SƖPAALAARAA 2 - WƖA TENIŊ

Wɩa tɩndaara mʋ Bokim

¹ Ŋɩɩ nɛ Wɩa tɩndaara lɩɩ Gɩlɩgal lɛ a mʋ Bokim a bʋla pɩ Iziral tɩŋŋaa, “Mɩ kɛmma lɩɩ Ijipiti tinteeŋ lɛ nɛ, a kɛmma kaa mʋ tintee-la mɩ sɩ hɛ niiŋ arɩ mɩ jaŋ joŋo pɩ ma naabalɩmaba. Mɩ sɩ, ‘Mɩ bɩ jaŋ kɔ dɩ mɩ leŋe dɩ niiŋ deeŋ birigi.

² Má ma bɩ maga dɩ ma leŋ ma dɩ nɩalɩŋ sɩ hɛ tinteeŋ deeŋ lɛ pɛ nii kala. Ʋ maga dɩ ma chei ba vʋɩyaa korunuŋ kala.’ Ama ma bɩ mɩ niiŋ lɛ to. Bɛɛ nɛ tɩɩ ma ŋaa ŋɩɩ?

³ Lɛɛlɛ mɩ bʋlaa pɩma, mɩ bɩ jaŋ kiri nɩalɩŋ ta ma sɩpaaŋ. Ba jaŋ nagɛ sɔsʋŋ ma yaraa lɛ, dɩ ba vesiŋ ma nagɛ bɛrɛ a kɩkɛsɛma.”

⁴ Wɩa tɩndaarʋ-la sɩ bʋl wɩaa deemba a pɩ Iziral tɩŋŋaa, ba kala faasa ŋmoo niiŋ.

⁵ Ŋɩɩ nɛ ba hɛ lee-la yɩrɩŋ Bokim (ʋ bʋbʋɔŋ nɛ nɩaa sɩɩ yel). Ŋɩɩ nɛ ba kpʋ pʋsʋŋ a ŋaa Wɩɩsʋlʋŋ pɩ La TƖƖNA nɩmɛ.

Iziral tɩŋŋaa vɩa Wɩa niiŋ, ba yuo diiba

⁶ Josua sɩ ta Iziral tɩŋŋaa ba viiri, ba kʋŋkala mʋ dɩ ʋ laa ʋ tinteeŋ kpaalɩŋ.

⁷ Josua mɩɩsɩŋ kala lɛ, Iziral tɩŋŋaa to La TƖƖNA nɛ woruŋ. Ʋ sʋʋŋ harɩŋ ma, nɩhɩasɩ-la kala sɩ hɛ ba mɩɩsɩŋ lɛ a na wɩalɩŋ La TƖƖNA sɩ ŋaa pɩ Iziral tɩŋŋaa, ba mɩɩsɩŋ kala lɛ Iziral tɩŋŋaa ha to Wɩa nɛ.

⁸ Ŋɩɩ nɛ La TƖƖNA tɩntɩnna, Nuŋ nanʋala Josua sʋʋ, dɩ ʋ ŋaa jɩsɩŋ zɔlɔ arɩ fii.

⁹ Ba joŋu hugi ʋ tɩtɩa tinteeŋ lɛ, Tɩmɩnaf Sɛra lɛ, a hɛ Efirem tintee-la peelee sɩ yʋga lɛ, peel-la ba sɩɩ yɩrɛ Gaas a hɛ wɩɩpɔsʋŋ nagʋa.

¹⁰ Doho deeŋ nɩaa kala sɩ kʋ sʋʋ dɛrɛ, do-falɩɩ ma bɩra sii, a bɩ La TƖƖNA jɩŋ, a bɩ wɩalɩŋ ʋ sɩ ŋaa pɩ Iziral tɩŋŋaa ma jɩŋ.

¹¹ Ŋɩɩ nɛ Iziral tɩŋŋaa ŋaa wʋbɔŋ La TƖƖNA teeŋ a kpʋkpaarɛ vesi-la ba sɩɩ yɩrɛ Baal.

¹² Ba vɩa La TƖƖNA nɛ, ba naabalɩmaba Wɩa sɩ kɛmba kaa kʋ lɩɩ Ijipiti tinteeŋ lɛ, aŋ kpʋkpaarɛ nɩalɩŋ sɩ golliba vesiŋ. Ba ŋaa La TƖƖNA baanɩŋ sii nɛ,

¹³ bɛɛ wɩaa ba vɩaʋ nɛ aŋ kpʋkpaarɛ vesi-la ba sɩɩ yɩrɛ Baal arɩ Asɩtɔrɛf.

¹⁴ La TƖƖNA sɩ na baanɩŋ Iziral tɩŋŋaa nyuŋ ŋɩɩ, ʋ jomba hɛ laalɩyuoroo nɩsɩŋ lɛ, ba yuoba a paa ba kɩaa kala. Ʋ jomba hɛ ba dʋndɔmɔ-la kala sɩ golliba nɩsɩŋ lɛ nɛ, nɩalɩŋ nɩsɩŋ lɛ ba sɩ bɩ wuo fori.

¹⁵ Bʋa na-kala dɩ Iziral tɩŋŋaa nɛ mʋa dɩ ba yuo laalɩŋ, La TƖƖNA yie leŋ ba yuo diiba nɛ, arɩ ŋɩɩ ʋ fa sɩ ŋmɩɛsa pɩba. Bʋa-la lɛ, ba chaasa hɛ hɛɛŋ tʋɔŋ nɛ woruŋ.

¹⁶ Ŋɩɩ nɛ La TƖƖNA lɩɩsɛ sɩpaalaaraa pɩ Iziral tɩŋŋaa, ba laaba ta laalɩyuoro-la sɩ yuo didiiba nɩsɩŋ lɛ.

¹⁷ Ama Iziral tɩŋŋaa vɩa dɩ ba to sɩpaalaara-la niiŋ, aŋ ha joŋ ba tɩtɩa a hɛ vesiŋ lɛ a kpʋkpaarɛba. Doho deeŋ nɩaa-na fa bɩ ba nyɩmmaba naga, ba nyɩmmaba fa sɩɩ to La TƖƖNA niiŋ wɩaa ŋɩɩ. Ba-na guu vɩa ba kala nɛ.

¹⁸ Bʋa na-kala dɩ La TƖƖNA nɛ lɩɩsɛ sɩpaalaara pɩba, ʋ yie chɩŋ sɩpaa-laarʋ-la harɩŋ nɛ, a lɩɩsɛ Iziral tɩŋŋaa ba dʋndɔŋŋɔɔ nɩsɩŋ lɛ sɩpaa-laarʋ-la mɩɩsɩŋ kala lɛ. Bʋa na-kala dɩ ba dʋndɔŋŋɔɔ nɛ dɔgɩsɛba dɩ ba na hɛɛŋ a yele pʋ, ʋ yie fá ba nenige nɛ a laaba ta.

¹⁹ Ama dɩ sɩpaa-laarʋ-la nɛ sʋba, nɩalɩŋ yie bɩra vɩa La TƖƖNA nɛ aŋ mʋʋ to wombie-la sɩ bɔmɔ kɩɩ wombie-la ba nyɩmmaba fa sɩɩ to, a tuto vesiŋ a kpʋkpaarɛba. Ba vɩa dɩ ba joŋ ba wʋbɔmɔ-la arɩ ba nyu-duo-la a ta nɛ.

²⁰ Ŋɩɩ wɩaa, La TƖƖNA chaasa na baanɩŋ Iziral tɩŋŋaa nyuŋ a bʋl, “A tɩŋ tinteeŋ deeŋ nɩaa sɩ chei nii-la mɩ sɩ hɛ mɩ dɩ ba naabalɩmaba pɛgɛ, a bɩ jegile nɩɩ mɩ teeŋ,

²¹ tinteye-la Josua sɩ bɩ kire aŋ sʋʋ, mɩ bɩra bɩ jaŋ kiriba ta ba sɩpaaŋ.

²² Mɩ jaŋ kɛŋ tinteye-la a magɩsɛ Iziral tɩŋŋaa, a na dɩ ba jaŋ to mɩ wombiiŋ arɩ ba naabalɩmaba sɩ to ŋɩɩ koo ba bɩ jaŋ to.”

²³ La TƖƖNA fa leŋe tinteye-la ka nɛ, ʋ bɩ ba-na joŋo hɛ Josua nɩsɩŋ lɛ ʋ kiriba ta bala.