SƖPAALAARAA 10 - WƖA TENIŊ

Iziral tɩŋŋaa sɩpaalaara Tola

¹ Abɩmɛlɛk sʋʋŋ harɩŋ, Pʋa nanʋala Tola sɩ ŋaa Dodo nihiŋ ma nɛ bɩra laa Iziral tɩŋŋaa ta. Ʋ fa ŋaa Ɩsaka doho nʋʋ nɛ, aŋ hɛ taŋ-la ba sɩɩ yɩrɛ Samɩɩ sɩ hɛ Efirem tintee-la peelee sɩ yʋga lɛ.

² Ʋ fa laa Iziral tɩŋŋaa sɩpaaŋ jɩsɩŋ mara arɩ batori nɛ aŋ sʋʋ. Ba hugu Samɩɩ lɛ.

Iziral tɩŋŋaa sɩpaalaara Jaa

³ Gɩlɩad tɩŋŋaa Jaa ma nɛ bɩra tɩgɛ ʋ lɛ. Ʋ ma laa Iziral tɩŋŋaa sɩpaaŋ jɩsɩŋ mara arɩ balɩa nɛ.

⁴ Ʋ fa kɛŋ hambolibiisiŋ mara arɩ fii nɛ. Ba jɩjɩl kakusuŋ mara arɩ fii. Gɩlɩad tinteeŋ lɛ ba faa beŋ tasɩŋ mara arɩ fii nɛ. Baa yɩrɛ tasɩ-la Hawof Jaa nɛ, arɩ jɩnɩŋ kala. (Hawof Jaa bʋbʋɔŋ nɛ Jaa tabiisiŋ.)

⁵ Jaa sɩ sʋba, ba hugu taŋ-la ba sɩɩ yɩrɛ Kamɔŋ lɛ nɛ.

Amɔŋ tɩŋŋaa dɔgɩsɛ Iziral tɩŋŋaa

⁶ Iziral tɩŋŋaa bɩra ŋaa wʋbɔŋ La TƖƖNA teeŋ. Baa to vesi-la ba sɩɩ yɩrɛ Baal, Asɩtɔrɛf arɩ Aram tɩŋŋaa vesiŋ, Sɩdɔŋ tɩŋŋaa vesiŋ, Mʋab tɩŋŋaa vesiŋ, Amɔŋ tɩŋŋaa vesiŋ arɩ Fɩlɩsɩtɩa tɩŋŋaa vesiŋ. A tɩŋ Iziral tɩŋŋaa sɩ vɩa La TƖƖNA, a bɩra bɩ ʋ ka to wɩaa,

⁷ ʋ na baanɩŋ ba nyuŋ, a jomba hɛ Fɩlɩsɩtɩa tɩŋŋaa arɩ Amɔŋ tɩŋŋaa nɩsɩŋ lɛ.

⁸ Jɩsɩŋ fii arɩ chori, ba dɔgɩsɛ Iziral tɩmma-la kala sɩ hɛ Jɔdaŋ fuo-la wɩɩpɔsʋŋ dɩɩrɩŋ Gɩlɩad tinteeŋ lɛ. Gɩlɩad fa ŋaa Amɔrɩ tɩŋŋaa tinteeŋ nɛ.

⁹ Amɔŋ tɩŋŋaa ma chol Jɔdaŋ fuo-la dɩ ba yuo Juda, Bɛnjamɩŋ arɩ Efirem doho nɩaa, hɛɛŋ chaasa jʋʋ Iziral tɩŋŋaa kala.

¹⁰ Ŋɩɩ nɛ Iziral tɩŋŋaa ŋmoo niiŋ a pɩ La TƖƖNA, a bʋl, “La ŋaa wʋbɔŋ nɛ ŋ teeŋ, la sɩ vɩa la Wɩa aŋ tuto vesi-la ba sɩɩ yɩrɛ Baal.”

¹¹ La TƖƖNA bʋl, “Bʋa-la lɛ Ijipiti tɩŋŋaa, Amɔrɩ tɩŋŋaa, Amɔŋ tɩŋŋaa, Fɩlɩsɩtɩa tɩŋŋaa,

¹² Sɩdɔŋ tɩŋŋaa, Amalɛk tɩŋŋaa arɩ Mʋab tɩŋŋaa sɩɩ dɔgɩsɛma, ma ŋmoo niiŋ pɩmɛ dɩ mɩ pɛ ma lɛ, mɩ bɩ ma laa ta ba nɩsɩŋ lɛɛ?

¹³ Ama ma vɩamɛ nɛ aŋ mɩɩra tuto vesiŋ, ŋɩɩ wɩaa mɩ bɩra bɩ jaŋ laama ta.

¹⁴ Má mʋ ŋmoo niiŋ a pɩ vesi-la ma sɩɩ to. Má leŋ dɩ ba laama ta, dɩ wɩaa nɛ jʋʋma.”

¹⁵ Iziral tɩmma-la bʋla pɩ La TƖƖNA, “La ŋaa wʋbɔŋ nɛ. Wɩɩ-la kala ŋ sɩɩ chɛ, ŋaa la lɛ, ama lɛɛlɛ laa sʋlʋŋ laala ta.”

¹⁶ Ŋɩɩ nɛ ba joŋ vesi-la sɩ hɛ ba teeŋ ta, aŋ tuto La TƖƖNA. Ʋ chaasa fá ba nenige. Ʋ bɩra bɩ leŋe ba na hɛɛŋ.

¹⁷ Amɔŋ tɩŋŋaa sɩ yɩrɛ ba laalɩyuoroo kʋ ŋmoo buguŋ Gɩlɩad tinteeŋ lɛ, Iziral laalɩyuoroo ma kala kʋ hɛ dɔŋɔ lɛ a ŋmoo buguŋ taŋ-la ba sɩɩ yɩrɛ Mɩzɩpa lɛ.

¹⁸ Gɩlɩad tɩŋŋaa sɩpaalaaraa bʋla pɩ dɔŋɔ, “Nɩɩ-la kala sɩ wuo laa sɩpaaŋ la yuo Amɔŋ tɩŋŋaa, tɩɩna nɛ jaŋ ŋaa nɩalɩŋ kala sɩ hɔŋ Gɩlɩad lɛ nɩhɩaŋ.”