SƖPAALAARAA 6 - WƖA TENIŊ

Iziral tɩŋŋaa sɩpaalaara Gɩdɩɔŋ

¹ Ŋɩɩ nɛ Iziral tɩŋŋaa bɩra ŋaa wʋbɔŋ La TƖƖNA teeŋ, ʋ jomba hɛ Midiaŋ tɩŋŋaa nɩsɩŋ lɛ jɩsɩŋ balɩpɛ.

² A tɩŋ Midiaŋ tɩŋŋaa sɩ kɛŋ doluŋ aa dɔgɩsɛ Iziral tɩŋŋaa, ba fá jɩl peelee nyuŋ a faa bʋ-bʋɔsʋŋ arɩ leree dɔnsʋŋ.

³ Bʋa na-kala lɛ dɩ Iziral tɩŋŋaa nɛ duu kɩaa, Midiaŋ tɩŋŋaa, Amalɛk tɩŋŋaa arɩ nɩalɩŋ dɔnsʋŋ sɩ hɛ wɩɩpɔsʋŋ yie kʋ jʋʋ tintee-la nɛ a yuoba,

⁴ aŋ ŋmoo buguŋ tintee-la lɛ a chei kɩalɩŋ kala ba sɩ duo ŋɩɩ a mʋ yi taŋ-la ba sɩɩ yɩrɛ Gaza. Ba bɩ kʋŋkala sɩ weye leŋe a pɩpɩ Iziral tɩmma-la: piesee, nɛsɩŋ koo kakusuŋ.

⁵ Ba yie kiri ba pʋsʋŋ aŋ chʋŋ ba lɛŋŋɛɛ a kʋkɔ a nagɛ hɔbɩ-laalɩŋ sɩɩ kɔ. Ŋ bɩ ba dɩ ba bʋntaŋŋaba wuo dɩɩsɛ. Ba yie tɔ tintee-la kala nɛ a cheyu.

⁶ Midiaŋ tɩmma-la chaasa hɛ Iziral tɩŋŋaa sunnuŋ lɛ nɛ kɩŋkɛŋ, ba ŋmoo niiŋ a pɩ La TƖƖNA dɩ ʋ pɛ ba lɛ.

⁷ Iziral tɩŋŋaa sɩ ŋmoo niiŋ a pɩ La TƖƖNA, a tɩŋ Midiaŋ tɩmma-la wɩaa,

⁸ ʋ tɩŋ ʋ wʋlaabʋlla. Ʋ kʋ bʋla pɩba, “Wɩɩ-la La TƖƖNA Iziral Wɩa sɩ bʋla nɛ ŋ-la: ‘Mɩ nɛ kɛmma lɩɩ Ijipiti tinteeŋ lɛ, lee-la ma fa sɩ hɛ a ŋaa yosi.

⁹ Mɩ kɛmma laa Ijipiti tɩŋŋaa arɩ nɩalɩŋ kala fa sɩɩ dɔgɩsɛma nɩsɩŋ lɛ nɛ. Mɩ kiriba ta nɛ, aŋ laa ba tinteeŋ pɩma.

¹⁰ Mɩ bʋla pɩma nɛ, arɩ mɩ nɛ ŋaa ma TƖƖNA Wɩa, má sɩ́ Amɔrɩ tɩmma-la tinteeŋ lɛ ma sɩ hɔnɔ vesiŋ to, ama ma bɩ jegile nɩɩ mɩ teeŋ.’ ”

¹¹ Ŋɩɩ nɛ La TƖƖNA tɩndaara kʋ hɔŋ piine kʋbala bʋbʋɔŋ, a hɛ taŋ-la ba sɩɩ yɩrɛ Ɔfɩra lɛ. Abieza tɩɩna kʋbala ba sɩɩ yɩrɛ Jʋas nɛ fa tɩɩ tɩa-la. Nɩmɛ nɛ ʋ bie Gɩdɩɔŋ fa faa aa ŋmoo ʋ mɛmpɛ, lee-la ba sɩɩ chagɛ tɩɩnɛnɛɛ sɩnɩŋ, dɩ Midiaŋ tɩŋŋaa sɩ́ ʋ na.

¹² La TƖƖNA tɩndaarʋ-la sɩ kɛŋ ʋ tɩtɩa kʋ dagɛ Gɩdɩɔŋ, ʋ sɩ, “Laalɩyuori-babiibal, La TƖƖNA hɛ ŋ teeŋ nɛ.”

¹³ Gɩdɩɔŋ pɩɛsɛ, “Mɩɩ sʋlʋŋ, dɩ La TƖƖNA nɛ hɛ la teeŋ, bɛɛ nɛ tɩɩ wɩaa deemba kala ŋaa la lɛ? Ka wʋkpuŋkperisi-la kala wɩaa, la nyɩmmaba sɩ bʋla pɩla, nɩɩ nɛ ba hɛ? Ba sɩ sɩ La TƖƖNA Wɩa nɛ kɛnla kaa lɩɩ Ijipiti tinteeŋ lɛ kɔ, ama lɛɛlɛ La TƖƖNA vɩala ta nɛ a jonla la hɛ Midiaŋ tɩŋŋaa nɩsɩŋ lɛ.”

¹⁴ Ŋɩɩ nɛ La TƖƖNA bʋla pʋ, “Dol-la ŋ sɩ kɛnɛ, kaa mʋ laa Iziral tɩŋŋaa ta Midiaŋ tɩŋŋaa nɩsɩŋ lɛ. Mɩ-na nɩɩ tɩmɩŋ.”

¹⁵ Gɩdɩɔŋ pɩɛsɛ La TƖƖNA, “Ɛɛ nɛ mɩ jaŋ ŋaa a laa Iziral tɩŋŋaa ta? Manasɛ doho nɩaa tʋɔŋ, mɩ nyɩŋ-nɩa nɛ bɩ doluŋ kɛnɛ. Mɩ dɩa nɩaa ma tʋɔŋ, mɩ nɛ ba kʋbie.”

¹⁶ La TƖƖNA bʋla pʋ, “Mɩ jaŋ chɩŋ ŋ harɩŋ, dɩ ŋ wuo kpʋ Midiaŋ tɩŋŋaa kala hɛ dɔŋɔ.”

¹⁷ Gɩdɩɔŋ ma bɩra bʋl, “Dɩ ŋ tʋɔŋ nɛ tɔrɛ mɩ nyuŋ, pɩmɛ magɩlɩŋ sɩ jaŋ leŋ dɩ mɩ jɩŋ arɩ ŋ-na La TƖƖNA nɛ sɛnɛɛ bʋl wɩaa mɩ teeŋ ŋɩɩ.

¹⁸ Mɩɩ sʋlʋŋ, gbɛrɛ daha dɩ mɩ mʋ kɛŋ mɩ Wɩɩsʋlʋŋ kɩaa kʋ pɩŋ.” La TƖƖNA bʋl, “Mɩ jaŋ gbɛrɛ dɩ ŋ mʋ aŋ kɔ.”

¹⁹ Ŋɩɩ nɛ Gɩdɩɔŋ mʋ dɩa a kɛŋ bʋ-bie kpʋ a bɩrɩmɛ a chɔ, a magɩsɛ munuŋ kuokuo gbaŋa sɩɩŋ bʋnɔŋ a wasɛ boroboro sɩ bɩ sɩbʋrʋŋ kɛnɛ, a joŋ nammɩa-la hɛ sime lɛ, aŋ joŋ ʋ yomuŋ ma hɛ pupoiŋ tʋɔŋ, a kaa kʋ lɩɩ pʋ, piine-la bʋbʋɔŋ.

²⁰ Wɩa tɩndaarʋ-la bʋla pʋ, “Joŋ nammɩa-la arɩ boroboro-la sɩ bɩ sɩbʋrʋŋ kɛnɛ a daŋ bʋŋ deeŋ nyuŋ, aŋ joŋ yoŋ-la ma bɩsɛ wurisi.” Gɩdɩɔŋ ŋaa ŋɩɩ ʋ sɩ daga.

²¹ La TƖƖNA tɩndaarʋ-la fa kori dantɩga nɛ ʋ nɩsɩŋ lɛ. Ʋ kɛŋ dantɩga-la niiŋ a digi nammɩa-la arɩ boroboro-la. Nyiniŋ lɩɩ bʋŋ-la lɛ a joŋ nammɩa-la arɩ boroboro-la kala dii. Ŋɩɩ nɛ Wɩa tɩndaarʋ-la ma nyɩɩgɛ.

²² Gɩdɩɔŋ sɩ kʋ jɩŋ arɩ La TƖƖNA tɩndaara nɛ ʋ na ŋɩɩ, fawʋllʋŋ kɛnʋ ʋ bʋl, “La TƖƖNA doluŋ kala Tɩɩna! Mɩ na ŋ tɩndaara arɩ mɩ sɩɩŋ.”

²³ Ama La TƖƖNA bʋla pʋ, “Hɔŋ sɔm, sɩ́ leŋe dɩ fawʋllʋŋ kɛnɩŋ. Ŋ bɩ jaŋ sʋʋ.”

²⁴ Ŋɩɩ nɛ Gɩdɩɔŋ saa koruŋ nɩmɛ a pɩ La TƖƖNA, a hɛ ʋ yɩrɩŋ ‘La TƖƖNA nɩɩ pɩla fɩɛlɩŋ’. Koru-la ha hɛ taŋ-la ba sɩɩ yɩrɛ Ɔfɩra lɛ arɩ jɩnɩŋ kala. Abieza tɩŋŋaa nɛ tɩɩ lee-la.

²⁵ Tɩtaŋ-la tɩtɩa nɛ La TƖƖNA bʋla pɩ Gɩdɩɔŋ, “Kɛŋ ŋ nyɩmma nɛsɩŋ tʋɔŋ nɛ-bele sɩ yi jɩsɩŋ balɩpɛ. Ŋmoo ŋ nyɩmma koru-la ʋ sɩ saa pɩ vene-la ba sɩɩ yɩrɛ Baal lo, a keri vene-la ma ba sɩɩ yɩrɛ Asɩra daa-la sɩ chɩna kpɛrɛ Baal lo,

²⁶ aŋ saa koruŋ dɩ ʋ zɔŋ woruŋ dundolo deeŋ nyuŋ a pɩ mɩ-na ŋ TƖƖNA Wɩa. Kɛŋ Asɩra daa-la ŋ sɩ kere lo a hɛ nyiniŋ, a kpʋ nɛ-bele-la a sʋl kʋnyɩgaa Wɩɩsʋlʋŋ.”

²⁷ Ŋɩɩ nɛ Gɩdɩɔŋ kɛŋ ʋ tɩntɩnnaa fii ba ŋaa ŋɩɩ tɩtɩa La TƖƖNA sɩ bʋla pʋ. Ama a tɩŋ ʋ fa sɩɩ fá ʋ dɩa nɩaa arɩ taŋ-la nɩaa wɩaa, ʋ ŋaa wɩɩ-la tɩtaŋɩŋ nɛ, wɩɩhɛyɛ dee ʋ ŋaa.

²⁸ Taŋ sɩ pʋla chʋchʋɔŋ, taŋ-la nɩaa sie dɩ ba giri vene-la ba sɩɩ yɩrɛ Baal koru-la aŋ keri Asɩra daa-la ma sɩ chɩŋ ʋ sɛmɛ lo, aŋ ka ba kpʋ nɛ-bele a ŋaa Wɩɩsʋlʋŋ koru-falɩɩ-la nyuŋ.

²⁹ Ba pɩɛsɛ dɔŋɔ, “Kʋbɛɛ nɛ ŋaa wɩɩŋ deeŋ?” Ba sɩ fɩɛlɛ sɩaa aŋ kpɛrɛ pɩɛsɛ, nʋʋ bʋla pɩba, “Jʋas nanʋala Gɩdɩɔŋ nɛ ŋaa ŋɩɩ.”

³⁰ Ŋɩɩ nɛ taŋ-la nɩaa bʋla pɩ Jʋas, “Kɛŋ ŋ nanʋala Gɩdɩɔŋ kaa kʋ lɩɩ, ʋ maga la kpʋʋ nɛ, bɛɛ wɩaa ʋ giri Baal koruŋ nɛ aŋ keri Asɩra daa-la ma sɩ chɩŋ ʋ sɛmɛ lo.”

³¹ Jʋas ma pɩɛsɛ nɩ-daŋ-la sɩ na baanɩŋ a gollu, “Maa chɛ dɩ ma laa Baal yuosuŋ a yuo nɛɛ? Ma chɩna ma laa pɛ ʋ lɛ nɛɛ? Nɩɩ-la kala sɩɩ chɛ dɩ ʋ laa Baal yuosuŋ a yuo, ʋ maga dɩ ba kpʋʋ nɛ chʋchʋɔŋ! Dɩ Baal nɛ sɛnɛ ŋaa veŋ-tɩtɩɩ, ʋ koruŋ nɛ ba giri, ʋ maga ʋ nɛ laa ʋ tɩtɩa ta.”

³² Tapʋlɩɩ-la nɛ ba mɩɩra kɛŋ Gɩdɩɔŋ a yɩyɩrɛ ‘Jerub-Baal’, aŋ bʋl, “Má leŋ dɩ Baal yuou, bɛɛ wɩaa ʋ koruŋ nɛ ʋ giri.”

³³ Ŋɩɩ nɛ Midiaŋ tɩŋŋaa, Amalɛk tɩŋŋaa arɩ nɩalɩŋ kala sɩ hɛ wɩɩpɔsʋŋ dɩɩrɩŋ kʋ hɛ dɔŋɔ lɛ, ba chol Jɔdaŋ fuo-la a ŋmoo buguŋ Jɛzɩrɛl fuonaaŋ lɛ.

³⁴ La TƖƖNA Dɩma kʋ jʋʋ Gɩdɩɔŋ, ʋ ŋmʋʋ banyile a yɩrɛ Abieza tɩŋŋaa kala dɩ ba kʋ to ʋ harɩŋ,

³⁵ aŋ tɩma yɩrɛ Manasɛ doho nɩaa, Asa, Zebuluŋ arɩ Nafɩtalɩ doho nɩaa kala, ba nyɩgɩlɛ a kʋ chemba.

³⁶ Ŋɩɩ nɛ Gɩdɩɔŋ bʋla pɩ Wɩa, “Dɩ ŋ nɛ jaŋ to mɩ lɛ a laa Iziral tɩŋŋaa ta arɩ ŋ sɩ bʋl ŋɩɩ,

³⁷ na pie-pʋnaa nɛ mɩ joŋo bil taha tʋɔŋ ŋ-la, dɩ taŋ nɛ pʋla dɩ nyalɩŋ nyal a kɛŋ pie-pʋna-la dʋndʋŋa ka dɩ tinteeŋ hɩl, mɩ jɩma ŋ sɛnɛ jaŋ to mɩ lɛ nɛ a laaba ta, arɩ ŋ sɩ bʋl ŋɩɩ.”

³⁸ Taŋ sɩ pʋla, ŋɩɩ tɩtɩa nɛ ŋaa. Gɩdɩɔŋ sii joŋ pie-pʋna-la, a chagɛ ba nyalɩŋ lɩɩŋ a su gbaŋa.

³⁹ Ŋɩɩ nɛ Gɩdɩɔŋ bɩra bʋla pɩ Wɩa, “Sɩ́ leŋe dɩ ŋ baanɩŋ sii mɩ nyuŋ. Leŋ dɩ mɩ bɩra magɩsɩŋ bala arɩ pie-pʋna-la. Bʋa deeŋ lɛ leŋ dɩ pie-pʋna-la hɩl, aŋ ka dɩ tinteeŋ kala tɔ arɩ nyalɩŋ.”

⁴⁰ Tɩtaŋ-la ŋɩɩ tɩtɩa nɛ Wɩa ŋaa, pie-pʋna-la dʋndʋŋa nɛ hɩla, aŋ ka tinteeŋ kala tɔ nyalɩŋ.