OBADAAYA 1 - WƖA TENIŊ

La Tɩɩna jaŋ dɔgɩsɛ Ɛdɔm nɩaa

¹ Obadaaya sɩ na wɩalɩŋ duosoo tʋɔŋ. La TƖƖNA Wɩɩjarɩbakɔ bʋl wɩaa tɩgɛ Ɛdɔm nɩaa lɛ. La nɩɩ tɩndaarɩŋ nɛ, ʋ lɩɩ la TƖƖNA teeŋ nɛ. Ʋ tɩŋ ʋ tɩndaara dɩ ʋ bʋla pɩ tinteyee nɩaa, “Má sii dɩ la mʋ yuo Ɛdɔm nɩaa.”

² La TƖƖNA bʋla pɩ Ɛdɔm, “Mɩ jaŋ ŋaa dɩ ŋ muuri tinteyee kala tʋɔŋ. Ba jaŋ bee gʋʋnʋŋ.

³ Ŋ babii-ballɩŋ nyɩsɩŋ nɛ, ŋ sɩ hɔŋ bʋŋ nyuŋ ŋɩɩ, ŋ dɩa hɛ peelee nyuŋ dɩ-bolii, ŋ bʋl ŋ tʋɔŋ lɛ, ‘Kʋbɛɛ nɛ jaŋ wuo sorimi kʋ tʋʋ tinteeŋ?’

⁴ Dɩ ŋ nɛ file jɩl wɩa-nyuŋ a nagɛ kachuuŋ ma, dɩ ŋ dɩa hɛ chɛnwʋlaa tʋɔŋ, mɩ jaŋ lɛrɩŋ lɩɩ nɩmɛ kʋ tuu. Mɩ-na ma Tɩɩna nɛ bʋla.

⁵ Dɩ gaaraa nɛ kɔ ŋ dɩa tɩtaŋɩŋ, bɛɛ kʋŋ nɛ ba yie ŋaa? Ba yie gaa kɩalɩŋ ba sɩ cho nɛ. Dɩ girep tɩɩ-nɛŋ tɔrʋrɔɔ nɛ kɔ ŋ girep tɩɩsɩŋ tʋɔŋ, ba yie tɔrɛ aŋ ka mʋa nɛ.

⁶ Ama, ba jaŋ gbille paa Ɛsɔ dʋa kala, kɩalɩŋ kala sɩ faa.

⁷ Ŋ sɩŋŋaa jaŋ kiriŋ ta ŋ tinteeŋ lɛ, ŋ nandɔnsʋŋ jaŋ nyɩsɩŋ a yuo diiŋ, ŋ dɩ nɩalɩŋ sɩ gbaara didii kɩaa jaŋ dɩdaa dɩ ba kɛnɩŋ, ama ŋ bɩ jaŋ jɩŋ.”

⁸ Ŋɩɩ nɛ La Tɩɩna bɩra bʋl, “Tapʋlɩɩ-la mɩ sɩ jaŋ dɔgɩsɛ Ɛdɔm nɩaa, mɩ jaŋ kpʋ ʋ wʋjɩnnaa arɩ nɩalɩŋ sɩ jɩŋ wɩaa sɩaa Ɛsɔ doho nɩaa tʋɔŋ.

⁹ Tɛmaŋ nɩaa, fawʋllʋŋ jaŋ faasa jʋʋ ma laalɩyuori duoruŋ, ka dɩ ba kpʋ Ɛdɔm tinteeŋ nɩaa kala.

¹⁰ A tɩŋ ŋ sɩ kɛŋ ŋ naambie Jekɔb yuo yuosuŋ wɩaa, hɩɩsɩŋ jaŋ diiŋ. Ba jaŋ cheyiŋ ta a kaa mʋ wuu.

¹¹ Tapʋlɩɩ-la fa sɩ maga dɩ ŋ pɛ Jerusalɛm lɛ, ŋ chɩna ta jɩa nɛ aŋ ka ʋ dʋndɔŋŋɔɔ kʋ fʋga jʋʋ ʋ boi-baalaa a chʋŋ ʋ dʋa kala, a kaa kpaa dɔŋɔ. Ŋ ma fa nagɛ ba dɔŋɔ nɛ.

¹² Ʋ fa bɩ maga ŋ bee gʋʋnɛ ŋ naambie tapʋlɩɩ-la wɩaa sɩ jʋʋ, koo dɩ ŋ jʋjʋɔsɛ tapʋlɩɩ-la ba sɩ chei Juda nɩaa koo ŋ sisieri ba lɛ a tɩŋ wɩaa sɩ jʋʋba.

¹³ Ʋ fa bɩ maga dɩ ŋ to mɩ nɩaa boi-baalaa jʋʋ ba taŋ bʋa-la lɛ wʋlɔrʋnʋŋ sɩ jʋʋba koo ŋ bee gʋʋnɛba koo ŋ fʋga laa ba kɩaa a tɩŋ wʋlɔrʋnʋŋ sɩ jʋʋba wɩaa.

¹⁴ Ŋ fa bɩ maga dɩ ŋ kɛrɛ wombiee lɛ a kɛsɛ nɩalɩŋ sɩ faa lɛl ba dʋndɔŋŋɔɔ nɩsɩŋ lɛ, koo a kɛsɛ nɩalɩŋ sɩ ka a bɩra kaa mʋ pɩ ba dʋndɔŋŋɔɔ tapʋlɩɩ-la wɩaa sɩ jʋʋba.

¹⁵ Mɩ-na ma Tɩɩna tapʋlɩɩ-la kpaga nɛ dɩ mɩ dɔgɩsɛ tinteyee nɩaa kala. Ɛdɔm, wɩalɩŋ ŋ sɩ ŋaa ba tɩtɩa nɛ mɩ jaŋ joŋo ŋaa ŋ lɛ, ŋ wʋŋaalaa kala jaŋ gʋra nyʋa ŋ nyuŋ lɛ.

¹⁶ Mɩ nɩaa sɩ faasa na hɛɛŋ ŋɩɩ mɩ peel-zɔŋ-la nyuŋ, ŋɩɩ tɩtɩa nɛ tinteye-la kala nɩaa ma jaŋ faasa na hɛɛŋ a mʋ lɛl.

¹⁷ Ama Zaayɔŋ peel-la nyuŋ nɛ laatanɩŋ jaŋ hɛ, ʋ jaŋ ŋaa lee sɩ bɩ disiniŋ kɛnɛ, dɩ Jekɔb doho nɩaa tɩɩ ʋ dʋa kala.

¹⁸ Jekɔb doho nɩaa jaŋ nagɛ nyiniŋ, dɩ Josɛf doho nɩaa ma nagɛ nyiŋgeliŋ, a joŋ Ɛsɔ doho nɩaa sɩ nagɛ ya-hɩlɩŋ dii. Nʋʋkala bɩ jaŋ ka Ɛsɔ doho nɩaa tʋɔŋ. Mɩ-na ma TƖƖNA nɛ bʋla.

¹⁹ Nɛgɛf nɩaa jaŋ laa Ɛsɔ tinteeŋ tɩɩ, dɩ nɩalɩŋ sɩ hɛ dundollu-la sɩ hɛ peeliŋ bʋbʋɔŋ ma laa Fɩlɩsɩtɩa nɩaa tinteeŋ. Ba jaŋ laa Efirem arɩ Samarɩa tinteeŋ, ka dɩ Bɛnjamɩŋ ma tɩɩ Gɩlɩad tinteeŋ.

²⁰ Iziral tɩmma-la sɩ mʋ yoŋ-baga jaŋ mɩɩra kɔ ba tinteeŋ, a laa tintee-la kala a kaa mʋ yi Zarɛfaf tinteeŋ. Jerusalɛm nɩalɩŋ ba sɩ kaa mʋ yoŋ-baga sɩ kʋ hɛ Sɛfarad tinteeŋ lɛ jaŋ laa Nɛgɛf tasɩŋ kala tɩɩ.

²¹ Nɩduoruŋ jaŋ lɩɩ Zaayɔŋ peel-la lɛ a yuo dii Ɛsɔ doho nɩaa a bibemba, dɩ kuorii-la ŋaa mɩ-na ma TƖƖNA kʋŋ.”