Fɩlɩmɔŋ 1 - WƖA TENIŊ

¹ Mɩ-na Pɔɔl, nɩɩ-la ba sɩ kaa tɔ dɩa a tɩŋ Yesu Kirisito wɩaa arɩ la naambie Timoti nɛ ŋmʋnsɛ teniŋ deeŋ aa pɩ ŋ-na Fɩlɩmɔŋ. Ŋ ŋaa la nandɔŋ-choolii nɛ, a bɩra ŋaa la tɩtɩnnɩ dɔŋ ma.

² La bɩra ŋmʋnsɛ teniŋ deeŋ a pɩpɩ nɩalɩŋ sɩ laa Yesu wɩaa dii aa hilimi ŋ dɩa lɛ, a bɩra ŋmʋnsɛ teniŋ deeŋ a pɩpɩ la dɩhaala Apɩa arɩ la naambie Akɩpʋs. Akɩpas ŋaa la laalɩyuori dɔŋ nɛ Kirisito tɩntɩŋŋaa lɛ.

³ La Nyɩmma Wɩa arɩ La Tɩɩna Yesu Kirisito lahɔrɩmɔ lɛ, ma jaŋ hɔŋ arɩ yarɩfɩɛlaa.

Pɔɔl lɔllɛ Wɩa a mʋ tɩgɛ Fɩlɩmɔŋ lɛ

⁴ Bʋa na-kala lɛ dɩ mɩ nɩɩ chʋɔlɛ Wɩa, mɩ yie lɔllɛ Wɩa nɛ a tɩŋ ŋ wɩaa,

⁵ bɛɛ wɩaa mɩ nɩɩ ŋɩɩ ŋ sɩ cho Wɩa nɩaa, arɩ ŋɩɩ ŋ sɩ laa La Tɩɩna Yesu Kirisito wɩaa dii.

⁶ Mɩ Wɩɩsʋlʋŋ nɛ dɩ Wɩa pɛ ŋ lɛ dɩ ŋ wasa bʋl Kirisito wɩalɩŋ ŋ sɩ laa dii a pɩ nɩaa, dɩ ŋɩɩ leŋ dɩ ŋ chaasa jɩŋ wʋzɔŋ-na kala la sɩ kɛnɛ Kirisito teeŋ.

⁷ Mɩ naambii-choolii, ŋ sɩ́ cho Wɩa nɩaa ŋɩɩ, ŋɩɩ ŋaa mɩ ma tʋɔŋ tɔrɛ nɛ kɩŋkɛŋ, mɩ nyuŋ nyaasɛ, bɛɛ wɩaa ŋ leŋe Wɩa nɩaa tʋɔŋ pɩŋ dɩ-bala nɛ.

Pɔɔl sʋl Fɩlɩmɔŋ dɩ ʋ kɛŋ Oniisimɔs woruŋ

⁸ Ŋɩɩ wɩaa, Kirisito wɩaa lɛ, mɩ fa jaŋ wuo dagɩŋ wɩɩ-la sɩ maga dɩ ŋ ŋaa.

⁹ Ama a tɩŋ mɩ sɩ choŋ wɩaa, mɩ jaŋ sʋlʋŋ dɩ ŋ ŋaa wɩɩ-la. Mɩ-na Pɔɔl nɛ paala chɩŋ Yesu Kirisito naasɩŋ lɛ aŋ lɛɛlɛ hɛ sarɩka lɛ a tɩŋ ʋ wɩaa.

¹⁰ Mɩɩ sʋlʋŋ a tɩŋ mɩ bie Oniisimɔs wɩaa. Ʋ naga mɩ bii nɛ Yesu wɩaa lɛ, bɛɛ wɩaa, mɩ lɛ nɛ ʋ to a laa Yesu wɩaa dii bʋa-la lɛ mɩ sɩ hɛ sarɩka lɛ.

¹¹ Bʋa-la lɛ ʋ fa sɩ hɛ ŋ teeŋ, ʋ fa bɩ bʋbʋɔ kɛnɛ a pɩŋ, ama lɛɛlɛ, ʋ kɛŋ bʋbʋɔŋ a pɩ mɩ dɩŋ kala nɛ.

¹² Mɩ leŋe ʋ kʋkɔ ŋ teeŋ nɛ, mɩ chou nɛ woruŋ.

¹³ Mɩ fa cho dɩ ʋ hɛ mɩ teeŋ nɛ. Mɩ ha sɩ hɛ sarɩka lɛ ŋɩɩ a tɩŋ Yesu wʋzɔmɔ-la wɩaa, ʋ fa jaŋ wuo pɛ mɩ lɛ arɩ ŋ fa sɩ jaŋ pɛ mɩ lɛ ŋɩɩ.

¹⁴ Ama mɩ bɩ chɛ dɩ mɩ fʋgʋŋ dɩ ŋ pɛ mɩ lɛ. Mɩɩ chɛ dɩ ŋ to ŋ tɩtɩa tʋɔtɔrʋŋ lɛ nɛ a pɛ mɩ lɛ. Ŋɩɩ wɩaa mɩ bɩ jaŋ ŋaa wɩɩkala see dɩ ŋ sɛyɛ.

¹⁵ Kapo Oniisimɔs lɩɩ ŋ teeŋ tapʋlɩa-la baŋmɛnɛ ŋɩɩ ka dɩ ʋ mɩɩra kɔ a hɛ ŋ teeŋ deeŋ deeŋ nɛ.

¹⁶ Oniisimɔs fa ŋaa ŋ yomo nɛ, ama lɛɛlɛ ʋ kɩɩ yomo. Ʋ ŋaa la naambii-tɩtɩɩ sɩ laa Yesu wɩaa dii nɛ. Mɩ chou nɛ woruŋ, mɩ jɩma ŋ ma jaŋ chou, ʋ sɩ ŋaa ŋ yomo arɩ ŋ naambie kala La Tɩɩna Yesu teeŋ.

¹⁷ Dɩ ŋ nɛ bene dɩ mɩ ŋaa ŋ tɩntɩnnɩ-dɔŋ, dɩ ʋ nɛ kɔ, kɛnʋ woruŋ arɩ ŋɩɩ ŋ fa sɩ jaŋ kɛmmɛ.

¹⁸ Dɩ ʋ nɛ fa ŋaa wɩɩ cheyiŋ, koo dɩ ʋ dii ŋ chɩmɩŋ ma, joŋ arɩ mɩ nɛ ŋaa wɩɩ-la.

¹⁹ Mɩ-na Pɔɔl, mɩ tɩtɩa nɩsɩŋ nɛ ŋmʋnsɛ teniŋ deeŋ a pɩpɩŋ. Mɩ jaŋ timiŋ. Sɩ́ yʋ arɩ ŋ ma kɛŋ mɩ chɩmɩŋ nɛ, bɛɛ wɩaa mɩ lɛ nɛ ŋ to a kɛŋ mɩɩsɩŋ Yesu teeŋ.

²⁰ Ŋɩɩ wɩaa mɩ naambii, mɩɩ sʋlʋŋ, a tɩŋ La Tɩɩna Yesu wɩaa, ŋaa wɩɩŋ deeŋ pɩmɛ. La sɩ ŋaa naambiiri Kirisito lɛ, leŋ dɩ mɩ tʋɔŋ tɔrɛ.

²¹ Mɩ laa dii arɩ mɩ sɩ ŋmʋnsɛ wɩɩŋ deeŋ pɩŋ, ŋ jaŋ ŋaa wɩɩ-la mɩ sɩɩ chɛ. Mɩ jɩma arɩ ŋ jaŋ paala ŋaa kɩɩ ŋɩɩ.

²² Pɛ chɛ dɩa a bil mɩ lɛ, bɛɛ wɩaa mɩɩ yɩɛlɛ arɩ ma sɩ chʋɔlɛ Wɩa pɩpɩmɛ ŋɩɩ, Wɩa jaŋ laa ma kala sʋla a leŋ dɩ mɩ mɩɩra kɔ ma teeŋ.

Pɔɔl arɩ nɩaa dɔnsʋŋ chʋɔlɛ Fɩlɩmɔŋ

²³ Ɛpafɩras ma ba sɩ kaa tɔ dɩa a pɛ mɩ lɛ Yesu wɩaa, ʋ ma ka chʋɔlʋŋ.

²⁴ Maak arɩ Arɩsɩtakʋs arɩ Dɩmas arɩ Luuk, ba ma ŋaa mɩ tɩntɩnnɩ-dɔsʋŋ nɛ, ba ma ka chʋɔlʋŋ.

²⁵ La Tɩɩna Yesu Kirisito lahɔrɩmɔ lɛ, ma jaŋ hɔŋ arɩ yarɩfɩɛlaa.