SƖPAALAARAA 5 - WƖA TENIŊ

Yɩɩl-la Debora sɩ yɩa

¹ Tapʋlɩɩ-la nɛ Debora arɩ Abɩnʋam nanʋala Barak yɩɩ yɩɩlɩŋ deeŋ:

² “Má dɛnnɛ La TƖƖNA! Iziral sɩpaalaaraa kɔ nɛ a laa sɩpaaŋ, nɩalɩŋ ma sɛɩ a to ba harɩŋ.

³ Kuoroo arɩ sɩpaalaaraa, má jegile nɩɩ. Mɩ jaŋ yɩɩ yɩɩlɩŋ a du kɩaa a dɛnnɛ La TƖƖNA Iziral tɩŋŋaa Wɩa.

⁴ La TƖƖNA, bʋa-la lɛ ŋ sɩ lɩɩ Sɛɛ peel-la leriŋ, lee-la Ɛdɔm tɩŋŋaa sɩ hɔnɔ, tinteeŋ fa zigile nɛ, duonuŋ lɔgɔ jaasɛ.

⁵ Peelee fa jigise nɛ La TƖƖNA sɩpaaŋ, peel-la ba sɩɩ yɩrɛ Sɩnaɩ ma jigisi Iziral tɩŋŋaa Wɩa sɩpaaŋ.

⁶ Anaf nanʋala Samɩga mɩɩsɩŋ bʋa lɛ arɩ Jaɛl ma mɩɩsɩŋ bʋa lɛ, wɛŋ-vɛnnɛɛ fa vɩa womporuŋ ta nɛ, aŋ vɩvɛŋ wɛŋ-biisiŋ lɛ.

⁷ Tabiisiŋ nɩaa fa bɩra bɩ ba bagɩsɩŋ lɛ wuo tɩŋ, a kaa mʋ yi bʋa-la lɛ mɩ-na Debora sɩ sii chɩna pɔ Iziral nɩaa a nagɛ ba naaŋ.

⁸ Iziral tɩŋŋaa sɩ kʋʋ to vesiŋ, laalɩŋ kʋ jʋʋba nɛ. Iziral nɩaa bʋɩ mahɩŋ balɩa tʋɔŋ, hɔɔtaalɩ-la laalɩyuoroo sɩ kaa kɛrɛɛ laa bayuori hɛŋŋɛɛ koo timiŋ kʋbala ma fa tuo ba teeŋ.

⁹ Mɩɩ dɛnnɛ La TƖƖNA, mɩ tʋɔŋ tɔrɛ Iziral laalɩyuoroo sɩpaalaara-la nyuŋ arɩ laalɩyuoro-la sɩ sɛyɛ a kɛŋ ba tɩtɩa kʋ lɩɩ dɩ ba yuo laalɩŋ.

¹⁰ Má nɩalɩŋ sɩ kpɩɛrɛ kaku-pʋllʋŋ a jɩla hɔŋ kaku-kpasɩnɩŋ nyuŋ, arɩ ma nɩalɩŋ sɩɩ vɛŋ naasɩŋ lɛ,

¹¹ má jegile nɩɩ yɩɩla-la fuo-tuuroo sɩɩ yɩɩ vilee leree. La TƖƖNA tʋɔpʋl wʋŋaalɩa-la wɩaa nɛ ba bʋbʋl ŋɩɩ, a bɩra bʋl ʋ laalɩyuoro-la sɩ hɛ Iziral ma lɛ tʋɔpʋl wʋŋaalaa wɩaa. Ŋɩɩ nɛ La TƖƖNA nɩaa sii tuu taŋ-la boi-baalaa a bʋl,

¹² ‘Sii, sii, Debora! Sii, sii ta yɩɩlɩŋ! Sii, Ahɩnʋam nanʋala Barak, yuo kɛsɛ la dʋndɔŋŋɔɔ.’

¹³ Ŋɩɩ nɛ nɩkaana-la mɩɩra kɔ ba sɩpaalaaraa teeŋ, La TƖƖNA nɩalɩŋ mɩɩra kɔ mɩ teeŋ nɛ arɩ nɩduoruŋ a ŋaa siri dɩ ba yuo.

¹⁴ Dɔnsʋŋ lɩɩ Efirem nɛ a kɔ, lee-la Amalɛk tɩŋŋaa fa sɩ hɔnɔ. Bɛnjamɩŋ doho nɩaa ma fa kɔ nɛ. Laalɩyuoroo sɩpaalaaraa ma fa lɩɩ Makɩɩ nɛ a kʋ tuu. Tɩntɩnnɩ-hɩasɩŋ ma lɩɩ Zebuluŋ kɔ.

¹⁵ Ɩsaka doho sɩpaalaaraa fa hɛ Debora arɩ Barak teeŋ nɛ, a to ʋ harɩŋ tuu fuonaaŋ. Ama Rubiŋ doho nɩaa-na fa ha bɩ jɩŋ wɩɩ-la tʋɔŋ ba sɩ hɛ.

¹⁶ Rubiŋ doho nɩaa, bɛɛ nɛ tɩɩ ma ha hɛ ma pie-dɩɩsɩŋ leree? Maa chɛ dɩ ma nɩɩ ŋɩɩ pie-daaraa sɩ fʋʋla yɩyɩrɛ ba piesee nɛ koo? Rubiŋ doho nɩaa-na fa ha bɩ jɩŋ wɩɩ-la tʋɔŋ ba sɩ hɛ.

¹⁷ Gɩlɩad nɩaa hɔŋ Jɔdaŋ fuoŋ cholo wɩɩpɔsʋŋ nɛ. Daŋ doho nɩaa, bɛɛ nɛ tɩɩ ma-na ha hɛ lɩɩŋ daborusuŋ lɛ? Asa doho nɩaa ma hɔnɔ ta jɩa nɛ fuoŋ niiŋ, a hɛ lɩɩŋ niiŋ.

¹⁸ Ama Zebuluŋ arɩ Nafɩtalɩ nɩaa joŋ ba mɩɩsɩŋ a yɔɔ sʋʋŋ nɛ laalɩŋ lɛ.

¹⁹ Taanak lɛ, Kɛnaŋ kuoroo kɔ nɛ, ba yuo laalɩŋ a kpagɛ Mɛgɩdɔ lɩɩ-la leriŋ. Ama ba bɩ wuo paa hɔɔ-pʋla koo kʋŋkala.

²⁰ Chɛnwʋlaa faa vɛŋ wɩa-nyuŋ nɛ aŋ yuyuo Sɩsɛra.

²¹ Fuo-jɩna-la ba sɩɩ yɩrɛ Kɩsɔŋ, pɛllɛ paa Sɩsɛra nɩaa viiri nɛ. Mɩ jaŋ vɛŋ, a vɛŋ arɩ doluŋ.

²² Ŋɩɩ nɛ ʋ janɩŋ fɩfɩl a yɩyagɛ tinteeŋ arɩ ba naasɩŋ.

²³ La TƖƖNA tɩndaara bʋl, ‘Kalɩba hɛ Mɛrɔzɩ nɩaa lɛ, kalɩba hɛ ba lɛ woruŋ, bɛɛ wɩaa, ba bɩ kʋ pɛ La TƖƖNA lɛ dɩ ʋ yuo dii ʋ dʋndɔmɔ-la sɩ dolie.’

²⁴ Má zil Keni tɩŋŋaa Hɛba haala Jaɛl. Haala-la kala sɩɩ jʋʋ lɛŋŋɛɛ, ba tʋɔŋ má zilu a kɩɩ ba kala.

²⁵ Sɩsɛra fa sʋl lɩɩŋ nɛ ʋ teeŋ, ʋ ŋaa nɛ-yɩlɩŋ pʋ, ʋ fa ŋaa nɛyɩl-dɩndɛrɩŋ nɛ a hɛ nɩbalaa gbaŋa lɛ a pʋ.

²⁶ Ʋ joŋ lɛbɩŋ daa-pɛ-bie nɛ, aŋ kɛŋ nadiiŋ ma joŋ hama. Daa-pɛ-bie-la nɛ ʋ joŋo ŋmoo pɛ Sɩsɛra nyuŋ lɛ, ʋ nyu-kuŋkogulo yɛrɛ.

²⁷ Sɩsɛra nyaga sii kpirimi, aŋ tele pɩŋ nɩmɛ, a sʋʋ Jaɛl naasɩŋ bʋbʋɔŋ.

²⁸ Sɩsɛra naaŋ to tokoro a nyilimi, a ŋmoo niiŋ a bʋl, ‘Bɛɛ nɛ tɩɩ ʋ dieni ʋ bɩ kɔ? Bɛɛ nɛ tɩɩ ʋ didieni, ka la bɩ janɩŋ torukoba dɔmɔ ka nɩɩ?’

²⁹ Ʋ dɩ haala-la sɩ jɩŋ wɩaa kala bʋbʋl wʋbala,

³⁰ ‘Kapo ba yuo dii kɩaa nɛ aa chɛ ba kaa kpaa dɔŋɔ, dɩ baal kala na hantolibie koo hantolibiisiŋ balɩa, dɩ Sɩsɛra ma na gɛrɩ-zɔmɔ-la ba sɩ yuo dii. Ka dɩ mɩ ma laa gɛrɩ-zɔmɔ-la kala ba sɩ sʋa.’

³¹ La TƖƖNA, a leŋ dɩ ŋ dʋndɔŋŋɔɔ kala sʋʋ a nagɛ Sɩsɛra, aŋ leŋ dɩ nɩalɩŋ sɩ choŋ chaanɛ a nagɛ wɩɩpɔsʋŋ.” Ŋɩɩ nɛ Iziral tɩŋŋaa hɔŋ tintee-la lɛ arɩ fɩɛlɩŋ jɩsɩŋ mahɩŋ balɩa.