SƖPAALAARAA 20 - WƖA TENIŊ

Iziral tɩŋŋaa yuo Bɛnjamɩŋ doho nɩaa

¹ Ŋɩɩ nɛ Iziral tɩŋŋaa kala, a chɩŋ Daŋ doho nɩaa sɩ hɛ wɩɩ-pɔnʋŋ nagʋa a kaa mʋ Bɛɛsɩba wɩɩpɔsʋŋ nadiiŋ, arɩ Gɩlɩad tinteeŋ nɩaa, ba kala lɩɩ hɛ dɔŋɔ a ŋaa nii-bala a hilimi La TƖƖNA sɩpaaŋ Mɩzɩpa lɛ.

² Iziral doho doho-la kala sɩpaalaaraa nɛ fa hɛ Wɩa nɩaa hilime deeŋ lɛ. Ba laalɩyuoroo fa ŋaa bʋɩ banɛsɛ nɛ a kɛŋ ba tokobiee.

³ (Ŋɩɩ nɛ Bɛnjamɩŋ doho nɩalɩŋ nɩɩ arɩ Iziral tɩmma-la dɔnsʋŋ mʋ a hilimi Mɩzɩpa lɛ nɛ.) Iziral tɩmma-la pɩɛsɛ Levi doho nɩɩ-la, “Bʋla pɩla ŋɩɩ wʋbɔmʋŋ deeŋ sɩ to ŋaa.”

⁴ Ŋɩɩ nɛ Levi doho nɩɩ-la haala ba sɩ kpʋa bʋl, “Mɩ dɩ mɩ haala mɩ sɩ bile aŋ bɩ jaa nɛ mʋ Gɩbɩa sɩ hɛ Bɛnjamɩŋ tinteeŋ lɛ dɩ la chʋa nɩmɛ.

⁵ Tɩtaŋɩŋ Gɩbɩa baalaa kʋ golli dɩa-la lɛ la sɩ pɩna a chu, a chɩchɛ dɩ ba kpʋmɛ. Ŋɩɩ nɛ ba mɩɩra gurigi haal-la mɩ sɩ bile aŋ bɩ jaa a pɩnʋ, ʋ sʋʋ.

⁶ Mɩ joŋu kaa keri muno muno a kpaa Iziral doho doho-la kala, bɛɛ wɩaa nɩalɩŋ ŋaa wʋbɔŋ nɛ arɩ hɩɩsɩ wɩɩ Iziral tinteeŋ lɛ.

⁷ Lɛɛlɛ ma Iziral tɩŋŋaa kala, má ma bʋl wɩɩ-la ma sɩ kɛnɛ a mʋ tɩgɛ wɩɩŋ deeŋ lɛ.”

⁸ Ŋɩɩ nɛ nɩalɩŋ kala sii chɩŋ a bʋl, “La kʋŋkala bɩ jaŋ mɩɩra mʋ dɩa da.

⁹ Ama wɩɩ-la la sɩ jaŋ ŋaa Gɩbɩa lɛ nɛ ŋ-la: La jaŋ tɔnsɛ a lɩɩsɛ nɩaa dɩ ba mʋ yuoba.

¹⁰ Baalaa zɔlɔ tʋɔŋ la jaŋ lɩɩsɛ nɩaa fii Iziral doho doho-la kala lɛ, baalaa bʋɩ ma tʋɔŋ la jaŋ lɩɩsɛ nɩaa zɔlɔ. Nɩaa bʋɩ fii ma tʋɔŋ la jaŋ lɩɩsɛ nɩaa bʋɩ, dɩ ba kɛŋ kʋdiilee mʋ pɩ laalɩyuoro-la sɩɩ mʋ Gɩbɩa. Dɩ laalɩyuoro-la nɛ mʋ yi Gɩbɩa sɩ hɛ Bɛnjamɩŋ tinteeŋ lɛ, ba jaŋ dɔgɩsɛba a tɩŋ wʋbɔŋ-la ba sɩ ŋaa Iziral tinteeŋ lɛ.”

¹¹ Ŋɩɩ nɛ Iziral tɩŋŋaa kala kʋ hɛ dɔŋɔ a ŋaa nii-bala dɩ ba yuo taŋ-la.

¹² Ŋɩɩ nɛ Iziral tɩŋŋaa tɩŋ nɩaa ba mʋ Bɛnjamɩŋ doho nɩaa kala teeŋ a pɩɛsɛba, “Bɛɛ kʋŋ wʋbɔŋ nɛ ma ŋaa ŋɩɩ?

¹³ Má chaarɛ Gɩbɩa nɩbɔmɔ-la sɩ ŋaa wɩɩŋ deeŋ pɩla dɩ la kpʋba a lɩɩsɛ wʋbɔŋ-la ta Iziral tinteeŋ lɛ.” Ama Bɛnjamɩŋ doho nɩalɩŋ bɩ jegile nɩɩ wɩɩ-la ba Iziral tɩmma-la dɔnsʋŋ sɩ bʋla.

¹⁴ Ŋɩɩ nɛ ba lɩɩ ba tasɩŋ a kʋ hɛ dɔŋɔ Gɩbɩa lɛ dɩ ba yuo ba Iziral tɩmma-la dɔnsʋŋ.

¹⁵ Bɛnjamɩŋ doho nɩaa guu lɩɩsɛ laalɩyuoroo bʋɩ mara arɩ balɩdʋ ba tasɩŋ lɛ, ba kori tokobiee a pɛ nɩaa zɔɔ-balɩpɛ ba sɩ lɩɩsa Gɩbɩa lɛ.

¹⁶ Bɛnjamɩŋ doho nɩaa laalɩyuoro-la tʋɔŋ, nɩaa zɔɔ-balɩpɛ nɛ fa hɛ nɩmɛ a ŋaa gɛlɛ tɩmma. Ba fa kɛŋ sɩɩŋ nɛ woruŋ, dɩ ŋ nɛ paala joŋ nyu-pʋnʋŋ bil dɩ ba kʋŋ yuou arɩ kpalɩŋ, ʋ bɩ puri.

¹⁷ Iziral tɩŋŋaa sɩ kɛŋ ba laalɩyuoroo hɛ dɔŋɔ, nɩalɩŋ sɩ jɩŋ laalɩ-yuonuŋ woruŋ ŋaa nɩaa bʋɩ zɔɔ-banɛsɛ nɛ, a lɩɩsɛ Bɛnjamɩŋ doho nɩaa ta.

¹⁸ Ŋɩɩ nɛ Iziral tɩŋŋaa mʋ Bɛtɛl a pɩɛsɛ Wɩa, “Do bɛɛ laalɩyuoroo nɛ maga dɩ ba laa sɩpaaŋ a mʋ yuo Bɛnjamɩŋ doho nɩalɩŋ?” La TƖƖNA bʋl, “Juda doho nɩaa laalɩyuoroo nɛ jaŋ laa sɩpaaŋ mʋ.”

¹⁹ Taŋ sɩ pʋla, Iziral tɩmma-la sii mʋ ŋmoo ba buguŋ a kpagɛ Gɩbɩa.

²⁰ Ŋɩɩ nɛ Iziral tɩmma-la lɩɩ a chɩŋ lee-la ba sɩ jaŋ yuo Bɛnjamɩŋ doho nɩalɩŋ Gɩbɩa lɛ.

²¹ Bɛnjamɩŋ doho nɩalɩŋ kʋ lɩɩ Gɩbɩa lɛ a kpʋ Iziral laalɩyuoroo bʋɩ mara arɩ balɩa tapʋlɩɩ-la.

^22-23 Ŋɩɩ nɛ Iziral tɩŋŋaa mʋ Bɛtɛl, lee-la ba sɩɩ dɛnnɛ La TƖƖNA a yel ʋ sɩpaaŋ wɩa tuu jʋʋ. Ba pɩɛsɛ La TƖƖNA, “La bɩra mʋ a yuo la naambiiriŋ Bɛnjamɩŋ doho nɩalɩŋ?” La TƖƖNA sɩ, “Oo, má mʋ yuoba.” Iziral laalɩyuoro-la nyuŋ nyaasɛ, ba bɩra mʋ chɩŋ lere-la ba fa sɩ laa sɩpaaŋ chɩŋ.

²⁴ Ŋɩɩ nɛ Iziral tɩŋŋaa bɩra tʋɔra mʋ Bɛnjamɩŋ doho nɩalɩŋ lɛ tapʋl-lɩa lɛ.

²⁵ Bɛnjamɩŋ doho nɩaa laalɩyuoroo bɩra kʋ lɩɩ bʋa deeŋ lɛ a kpʋ ba nɩaa bʋɩ fii arɩ chori fa sɩ kori tokobiee.

²⁶ Ŋɩɩ nɛ Iziral tɩmma-la kala mʋ Bɛtɛl a hɔŋ La TƖƖNA sɩpaaŋ a yiyel. Tapʋlɩɩ-la ba vɔɔ niiŋ nɛ wɩa tuu jʋʋ, a ŋaa kʋnyɩgaa Wɩɩsʋlʋŋ arɩ nii-magɛ dɔŋɔ Wɩɩsʋlʋŋ a pɩ La TƖƖNA.

²⁷ Ŋɩɩ nɛ Iziral tɩmma-la mʋ dɩ ba chɛ na La TƖƖNA teeŋ. (Bʋa-la lɛ dɩ La TƖƖNA niiriŋ daga-la fa hɛ Bɛtɛl lɛ,

²⁸ Arɔŋ nihiŋ Finihas sɩ ŋaa Elieza nanʋala nɛ faa beŋ daga-la.) Ba pɩɛsɛ La TƖƖNA, “La bɩra mʋ a yuo Bɛnjamɩŋ doho nɩaa sɩ ŋaa la naambiiriŋ koo la sɩ́ mʋ?” La TƖƖNA bʋl, “Má mʋ, chie mɩ jaŋ jomba hɛ ma nɩsɩŋ lɛ.”

²⁹ Ŋɩɩ nɛ Iziral tɩŋŋaa leŋ ba laalɩyuoroo dɔnsʋŋ mʋ faa a golli Gɩbɩa.

³⁰ Ba bɩra mʋ Bɛnjamɩŋ doho nɩalɩŋ lɛ tapʋl-tori chɛɛŋ, a bɩra mʋ chɩŋ lere-la ba fa sɩ laa sɩpaaŋ chɩŋ.

³¹ Bɛnjamɩŋ doho nɩalɩŋ kʋ lɩɩ dɩ ba yuoba, ba nyɩsa kɛmba fá kagɛ ba taŋ lɛ. Bɛnjamɩŋ doho nɩalɩŋ bɩra suomo kpʋkpʋ Iziral tɩmma-la arɩ ba fa sɩ laa sɩpaaŋ kpʋba ŋɩɩ, a kpʋ ba nɩaa mara arɩ fii ŋmaŋkaaŋ nyuŋ, wombii-la sɩɩ mʋ Bɛtɛl arɩ wombii-la sɩɩ mʋ Gɩbɩa lɛ.

³² Bɛnjamɩŋ doho nɩalɩŋ bʋl, “La bɩra yuo diiba nɛ arɩ la sɩ laa sɩpaaŋ a yuo diiba ŋɩɩ.” Ama Iziral tɩmma-la chɛ dɩ ba nyɩsa kɛmba fá kagɛ ba taŋ lɛ nɛ a mʋ wombiee.

³³ Iziral tɩmma-la kala fá a mʋ chɩŋ Baal Tama lɛ, ka ba nɩalɩŋ sɩ faa Gɩbɩa wɩɩjʋʋlʋŋ dɩɩrɩŋ ma nyaga sii.

³⁴ Ŋɩɩ nɛ Iziral laalɩyuoroo bʋɩ fii sɩ jɩŋ laalɩŋ yuonuŋ woruŋ jʋʋ a yuo Gɩbɩa. Laal-la fa chaasa lɩŋ nɛ woruŋ. Bɛnjamɩŋ doho nɩalɩŋ fa bɩ jɩŋ arɩ ba jaŋ cheiba.

³⁵ La TƖƖNA leŋ Iziral tɩŋŋaa yuo dii Bɛnjamɩŋ doho nɩaa laalɩyuoroo, a kpʋ ba nɩaa bʋɩ mara arɩ banɔŋ arɩ zɔlɔ tapʋlɩɩ-la.

³⁶ Ŋɩɩ nɛ Bɛnjamɩŋ doho nɩalɩŋ jɩŋ arɩ ba yuo diiba nɛ. Iziral tɩmma-la fa fá ŋɩɩ, bɛɛ wɩaa baa yɩɛlɛ ba nɩalɩŋ sɩ faa a golli Gɩbɩa lɛ nɛ.

³⁷ Nɩalɩŋ sɩ faa golli Gɩbɩa lɛ guu sii a jʋʋ Gɩbɩa a pɩsa su taŋ-la a kpʋ nʋʋkala sɩ hɛ nɩmɛ.

³⁸ Iziral laalɩyuoro-la sɩ faa arɩ nɩalɩŋ sɩ hɛ pɔkɔŋ nyuŋ fa dagɛ magɩl nɛ a pɩ dɔŋɔ: Dɩ nɩalɩŋ sɩ hɛ pɔkɔŋ nyuŋ nɛ na dɩ nyʋɔsʋŋ ka sii taŋ-la tʋɔŋ,

³⁹ ba mɩɩra kʋkɔ. Bʋa-la lɛ Bɛnjamɩŋ doho nɩalɩŋ sɩ kpʋ Iziral nɩaa mara arɩ fii aŋ bʋl, “La bɩra yuo diiba nɛ arɩ bumbuŋ-la.”

⁴⁰ Ŋɩɩ nɛ Iziral tɩŋŋaa na magɩl-la, ba na dɩ nyʋɔsʋŋ tɔ taŋ-la a sii jɩjɩl wɩa-nyuŋ. Bɛnjamɩŋ doho nɩaa mɩɩra daasɛ harɩŋ a na dɩ ba jaŋ tɔ arɩ nyiŋgeliŋ. Ʋ ŋaaba wʋkpuŋkpere.

⁴¹ Iziral tɩmma-la mɩɩra chicheŋ Bɛnjamɩŋ doho nɩalɩŋ. Fawʋllʋŋ kɛŋ Bɛnjamɩŋ doho nɩalɩŋ, bɛɛ wɩaa ba jɩma arɩ Iziral tɩŋŋaa jaŋ cheiba.

⁴² Ŋɩɩ nɛ ba fá to tintee-hɩlɩŋ dɩɩrɩŋ a mʋmʋ, ama ba bɩ foro Iziral tɩŋŋaa nɩsɩŋ lɛ. Iziral tɩmma-la sɩ faa a sii jʋʋ taŋ-la kʋ tɔba hɛ a kpʋba.

⁴³ Iziral tɩmma-la tɔba hɛ nɛ a kire kpʋba ŋɩɩ halɩɩ a mʋ yi Gɩbɩa wɩɩpɔsʋŋ dɩɩrɩŋ.

⁴⁴ Bɛnjamɩŋ doho nɩalɩŋ laalɩyuoroo bʋɩ fii arɩ chori nɛ ba kpʋ. Ba kala fa ŋaa laalɩyuori babiibala nɛ.

⁴⁵ Bɛnjamɩŋ doho nɩalɩŋ sɩ mɩɩra fá a tʋʋlɛ tintee-hɩlɩɩ-la a mʋmʋ Rimoŋ bʋŋ-la leriŋ dɩɩrɩŋ, Iziral tɩŋŋaa kpʋ ba ma bʋɩ banɔŋ nɛ wombii-la lɛ, aŋ ha kire to ba harɩŋ a mʋ yi Gidom a kpʋ nɩaa bʋɩ balɩa a pɛ.

⁴⁶ Tapʋlɩɩ-la Bɛnjamɩŋ doho nɩalɩŋ laalɩyuoro-la sɩ kɛŋ tokobiee a yuyuo, ba nɩaa bʋɩ mara arɩ banɔŋ nɛ ba kpʋ. Ba kala fa ŋaa laalɩyuori babiibala nɛ.

⁴⁷ Ama ba ma nɩaa zɔɔ-balɩdʋ nɛ wuo fá a mʋ tintee-hɩlɩɩ-la a mʋ Rimoŋ bʋŋ-la leriŋ a hɔŋ nɩmɛ chɛnsɩŋ banɛsɛ.

⁴⁸ Ŋɩɩ nɛ Iziral tɩmma-la mɩɩra mʋ Bɛnjamɩŋ doho nɩalɩŋ tasɩŋ a kpʋ nʋʋkala sɩ hɛ nɩmɛ, arɩ ba pʋsʋŋ kala a chei ba kʋŋkala, aŋ nyɩgɛ tasɩ-la kala sɩ hɛ lee-la.