SOLOMOŊ YƖƖL-SƖMƖŊ 3 - WƖA TENIŊ

¹ Mɩ sɩ pɩŋ mɩ bɔsɔ lɛ tɩtaŋɩŋ kala, mɩ bee chɩchɛ nɩɩ-la mɩ sɩ cho nɛ. Mɩ bee chɛʋ nɛ, ama mɩ bɩ ʋ na.

² Mɩ sɩ mɩ jaŋ sii lɛɛlɛ a jʋʋ tabal-la tʋɔŋ, a to ʋ womporunuŋ arɩ ʋ taŋ nɩaa dɩ-hɔnɔɔ. Mɩ sɩ mɩ jaŋ chɛ kɛŋ nɩɩ-la mɩ sɩ cho. Ŋɩɩ nɛ mɩ sii bee chɛʋ, ama mɩ bɩ ʋ na.

³ Nɩalɩŋ sɩɩ pɔ leriŋ namɛ, ba sɩ golli tabal-la a bɩbal. Mɩ pɩɛsɛba, “Ma na nɩɩ-la mɩ sɩ cho nɛɛ?”

⁴ Mɩ sɩ leŋ nɩalɩŋ, ʋ bɩ diene ka mɩ na nɩɩ-la mɩ sɩ cho. Mɩ kɛnʋ a bɩ leŋe ʋ mʋ aŋ kɛnʋ kaa kɔ mɩ naaŋ dɩa, a kɛnʋ jʋʋ nɩɩ-la sɩ lʋlmɛ dɩa.

⁵ Jerusalɛm toloo, má ŋmɩɛsɛ wieme arɩ aamɩŋ arɩ ma bɩ jaŋ kɛŋ la chono-la pugi.

⁶ Kʋbɛɛ nɛ lɩɩ tintee-hɩlɩŋ kʋkɔ ŋɩɩ a nagɛ nyʋɔsʋŋ sɩ nagɛ jebiiŋ aa jɩl wɩa-nyuŋ, a sʋsʋɔrɛ tɩɩ-kel-la sʋɔra sɩ sɩma baa yɩrɛ mɛɛ arɩ kʋsʋɔrʋsʋŋ dɔnsʋŋ ba sɩ kɛŋ bayalaa tegisiŋ kala ŋaa?

⁷ Bee na, Solomoŋ nɛ ŋɩɩ a pɩŋ ʋ geleŋgeleŋ lɛ ka ba chʋŋʋ, ka bayuori-duoruŋ mahɩŋ batori kɛnʋ vɩvɛŋ. Ba ŋaa Iziral tɩŋŋaa laalɩyuori babiibalaa nɛ.

⁸ Ba kala gɩrɩgɛ tokobiee nɛ, a jɩŋ laalɩŋ yuonuŋ woruŋ. Ba kʋŋkala tokobiiŋ hɛ ʋ sɛmɛ lɛ nɛ, a pɔ dɩ wɩɩkala sɩ́ kuoro ŋaa tɩtaŋɩŋ.

⁹ Kuoro Solomoŋ nɛ leŋe ba ŋaa geleŋgeleŋ-la ba sɩ kaa chʋchʋŋʋ. Lɛbanɔŋ duuŋ daasɩŋ nɛ ba kaa ŋaaʋ.

¹⁰ Geleŋgeleŋ-la daaterigeba, hɔpʋla nɛ ʋ kaa ŋaa, a kɛŋ sɛlɩmɛ ŋaa ʋ bʋbʋa-chala. Geleŋgeleŋ-la dɩhɔnʋŋ, gɛrɩpɛ vachalɩŋ nɛ ʋ kaa ŋaa a hɛ kumpuŋŋuba. Jerusalɛm toloo nɛ jɩma kpɩɛrɛ ʋ tʋɔŋ ŋɩɩ.

¹¹ Zaayɔŋ toloo, má kʋ lɩɩ a bagɩsɛ kuoro Solomoŋ sɩ chu kuoru nyunchuulo, kuoru nyunchuul-la ʋ naaŋ sɩ joŋo chuu tapʋlɩɩ-la ʋ sɩ jaa haala, tapʋlɩɩ-la ʋ tʋɔŋ sɩ tɔrɔ.