SƖPAALAARAA 21 - WƖA TENIŊ

Haala-la Bɛnjamɩŋ doho nɩaa sɩ jaa

¹ Iziral tɩŋŋaa fa ŋmɩɛsa nɛ Mɩzɩpa lɛ a bʋl, “La kʋŋkala bɩ jaŋ leŋ dɩ Bɛnjamɩŋ doho nʋʋ jaa la tolo.”

² Ŋɩɩ nɛ Iziral tɩŋŋaa mʋ Bɛtɛl a hɔŋ La TƖƖNA sɩpaaŋ, wɩa tuu jʋʋ, aŋ faasa yiyel.

³ Ba yel a bʋl, “Ou, La TƖƖNA Iziral tɩŋŋaa Wɩa, bɛɛ nɛ tɩɩ wɩɩŋ deeŋ ŋaa la lɛ? Bɛɛ nɛ tɩɩ Iziral doho doho dɔŋɔ jaŋ lɛl jɩnɩŋ?”

⁴ Taŋ sɩ pʋla chʋchʋɔ-fɩɛla, ba sii saa Wɩɩ-sʋlla koruŋ a ŋaa kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ.

⁵ Ŋɩɩ nɛ Iziral tɩmma-la pɩɛsɛ, “La tʋɔŋ nyɩŋ bɛɛ nɩaa nɛ bɩ kʋ hilimi La TƖƖNA sɩpaaŋ Mɩzɩpa lɛ?” Ba fa ŋmɩɛsa nɛ arɩ nʋʋkala nɛ vɩa dɩ ʋ kʋ hilimi La TƖƖNA sɩpaaŋ, ʋ maga dɩ ba kpʋʋ nɛ.

⁶ Iziral tɩŋŋaa tʋɔŋ chei ba naambiiriŋ Bɛnjamɩŋ doho nɩalɩŋ wɩaa ba bʋl, “Jɩnɩŋ Iziral doho doho dɔŋɔ lɛlɛ nɛ la tʋɔŋ.

⁷ Ɛɛ nɛ la jaŋ ŋaa a na haalaa pɩ Bɛnjamɩŋ doho nɩalɩŋ sɩ ka, la sɩ ŋmɩɛsa La TƖƖNA yɩrɩŋ lɛ arɩ la bɩ jaŋ joŋ la toloo pɩba dɩ ba jaa?”

⁸ Ba bɩra pɩɛsɛ, “Nyɩŋ bɛɛ nɩaa nɛ vɩa a bɩ kʋ hilimi La TƖƖNA sɩpaaŋ Mɩzɩpa lɛ?” Ŋɩɩ nɛ ba bee na arɩ Jabɛs Gɩlɩad nɩaa nɛ bɩ kɔ.

⁹ Ba fa sɩ dɩɩsɛ nɩalɩŋ, ba na arɩ Jabɛs Gɩlɩad nʋʋkala tuo ba tʋɔŋ.

¹⁰ Ŋɩɩ nɛ nɩalɩŋ sɩ hilime tɩŋ laalɩyuoroo bʋɩ fii arɩ balɩa ba mʋ Jabɛs Gɩlɩad a kpʋ nʋʋkala sɩ hɛ nɩmɛ, baalaa, haalaa arɩ hambiisiŋ kala.

¹¹ Ba sɩ, “Má kpʋ baalaa kala arɩ haala-la kala sɩ bɩ hapumo ŋaa.”

¹² Ba sɩ mʋ Jabɛs Gɩlɩad nɩalɩŋ tʋɔŋ, ba na hatoloo zɔɔ-banɛsɛ ha sɩ bɩ baal jɩŋ. Ŋɩɩ nɛ ba kɛsɛba a kaa mʋ ba buguŋ sɩ hɛ Sɩlɔ lɛ Kɛnaŋ tinteeŋ.

¹³ Iziral tɩmma-la kala sɩ hilime tɩŋ tɩndaarɩŋ pɩ Bɛnjamɩŋ doho nɩalɩŋ sɩ hɛ Rimoŋ bʋŋ-la leriŋ arɩ ba leŋ yuosuŋ, ka dɩ ba kɛŋ nii-bala.

¹⁴ Ŋɩɩ nɛ Bɛnjamɩŋ doho nɩalɩŋ mɩɩra kɔ Iziral tɩmma-la dɔnsʋŋ teeŋ. Ba joŋ Jabɛs Gɩlɩad nɩaa tolie-la ba sɩ bɩ kpʋa a pɩba. Ama tolie-la fa bɩ nɩalɩŋ nyuŋ chese.

¹⁵ Iziral tɩmma-la tʋɔŋ chei a tɩŋ La TƖƖNA sɩ leŋe Iziral doho doho-la dɔŋɔ fuoli.

¹⁶ Ŋɩɩ nɛ ba sɩpaalaaraa bʋl, “La kpʋ Bɛnjamɩŋ doho nɩaa haalaa kala nɛ, nɩɩ nɛ la jaŋ to a na haalaa pɩ baala-la sɩ ka?”

¹⁷ Ba sɩ, “Bɛnjamɩŋ doho nɩalɩŋ sɩ bɩ sʋba maga dɩ ba kɛŋ biiriŋ nɛ dɩ ba chɩŋ ba nyuŋ lɛ dɩ Iziral doho doho-la kʋŋ sɩ́ lɛl.

¹⁸ La bɩ jaŋ wuo joŋ la toloo a pɩba dɩ ba jaa, bɛɛ wɩaa la ŋmɩɛsa nɛ arɩ nʋʋkala nɛ ŋaa ŋɩɩ, ŋmɩaŋ jaŋ diiŋ.”

¹⁹ Ŋɩɩ nɛ ba bɩɩnɛ wɩɩ-la aŋ bʋl, “Jɩna na-kala la sɩ yie gbieli La TƖƖNA gbiele-la Sɩlɔ lɛ, ʋ kpaga nɛ.” (Sɩlɔ hɛ Bɛtɛl wɩɩpɔsʋŋ nagʋa nɛ, a hɛ Lɛbanɔŋ ma wɩɩpɔsʋŋ nadiiŋ aŋ hɛ Bɛtɛl arɩ Sɛkɛm ma wombiiŋ wɩɩpɔsʋŋ dɩɩrɩŋ.)

²⁰ Ba bʋla pɩ Bɛnjamɩŋ doho nɩalɩŋ, “Má mʋ faa girep tɩɩsɩŋ bagɩsɩŋ tʋɔŋ,

²¹ aŋ bibeŋ, dɩ Sɩlɔ tɩŋŋaa tolie-la nɛ kʋ lɩɩ a gʋgʋa gbiele-la lɛ, má guu sii a fá a mʋ dɩ nʋʋkala kɛŋ haal-la ʋ sɩ cho a kaa mʋ ma tinteeŋ.

²² Dɩ tolie-la nyɩmmaba koo dɩ ba dɩ-baalaa nɛ ŋaa goŋ, la jaŋ bʋla pɩba, ‘Laa sʋlma, má leŋ dɩ ba kɛŋ ma tolie-la, bɛɛ wɩaa la bɩ wuo na haalaa a pɩ ba kala bʋa-la lɛ la sɩɩ yuo laalɩŋ Jabɛs lɛ. Ma bɩ jaŋ laa cheeri kala, bɛɛ wɩaa ma dee bɩ ma toloo joŋo pɩba.’ ”

²³ Ŋɩɩ nɛ Bɛnjamɩŋ doho nɩalɩŋ ŋaa ŋɩɩ ba sɩ dagɛba. Bʋa-la lɛ tolie-la sɩ kʋ lɩɩ gʋgʋa, ba kʋŋkala sii a mʋ kɛŋ tolie-la dɔŋɔ, a kaa mʋ ŋaa ʋ haala. Ŋɩɩ nɛ ba mɩɩra mʋ ba tinteeŋ a wasa saa ba tasɩŋ a hɔŋ nɩmɛ.

²⁴ Bʋa-la lɛ nɛ Iziral tɩmma-la kʋkaanaa ma kala mɩɩra mʋ ba doho doho arɩ ba nyɩŋ-nɩaa leriŋ.

²⁵ Bʋa-la lɛ, Iziral tɩŋŋaa fa bɩ kuoro kɛnɛ, nʋʋkala faa ŋaa wɩɩ-la ʋ sɩ cho nɛ.