Jɔɔŋ Wʋnaalaa 22 - WƖA TENIŊ

¹ Ŋɩɩ nɛ Wɩa tɩndaarʋ-la bɩra dagɛmɛ fuo-la lɩɩŋ sɩɩ pɩ nɩaa mɩɩsɩŋ. Lɩɩ-la kala pʋlla nɛ chɩl chɩl a nagɛ beenantɩrɛ. Lɩɩ-la pɛllɛ lɩɩ Wɩa arɩ Pie-bie-la kuoru kpasa-la teeŋ nɛ,

² a pɛllɛ to tabal-la womporuŋ tʋtʋɔbaanɩŋ, ka tɩa-la sɩɩ pɩ nɩaa mɩɩsɩŋ chɩŋ fuo-la cholluŋ balɩa-la kala lɛ. Tɩa-la yie nɛŋ nɛŋ-dosunuŋ naansɩɩŋ fii arɩ balɩa jɩna kala. Chɛnɛ kala ʋ yie nɛŋ bala. Tɩa-la pɩpaarɩŋ nɛ tinteyee nɩaa kaa vɩvaarɛ ba tɩtɩa.

³ Kʋŋ na-kala lɛ Wɩa sɩ ŋmɩɛsa hɛ bɩ jaŋ hɛ tabal-la tʋɔŋ. Wɩa kuoru kpasa arɩ Pie-bie-la kpasa jaŋ hɛ lee-la, ka ʋ tɩntɩnnaa chʋɔlʋ.

⁴ Ba jaŋ na ʋ sɩaa, ka ʋ yɩrɩŋ hɛ ba tilliŋ lɛ.

⁵ Taŋ bɩ jaŋ biri nɩmɛ. Ba bɩ chaanɩŋ koo wɩɩpɔsʋŋ pʋlʋmʋŋ chɛ nɩmɛ. La Tɩɩna Wɩa nɛ jaŋ ŋaa ba pʋlʋmʋŋ. Ba nɛ jaŋ beŋ dʋnɩa a kaa mʋ wuu.

Yesu sɩ dɩ ʋ jaŋ kɔ lɛɛlɛ

⁶ Ŋɩɩ nɛ Wɩa tɩndaarʋ-la bɩra bʋla pɩmɛ, “Wɩaa deemba ŋaa wʋtɩtɩɩba nɛ a magɛ dɩ nɩaa laaba dii. La Tɩɩna Wɩa, Nɩɩ-la sɩ joŋ ʋ Dɩŋ-zɔmʋŋ a hɛ ʋ wʋlaabʋllaa nɛ tɩŋ ʋ tɩndaara dɩ ʋ kʋ bʋl wɩalɩŋ sɩ jaŋ ŋaa lɛɛlɛ a pɩ ʋ tɩntɩnnaa.”

⁷ Yesu sɩ, “Má bee na, mɩ jaŋ kɔ lɛɛlɛ. Nɩalɩŋ sɩɩ to wɩalɩŋ ba sɩ bʋla Wɩa Dɩŋ-zɔmʋŋ doluŋ lɛ a hɛ teniŋ deeŋ tʋɔŋ, Wɩa jaŋ pɛ ba lɛ.”

⁸ Mɩ-na Jɔɔŋ, mɩ nɛ nɩɩ wɩaa deemba aŋ pɛ na ma. Mɩ sɩ nɩɩba aŋ pɛ na ŋɩɩ, mɩ tuu kpirimi Wɩa tɩndaarʋ-la sɩɩ dagɛmɛ wɩaa deemba sɩpaaŋ dɩ mɩ chʋɔlʋ.

⁹ Ŋɩɩ nɛ ʋ bʋla pɩmɛ, “Sɩ́ ŋɩɩ ŋaa, mɩ dɩŋ arɩ ŋ naambiiri-la kala sɩ ŋaa Wɩa wʋlaabʋllaa ŋaa Wɩa tɩntɩnnaa, arɩ nɩalɩŋ kala sɩɩ to wɩalɩŋ sɩ hɛ teniŋ deeŋ tʋɔŋ. Wɩa nɛ maga ŋ chʋɔlɛ.”

¹⁰ Ŋɩɩ nɛ ʋ bɩra bʋla pɩmɛ, “Sɩ́ wɩaa deemba ba sɩ bʋla Wɩa Dɩŋ-zɔmʋŋ doluŋ lɛ a hɛ teniŋ deeŋ tʋɔŋ kaa faa, bɛɛ wɩaa ʋ bɩ jaŋ dieni ka dɩ wɩalɩŋ kala ŋaa.

¹¹ Ŋɩɩ wɩaa má leŋ dɩ nɩbɔŋŋɔɔ kɛŋ ŋɩɩ naaŋ lɛ a ŋɩŋaa wʋbɔŋŋɔɔ, dɩ nɩalɩŋ sɩ kɛŋ disiniŋ ma kɛŋ ŋɩɩ naaŋ lɛ a ŋɩŋaa disiniŋ, dɩ nɩzɔŋŋɔɔ ma kɛŋ ŋɩɩ naaŋ lɛ a ŋɩŋaa wʋzɔŋŋɔɔ, dɩ tʋɔpʋl tɩŋŋaa ma kɛŋ ŋɩɩ naaŋ lɛ a ŋɩŋaa tʋɔpʋl wɩaa.”

¹² Yesu sɩ, “Má bee na, mɩ jaŋ kɔ lɛɛlɛ, mɩ jaŋ kʋ tiŋ nʋʋkala. Nʋʋkala sɩ tɩma magɛ ŋɩɩ, ŋɩɩ tɩtɩa nɛ ʋ jaŋ laa ʋ time.

¹³ Mɩ nɛ ŋaa Alɩfa arɩ Omega, mɩ nɛ ŋaa Nɩɩ-la fa sɩ hɛ nɩmɛ bumbuŋ arɩ Nɩɩ-la sɩ jaŋ hɛ nɩmɛ dʋnɩa dɩdɛrɩŋ. Mɩ nɛ ŋaa dɩ-suomuŋ, mɩ nɛ ŋaa dɩdɛrɩŋ ma.

¹⁴ Nɩalɩŋ sɩɩ to Wɩa wɩaa, Wɩa jaŋ pɛ ba lɛ dɩ ba wuo na wombiiŋ a to tabal-la boi-baalaa jʋʋ, a wuo dii tɩa-la sɩɩ pɩ nɩaa mɩɩsɩŋ nɛnɛɛ.

¹⁵ Ama nɩbɔŋŋɔɔ jaŋ chɩŋ taŋ-la jeeŋ harɩŋ. Nɩalɩŋ wʋŋaalaa sɩ nagɛ vasɩŋ, arɩ nɩalɩŋ sɩɩ ŋaa chichiribi wɩaa, arɩ nɩalɩŋ sɩɩ ŋaa wʋlɩɩlɩŋ, arɩ nɩalɩŋ sɩɩ kpʋ nɩaa, arɩ vʋɩ-kpaaraa, arɩ nɩalɩŋ kala sɩ cho wʋnyɩɛrɩŋ aa nyɩɛ wɩaa, ba kala jaŋ chɩŋ taŋ-la jeeŋ harɩŋ.

¹⁶ Mɩ-na Yesu nɛ tɩŋ mɩ tɩndaara dɩ ʋ kɔ ma teeŋ a bʋl wɩaa deemba pɩ nɩalɩŋ sɩ laa mɩ wɩaa dii a hihilimi lee na-kala. Mɩ ŋaa Devit dɩa nɩaa gentine nɛ, a ŋaa ʋ doho nʋʋ. Mɩ nɛ ŋaa nanyʋɔlʋŋ.”

¹⁷ Ŋɩɩ nɛ Wɩa Dɩŋ-zɔmʋŋ arɩ haal-la Pie-bie-la sɩɩ chɛ dɩ ʋ jaa bʋla pɩ nɩaa, “Má kɔ. Nʋʋkala sɩ nɩa, má leŋ dɩ ʋ kɔ. Nʋʋ na-kala lɩɩnyʋasʋŋ sɩ kɛnɛ, ʋ kɔ. Nɩɩ-la kala sɩ cho dɩ ʋ nyʋa lɩɩ-la sɩɩ pɩ nɩaa mɩɩsɩŋ sɩ ŋaa chɔgɩta kʋŋ, ʋ kɔ a nyʋa.”

Wʋkaanaa

¹⁸ Mɩ-na Jɔɔŋ chɛ dɩ nʋʋkala sɩ nɩɩ wɩaa deemba ba sɩ bʋla hɛ teniŋ deeŋ tʋɔŋ, dɩ ba kɛŋ ba tɩtɩa woruŋ arɩ wɩaa deemba lɛ. Dɩ nʋʋkala nɛ kɛŋ wɩɩ pɛ wɩaa deemba lɛ, Wɩa ma jaŋ joŋ nyanyal-bɔmɔ-la ba sɩ daga teniŋ deeŋ tʋɔŋ a dɔgɩsɛ ʋ tɩɩna.

¹⁹ Dɩ nʋʋkala ma nɛ lɩɩsɛ wɩaa deemba kʋŋ ta, Wɩa ma jaŋ lɩɩsɛ ʋ tɩɩna ta. Ʋ bɩ jaŋ pʋ wombiiŋ dɩ ʋ na wɩalɩŋ ba sɩ ŋmʋnsa hɛ teniŋ deeŋ tʋɔŋ. Ʋ tɩɩna bɩ jaŋ wuo dii tɩa-la sɩɩ pɩ nɩaa mɩɩsɩŋ nɛnɛɛ. Ʋ bɩra bɩ jaŋ jʋʋ Wɩa tabal-la ma.

²⁰ Nɩɩ-la sɩɩ dagɛ wɩaa deemba sɩ, “Wʋtɩtɩɩ, mɩɩ kɔ nɛ lɛɛlɛ.” Amɩɩ, kɔ, La Tɩɩna Yesu.

²¹ La Tɩɩna Yesu lahɔrɩmɔ lɛ, Wɩa nɩaa kala jaŋ hɔŋ arɩ yarɩfɩɛlaa. Amɩɩ.