Jɔɔŋ Wʋnaalaa 14 - WƖA TENIŊ

Pie-bie-la arɩ nɩaa bʋɩ zɔlɔ arɩ mahɩŋ balɩa arɩ banɛsɛ

¹ Ŋɩɩ nɛ mɩ beŋ a na Pie-bie-la dɩ ʋ chɩŋ peel-la ba sɩɩ yɩrɛ Zaayɔŋ nyuŋ. Ʋ dɩ nɩaa bʋɩba zɔlɔ arɩ mahɩŋ balɩa arɩ banɛsɛ nɛ fa chɩŋ peel-la nyuŋ. Ba ŋmʋnsɛ Pie-bie-la yɩrɩŋ arɩ ʋ Nyɩmma yɩrɩŋ nɛ a hɛ nɩaa deemba tilliŋ lɛ.

² Ŋɩɩ nɛ mɩ nɩɩ dɔmɔ kʋbala Wɩa-jaŋ a nagɛ lɩɩŋ sɩɩ pɛllʋ gbul gbul, a bɩra nagɛ duonuŋ sɩɩ kpɩa. Dɔmɔ-la fa bɩra nagɛ cheŋ-duuroo sɩɩ du chenniŋ nɛ.

³ Nɩaa deemba chɩŋ kuoru kpasa-la arɩ nɩhɩasɩ-la, arɩ kɩalɩŋ banɛsɛ-la sɩ weye sɩpaaŋ nɛ aa yɩɩ yɩɩl-falɩɩ kʋbala. Nʋʋkala bɩ yɩɩl-la wuo gʋnnɛ, see nɩalɩŋ bʋɩ zɔlɔ arɩ mahɩŋ balɩa arɩ banɛsɛ-la dʋndʋŋa. Nɩaa deemba nɛ Wɩa tʋɔsɛ dʋnɩa lɛ a laaba ta.

⁴ Nɩaa deemba nɛ ŋaa nɩalɩŋ sɩ bɩ wʋlɩɩlɩŋ ŋaa, a lɩɩsɛ ba tɩta disiŋ kala lɛ. Ba nɩɩ to Pie-bie-la harɩŋ lee-na kala ʋ sɩɩ mʋ. Ba nɛ Wɩa laa sɩpaaŋ lɩɩsɛ nuhuobiinee tʋɔŋ, dɩ ba ŋaa Wɩa arɩ Pie-bie-la tʋɔpʋl tɩŋŋaa.

⁵ Ba ha bɩ wɩaa nyɩɛ aŋ ka, ba bɩ cheeri kala kɛnɛ.

Wɩa tɩndaaraa batori bʋl wɩaa

⁶ Ŋɩɩ nɛ mɩ bɩra na Wɩa tɩndaara dɔŋɔ dɩ ʋʋ fil wɩa-nyuŋ dɩ-bolii. Ʋ fa kori Wɩa Wʋzɔmɔ-la nɛ, Wʋzɔmɔ-la sɩ jaŋ hɛ nɩmɛ a kaa mʋ wuu. Ʋ kaa mʋ bʋla pɩ tintee kala nɩaa, doho kala nɩaa, yikoro kala nɩaa arɩ nɩaa kala.

⁷ Ŋɩɩ nɛ Wɩa tɩndaarʋ-la bʋl arɩ yikori-balɩŋ, “Má fá Wɩa a dɛnnɛ ʋ yɩrɩ-balɩŋ, bɛɛ wɩaa bʋa-la ʋ sɩ jaŋ dii dʋnɩa nɩaa sarɩya yie nɛ. Má dɛnnʋ, ʋ nɛ ta wɩa-nyuŋ arɩ tinteeŋ arɩ mʋgʋ-balɩŋ arɩ lɩɩ-bulluŋ kala.”

⁸ Ka Wɩa tɩndaarɩ-lɩa-la ma tuto a bʋl, “Babɩlɔŋ tele, Babɩlɔŋ tele, tabal-la ba sɩɩ yɩrɛ Babɩlɔŋ, ʋ tele. Ʋ nɛ joŋ ʋ wʋlɩɩlɩŋ a dagɛ tintee kala nɩaa. Wʋlɩɩlɩ-la nagɛ sɩ-duoŋ.”

⁹ Ŋɩɩ nɛ Wɩa tɩndaarɩ-tori ma tuto ba harɩŋ, a ma bʋl wɩaa arɩ yikori-balɩŋ. Ʋ sɩ, “Dɩ nʋʋkala nɛ chʋɔlɛ baga kʋ-la arɩ ʋ nagɩsɩŋ ba sɩ mɛ bil, a laa magɩl-la ʋ tile lɛ koo ʋ nɩsaa lɛ,

¹⁰ Wɩa jaŋ na baanɩŋ kɩŋkɛŋ ʋ tɩɩna nyuŋ. Wɩa jaŋ faasa na baanɩŋ ʋ nyuŋ a dɔgɩsʋ woruŋ dɩ ʋ na hɛɛŋ a nagɛ nɩa sɩ nyʋa sɩ-duoŋ a bugi. Ba jaŋ joŋ jiribiiŋ nyiniŋ a dɔgɩsɛ tɩɩna. Ba jaŋ ŋaa ŋɩɩ Wɩa tɩndaara-la sɩ bɩ disiniŋ kɛnɛ arɩ Pie-bie-la sɩpaaŋ.

¹¹ Nyiŋ-la jaŋ diiba deeŋ deeŋ, ʋ bɩ dɩsa. Nɩaa deemba bɩ jaŋ kɔ dɩ ba na wiese wɩɩhɛyɛ arɩ tɩtaŋɩŋ kala. Nɩaa deemba sɩ chʋɔlɛ baga kʋ-la arɩ ʋ nagɩsɩŋ ba sɩ mɛ bil a laa ʋ yɩrɩŋ magɩl-la, ba bɩ jaŋ na wiese.”

¹² Bʋa deeŋ lɛ Wɩa nɩalɩŋ sɩɩ to Wɩa niiŋ a laa Yesu Kirisito wɩaa dii, ʋ maga dɩ ba nyalɩmɛ nɛ.

¹³ Ka mɩ nɩɩ yikoro kʋbala dɩ ʋ lɩɩ Wɩa-jaŋ a bʋl, “Ŋmʋnsɛ wɩɩŋ deeŋ: Nɩalɩŋ sɩ laa La Tɩɩna Yesu wɩaa dii aŋ sʋʋ, Wɩa jaŋ pɛ ba lɛ a chɩŋ lɛɛlɛ kaa mʋ.” Ŋɩɩ nɛ Wɩa Dɩŋ-zɔmʋŋ ma bʋl, “Wɩa sɛnɛ jaŋ pɛ nɩaa deemba lɛ dɩ ba wuo na wiese woruŋ. Ba bɩra bɩ jaŋ tɩŋ, bɛɛ wɩaa tɩntɩmɩɩ-la ba sɩ tɩma ka to ba harɩŋ nɛ.”

Ba kɛŋ sɩɩkɔrɔ a kaa kʋŋ kɩaa

¹⁴ Ŋɩɩ nɛ mɩ bɩra beŋ a na duoŋ-bɩlɩmbaaŋ-pʋla, dɩ nʋʋ nagɛ nuhuobiine bie a hɔŋ duoŋ-bɩlɩmbaaŋ-la nyuŋ a chu sɛlɩmɛ kuoru nyunchuulo aŋ kori sɩɩkɔrɔ sɩ kɛŋ niiŋ woruŋ.

¹⁵ Ŋɩɩ nɛ Wɩa tɩndaarʋ-la dɔŋɔ ma lɩɩ Wɩa dɩɩ-balɩŋ tʋɔŋ kʋ lɩɩ, a faasa yɩrɛ arɩ yikori-balɩŋ nɩɩ-la sɩ hɔŋ duoŋ-bɩlɩmbaaŋ-la nyuŋ a bʋl, “Kɛŋ ŋ sɩɩkɔrɔ-la a kaa kʋŋ kɩaa. Bʋa-la sɩ maga dɩ la kʋŋ kɩaa yie nɛ. Kɩalɩŋ kala sɩ hɛ dʋnɩa lɛ sɩ maga dɩ ba kʋŋ, ba kala bɩa nɛ.”

¹⁶ Ŋɩɩ nɛ nɩɩ-la sɩ hɔŋ duoŋ-bɩlɩmbaaŋ-la nyuŋ kɛŋ ʋ sɩɩkɔrɔ-la viisi tinteeŋ a kʋŋ tinteeŋ kʋŋkala.

¹⁷ Ŋɩɩ nɛ Wɩa tɩndaara dɔŋɔ ma lɩɩ Wɩa dɩɩ-bal-la sɩ hɛ Wɩa-jaŋ a kʋ lɩɩ, a ma kori sɩɩkɔrɔ sɩ kɛŋ niiŋ nɛ woruŋ.

¹⁸ Ŋɩɩ nɛ Wɩa tɩndaara dɔŋɔ ma lɩɩ Wɩa dɩɩ-bal-la koru-la sɛmɛ a kʋ lɩɩ. Ʋ nɛ ŋaa Wɩa tɩndaarʋ-la sɩ kɛŋ nyiniŋ doluŋ. Ŋɩɩ nɛ ʋ yɩrɛ nɩɩ-la sɩ kori sɩɩkɔrɔ-la arɩ yikori-balɩŋ a bʋl, “Kɛŋ ŋ sɩɩkɔrɔ-la a kaa keri tɩa-la ba sɩɩ yɩrɛ girep jagɩsɩŋ, bɛɛ wɩaa ʋ nɛnɛɛ bɩa nɛ.”

¹⁹ Ŋɩɩ nɛ Wɩa tɩndaarʋ-la kɛŋ ʋ sɩɩkɔrɔ-la kaa viisi tinteeŋ a keri girep jagɩsɩ-la kala, a paa ba kala hɛ bʋa-la lɛ ba sɩ luo aa chagɛ tɩɩnɛnɛ-la lɩɩŋ, Wɩa baanɩŋ leriŋ.

²⁰ Tabal-la jeeŋ harɩŋ nɛ ba chagɛ tɩɩnɛnɛ-la. Ba sɩ chagɛba, lɩɩ-la kala lɩɩ a bɩrɩmɛ chalɩŋ, a tuu pɩpɛllɛ tinteeŋ a nagɛ fuoŋ, ʋ duomuŋ yi naakieli zɔɔ-balɩa, ʋ luŋuŋ ma ŋaa naakieliŋ bʋlɩa.