SƖPAALAARAA 14 - WƖA TENIŊ

Samɩsɩŋ jaa haala

¹ Tapʋlɩɩ kʋbala Samɩsɩŋ sii mʋ taŋ kʋbala baa yɩrɛ Tɩmɩna a na Fɩlɩsɩtɩa tɩŋŋaa tolo kʋbala nɩmɛ.

² Ʋ sɩ mɩɩra kɔ, ʋ bʋla pɩ ʋ nyɩmma arɩ ʋ naaŋ, “Mɩ na Fɩlɩsɩtɩa tɩŋŋaa tolo nɛ Tɩmɩna lɛ, má jaaʋ pɩmɛ.”

³ Ʋ nyɩmma arɩ ʋ naaŋ pɩɛsʋ, “hazɔŋ kala tuo la naambiiriŋ koo la nɩaa kala tʋɔŋ? Nɩaa deemba sɩ bɩ Wɩa ka to tʋɔŋ nɛ maga dɩ ŋ jaa ŋ haalaa?” Ama Samɩsɩŋ bʋla pɩ ʋ nyɩmma, “Jaa pɩmɛ, nɩɩ-la mɩ sɩɩŋ sɩ jʋa nɛ ŋɩɩ.”

⁴ (Ʋ nyɩmma arɩ ʋ naaŋ fa bɩ jɩŋ arɩ La TƖƖNA nɛ leŋe Samɩsɩŋ ŋɩŋaa ŋɩɩ, a chɩchɛ wombiiŋ dɩ ʋ yuo Fɩlɩsɩtɩa tɩŋŋaa, bɛɛ wɩaa bʋa-la lɛ ba nɛ faa beŋ Iziral tɩŋŋaa.)

⁵ Ŋɩɩ nɛ Samɩsɩŋ arɩ ʋ nyɩmma arɩ ʋ naaŋ kala sii mʋ Tɩmɩna. Ba sɩ mʋ yi girep tɩɩsɩŋ baga kʋbala sɩ hɛ Tɩmɩna lɛ, naachigi-bie sii guu tʋɔra kʋkɔ Samɩsɩŋ lɛ.

⁶ La TƖƖNA Dɩma kʋ jʋʋ Samɩsɩŋ a pʋ doluŋ ʋ kɛŋ naachigi-la pʋɔsɛ arɩ nɩsɩŋ, a nagɛ bʋ-bie. Ama ʋ bɩ wɩɩ-la ʋ sɩ ŋaa bʋla pɩ ʋ nyɩmma arɩ ʋ naaŋ.

⁷ Ba sɩ mʋ Tɩmɩna, Samɩsɩŋ kɛŋ tolo-la bʋl wɩaa, ʋ chaasa chou woruŋ.

⁸ Ʋ ŋɩɩ harɩŋ, ʋ sɩ mɩɩra mʋ dɩ ʋ jaa haal-la, ʋ gɛbɛ jʋʋ dɩ ʋ na naachigi-la kʋsʋʋŋ. Ʋ mʋa dɩ tʋʋ-biee kʋ jʋʋ naachigi-sʋʋ-la a saa hɛ nʋʋŋ.

⁹ Ʋ kɛŋ nɩsɩŋ tuu a lɔgɛ tʋʋ-la a vɛŋ aŋ didii. Ʋ sɩ kɔ ʋ nyɩmma arɩ ʋ naaŋ teeŋ, ʋ lɔgɛ tʋʋ-la mʋa pɩba ba dii. Ama ʋ bɩ bʋla pɩ ʋ nyɩmma arɩ ʋ naaŋ arɩ naachigi-sʋʋŋ yaraa lɛ nɛ ʋ lɔgɛ tʋʋ-la.

¹⁰ Ŋɩɩ nɛ ʋ nyɩmma mʋ haal-la dɩa. Samɩsɩŋ leŋ ba ŋaa kʋdiilee ba didii aŋ gbigbieli, arɩ ŋɩɩ ba naabalɩma wombiiŋ sɩ daga dɩ bapʋɔsɛ biisiŋ to a jɩjaa haalaa.

¹¹ Fɩlɩsɩtɩa tɩŋŋaa sɩ na Samɩsɩŋ, ba leŋ bapʋɔsɛ biisiŋ mara arɩ fii mʋ kɛnʋ ba hɔŋ.

¹² Samɩsɩŋ bʋla pɩ bapʋɔsɛ biisi-la, “Mɩ jaŋ magɛ namaga, dɩ ma nɛ wuo dagɛ ʋ bʋbʋɔŋ gbiele deeŋ tapʋlɩa-la balɩpɛ pɛgɛ, mɩ jaŋ pɩma gɛrɩpɛ fʋfʋlʋŋ gɛnnɩŋ mara arɩ fii arɩ gɛrɩ-balaa mara arɩ fii.

¹³ Dɩ ma nɛ bɩ wuo dagɛ namaga-la bʋbʋɔŋ, ma ma jaŋ pɩmɛ gɛrɩpɛ fʋfʋlʋŋ gɛnnɩŋ mara arɩ fii arɩ gɛrɩ-balaa mara arɩ fii.” Ba bʋl, “Magɛ ŋ namaga-la dɩ la nɩɩ.”

¹⁴ Samɩsɩŋ bʋl, “Kʋdiire niiŋ lɛ nɛ kʋdiilee lɩɩ, kʋduoŋ lɛ nɛ kʋsɩmɩŋ lɩɩ.” Tapʋlaa batori ba bɩ wuo dagɛ namaga-la bʋbʋɔŋ.

¹⁵ Tapʋl nɛsɛ chɛɛŋ, bapʋɔsɛ biisi-la bʋla pɩ Samɩsɩŋ haala, “Nyɩsɛ ŋ bala dɩ ʋ dagɛ namaga-la bʋbʋɔŋ a pɩla, dɩ ŋɩɩ dee, la jaŋ nyɩgɛ ŋ dɩ ŋ nyɩmma dɩa nɩaa kala dɩ ma sʋʋ. Ma yɩrɛla kaa kɔ daha dɩ ma laa la kɩaa nɛɛ?”

¹⁶ Ŋɩɩ nɛ Samɩsɩŋ haala joŋ ʋ tɩtɩa kala a tele nyagɛ Samɩsɩŋ, aŋ yiyel, aŋ bʋl, “Ŋ bɛrɛmɛ nɛ! Ŋ bɩ chaasa chomi. Ŋ magɛ namaga a pɩ mɩ nɩaa nɛ, aŋ bɩ namaga-la bʋbʋɔŋ daga pɩmɛ.” Samɩsɩŋ bʋl, “Mɩ paala bɩ namaga-la bʋbʋɔŋ daga pɩ mɩ nyɩmma koo mɩ naaŋ, bɛɛ nɛ saa tɩɩ mɩ jaŋ dagɛ ʋ bʋbʋɔŋ pɩ ŋ-na?”

¹⁷ Haal-la yel ŋɩɩ nɛ gbiele-la tapʋlaa balɩpɛ-la kala. Tapʋl-pɛɩ chɛɛŋ nɛ Samɩsɩŋ dagɛ namaga-la bʋbʋɔŋ a pʋ, bɛɛ wɩaa haal-la vɛnɛɛ pɛsɛ ʋ lɛ nɛ. Ʋ sɩ daga pʋ ŋɩɩ, haal-la ma mʋ dagɛ namaga-la bʋbʋɔŋ a pɩ ʋ nɩaa.

¹⁸ Ka dɩ wɩɩ-muluŋ-na tuu jʋʋ tapʋl-pɛɩ-la chɛɛŋ, ba-pʋɔsa-la sii mʋ pɩɛsɛ Samɩsɩŋ, “Bɛɛ kʋŋ nɛ sɩma a kɩɩ tʋʋŋ? Bɛɛ kʋŋ nɛ dolie a kɩɩ naachigiŋ?” Samɩsɩŋ bʋla pɩba, “Dɩ ma nɛ fa bɩ mɩ haala lɛ to, ma fa bɩ jaŋ wuo dagɛ mɩ namaga-la bʋbʋɔŋ.”

¹⁹ Ŋɩɩ nɛ La TƖƖNA Dɩma kʋ jʋʋ Samɩsɩŋ a pʋ doluŋ. Ʋ sii tuu taŋ-la ba sɩɩ yɩrɛ Asɩkɛlɔŋ, a kpʋ ba baalaa mara arɩ fii, a wuri ba kɩaa a joŋ ba gɛnnɩŋ pɩ nɩalɩŋ sɩ dagɛ namaga-la bʋbʋɔŋ. Ka ʋ baanɩŋ chaasa sii woruŋ wɩɩ-la wɩaa, ʋ mɩɩra mʋ ʋ nyɩmma dɩa.

²⁰ Samɩsɩŋ hɩɩlɩ-baala mɩɩra joŋ haal-la pɩ baal-la sɩ ŋaa Samɩsɩŋ nandɔŋɔ hajaarɩ gbiele-la lɛ.