NƐHƖMAAYA 1 - WƖA TENIŊ

Nɛhɩmaaya Wɩɩsʋlʋŋ

¹ Wɩalɩŋ Hakalɩa nanʋala Nɛhɩmaaya sɩ bʋla: Atazɛzɛs sɩ dii Pɛsɩa tinteeŋ kuoruŋ ʋ jɩsɩŋ mara tʋɔŋ, chɛnɛ-la ba sɩɩ yɩrɛ Kɩsɩlɛ lɛ, dɩ mɩ-na Nɛhɩmaaya hɛ dɩ-duo-la ba sɩɩ yɩrɛ Sʋsa sɩ ŋaa ba tabalɩŋ lɛ.

² Mɩ naambiiriŋ dɔŋɔ ba sɩɩ yɩrɛ Hanani arɩ baalaa dɔnsʋŋ lɩɩ Juda tinteeŋ kɔ. Ŋɩɩ nɛ mɩ pɩɛsɛba a mʋ tɩgɛ Juu tɩŋŋaa nɩkaana-la sɩ bɩ sʋba aŋ lɩɩ yoŋ-baga kɔ, a bɩra pɩɛsɛ ba Jerusalɛm ma wɩaa.

³ Ŋɩɩ nɛ ba bʋla pɩmɛ, “Nɩalɩŋ sɩ bɩ sʋba yoŋ-baga lɛ mɩɩra kɔ tintee-la nɛ a chaasa hɛ wʋwalɩmaa arɩ hɩɩsɩŋ tʋɔŋ. Jebii-la sɩ golli Jerusalɛm kala nɛ ba ŋmoo lo a nyɩgɛ ʋ boi-baalaa kala.”

⁴ Mɩ sɩ nɩɩ wɩaa deemba, ŋɩɩ nɛ mɩ hɔŋ a yel. Mɩ yel tapʋl daŋ, a vɔɔ niiŋ a chʋɔlɛ Wɩa sɩ hɛ ʋ jaŋ lɛ.

⁵ Ŋɩɩ nɛ mɩ bʋl, “Ou, La TƖƖNA Wɩa, ŋ sɩ hɛ ŋ jaŋ lɛ, ŋ kɛŋ doluŋ nɛ woruŋ, la chaasa fɩfáŋ. Ŋ kɛŋ nii-la sɩ hɛ ŋ dɩ ŋ nɩaa pɛgɛ kaa tɩtɩŋ nɛ arɩ wʋtɩtɩɩ, nɩalɩŋ sɩ choŋ a tuto ŋ wʋdagaa.

⁶ La TƖƖNA, suri sɩaa pɩmɛ, aŋ jegile nɩɩ mɩ-na ŋ tɩntɩnna teeŋ, ŋɩɩ mɩ sɩɩ sʋlʋŋ wɩɩhɛyɛ arɩ tɩtaŋɩŋ a pɩpɩ ŋ tɩntɩnnaa, Iziral tɩŋŋaa. Mɩ dagɛ wʋbɔmɔ-la la Iziral tɩŋŋaa sɩ ŋaa ŋ lɛ aa pɩŋ nɛ. Mɩ dɩ mɩ naabalɩmaba kala ŋaa wʋbɔŋŋɔɔ nɛ ŋ lɛ.

⁷ La ŋaa wʋbɔŋŋɔɔ nɛ ŋ lɛ, a bɩ wɩalɩŋ ŋ sɩ daga to. La bɩ ŋ niiriŋ arɩ wombie-la ŋ sɩ to ŋ tɩntɩnna Mosis lɛ a joŋo dagɛla to.

⁸ La TƖƖNA, liisi wɩalɩŋ ŋ sɩ bʋla pɩ ŋ tɩntɩnna Mosis a bʋl: ‘Dɩ ma Iziral tɩŋŋaa nɛ bɩ wʋtɩtɩɩ kɛnɛ mɩ teeŋ, mɩ jaŋ kɛmma pɩsa hɛ tintee-wogusuŋ lɛ.

⁹ Ama dɩ ma nɛ bɩra mɩɩra kɔ mɩ teeŋ a ŋɩŋaa wɩalɩŋ mɩ sɩ dagɛma, dɩ ma nɩalɩŋ ba sɩ kɛsɛ mʋ yoŋ-baga nɛ paala hɛ dɩ-bolii ma, mɩ jaŋ kɛmba lɩɩ nɩmɛ a kaa kɔ lee-la mɩ sɩ lɩɩsa dɩ ba chʋɔlɛmɛ nɩmɛ.’

¹⁰ Ba ŋaa ŋ tɩntɩnnaa arɩ ŋ nɩaa nɛ. Ba nɛ ŋ kɛŋ ŋ dol-balɩŋ arɩ ŋ naduo-la laa ta ŋɩɩ.

¹¹ Mɩ Tɩɩna, jegile nɩɩ mɩ-na ŋ tɩntɩnna sʋla arɩ ŋ tɩntɩnnaa dɔnsʋŋ Wɩɩsʋlʋŋ, la nɩalɩŋ sɩ choŋ a ziziliŋ. Leŋ dɩ mɩ-na ŋ tɩntɩnna cheŋ nyu-sɩmɩŋ, a leŋ dɩ kuoro tʋɔŋ tɔrɛ mɩ nyuŋ.” Bʋa deeŋ lɛ dɩ mɩ nɛ fa ŋaa nɩɩ-la sɩɩ kori kuoru-la nyʋnyʋala.