Jɔɔŋ Wʋnaalaa 12 - WƖA TENIŊ

Dɩmɩŋ arɩ haala yuo dɔŋɔ

¹ Ŋɩɩ nɛ kʋkpuŋkpere kʋbala kʋ lɩɩ wɩa-nyuŋ. Kʋkpuŋkpere-la nagɛ haal nɛ a joŋ wɩɩpɔsʋŋ a laalɛ, a nagɛ nɩaa sɩɩ laalɛ gɛnnɩŋ ŋɩɩ. Ka chɛnɛ ma hɛ ʋ naasɩŋ bʋbʋɔŋ, aŋ ka ʋ chu kuori-nyunchuuluŋ. Nyunchuulo-la, chɛnwʋlaa fii arɩ balɩa nɛ ba kaa ŋaa.

² Haal-la fa kɛŋ luoruŋ nɛ. Ʋ luoruŋ wʋwɩɩ, ʋ faasa yiyel a wʋwalɩmɛ dɩ ʋ lʋl.

³ Ŋɩɩ nɛ kʋkpuŋkpere dɔŋɔ ma kʋ lɩɩ wɩa-nyuŋ. Kʋkpuŋkpere deeŋ fa nagɛ dɩmɩŋ sɩ yʋga kieli nɛ a kala fɩɛsɛ a nagɛ chalɩŋ. Dɩŋ-la fa kɛŋ nyusuŋ balɩpɛ nɛ arɩ nyilliŋ fii, a chu kuori nyunchuuluŋ balɩpɛ.

⁴ Ʋ kɛŋ ʋ bʋbʋɔ-doho gbaa chɛnwʋlaa, dɩ ŋ nɛ kaa kpaa leree batori sɛmɛ dɔŋɔ kʋ tuu tel tinteeŋ. Aŋ ka dɩŋ-la mʋ chɩŋ haal-la fa sɩɩ walɩmɛ dɩ ʋ lʋl sɩpaaŋ a gbɛrɛ, dɩ haal-la nɛ lʋla, dɩ ʋ guu joŋ bile liŋ.

⁵ Ŋɩɩ nɛ haal-la lʋl hambolibie, nɩɩ-la sɩ jaŋ beŋ dʋnɩa nɩaa kala arɩ hɔɔŋ dantɩga. Ŋɩɩ nɛ Wɩa joŋ bile kaa mʋ ʋ teeŋ a leŋ ʋ hɔŋ ʋ kuoru kpasa nyuŋ,

⁶ aŋ ka haal-la fá jʋʋ tintee-hɩlɩŋ, lee-la Wɩa sɩ wasa bil ʋ lɛ. Wɩa pʋ kʋdiilee nɩmɛ tapʋlaa bʋɩ arɩ zɔɔ-balɩa arɩ mahɩŋ batori.

⁷ Bʋa deeŋ lɛ laalɩŋ sii Wɩa-jaŋ lɛ. Wɩa tɩndaarɩ-hɩaŋ ba sɩɩ yɩrɛ Maakɩl arɩ tɩndaaraa dɔnsʋŋ suomi a yuyuo dɩŋ-la. Ŋɩɩ nɛ dɩŋ-la arɩ ʋ harɩ-tooroo maa yuo.

⁸ Ama Maakɩl nɩaa yuo dii dɩŋ-la arɩ ʋ harɩ-tooroo. Dɩŋ-la arɩ ʋ harɩ-tooroo bɩra bɩ dɩ-hɔnɩɩ kala kɛnɛ Wɩa-jaŋ lɛ.

⁹ Ŋɩɩ nɛ ba joŋ dɩŋ-la arɩ ʋ harɩ-tooroo a yuo ta ba lɩɩ Wɩa-jaŋ a kʋ tuu tinteeŋ. Dɩŋ-la fa hɛ nɩmɛ faafaa kala nɛ a lɩɩ dʋnɩa dɩ-suomuŋ. Ʋ nɛ baa yɩrɛ Sɩtaanɩ, nɩɩ-la sɩɩ nyɩsɛ dʋnɩa nɩaa ba yeŋŋi.

¹⁰ Ŋɩɩ nɛ ka mɩ nɩɩ yikori-bal kʋbala dɩ ʋ lɩɩ Wɩa-jaŋ a bʋl, “Lɛɛlɛ Wɩa dagɛ dol-la ʋ sɩ kɛnɛ dɩ ʋ laa ʋ nɩaa ta nɛ. Ʋ dagɛ ʋ doluŋ arɩ ʋ kuoruŋ nɛ, arɩ dol-la Kirisito sɩ kɛnɛ, Nɩɩ-la ʋ sɩ lɩɩsa, bɛɛ wɩaa nɩɩ-la sɩ joŋ cheeriŋ pɩ la naambiiriŋ, ba joŋu yuo ta nɛ ʋ kʋ tuu tinteeŋ. Ʋ fa joŋ cheeriŋ pɩba Wɩa sɩpaaŋ wɩɩhɛyɛ arɩ tɩtaŋɩŋ kala nɛ.

¹¹ Ba yuo dii Sɩtaanɩ a tɩŋ Pie-bie-la chalɩŋ wɩaa nɛ, arɩ Wɩa niiŋ wɩalɩŋ ba fa sɩ bʋla pɩpɩ nɩaa. Ba fa kɛŋ ba tɩtɩa dɩ ba kpʋba a tɩŋ Wɩa wɩalɩŋ wɩaa nɛ.

¹² Ma nɩalɩŋ sɩ hɛ Wɩa-jaŋ, má leŋ dɩ ma tʋɔŋ tɔrɛ. Ama ma nɩalɩŋ sɩ hɛ tinteeŋ lɛ arɩ kɩalɩŋ sɩ hɛ mʋgʋ-balɩŋ lɛ, ma jaŋ na hɛɛŋ. Sɩtaanɩ kʋ tuu ma teeŋ nɛ, ʋ faasa na baanɩŋ nɛ, bɛɛ wɩaa ʋ jɩma arɩ ʋ bɩra bɩ dieni, ka dɩ ba laa ʋ doluŋ.”

¹³ Dɩŋ-la sɩ na dɩ ba joŋu yuo ta, ʋ kʋ tuu tinteeŋ, ŋɩɩ nɛ ʋ kire to haal-la sɩ lʋl hambolibie-la harɩŋ.

¹⁴ Ŋɩɩ nɛ Wɩa joŋ kachuu-balɩŋ kɩŋkɛnsɩŋ pɩ haal-la, dɩ ʋ wuo fil a kagɛ dɩŋ-la lɛ a mʋ tinteeŋ, lee-la Wɩa sɩ wasa bil ʋ lɛ. Nɩmɛ nɛ Wɩa benu jɩsɩŋ batori arɩ kpaa magɛ dɔŋɔ.

¹⁵ Ŋɩɩ nɛ lɩɩŋ lɩɩ dɩŋ-la niiŋ lɛ a nagɛ fuoŋ, a kire to haal-la harɩŋ dɩ ʋ pɛllɛ joŋu.

¹⁶ Ama tintee-hɩlɩŋ kʋ pɛ haal-la lɛ a joŋ lɩɩ-la sɩ lɩɩ dɩŋ-la niiŋ lɛ kala a nyʋa.

¹⁷ Ŋɩɩ nɛ dɩŋ-la na baanɩŋ haal-la nyuŋ a mʋ dɩ ʋ kɛŋ haal-la biiriŋ dɔnsʋŋ a yuo laalɩŋ. Haal-la biiriŋ nɛ ŋaa nɩalɩŋ sɩ nɩɩ Wɩa niiŋ wɩaa a tutoba, a didii Yesu dansɩa, a bʋl ʋ wɩaa a pɩpɩ nɩaa.

¹⁸ Ŋɩɩ nɛ dɩŋ-la mʋ chɩŋ mʋgʋ-balɩŋ niiŋ.