NAMBABA 35 - WƖA TENIŊ

Tasɩ-la ba sɩ lɩɩsa pɩ Levi doho nɩaa

¹ Bʋa-la lɛ Iziral tɩŋŋaa sɩ hɔŋ Mʋab tintee-taalɩsɩ-la sɩ kpagɛ Jɔdaŋ fuo-la, Jeriko cholo lɛ nɛ La TƖƖNA bʋla pɩ Mosis,

² “Bʋla pɩ Iziral tɩŋŋaa, tintee-la mɩ sɩ joŋo pɩba lɛ, ba lɩɩsɛ tasɩŋ dɔnsʋŋ a pɩ Levi doho nɩaa, aŋ keri ba pʋsʋŋ dɩ-diiliŋ ma a golli ba tasɩ-la a pɩba,

³ dɩ ba wuo kɛŋ tasɩŋ a jʋjʋʋ, a kɛŋ nɛsɩŋ, piesee, bʋʋnaa arɩ pʋsʋŋ dɔnsʋŋ arɩ ba dɩ-diiliŋ.

⁴ Pʋsʋ-la dɩ-diiliŋ maga dɩ ʋ chɩŋ jebii-la ba sɩ saa golli tasɩ-la, a duomi ŋɩɩ a mʋ yi naakieliŋ zɔɔ-banɛsɛ arɩ mahɩŋ balɩa arɩ fii.

⁵ A bɩra chɩŋ taŋ-la tʋtʋɔbaanɩŋ a kaa mʋʋ yi pʋsʋ-la dɩ-diiliŋ dɩdɛrɩŋ, ʋ duomuŋ maga dɩ ʋ ŋaa naakieliŋ zɔlɔ nibi a golli taŋ-la kala.

Tasɩ-la ba sɩ jaŋ fá mʋ yuori

⁶ Ma jaŋ pɩ Levi doho nɩaa tasɩŋ balɩdʋ, dɩ nʋʋ nɛ bɩ sɛnɛ aŋ kpʋ nʋʋ, dɩ ʋ wuo fá mʋ yuori. Ma ha jaŋ pɩba tabalaa mahɩŋ balɩa arɩ balɩa ma a pɛ.

⁷ Tasɩ-la kala ma sɩ jaŋ joŋo pɩ Levi doho nɩaa jaŋ ŋaa tabalaa mahɩŋ balɩa arɩ chori a pɛ ba pʋsʋŋ dɩ-diilee lɛ.

⁸ Iziral tɩŋŋaa sɩ jaŋ joŋ tabala-la pɩ Levi doho nɩaa, doho-la nɩaa sɩ yʋga, ŋ jaŋ pɩba tasɩŋ yʋgɛ, doho-la ma nɩaa sɩ muuro, ŋ jaŋ pɩba tasɩŋ baŋmɛnɛ.”

⁹ Ŋɩɩ nɛ La TƖƖNA bʋla pɩ Mosis,

¹⁰ “Bʋla pɩ Iziral tɩŋŋaa, ‘Dɩ ma nɛ chol Jɔdaŋ fuo-la a mʋ Kɛnaŋ tinteeŋ,

¹¹ má lɩɩsɛ tasɩŋ dɔnsʋŋ dɩ nʋʋ nɛ bɩ sɛnɛ aŋ kpʋ nʋʋ, dɩ ʋ fá mʋ yuori.

¹² Leree deemba jaŋ hɛ nɩmɛ, dɩ nʋʋ nɛ bɩ sɛnɛ aŋ kpʋ nʋʋ ʋ jaŋ fá mʋ jʋʋ dɩ ba sɩ́ ʋ kpʋ a tiŋ ŋɩɩ chɩmɩŋ, ka dɩ ba wuo diiu sarɩya.

¹³ Tasɩŋ deemba balɩdʋ nɛ jaŋ hɛ nɩmɛ dɩ ma fá mʋ aa yuori.

¹⁴ Batori jaŋ hɛ Jɔdaŋ fuo-la cholo wɩɩpɔsʋŋ dɩɩrɩŋ, dɩ batori ma hɛ Kɛnaŋ tinteeŋ lɛ.

¹⁵ Tasɩŋ deemba balɩdʋ jaŋ ŋaa tasɩ-la Iziral tɩŋŋaa arɩ nɩwogusu-la sɩ hɛ ba tʋɔŋ kala sɩ jaŋ fá mʋ aa yuori dɩ ba kʋŋ nɛ bɩ sɛnɛ aŋ kpʋ nʋʋ.

¹⁶ Dɩ nʋʋ nɛ joŋ hɔɔŋ a ŋmoo ʋ dɔŋɔ dɩ ʋ sʋʋ, tɩɩna ŋaa nɩkpʋʋrʋ nɛ, má kpʋ ʋ ma.

¹⁷ Dɩ nʋʋ nɛ joŋ tabɩɩŋ, a jɩŋ arɩ tabɩɩ-la jaŋ wuo kpʋ nɩa, ka dɩ ʋ joŋo yagɛ nʋʋ dɩ ʋ sʋʋ, ʋ ma ŋaa nɩkpʋʋrʋ nɛ. Má kpʋ ʋ ma.

¹⁸ Koo dɩ nʋʋ nɛ joŋ daaŋ a jɩŋ arɩ daa-la jaŋ wuo kpʋ nɩa, ka dɩ ʋ joŋo ŋmoo nʋʋ dɩ ʋ sʋʋ, ʋ ŋaa nɩkpʋʋrʋ nɛ, ʋ maga dɩ ma kpʋ ʋ ma.

¹⁹ Dɩ nɩɩ-la ʋ sɩ kpʋa naambii nɛ cheŋ nɩkpʋʋrʋ-la, ʋ maga dɩ ʋ ma kpʋʋ.

²⁰ Dɩ nʋʋ nɛ bɩ ʋ dɔŋɔ tɩɩna cho, a yigu lo koo a joŋ kʋŋ yagʋ,

²¹ koo dɩ nɩsɩŋ nɛ ʋ joŋo ŋmobu dɩ ʋ sʋʋ, tɩɩna ŋaa nɩkpʋʋrʋ nɛ, ʋ maga dɩ ba kpʋʋ. Nɩɩ-la sɩ sʋba naambii nɛ na nɩkpʋʋrʋ-la, ʋ maga dɩ ʋ kpʋʋ.

²² Dɩ nʋʋ nɛ bɩ jɩŋ aŋ kpʋ nʋʋ ʋ sɩ bɩ bɛrɛ, dɩ ʋ yigu lo nɛ koo dɩ kʋŋ nɛ ʋ joŋo yagʋ,

²³ koo dɩ nʋʋ nɛ bɩ ʋ dɔŋɔ tɩɩna na aŋ joŋ tabɩɩŋ a yuo dɩ ʋ mʋ yagʋ dɩ ʋ sʋʋ,

²⁴ wɩaa deemba kʋŋkala lɛ Iziral tɩŋŋaa maga dɩ ba jʋʋ wɩɩ-la tʋɔŋ a na nɩɩ-la kɩaa sɩ sɩma.

²⁵ Iziral tɩŋŋaa maga dɩ ba pɔ nɩkpʋʋrʋ-la a kɛnʋ mɩɩra mʋ taŋ-la ʋ fa sɩ fá mʋ yuori. Ʋ maga dɩ ʋ hɛ taŋ-la lɛ nɛ a mʋ yi bʋa-la lɛ Wɩɩsʋllɩ sɩpaalaaraa kʋhɩaŋ sɩ hɛ lee-la sɩ jaŋ sʋʋ.

²⁶ Ama dɩ nɩkpʋʋrʋ-la nɛ lɩɩ taŋ-la ʋ sɩ fá mʋ yuori tʋɔŋ,

²⁷ dɩ nɩɩ-la ʋ sɩ kpʋa naambiiriŋ kʋŋ naʋ, ʋ jaŋ wuo kpʋʋ. Dɩ ʋ nɛ ŋaa ŋɩɩ, ʋ bɩ wɩɩkala cheye.

²⁸ Nɩkpʋʋrʋ-la maga dɩ ʋ hɛ taŋ-la ʋ sɩ fá mʋ yuori tʋɔŋ nɛ a kaa mʋ bʋa-la lɛ Wɩɩsʋllɩ sɩpaalaaraa kʋhɩaŋ sɩ hɛ lee-la sɩ jaŋ sʋʋ. Dɩ ʋ nɛ sʋba, ʋ jaŋ wuo mɩɩra mʋ lee-la ʋ sɩ lɩa.

²⁹ Ma doho nɩaa kala maga dɩ ma tuto wombiee deemba nɛ lee na-kala ma sɩ hɛ.

³⁰ Dɩ nʋʋ nɛ kpʋ ʋ dɔŋ, ʋ maga dɩ nɩaa yi balɩa nɛ a pɛ na arɩ wʋtɩtɩɩ nɛ, ka dɩ ba-na kpʋʋ. Nɩbala dʋndʋŋ bɩ jaŋ wuo na wɩɩ dɩ ba tɩŋ ŋɩɩ wɩaa a kpʋ nʋʋ.

³¹ Dɩ nʋʋ nɛ kpʋ ʋ dɔŋɔ, ʋ bɩ jaŋ wuo time laa ʋ mɩɩsɩŋ, ʋ maga dɩ ba kpʋ ʋ ma.

³² Nʋʋ bɩ jaŋ wuo time laa ʋ tɩtɩa a lɩɩ taŋ-la ʋ sɩ fá mʋ yuori lɛ a mɩɩra mʋ ʋ jaŋ, dɩ Wɩɩsʋllɩ sɩpaalaaraa kʋhɩaŋ-la sɩ hɛ taŋ-la lɛ nɛ bɩ sʋba.

³³ Má sɩ́ nɩaa kpʋ a ŋaa disiniŋ hɛ tintee-la ma sɩ hɔnɔ lɛ. Dɩ ma nɛ ŋaa ŋɩɩ, ma bɩ jaŋ wuo pɩɩsɛ tintee-la disiniŋ ta, see dɩ ma kpʋ nɩkpʋʋrʋ-la.

³⁴ Má sɩ́ disiniŋ ŋaa hɛ tintee-la lɛ ma sɩ hɔnɔ, bɛɛ wɩaa mɩ nɛ ma TƖƖNA, mɩ hɛ ma Iziral tɩŋŋaa tʋɔŋ nɛ.’ ”