SOLOMOŊ YƖƖL-SƖMƖŊ 1 - WƖA TENIŊ

¹ Solomoŋ yɩɩlaa tʋɔŋ yɩɩl-sɩmɩŋ.

Haala

² Mɩ hɩɩla, kɛŋ ŋ niiŋ a mʋmʋsɛ mɩ niiŋ, bɛɛ wɩaa ŋ sɩ chomi paala sɩma kɩɩ girep nɛnɛɛ sɩnɩŋ.

³ Ŋ tʋlaalɩ sʋɔra sɩma nɛ woruŋ. Ŋ yɩrɩŋ sɩma a nagɛ ba sɩ bɩsɛ tʋlaalɩ ta ʋ sʋsʋɔrɛ nɛ, daŋkʋnɛ, hatoloo kala choŋ ŋɩɩ.

⁴ Pɛ kɛmmɛ mʋ, leŋ la ŋaa lɩma. Leŋ dɩ kuoro kɛmmɛ jʋʋ ʋ dɩpɩnɩŋ. Laa jʋɔsɛ ŋ lɛ nɛ, la tʋɔŋ ma tɔrɛ ŋ nyuŋ. La jaŋ bɛsɛ ŋ chonuŋ lɛ a kɩɩ girep nɛnɛɛ sɩnɩŋ. Ba kɩaa sɩma nɛ a magɛ dɩ ba bɛsɛ ŋ lɛ.

Tanlɔsʋŋ Haala

⁵ Jerusalɛm toloo, mɩ yaraa bire nɛ, ama mɩ zɔmɔ nɛ woruŋ. Mɩ bire a nagɛ taŋ-la ba sɩɩ yɩrɛ Keda lɛŋŋɛɛ nɛ, a bɩra bire nagɛ Solomoŋ kuoru dɩa patɩɩsamba.

⁶ Má sɩ́ sɩaa chaara pɛ mɩ lɛ ŋɩɩ a tɩŋ mɩ yaraa sɩ bire wɩaa, a tɩŋ wɩɩpɔsʋŋ sɩ ŋaa mɩ biri wɩaa. Mɩ naambiiriŋ na baanɩŋ nɛ mɩ nyuŋ a leŋ mɩ bibeŋ girep tɩɩsɩŋ bagɩsɩŋ, aŋ vɩa mɩ tɩtɩa girep tɩɩsɩŋ baga ta.

⁷ Mɩ nɩ-chooluŋ, dagɛmɛ lee-la ŋ sɩ kɛŋ ŋ piesee mʋ ba didii yaŋ, arɩ lee-la ŋ sɩ yie leŋ ŋ piesee pɩnaa wiesi wɩɩhɛyɛ. Bɛɛ nɛ tɩɩ mɩ jaŋ nagɛ ha-gɔllɔ baarɩ a chɩŋ ŋ nandɔsʋŋ piesee sɛmɛ?

Tanlɔsʋŋ

⁸ Haala tʋɔŋ ha-zɔmʋŋ, dɩ ŋ nɛ bɩ jɩŋ, to piese-la naabʋɔsʋŋ a leŋ dɩ ŋ bʋʋ-biisiŋ dii yaŋ pie-daaraa lɛŋŋɛɛ sɛmɛ.

Baala

⁹ Mɩ hɩɩla, mɩ kɛnɩŋ mɩmagɩsɛ Faaro laalɩŋ janɩŋ toruko ja-nɩɩ-hɩasɩ-la dɔŋɔ nɛ.

¹⁰ Ŋ chaŋkpaŋŋaa arɩ dɩgɩlɩŋ-kpɛnsɩŋ zɔmɔ, ŋ baŋŋaa arɩ banzɔlɔba ma zɔŋ.

¹¹ La jaŋ kɛŋ sɛlɩmɛ ŋaa dɩgɩlɩŋ-kpɛnsɩŋ pɩŋ a kɛŋ hɔpʋla libi kʋbiisiŋ chagɩsɛ.

Haala

¹² Kuoro fa hɔŋ ʋ kumpuŋŋuba nyuŋ nɛ, ka mɩ tʋlaalɩ sʋɔra laa leriŋ.

¹³ Mɩ hɩɩla nagɛ tɩɩ-kel-la sʋɔra sɩ sɩma ba sɩɩ yɩrɛ mɛɛ nɛ a daŋ mɩ yɩlaa nyuŋ.

¹⁴ Mɩ hɩɩla nagɛ leele fɩɩlaa ba sɩ kaa lɩɩ Ɛŋ-Gedi girep tɩɩsɩŋ baga nɛ.

Baala

¹⁵ Mɩ hɩɩla, ŋ chaasa zɔŋ nɛ woruŋ. Wʋtɩtɩɩ, ŋ chaasa zɔŋ nɛ woruŋ. Ŋ sɩaa nagɛ kokomo nɛ.

Haala

¹⁶ Mɩ hɩɩla, ŋ ma chaasa zɔŋ nɛ woruŋ. Wʋtɩtɩɩ, ŋ chaasa kɛŋ buno nɛ. Ya-laaŋ nɛ jaŋ ŋaa la bɔsɔ,

¹⁷ kuolu tɩɩsɩŋ arɩ chɛrɩ tɩɩsɩŋ fɩɛlɩŋ lɛ.