RUF 1 - WƖA TENIŊ

Nawomi arɩ Ruf

¹ Bʋa-la lɛ kuoroo fa sɩ tuo Iziral tinteeŋ lɛ ka bawajɩaba bibemba, losu-kʋbala nɛ fa jʋa. Ŋɩɩ nɛ baal kʋbala sɩ ŋaa Bɛtɩlɛhɛm tɩɩna a lɩɩ Juda tinteeŋ, ʋ dɩ ʋ haala arɩ ʋ hambolibiisiŋ balɩa sii mʋ dɩ ba hɔŋ Mʋab tinteeŋ lɛ mʋa.

² Baal-la yɩrɩŋ nɛ Ɛlɩmɛlɛk, ʋ haala ma yɩrɩŋ nɛ Nawomi. Ʋ hambolibiisi-la ma yɩraa nɛ Malɔŋ arɩ Kilioŋ. Ba kala ŋaa Ɛfɩraf tɩŋŋaa nɛ a lɩɩ Bɛtɩlɛhɛm sɩ hɛ Juda tinteeŋ. Ŋɩɩ nɛ ba mʋ hɔŋ Mʋab tinteeŋ lɛ.

³ Ŋɩɩ nɛ Ɛlɩmɛlɛk sʋʋ, aŋ ka Nawomi arɩ ʋ hambolibiisi-la balɩa.

⁴ Ʋ hambolibiisi-la jaa Mʋab tɩŋŋaa toloo. Tolie-la dɔŋɔ yɩrɩŋ nɛ Opa, dɔŋɔ ma yɩrɩŋ nɛ Ruf. Ŋɩɩ nɛ ba hɛ nɩmɛ ŋɩɩ a mʋ yi jɩsɩŋ fii,

⁵ Malɔŋ arɩ Kilioŋ ma sʋʋ, aŋ ka Nawomi dʋndʋŋa. Ʋ bɩ bala kɛnɛ, ʋ bɩ bii ma kɛnɛ.

⁶ Nawomi sɩ hɛ Mʋab lɛ aŋ nɩɩ arɩ La TƖƖNA pɛ ʋ nɩaa lɛ nɛ ba na kʋdiilee, ʋ dɩ ʋ bii-haalaa kɛŋ ba tɩtɩa hɛ dɔŋɔ dɩ ba mɩɩra mʋ ʋ jaŋ.

⁷ Ŋɩɩ nɛ ʋ dɩ ʋ bii-haalaa kala sii lee-la ba fa sɩ hɔnɔ, a lɩɩ joŋ wombiiŋ dɩ ba mɩɩra mʋ Juda tinteeŋ.

⁸ Ŋɩɩ nɛ Nawomi bʋla pɩ ʋ bii-haala-la balɩa, “Má mɩɩra mʋ ma naamba teeŋ, La TƖƖNA jaŋ kɛmma woruŋ arɩ ma sɩ kɛmmɛ arɩ nɩalɩŋ sɩ sʋba woruŋ ŋɩɩ.

⁹ La TƖƖNA jaŋ pɛ ma lɛ dɩ ma na balaba a jaa, a hɔŋ arɩ yarɩfɩɛlaa.” Ŋɩɩ harɩŋ, ʋ guoriba a taba dɩ ba viiri, ba faasa yel a bʋl,

¹⁰ “La jaŋ to ŋ harɩŋ a mʋ ŋ nɩaa teeŋ.”

¹¹ Ŋɩɩ nɛ Nawomi bʋla pɩba, “Mɩ toloo, má mɩɩra mʋ ma jaŋ. Bɛɛ nɛ tɩɩ maa chɛ dɩ ma to mɩ harɩŋ mʋ? Ma bɩɩna mɩ jaŋ bɩra wuo lʋl hambolibiisiŋ pɩma dɩ ma jaa?

¹² Mɩ toloo, má mɩɩra mʋ ma jaŋ, mɩ hɩɛsa nɛ arɩ mɩ sɩ jaŋ bɩra jaa bala a lʋl biiriŋ. Dɩ mɩ nɛ paala jaa bala tɩtaŋɩŋ deeŋ a lʋl hambolibiisiŋ ma,

¹³ ma jaŋ wuo gbɛrɛ dɩ ba waa? Ma jaŋ tɩŋ ba wɩaa a sɩ́ balaba jaa? Mɩ toloo, aɩ, ŋɩɩ bɩ jaŋ ŋaa. Wɩɩ-la wɩɩmɛ a kɩkɩɩma, bɛɛ wɩaa La TƖƖNA vɩamɛ nɛ.”

¹⁴ Nawomi sɩ bʋl wɩɩŋ deeŋ, ba bɩra yel, ŋɩɩ nɛ Opa-na guori ʋ bala naaŋ a taʋ aŋ mɩɩra mʋ dɩa, ka Ruf-na vɩa aŋ mɛrɛ ʋ lɛ.

¹⁵ Ŋɩɩ nɛ Nawomi bɩra bʋla pɩ Ruf, “Bee na, ŋ tol-dɔŋɔ mɩɩra nɛ a mʋ ʋ nɩaa arɩ ʋ vesiŋ teeŋ, ŋ ma mɩɩrɛ dɩ ma mʋ.”

¹⁶ Ama Ruf ma sɩ, “Sɩ́ mɩ kiru ŋ harɩŋ. Lee-la kala ŋ sɩɩ mʋ, mɩ ma jaŋ mʋ, lee-la kala ŋ sɩ jaŋ hɛ, mɩ ma jaŋ hɛ nɩmɛ. Ŋ nɩaa jaŋ ŋaa mɩ nɩaa, dɩ ŋ Wɩa ma ŋaa mɩ Wɩa.

¹⁷ Lee-la ŋ sɩ jaŋ sʋʋ, nɩmɛ nɛ mɩ ma jaŋ sʋʋ dɩ ba hugimi nɩmɛ. A leŋ dɩ La TƖƖNA dɔgɩsɛmɛ dɩ mɩ nɛ mɩɩrɛ ŋ harɩŋ, see sʋʋŋ nɛ jaŋ kɛnla pɔrɛ.”

¹⁸ Nawomi sɩ na dɩ Ruf chaasa kɛŋ ʋ tɩtɩa hɛ dɔŋɔ nɛ dɩ ʋ to ʋ harɩŋ, ʋ leŋu ʋ bɩra bɩ ʋ kire.

¹⁹ Ŋɩɩ nɛ ba to dɔŋɔ a mʋ Bɛtɩlɛhɛm. Ba sɩ mʋ yi nɩmɛ, taŋ-la nɩaa hihirigi, haalaa ŋaa goŋ a pɩpɩɛsɛ, “Nawomi nɛ ŋ-la?”

²⁰ Nawomi bʋla pɩba, “Má bɩra sɩ́ mɩ Nawomi yɩrʋ, ma yɩyɩrɛmɛ Mara, bɛɛ wɩaa La TƖƖNA doluŋ kala Tɩɩna leŋe mɩ na hɛɛŋ nɛ woruŋ.” (Nawomi bʋbʋɔŋ nɛ kʋzɔmʋŋ, Mara ma bʋbʋɔŋ nɛ kʋhaaŋ.)

²¹ Mɩɩ lɩɩ daha dɩ mɩ nɩsɩŋ kala suo nɛ, aŋ ka La TƖƖNA mɩɩra kɛmmɛ kɔ arɩ na-hɩllɩŋ. Bɛɛ nɛ saa tɩɩ ma ha jaŋ yɩyɩrɛmɛ Nawomi? La TƖƖNA doluŋ kala Tɩɩna joŋ wʋwalɩmaa a hɛ mɩ lɛ nɛ.

²² Nawomi arɩ ʋ bii-haala Ruf lɩɩ Mʋab tinteeŋ a kɔ Bɛtɩlɛhɛm dɩ ba mɩɩ-bumbumba kʋmʋŋ yie yi.