-na Pɔɔl nɛ ŋmʋnsɛ teniŋ deeŋ a pɩpɩ ŋ-na Taatɩs sɩ ŋaa mɩ bii-tɩtɩɩ Yesu wɩaa lɛ. La Nyɩmma Wɩa arɩ la Laataara Yesu Kirisito lahɔrɩmɔ lɛ, ŋ jaŋ hɔŋ arɩ yarɩfɩɛlaa.

Wɩa nɩaa tʋɔŋ nɩhɩasɩŋ sɩ maga dɩ ba nagɛ ŋɩɩ

⁵ Mɩ leŋiŋ Kiriiti lɛ dɩ ŋ wuo wasɛ wɩalɩŋ fa sɩ maga ba ŋaa nɛ. Mɩ bʋla pɩŋ dɩ ŋ lɩɩsɛ Wɩa nɩaa tʋɔŋ nɩhɩasɩŋ taŋ na-kala lɛ.

⁶ Wɩa nɩaa nɩhɩaŋ maga dɩ ʋ sɩ́ wʋcheeli kala kɛŋ nɩaa teeŋ. Ʋ maga dɩ ʋ kɛŋ ha-bala nɛ, ka ʋ biiriŋ ma kala laa Wɩa wɩaa dii, dɩ nɩaa sɩ́ bʋl arɩ ba tɛrɛ, a bɩ kʋhɩasɩŋ ma niiŋ ka to.

⁷ Nɩɩ-la sɩɩ beŋ Wɩa nɩaa ŋaa Wɩa tɩntɩnnɩ-hɩaŋ nɛ. Ʋ bɩ maga dɩ ʋ kɛŋ wʋcheelee nɩaa teeŋ. Ʋ bɩra bɩ maga dɩ ʋ dɩdagɛ ʋ tɩtɩa, a sɩ́ baaŋ tɩɩna koo sɩ-nyʋarʋ koo nii-jɩgɩ tɩɩna koo nɩɩ-la sɩ cho moribiee kɩŋkɛŋ ŋaa.

⁸ Ʋ maga dɩ ʋ beŋ nʋhʋɔraa woruŋ ʋ dɩa lɛ a cho wʋzɔŋŋɔɔ. Ʋ maga dɩ ʋ jɩŋ ʋ tɩtɩa kɛnɩŋ nɛ a ŋaa nɩtɩtɩɩ. Ʋ maga dɩ ʋ ŋaa nɩpʋla a wuo kɛŋ ʋ tɩtɩa a hɛ dɔŋɔ lɛ woruŋ.

⁹ Ba sɩ dagʋ Wɩa niiŋ wɩalɩŋ sɩ ŋaa wʋtɩtɩɩ ŋɩɩ, ʋ maga dɩ ʋ kɛmba woruŋ, dɩ ʋ wuo dagɛ ʋ dɔnsʋŋ tɩŋŋaa wʋtɩtɩɩ-la ʋ sɩ gʋnna. Dɩ ʋ nɛ ŋaa ŋɩɩ, ʋ jaŋ wuo dagɛ nɩalɩŋ sɩ bʋl wɩaa chichei Wɩa wʋtɩtɩɩ-la la sɩɩ to.

¹⁰ Nɩalɩŋ sɩ laa Wɩa wɩaa dii yʋga a bɩ chɛ dɩ ba tuto nɩhɩasɩŋ niiŋ wʋbʋlaa, a saa wasa nyaŋ Juu tɩmma-la sɩ laa Yesu wɩaa dii. Ba ŋaa wʋbʋl deeŋ deeŋ tɩmma nɛ, aa nyɩsɛ nɩaa.

¹¹ Ʋ maga dɩ ma bʋla pɩba dɩ ba leŋ wɩalɩŋ ba sɩɩ dagʋ, bɛɛ wɩaa ba sɩɩ dagɛ wɩalɩŋ sɩ bɩ maga dɩ baa dagɛ ŋɩɩ, ba ŋaa nɩaa joŋ wɩalɩŋ ba sɩ laa dii a tɩta nɛ. Moribiee wɩaa nɛ tɩɩ baa dagɛ wɩalɩŋ.

¹² Kiriiti nɩaa tʋɔŋ vʋgʋrʋ bʋl wɩaa a mʋ tɩgɛ ʋ nɩaa lɛ. Ʋ bʋla arɩ Kiriiti nɩaa kala ŋaa wʋnyɩɛraa nɛ a ŋaa nɩbɔmɔ, luobii tɩmma, aŋ pɛ kɛŋ yarɩwɩɩŋ ma.

¹³ Wɩɩ-la ʋ sɩ bʋla ŋaa wʋtɩtɩɩ nɛ. Ŋɩɩ wɩaa, bʋl ba teeŋ woruŋ dɩ ba chɩŋ wʋtɩtɩɩ-la ba sɩ laa dii lɛ kpaŋ kpaŋ.

¹⁴ Bɩra bʋla pɩba dɩ ba sɩ́ Juu tɩŋŋaa naabalɩmaba wɩaa sɩ nagɛ sʋnsɔgʋlɔɔ nɩɩ, a sɩ́ nɩalɩŋ sɩ vɩa Wɩa wʋtɩtɩɩ-la harɩŋ to.

¹⁵ Tʋɔpʋl tɩɩna teeŋ kʋŋkala zɔmɔ nɛ. Disiŋ tɩmma-la sɩ bɩ Wɩa wɩaa laa dii teeŋ, kʋŋkala ŋaa disiŋ kʋŋ nɛ. Ba tʋɔŋ lɔrɔ, ba tʋɔbɩɩnaa kala bɩ zɔŋ.

¹⁶ Baa bʋl arɩ ba jɩŋ Wɩa nɛ, ama ba wʋŋaalaa daga arɩ ba bɩ Wɩa jɩŋ. Ba wʋŋaalaa lɔrɔ, ba bɩ Wɩa niiŋ ka to, ba bɩ wʋzɔŋ kala wuo ŋaa.