Jɔɔŋ Wʋnaalaa 6 - WƖA TENIŊ

Pie-bie-la kɛŋ kelli-la ba sɩ kaa mɛrɛ teŋ-la lɛrɛ

¹ Ŋɩɩ nɛ mɩ na dɩ Pie-bie-la kɛŋ kelli-la ba fa sɩ kaa mɛrɛ teŋ-la dɔŋɔ lɛrɛ. Ŋɩɩ nɛ mɩ nɩɩ kɩalɩŋ sɩ weye banɛsɛ-la dɔŋɔ dɩ ʋ faasa yɩrɛ. Ʋ yikoro nagɛ duonuŋ sɩɩ kpɩa a bʋl, “Kɔ.”

² Ŋɩɩ nɛ mɩ bee na ja-pʋla dɩ nʋʋ hɔŋ ʋ nyuŋ a kori toŋ. Ba joŋ kuori-nyunchuul-la pʋ. Ʋ jɩl jɔɔ-la lɩɩ a yuo laalɩŋ dii lee-kala.

³ Ŋɩɩ nɛ Pie-bie-la bɩra kɛŋ kelli-la ba sɩ kaa mɛrɛ teŋ-la kʋlɩamɩŋ kaa lɛrɛ. Ŋɩɩ nɛ mɩ bɩra nɩɩ dɩ kɩalɩŋ banɛsɛ-la sɩ weye lɩamɩŋ tɩɩna bɩra yɩrɛmɛ a bʋl, “Kɔ.”

⁴ Ŋɩɩ nɛ mɩ bee a na jaaba dɔŋɔ dɩ ʋ kʋ lɩɩ. Jɔɔ-la ŋaa ja-fɩaŋ nɛ a faasa fɩɛsɛ, ka nʋʋ hɔŋ ʋ nyuŋ. Ŋɩɩ nɛ ba pɩ tɩɩna wombiiŋ dɩ ʋ kɛŋ yuosuŋ kaa kɔ dʋnɩa, dɩ nɩaa yuyuo dɔŋɔ a kpʋkpʋ dɔŋɔ. Ba joŋ tokobii-bal nɛ a hɛ ʋ nɩsɩŋ lɛ.

⁵ Pie-bie-la bɩra kɛŋ kelli-la ba sɩ kaa mɛrɛ teŋ-la ku-torimuŋ kaa lɛrɛ. Ŋɩɩ nɛ kɩalɩŋ sɩ weye, tori tɩɩna yɩrɛmɛ a bʋl, “Kɔ.” Ŋɩɩ nɛ mɩ na ja-bine dɩ nʋʋ hɔŋ ʋ nyuŋ a kori kʋmagɩsɩrɩ kʋa ʋ nɩsɩŋ lɛ.

⁶ Ŋɩɩ nɛ mɩ nɩɩ yikoro sɩ nagɛ nʋʋ yikoro. Yikoro-la lɩɩ kɩalɩŋ banɛsɛ-la sɩ weye tʋɔŋ nɛ. Ŋɩɩ nɛ tɩɩna bʋl, “Ba jaŋ yallɛ folii-mɩaa gbaŋa kʋbala, a yi chɛ-bala tɩntɩnna sɩ yie laa ʋ time magɛ ŋɩɩ, ka dɩ mɩaa gbansɩŋ batori ma yi chɛ-bala tɩntɩnna time. Ama sɩ́ olif tɩɩsɩŋ arɩ girep tɩɩsɩŋ chei.”

⁷ Ŋɩɩ nɛ Pie-bie-la bɩra kɛŋ kelli-la ba sɩ kaa mɛrɛ teŋ-la nɛsɩmɩŋ tɩɩna kaa lɛrɛ. Kɩalɩŋ banɛsɛ-la sɩ weye nɛsɩmɩŋ tɩɩna yɩrɛmɛ a bʋl, “Kɔ.”

⁸ Ŋɩɩ nɛ mɩ beŋ a na jaaba dɩ nʋʋ hɔŋ ʋ nyuŋ. Jɔɔ-la fa ŋaa kʋbʋgʋ nɛ. Nɩɩ-la sɩ hɔŋ ʋ nyuŋ yɩrɩŋ nɛ sʋʋŋ, ka lɛlɛɛ-jaŋ tuto ʋ harɩŋ. Ŋɩɩ nɛ Wɩa pɩba doluŋ dɩ ba kpʋ nuhuobiinee kala sɩ hɛ dʋnɩa sɛsɩ-la banɛsɛ dɔŋɔ. Ba jaŋ kɛŋ tokobii-la a kpʋ dɔnsʋŋ, dɩ losuŋ ma kpʋ dɔnsʋŋ, ka dɩ nyanyalaa arɩ baga kɩaa ma kpʋ dɔnsʋŋ.

⁹ Pie-bie-la sɩ kɛŋ kelli-la ba sɩ kaa mɛrɛ teŋ-la nɔŋ tɩɩna kaa lɛrɛ, ŋɩɩ nɛ mɩ bee na nɩalɩŋ ba sɩ kpʋa dɩnsɩŋ dɩ ba hɛ Wɩɩsʋllɩ koruŋ bʋbʋɔŋ. Nɩalɩŋ ba sɩ kpʋa faa bʋl Wɩa wɩaa nɛ a fa ŋaa La Tɩɩna Kirisito pɛ-naaraa ma, ŋɩɩ nɛ tɩɩ ba kpʋba.

¹⁰ Ŋɩɩ nɛ ba ŋmoo niiŋ vɩl vɩl aa bʋl, “La Tɩɩna Wɩɩjarɩbakɔ, ŋ ŋaa wʋtɩtɩɩ Tɩɩna nɛ a bɩ disiniŋ kɛnɛ, bʋa bɛɛ lɛ nɛ ŋ jaŋ dii dʋnɩa nɩaa sarɩya, aŋ dɔgɩsɛ nɩalɩŋ sɩ kpʋla?”

¹¹ Ŋɩɩ nɛ Wɩa joŋ gɛrɩ-pʋl-duduoŋ a pɩ ba kʋŋkala aŋ bʋla pɩba dɩ ba gbɛrɛ a wiesi mʋapɩlɩɩ, see dɩ ba kpʋ ba tɩntɩnnɩ dɔnsʋŋ arɩ ba naambiiri-la dɔnsʋŋ a magɛ ŋɩɩ ʋ sɩɩ chɛ.

¹² Pie-bie-la sɩ kɛŋ kelli-la ba sɩ kaa mɛrɛ teŋ-la dʋmʋŋ tɩɩna kaa lɛrɛ, mɩ bee na dɩ tinteeŋ faasa zigili. Ŋɩɩ nɛ wɩɩpɔsʋŋ kala biri lim a nagɛ chɛŋ-birimiŋ, chɛŋ-pʋla ma fɩɛsɛ a nagɛ chalɩŋ.

¹³ Ka chɛnwʋlaa lɩɩ wɩa-nyuŋ a kʋ tuu tinteeŋ, a nagɛ pel-duoŋ sɩ luo a ŋaa tutogi-nambil-huoruŋ yuori ŋɩɩ.

¹⁴ Ŋɩɩ nɛ wɩa-nyuŋ kala chuolo kʋ hɛ dɔŋɔ a nagɛ ba sɩ chuoli bɔsɔ ŋɩɩ. Peel-na kala arɩ lee-na kala lɩɩŋ sɩ gollo chu, ba kala sii ba leree.

¹⁵ Ŋɩɩ nɛ dʋnɩa kuoroo, arɩ nɩbalaa, arɩ laalɩyuori-hɩasɩŋ, arɩ nɩalɩŋ sɩ kɛŋ kɩaa, arɩ nɩalɩŋ sɩ kɛŋ doluŋ, arɩ nʋʋkala, yosuŋ arɩ nɩalɩŋ kala sɩ tɩɩ ba tɩtɩa, ba kala fá jʋʋ faa bʋ-bʋɔsʋŋ arɩ peel-pɛgɩsɩŋ lɛ.

¹⁶ Ŋɩɩ nɛ ba yɩyɩrɛ peele-la arɩ bʋsʋ-la a bʋl, “Má tele tɔla dɩ Pie-bie-la arɩ Nɩɩ-la sɩ hɔŋ kuoru kpasa-la nyuŋ sɩ́ la na, dɩ baaŋ-la Pie-bie-la sɩ na la nyuŋ sɩ́ la yi.

¹⁷ Tapʋlɩɩ-la Wɩa arɩ Pie-bie-la sɩ jaŋ na baanɩŋ dʋnɩa nɩaa nyuŋ yie nɛ. Kʋbɛɛ nɛ saa jaŋ wuo chɩŋ ba sɩpaaŋ?”