Jɔɔŋ Wʋnaalaa 2 - WƖA TENIŊ

Wɩalɩŋ ba sɩ ŋmʋnsa pɩ Ɛfɛsɩs nɩaa

¹ Ŋmʋŋsɛ wɩaa deemba a pɩpɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi Ɛfɛsʋs lɛ. Mɩ-na nɩɩ-la sɩ kori chɛnwʋla-la balɩpɛ mɩ nadiiŋ nɩsɩŋ lɛ a vɩvɛŋ chaaŋ daasɩ-la balɩpɛ tʋɔŋ, mɩ nɛ tɩŋ tɩndaarɩŋ deeŋ.

² Mɩ jɩŋ wɩalɩŋ kala ma sɩ ŋaa nɛ. Mɩ na ŋɩɩ ma sɩ tɩma arɩ sɩɩfɩɛsɩŋ nɛ, a dii kenyiri wɩɩkala lɛ. Mɩ jɩma ma dɩ nɩbɔŋŋɔɔ bɩ dɔŋɔ lɛ wuo. Nɩaa dɔnsʋŋ joŋ ba tɩtɩa arɩ ba ŋaa Wɩa nanzɔɔba nɛ, ama ma magɩsɛ nɩaa deemba nɛ a na dɩ baa nyɩɛ nɛ.

³ Ma kɛŋ kenyiri nɛ, a na hɛɛŋ mɩ wɩaa aŋ nyalɩmɛ, a ha bɩ lɔlɔ.

⁴ Ama wɩɩ nɛ mɩ kɛŋ a tɩgɛ ma lɛ. Ma fa sɩ chomi ŋɩɩ bumbuŋ-la, ma bɩra bɩ mɩ ŋɩɩ cho.

⁵ Má bɩɩna yi wɩalɩŋ lɛ a sɩ́ tele. Má bɩrɩma lɩɩ a ŋɩŋaa wɩalɩŋ ma fa sɩɩ ŋaa bumbuŋ-la. Dɩ ŋɩɩ dee, mɩ jaŋ kʋ joŋ ma chaaŋ daaŋ.

⁶ Ama wɩɩ-la ma sɩ ŋaa mɩ cho nɛ ŋ-la: Ma bɛrɛ Nɩkɔlaata nɩaa wʋŋaalaa nɛ arɩ mɩ ma sɩ bɛrɛ ba wʋŋaalaa ŋɩɩ.

⁷ Dɩgɩlaa tɩŋŋaa, má wuoli ma dɩgɩlaa a nɩɩ wɩalɩŋ Wɩa Dɩŋ-zɔmʋŋ sɩ bʋlaa pɩ nɩalɩŋ sɩ laa Yesu wɩaa dii a hihilimi lee-kala Esia lɛ. Nɩɩ-la kala sɩ wuo yuo dii Sɩtaanɩ, mɩ jaŋ leŋ dɩ ʋ dii tɩa-la nɛnɛɛ sɩɩ pɩ nɩaa mɩɩsɩŋ a hɛ Wɩa-jaŋ lɛ.

Wɩalɩŋ ba sɩ ŋmʋnsa pɩ Sɩmɩɩna nɩaa

⁸ Bɩra ŋmʋnsɛ wɩaa deemba a pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi Sɩmɩɩna lɛ. Wɩaa deemba lɩɩ mɩ-na Nɩɩ-la fa sɩ hɛ nɩmɛ bumbuŋ kala teeŋ nɛ, aŋ ha jaŋ hɛ nɩmɛ dʋnɩa dɩdɛrɩŋ. Mɩ sʋba nɛ, aŋ bɩra sii sʋʋŋ lɛ.

⁹ Mɩ jɩŋ wɩalɩŋ sɩɩ walɩmɛma nɛ, a jɩŋ ŋɩɩ ma sɩ summo, ama Wɩa teeŋ, ma ŋaa kuoroo nɛ. Nɩaa dɔnsʋŋ hɛ nɩmɛ aa chei ma yɩrɩŋ. Nɩaa deemba joŋ ba tɩtɩa arɩ ba ŋaa Juu tɩmma nɛ aŋ bɩ Juu tɩmma ŋaa. Baa to Sɩtaanɩ harɩŋ nɛ.

¹⁰ Má sɩ́ leŋe dɩ fawʋllʋŋ kɛmma a mʋ tɩgɛ hɛɛ kala ma sɩ jaŋ na lɛ. Mɩ bʋlaa pɩma, Sɩtaanɩ jaŋ magɩsɛ ma dɔnsʋŋ a leŋ dɩ ba kɛmma tɔ bɩnɩŋ dɩa. Ma jaŋ na hɛɛŋ a yi tapʋlaa fii. Dɩ ba nɩɩ chɛ dɩ ba kpʋma ma, ma-na ha chɩŋ wɩalɩŋ ma sɩ laa dii lɛ. Dɩ ma nɛ ŋaa ŋɩɩ, mɩ jaŋ joŋ mɩɩ-zɔmʋŋ pɩma Wɩa-jaŋ lɛ.

¹¹ Dɩgɩlaa tɩŋŋaa, má wuoli ma dɩgɩlaa a nɩɩ wɩalɩŋ Wɩa Dɩŋ-zɔmʋŋ sɩ bʋlaa pɩ nɩalɩŋ sɩ laa Yesu wɩaa dii aa hilimi lee-na kala Esia lɛ. Nɩɩ-la kala sɩ wuo yuo dii Sɩtaanɩ, dɩ ʋ nɛ sʋba, ʋ bɩ jaŋ jʋʋ Wɩa nyiniŋ.

Wɩalɩŋ ba sɩ ŋmʋnsa pɩ Pɛgamɔm nɩaa

¹² Bɩra ŋmʋnsɛ wɩaa deemba a pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi taŋ-la ba sɩɩ yɩrɛ Pɛgamɔm lɛ. Mɩ-na nɩɩ-la sɩ kori tokobiiŋ niiriŋ balɩa kala sɩɩ dii nyagaga nɩɩ bʋl wɩaa deemba.

¹³ Mɩ jɩŋ lee-la ma sɩ hɛ nɛ, nɩmɛ nɛ Sɩtaanɩ dii kuoruŋ. Ama ma ha kɛŋ wʋtɩtɩɩ nɛ a mʋ tɩgɛ mɩ yɩrɩŋ lɛ. Ma bɩ wɩalɩŋ ma sɩ laa dii joŋo ta bʋa-la lɛ ba sɩ kpʋ Antɩpas sɩ ŋaa wʋtɩtɩɩ tɩɩna a bʋl wɩaa a tɩgɛ mɩ lɛ. Ba kpʋʋ ma tabalɩŋ lɛ nɛ, lee-la Sɩtaanɩ sɩ hɛ.

¹⁴ Ma ŋaa kukeri nɛ, ama wɩaa baŋmɛnɛ nɛ ma ŋaa chei. Nɩaa dɔnsʋŋ hɛ ma tʋɔŋ a tuto wɩalɩŋ baal-la ba sɩɩ yɩrɛ Balam fa sɩɩ dagʋ. Ʋ nɛ dagɛ kuoru kʋbala baa yɩrɛ Balak dɩ ʋ nyɩsɛ Iziral tɩŋŋaa dɩ ba didii vʋɩyaa kɩaa aŋ pɛ ŋɩŋaa wʋlɩɩlɩŋ.

¹⁵ Nɩaa dɔnsʋŋ ma hɛ ma tʋɔŋ a tuto wʋbɔmɔ-la Nɩkɔlaata tɩmma-la sɩɩ dagʋ.

¹⁶ Ŋɩɩ wɩaa, má bɩrɩma lɩɩ wɩalɩŋ lɛ, dɩ ŋɩɩ dee mɩ jaŋ kɔ lɛɛlɛ a kɛŋ mɩ niiŋ wʋbʋlaa sɩ nagɛ tokobiiŋ, a yuoma.

¹⁷ Dɩgɩlaa tɩŋŋaa, má wuoli ma dɩgɩlaa a nɩɩ wɩalɩŋ Wɩa Dɩŋ-zɔmʋŋ sɩ bʋla pɩ nɩalɩŋ sɩ laa Yesu wɩaa dii aa hilimi Esia tinteeŋ lɛ. Nɩɩ-la kala sɩ yuo dii Sɩtaanɩ, mɩ jaŋ joŋ kʋdiile-la sɩ faa Wɩa-jaŋ lɛ a pʋ, a joŋ tabɩɩ-pʋla ma a pʋ. Mɩ jaŋ ŋmʋnsɛ yɩrɩ-falɩŋ a hɛ tabɩɩ-la lɛ. Yɩrɩ-la nʋʋkala bɩ jaŋ jɩmʋ, see nɩɩ-la sɩ laa tabɩɩ-la dʋndʋŋa.”

Wɩalɩŋ ba sɩ ŋmʋnsa pɩ Taataya nɩaa

¹⁸ Bɩra ŋmʋnsɛ wɩaa deemba nɛ a pɩ Wɩa tɩndaarʋ-la sɩɩ beŋ nɩalɩŋ sɩ laa Yesu wɩaa dii aa hilimi taŋ-la ba sɩɩ yɩrɛ Taataya lɛ. Mɩ-na Wɩa Bie nɛ bʋl wɩaa deemba. Mɩ sɩaa nagɛ nyiŋgeliŋ nɛ, ka mɩ naasɩŋ ma nagɛ kɔlɩɩŋ ba sɩ chɛsɛ ʋ faasa tʋtʋl.

¹⁹ Bʋla pɩba dɩ mɩ jɩŋ wɩalɩŋ kala ba sɩɩ ŋaa nɛ. Mɩ jɩŋ ŋɩɩ ma sɩ cho nɩaa nɛ, arɩ ŋɩɩ ma sɩ laa Wɩa dii, arɩ ŋɩɩ ma sɩɩ pɛ nɩaa lɛ, arɩ ŋɩɩ ma sɩ kɛŋ kenyiri. Lɛɛlɛ ma paala ŋaa wɩaa deemba aa kɩɩ ŋɩɩ ma fa sɩɩ ŋaa nɛ bumbuŋ-la.

²⁰ Ma ŋaa kukeri, ama wɩaa baŋmɛnɛ nɛ ma ŋaa chei. Haal kʋbala nɛ hɛ ma tʋɔŋ aa dagɛ wʋbɔŋŋɔɔ, ka ma bɩ ʋ kire. Haal-la ba sɩɩ yɩrɛ Jɛzɛbɛl nɛ ŋɩɩ. Ʋ fa joŋ ʋ tɩtɩa arɩ ʋ ŋaa Wɩa wʋlaabʋllʋ nɛ ama ʋʋ nyɩɛ nɛ. Ʋʋ dagɛ mɩ nɩaa nɛ dɩ ba ŋɩŋaa wʋlɩɩlɩŋ aŋ pɛ didii vʋɩyaa kɩaa ma.

²¹ Mɩ pɩ haala deeŋ wombiiŋ dɩ ʋ bɩrɩma lɩɩ ʋ wʋlɩɩlɩ-la lɛ nɛ, ka ʋ vɩa aŋ ŋɩŋaa.

²² Ŋɩɩ wɩaa, má bee na, mɩ jaŋ leŋ dɩ ʋ wɩɩlɛ woruŋ a pɩŋ. Nɩalɩŋ ma kala sɩɩ tou a ŋɩŋaa wʋlɩɩlɩ-la, mɩ jaŋ leŋ dɩ ba ma faasa na hɛɛŋ, see dɩ ba bɩrɩma lɩɩ ba wʋŋaalɩa-la lɛ.

²³ Mɩ jaŋ ŋmoo ʋ harɩ-tooroo kala kpʋ. Dɩ mɩ nɛ ŋaa ŋɩɩ, nɩalɩŋ kala sɩ laa Yesu wɩaa dii aa hilimi jaŋ jɩŋ arɩ mɩ jɩŋ nʋʋkala tʋɔbɩɩnaa nɛ. Nʋʋkala sɩ tɩma magɛ ŋɩɩ, ŋɩɩ nɛ mɩ jaŋ timu magɛ.

²⁴ Ama ma nɩalɩŋ dɔnsʋŋ sɩ hɛ Taataya lɛ a bɩ wɩalɩŋ haala deeŋ sɩɩ dagʋ ka to, a bɩ Sɩtaanɩ wʋbisi-la gʋnna, mɩ bɩ jaŋ joŋ wʋyuŋŋii kala daŋ ma lɛ. Wɩɩŋ deeŋ dʋndʋŋ nɛ mɩɩ chɛ dɩ mɩ bʋla pɩma:

²⁵ Ama wɩɩ-la mɩ sɩ jaŋ bʋla pɩma nɛ, má kɛŋ wʋtɩtɩɩ-la ma sɩ nɩa kpaŋ kpaŋ a mʋ yi tapʋlɩɩ-la mɩ sɩ jaŋ kɔ.

²⁶ Nɩɩ-la kala sɩ wuo yuo dii Sɩtaanɩ aŋ ŋɩŋaa wɩalɩŋ mɩ sɩɩ chɛ a mʋ yi ʋ mɩɩsɩŋ dɩdɛrɩŋ, mɩ jaŋ pʋ doluŋ dɩ ʋ bibeŋ dʋnɩa nɩaa kala.

²⁷ Tɩɩna jaŋ bibeŋ dʋnɩa nɩaa arɩ hɔɔŋ dantɩga. Ʋ jaŋ ŋmooba yɛrɛ muno muno a nagɛ pupoiŋ. Dol-la mɩ Nyɩmma sɩ joŋo pɩmɛ, ʋ tɩtɩa nɛ mɩ jaŋ joŋo pʋ.

²⁸ Mɩ jaŋ leŋ dɩ tɩɩna tʋtʋl a nagɛ nanyʋɔlʋŋ.

²⁹ Dɩgɩlaa tɩŋŋaa, má wuoli ma dɩgɩlaa a nɩɩ wɩalɩŋ Wɩa Dɩŋ-zɔmʋŋ sɩ bʋla pɩ nɩalɩŋ sɩ laa Yesu wɩaa dɩ aa hilimi Esia tinteeŋ lɛ.