Jɔɔŋ Wʋnaalaa 9 - WƖA TENIŊ

¹ Ŋɩɩ nɛ Wɩa tɩndaarɩ-nɔŋ-la ma ŋmʋʋ ʋ nyile. Ʋ sɩ ŋmʋʋ ŋɩɩ, mɩ na chɛnwʋlʋŋ dɩ ʋ lɩɩ wɩa-nyuŋ a kʋ tuu tel tinteeŋ. Ba joŋ buotuo luŋuŋ boribiiŋ pʋ.

² Ŋɩɩ nɛ ʋ suri buotuo-luŋii-la boro, nyʋɔsʋŋ lɩɩ buotuo-luŋii-la tʋɔŋ a nagɛ nyiŋ-balɩŋ nyʋɔsʋŋ, a tɔ pʋlʋmʋŋ arɩ wɩɩpɔsʋŋ kala ba biri.

³ Ŋɩɩ nɛ hɔbɔ to nyʋɔsʋ-la tʋɔŋ a kʋ tuu tinteeŋ. Wɩa pɩba doluŋ ba kɛŋ huoŋ a nagɛ nʋɔmaa.

⁴ Wɩa bʋla pɩba dɩ ba sɩ́ yaŋ dii koo tɩɩsɩŋ koo kɩalɩŋ sɩ nyʋ tinteeŋ lɛ, ama dɩ ba dɔgɩsɛ nɩalɩŋ sɩ́ bɩ Wɩa magɩlɩŋ kɛnɛ ba tilliŋ lɛ.

⁵ Wɩa bɩ hɔbɔ-la wombiiŋ pa dɩ ba kpʋ nɩaa deemba, ama dɩ ba dɔgɩsɛba chɛnsɩŋ banɔŋ. Ŋɩɩ nɛ ba dɔgɩsɛba a nagɛ nʋɔmʋŋ sɩ yie dɩŋ nɩa ʋ wʋwɩɩ ŋɩɩ.

⁶ Bʋa-la lɛ nɩaa jaŋ chɩchɛ dɩ ba sʋʋ, ama ba bɩ wuo sʋʋ.

⁷ Hɔbɔ-la fa nagɛ janɩŋ nɛ ba sɩ kpɩɛra dɩ ba kaa mʋ laalɩŋ. Ba chu kɩaa sɩ nagɛ sɛlɩmɛ nyunchuuluŋ nɛ. Ba sɩaa ma nagɛ nuhuobiinee sɩaa.

⁸ Ba kɛŋ nyu-pʋnaa ma nɛ. Ba duomo a nagɛ haala nyu-pʋnaa. Ba nyɩlaa ma nagɛ naachigee nyɩlaa.

⁹ Ba yaraa horuŋ nagɛ hɔɔŋ ba sɩ yie joŋo tɔ bɔyɛ a kaa yuo laalɩŋ nɛ. Ba kɩŋkɛnsɩŋ ma ŋɩŋaa goŋ, a nagɛ janɩŋ sɩ yʋga a lɛrɛ torukoba a fá mʋmʋ laalɩŋ.

¹⁰ Ba fa kɛŋ bʋbʋɔ-dosuŋ nɛ arɩ fɩllɩŋ a nagɛ nʋɔmʋŋ kɩaa. Dol-la kala ba fa sɩ kɛnɛ dɩ ba kaa dɔgɩsɛ nɩaa chɛnsɩŋ banɔŋ-la kala fa hɛ ba bʋbʋɔ-dosu-la lɛ nɛ.

¹¹ Wɩa tɩndaarʋ-la fa sɩ kori buotuo-luŋii-la boribiiŋ nɛ fa ŋaa ba kuoro. Juu tɩŋŋaa yikoro lɛ baa yɩrʋ Abadɔŋ nɛ. Giriik tɩŋŋaa ma yikoro lɛ baa yɩrʋ Apɔlɩyɔŋ nɛ.

¹² Bumbuŋ hɛɛ-la ba sɩ jaŋ na nɛ ŋɩɩ. Ama kɩaa balɩa nɛ ha ka.

¹³ Ŋɩɩ nɛ Wɩa tɩndaarɩ-dʋ-la ŋmʋʋ ʋ nyile. Ʋ sɩ ŋmʋʋ ŋɩɩ, mɩ nɩɩ nʋʋ yikoro dɩ ʋ lɩɩ sɛlɩmɛ koru-la sɩ chɩŋ Wɩa sɩpaaŋ gʋnaa banɛsɛ lɛ.

¹⁴ Ŋɩɩ nɛ yikoro-la bʋla pɩ Wɩa tɩndaarɩ-dʋ-la sɩ kori nyile-la, “Puri Wɩa tɩndaaraa banɛsɛ-la ba sɩ vɔbɔ Yufireti fuo-la lɛ a ta.”

¹⁵ Ŋɩɩ nɛ ba puri Wɩa tɩndaara-la. Wɩa fa vɔbɔ a bil a gbɛrɛ tapʋlɩɩ-la arɩ chɛnɛ-la arɩ jɩna-la ʋ fa sɩɩ chɛ ʋ kpʋ dʋnɩa nɩaa, ba sɩ kaa kpaa butori sɛmɛ dɔŋɔ nɛ.

¹⁶ Ŋɩɩ nɛ ba dagɛ laalɩyuoro-la sɩ jɩl janɩŋ niiŋ pɩmɛ. Ba fa ŋaa bʋɩ bʋɩ bʋɩba zɔɔ-balɩa nɛ.

¹⁷ Mɩ sɩ na laalɩyuoro-la sɩ jɩl ba janɩŋ mɩ duosoo tʋɔŋ, ŋ-la nɛ ba nagɛ: Ba bɔɩ-tɔɔrɩ gɛnnɩŋ ba sɩ yie joŋo tɔ bɔɩsɩŋ a kaa yuo laalɩŋ, ba dɔnsʋŋ faasa fɩɛsɛ nɛ, dɔnsʋŋ nagɛ diibelimbine pʋnaa, dɔnsʋŋ ma nagɛ jiribiiŋ. Janɩ-la nyusuŋ nagɛ naachigee nyusuŋ, ka nyiniŋ arɩ nyʋɔsʋŋ arɩ jiribiiŋ lɩlɩɩ ba niiriŋ lɛ.

¹⁸ Kɩaa deemba batori nɛ Wɩa leŋ ba kʋ kpʋ dʋnɩa nɩaa, dɩ ŋ nɛ kaa kpaa butori sɛmɛ dɔŋɔ: Nyiniŋ, nyʋɔsʋŋ arɩ jiribiiŋ-la sɩɩ lɩɩ janɩ-la niiriŋ lɛ.

¹⁹ Janɩ-la doluŋ kala fa hɛ ba niiriŋ arɩ ba bʋbʋɔ-dosuŋ lɛ nɛ. Ba bʋbʋɔ-dosu-la nagɛ dɩŋŋaa nɛ a kɛŋ nyusuŋ, ba kaa pɩpɩrɛ nɩaa.

²⁰ Dʋnɩa nɩkaana-la nyanyal bɔŋŋɔɔ deemba sɩ bɩ kpʋa, ba ma ha bɩ bɩrɩma lɩɩ ba wʋbɔŋŋɔɔ ŋaanɩŋ lɛ. Ba haa to Sɩtaanɩ nɛ a kpʋkpaarɛ vʋɩyaa. Sɛlɩmɛ arɩ hɔɔŋ arɩ kɔlɩɩŋ nɛ ba kaa mɛ vʋɩya-la dɔnsʋŋ, dɔnsʋŋ ma ŋaa tabɩaa, dɔnsʋŋ ma ŋaa tɩɩsɩŋ. Vʋɩya-la bɩ na, ba bɩ wɩaa maa nɩɩ, ba bɩra bɩ wuo vɩvɛŋ ma.

²¹ Nɩaa deemba fa bɩ bɩrɩma lɩɩ nɩaa kpʋnʋŋ lɛ, ba hɩl wɩaa lɛ, ba wʋlɩɩlɩŋ arɩ ba gaarɩŋ lɛ.