SƖPAALAARAA 19 - WƖA TENIŊ

Levi tɩɩna arɩ ʋ haal-la ʋ sɩ bile aŋ bɩ jaa

¹ Bʋa-la lɛ Iziral tɩŋŋaa fa sɩ bɩ kuoro kɛnɛ, Levi doho nʋʋ kʋbala fa hɛ gɩrɩŋ tʋɔŋ Efirem tintee-la peelee sɩ yʋga lɛ. Ʋ bil haal kʋbala sɩ lɩɩ Bɛtɩlɛhɛm sɩ hɛ Juda tinteeŋ lɛ, aŋ ha bɩ jaa.

² Ama haal-la fa na baanɩŋ ʋ bala nyuŋ, a leŋu aŋ mɩɩra mʋ ʋ nyɩmma dɩa Bɛtɩlɛhɛm lɛ. Ʋ sɩ hɛ nɩmɛ chɛnsɩŋ banɛsɛ,

³ ʋ bala mʋ dɩ ʋ sʋlʋ dɩ ʋ mɩɩra kɔ. Baal-la sɩɩ mʋ, ʋ pɛ kɛŋ ʋ tɩntɩnna arɩ kakusuŋ balɩa. Ba sɩ mʋa, haal-la kɛŋ baal-la jʋʋ ʋ nyɩmma dɩa. Ʋ nyɩmma sɩ na baal-la, ʋ cheme laaʋ arɩ tʋɔtɔrʋŋ.

⁴ Haal-la nyɩmma sʋlʋ dɩ ʋ hɔŋ ba teeŋ tapʋlaa baŋmɛnɛ. Ŋɩɩ nɛ baal-la hɛ ba teeŋ tapʋlaa batori a didii aŋ nyʋnyʋa.

⁵ Tapʋl nɛsɛ chɛɛŋ, ba sii chʋchʋɔ-fɩɛla, baal-la ŋaa siri dɩ ʋ viiri. Ama tolo-la nyɩmma bʋla pʋ, “Gbɛrɛ dii kɩaa a kɛŋ doluŋ aŋ-na mʋ.”

⁶ Ŋɩɩ nɛ ba balɩa hɔnɔ dii kɩaa aŋ nyʋa. Ba sɩ dii kɩalɩŋ dɛrɛ, tolo-la nyɩmma bɩra bʋl, “Chʋa daha jɩnɩŋ bɩra dɩ la nɩɩ sɩma.”

⁷ Levi doho nɩɩ-la sii dɩ ʋ viiri, ama baal-la ha pɛsɛ a sʋsʋlʋ, ʋ sɛɩ a chʋa nɩmɛ bɩra.

⁸ Tapʋl-nɔŋ chɛɛŋ chʋchʋɔ-fɩɛla, baal-la bɩra ŋaa siri dɩ ʋ viiri. Tolo-la nyɩmma bɩra bʋl, “Gbɛrɛ dii kɩaa aŋ mʋ wɩɩhɛyɛ.” Ŋɩɩ nɛ ba ŋaa kʋdiilee ba dii.

⁹ Baal-la arɩ ʋ haal-la ʋ sɩ bile aŋ bɩ jaa arɩ ʋ tɩntɩnnʋ-la bɩra sɩɩ chɛ dɩ ba mʋ, tolo-la nyɩmma bɩra bʋl, “Má bee na, wɩa ka mʋa dɩ ʋ jʋʋ. Leriŋ jaŋ biri lɛɛlɛ kala. Má chʋa daha dɩ la nɩɩ sɩma, ka dɩ ma chie sii chʋchʋɔ-fɩɛla a mʋ dɩa.”

¹⁰ Ama baal-la bɩra bɩ chɛ dɩ ʋ chʋa lee-la. Ʋ paa ʋ kakusuŋ gbagaa daŋ ʋ kakusuŋ nyuŋ, a kɛŋ ʋ haala arɩ ʋ tɩntɩnna ba to Jebus dɩɩrɩŋ a mʋmʋ (Jebus nɛ ha baa yɩrɛ Jerusalɛm).

¹¹ Ba sɩ mʋ kpagɛ Jebus, dɩ taŋ ka mʋa dɩ ʋ bire. Baal-la tɩntɩnnʋ-la bʋla pɩ ʋ nɩhɩaŋ, “Má leŋ dɩ la chʋa Jebus tɩŋŋaa taŋ deeŋ lɛ.”

¹² Ŋɩɩ nɛ ʋ nɩhɩaŋ bʋl, “Aɩ, la bɩ jaŋ jʋʋ chʋa nɩaa sɩ bɩ Iziral tɩmma ŋaa taŋ lɛ. La jaŋ kiele mʋ taŋ-la ba sɩɩ yɩrɛ Gɩbɩa.”

¹³ Ʋ bɩra bʋl, “Má leŋ dɩ la nɛrɩgɛ mʋ Gɩbɩa koo Rama a chʋa ba dɔŋɔ lɛ.”

¹⁴ Ŋɩɩ nɛ ba mʋmʋ, wɩɩ-muluŋ sɩɩŋ ka jʋʋ dɩ ba yi Gɩbɩa sɩ hɛ Bɛnjamɩŋ doho nɩaa tinteeŋ lɛ.

¹⁵ Ba chɩŋ dɩ ba chʋa Gɩbɩa lɛ. Ba mʋ a hɔŋ lee-la taŋ-la nɩaa kala sɩɩ hilimu. Ama nʋʋkala bɩ ba kaa jʋʋ ʋ dɩa.

¹⁶ Sɩɩ-dɩsa-la ba sɩ hɔŋ ŋɩɩ, dɩ banɩhɩaŋ kʋbala lɩɩ baga a kʋ to ba teeŋ a bɩbal. Baal-la fa lɩɩ Efirem tintee-la peelee sɩ yʋga nɛ. Ama lɛɛlɛ ʋ hɛ Gɩbɩa lɛ nɛ. (Nɩalɩŋ jesiŋ kala fa sɩ hɛ lee-la ŋaa Bɛnjamɩŋ doho nɩaa nɛ.)

¹⁷ Banɩhɩaŋ-la sɩ na Levi doho nɩɩ-la, ʋ jɩŋ arɩ wombii vɛnnʋ nɛ. Ʋ mʋ a pɩɛsɛ, “Nɩɩ nɛ ma lɩɩ, a mʋmʋ nɩɩ?”

¹⁸ Levi doho nɩɩ-la bʋl, “La mʋ Bɛtɩlɛhɛm sɩ hɛ Juda tinteeŋ lɛ nɛ aŋ mɩɩra mʋmʋ dɩa. Lɛɛlɛ laa mʋ tintee-la ba sɩɩ dɛnnɛ La TƖƖNA nɛ. Ŋɩɩ harɩŋ la jaŋ mɩɩra mʋ dɩa. La taŋ hɛ gɩrɩŋ tʋɔŋ dɩ-luŋii nɛ, Efirem tintee-la peelee sɩ yʋga lɛ. Nʋʋkala bɩ la kaa jʋʋ dɩ la chʋa ʋ dɩa lɛ.

¹⁹ La kɛŋ la kakusuŋ kʋdiilee arɩ la tɩtɩa ma kʋdiilee arɩ tɩɩnɛnɛɛ sɩnɩŋ nɛ. La bɩ kʋŋ dɔŋ kala ka chɛ see dɩpɩnɩŋ.”

²⁰ Ŋɩɩ nɛ banɩhɩaŋ-la bʋl, “Má kʋ jʋʋ mɩ dɩa. Mɩ jaŋ pɩma kʋŋkala ma sɩɩ chɛ. Má sɩ́ dɩ-jalɩŋ chʋa.”

²¹ Ŋɩɩ nɛ ʋ kɛmba jʋʋ ʋ dɩa, a ŋaa kʋdiilee pɩ ba kakusuŋ. Ŋɩɩ nɛ ba sɔŋ ba naasɩŋ aŋ dii kɩaa aŋ nyʋa.

²² Ba fa sɩ hɛ dɩa-la lɛ a didii kɩaa arɩ tʋɔtɔrʋŋ ŋɩɩ, taŋ-la nɩbɔŋŋɔɔ dɔnsʋŋ kɔ a golli dɩa-la lɛ ba sɩ hɛ, a ŋmuŋmoo dɩa-la boro, aŋ kpɩa banɩhɩaŋ-la sɩ tɩɩ dɩa-la lɛ a bʋl, “Kɛŋ baal-la sɩ kʋ jʋʋ ŋ dɩa kʋ lɩɩ dɩ la kɛnʋ pɩŋ.”

²³ Ŋɩɩ nɛ banɩhɩaŋ-la lɩɩ bʋla pɩba, “Nandɔmba, má sɩ́ wʋbɔmʋŋ deeŋ sɩ kɛŋ hɩɩsɩŋ ŋaa, baal-la ŋaa mɩ nʋhʋɔrʋ nɛ.

²⁴ Na baal-la haala ʋ sɩ bile aŋ bɩ jaa nɛ ŋ-la, arɩ mɩ tolo ha sɩ bɩ baal kala jɩŋ. Mɩ jaŋ kɛmba kʋ lɩɩ pɩma dɩ ma ŋaa wɩɩ-la kala ma sɩɩ chɛ. Ama má sɩ́ wʋlɩɩla kala ŋaa baala deeŋ-na lɛ.”

²⁵ Ama baala-la bɩ chɛ dɩ ba jegile nɩɩ ʋ teeŋ. Ŋɩɩ nɛ Levi doho nɩɩ-la kɛŋ ʋ haal-la ʋ sɩ bile aŋ bɩ jaa kʋ lɩɩ pɩba. Ba gurugu a pɩnʋ tɩtaŋ-la kala, sɩaa pʋʋraa kɔ ba joŋu ta.

²⁶ Chʋchʋɔ-fɩɛla haal-la sii mʋ dɩa-la lɛ ʋ bala sɩ hɛ, a tele pɩŋ boiŋ niiŋ, leriŋ pʋlla nyɩɩsɛ ʋ lɛ.

²⁷ Ʋ bala-la sii chʋchʋɔŋ a suri boiŋ kʋ lɩɩ dɩ ʋ viiri, dɩ ʋ haala nɛ tele pɩŋ boiŋ niiŋ ŋɩɩ, ʋ nɩsaa kʋ tɩgɛ boiŋ nii-jʋʋlʋŋ tɩtɩa lɛ.

²⁸ Baal-la bʋla pɩ ʋ haala, “Sii dɩ la viiri.” Ama haal-la bɩ wɩɩkala bʋla. Ʋ sʋba nɛ ŋɩɩ. Ŋɩɩ nɛ ʋ joŋu a sagɛ ʋ kakumo lɛ a kɛnʋ mʋ dɩa.

²⁹ Ʋ sɩ mʋ yi dɩa, ʋ joŋ sɩa a kɛŋ ʋ haal-la ʋ sɩ bile aŋ bɩ jaa kʋsʋʋŋ keri nandaasɩŋ fii arɩ balɩa, a kpaa Iziral doho doho-la kala.

³⁰ Nʋʋkala sɩ na haal-la nammɩa, ʋ sɩ, “La ha bɩ wʋdoho deeŋ na Iziral tinteeŋ lɛ aŋ ka, a lɩɩ bʋa-la lɛ Iziral tɩŋŋaa sɩ lɩɩ Ijipiti tinteeŋ a kaa kɔ jɩnɩŋ. Má leŋ la bɩɩna na wɩɩ-la sɩ maga dɩ la ŋaa.”