NAMBABA 32 - WƖA TENIŊ

Iziral doho doho-la sɩ hɔŋ Jɔdaŋ fuo-la cholo

¹ Rubiŋ doho nɩaa arɩ Gad doho nɩaa fa kɛŋ pʋsʋŋ nɛ woruŋ. Ŋɩɩ nɛ ba na arɩ Jaza tinteeŋ arɩ Gɩlɩad tinteeŋ zɔmɔ arɩ pʋsʋŋ dɩɛsɩŋ.

² Ba sii mʋ Mosis arɩ Wɩɩsʋllɩ sɩpaalaara Elieza arɩ Iziral tɩŋŋaa sɩpaalaaraa teeŋ a bʋl,

^3-4 “Tasɩŋ deemba nɛ La TƖƖNA pɛ la lɛ la yuo laa: Atarɔf, Dɩbɔŋ, Jaza, Nɩmɩra, Hɛsɩbɔŋ, Ɛlɩalɩ, Sɛbam, Nebo arɩ Bioŋ, tasɩ-la saa zɔmɔ nɛ woruŋ arɩ pʋsʋŋ dɩɛsɩŋ, ka la ma kɛŋ pʋsʋŋ.

⁵ Dɩ ma tʋɔŋ nɛ tɔrɛ la nyuŋ, má joŋ tasɩ-la tinteeŋ pɩla dɩ ʋ ŋaa la kʋŋ, dɩ la bɩra sɩ́ Jɔdaŋ fuo-la chol.”

⁶ Ŋɩɩ nɛ Mosis pɩɛsɛ Gad doho nɩalɩŋ arɩ Rubiŋ doho nɩalɩŋ, “Maa chɛ dɩ ma hɔŋ daha nɛ ka dɩ ma naambiiriŋ mʋ laalɩŋ?

⁷ Bɛɛ nɛ tɩɩ maa chɛ dɩ ma leŋ dɩ Iziral tɩŋŋaa nandaasɩŋ yʋɔrɛ dɩ ba sɩ́ wuo chol a jʋʋ tintee-la La TƖƖNA sɩ joŋo pɩba?

⁸ Ma nyɩmmaba ma fa ŋaa ŋɩɩ tɩtɩa nɛ, bʋa-la lɛ la fa sɩ hɛ Kadɛs Banɩa tintee-hɩlɩɩ-la lɛ, ka mɩ tɩmba dɩ ba mʋ beŋ tintee-la La TƖƖNA sɩɩ chɛ ʋ joŋo pɩla.

⁹ Ba sɩ mʋ yi Ɛsɩkɔl fuonaa-la a na tintee-la aŋ mɩɩra kɔ, ba bʋl wɩaa a yʋɔrɛ Iziral tɩŋŋaa kala nandaasɩŋ nɛ, dɩ ba sɩ́ wuo mʋ tintee-la La TƖƖNA sɩ sɩ ʋ jaŋ joŋo pɩba.

¹⁰ Tapʋlɩɩ-la, La TƖƖNA baanɩŋ sie nɛ ba nyuŋ, ʋ ŋmɩɛsa hɛ ba lɛ.

¹¹ Ʋ sɩ, ‘A tɩŋ ba sɩ bɩ mɩ to arɩ ba tʋɔŋ kala, baala-la kala sɩ lɩɩ Ijipiti tinteeŋ lɛ a yi jɩsɩŋ mara koo a kɩɩ ŋɩɩ bɩ jaŋ na tintee-la mɩ sɩ hɛ niiŋ pɩ Abɩraham, Aɩzɩk arɩ Jekɔb arɩ mɩ jaŋ joŋo pɩba,

¹² see Jefuni sɩ ŋaa Keni tɩɩna nanʋala Kalɩb arɩ Nuŋ nanʋala Josua. Ba dʋndʋŋa nɛ to wɩalɩŋ mɩ-na ma TƖƖNA sɩ daga arɩ ba tʋɔŋ kala.’

¹³ Ŋɩɩ nɛ La TƖƖNA na baanɩŋ Iziral tɩŋŋaa kala nyuŋ a leŋ ba baarɛ tintee-hɩlɩŋ lɛ ŋɩɩ jɩsɩŋ mahɩŋ balɩa, a mʋ yi bʋa-la lɛ nɩalɩŋ kala fa sɩ ŋaa wʋbɔŋ-la sɩ sʋʋ dɛrɛ.

¹⁴ Ma nɩaa deemba, wʋbɔŋ ŋaaraa, ma ma bɩra sii chɩŋ ma nyɩmmaba wʋbɔmɔ-la tɩtɩa ba fa sɩɩ ŋaa lɛ nɛ, aa chɛ dɩ La TƖƖNA baanɩŋ faasa sii Iziral tɩŋŋaa nyuŋ.

¹⁵ Dɩ ma nɛ mɩɩrɛ La TƖƖNA harɩŋ, ʋ jaŋ bɩra vɩa Iziral tɩŋŋaa deemba ta tintee-hɩlɩŋ deeŋ lɛ dɩ ba sʋʋ. Dɩ ʋ nɛ ŋaa ŋɩɩ, ma nɛ jaŋ laa cheeriŋ.”

¹⁶ Ŋɩɩ nɛ Rubiŋ doho nɩalɩŋ arɩ Gad doho nɩalɩŋ mʋ Mosis teeŋ a bʋla pʋ, “Laa chɛ dɩ la saa la pʋsʋŋ dɩɩsɩŋ daha nɛ, aŋ saa tabalaa ma a pɩ la haalaa arɩ la biiriŋ.

¹⁷ Ama la kɛŋ la tɩtɩa nɛ dɩ la laa Iziral tɩŋŋaa sɩpaaŋ a yuo laalɩŋ kɛmba mʋ lee-la ba sɩɩ chɛ, ka la biiriŋ arɩ la haalaa hɛ tabala-la la sɩ jaŋ saa kɛrɛ golli lɛ, dɩ nɩalɩŋ sɩ hɛ tintee-la lɛ sɩ́ wuo ŋaaba wɩɩkala.

¹⁸ La bɩ jaŋ mɩɩrɛ Iziral tɩŋŋaa harɩŋ, see ba kʋŋkala sɩ na ʋ dɩhɔnʋŋ.

¹⁹ Dɩ la nɛ kɛmba chol Jɔdaŋ fuo-la, la-na bɩra bɩ jaŋ laa tintee kala nɩmɛ, bɛɛ wɩaa la-na folo laa la toruŋ nɛ daha, wɩɩpɔsʋŋ dɩɩrɩŋ.”

²⁰ Ŋɩɩ nɛ Mosis bʋla pɩba, “Dɩ ma nɛ jaŋ ŋaa wɩɩ-la ma sɩ bʋla, má kɛŋ ma tɩtɩa La TƖƖNA sɩpaaŋ a mʋ laal-la.

²¹ Dɩ ma kala nɛ jaŋ nyɩgɩlɛ a to La TƖƖNA niiŋ a chol Jɔdaŋ fuo-la, a yuo la dʋndɔŋŋɔɔ, dɩ La TƖƖNA pɛ la lɛ a yuo diiba,

²² a laa ba tinteeŋ, ŋɩɩ harɩŋ ma laa ma tɩtɩa La TƖƖNA arɩ Iziral tɩŋŋaa nɩsɩŋ lɛ nɛ, ma jaŋ wuo mɩɩra mʋ lee-la. Ŋɩɩ nɛ La TƖƖNA jaŋ jɩŋ arɩ ma nɛ tɩɩ tintee-la.

²³ Ama dɩ ma nɛ bɩ ŋɩɩ ŋaa, La Tɩɩna teeŋ ma ŋaa wʋbɔŋ nɛ, ʋ jaŋ dɔgɩsɛma.

²⁴ Má saa jasɩŋ pɩ ma haalaa arɩ ma biiriŋ, a saa ma pʋsʋŋ dɩɩsɩŋ ma a hɛ ma pʋsʋŋ, a ŋaa wɩalɩŋ kala ma sɩ sɩ ma jaŋ ŋaa.”

²⁵ Ŋɩɩ nɛ Gad doho nɩaa arɩ Rubiŋ doho nɩaa bʋla pɩ Mosis, “La jaŋ ŋaa wɩalɩŋ kala ŋ sɩ daga.

²⁶ La biiriŋ arɩ la haalaa arɩ la pʋsʋŋ kala jaŋ ka Gɩlɩad tasɩ-la lɛ.

²⁷ Ama la baalaa kala nyɩgɩla nɛ dɩ la mʋ laal-la arɩ La TƖƖNA sɩ dagɛ ŋɩɩ. La jaŋ chol Jɔdaŋ fuo-la a yuo laal-la arɩ ŋ sɩ dagɛ ŋɩɩ.”

²⁸ Ŋɩɩ nɛ Mosis dagɛ wɩaa pɩ Wɩɩsʋllɩ sɩpaalaara Elieza arɩ Nuŋ nanʋala Josua arɩ Iziral tɩŋŋaa dɩa nɩhɩasɩŋ a mʋʋ tɩgɛ nɩalɩŋ lɛ.

²⁹ Ʋ sɩ, “Dɩ Gad doho nɩaa arɩ Rubiŋ doho nɩaa nɛ kɛŋ ba tɩtɩa hɛ dɔŋɔ a chol Jɔdaŋ fuo-la, a mʋ laalɩŋ arɩ La TƖƖNA sɩ dagɛ ŋɩɩ, a pɛ ma lɛ dɩ ma yuo laa tintee-la, má joŋ Gɩlɩad tinteeŋ pɩba dɩ ʋ ŋaa ba kʋŋ.

³⁰ Ama dɩ ba nɛ bɩ ma lɛ pɛ a chol Jɔdaŋ fuo-la a yuo laal-la, ba ma jaŋ laa ba kpaalɩŋ Kɛnaŋ tinteeŋ lɛ.”

³¹ Ŋɩɩ nɛ Gad doho nɩaa arɩ Rubiŋ doho nɩalɩŋ bʋl, “La jaŋ ŋaa wɩalɩŋ kala La TƖƖNA sɩ bʋla.

³² La jaŋ to La TƖƖNA niiŋ a chol Jɔdaŋ fuo-la a mʋ Kɛnaŋ tinteeŋ a yuo laalɩŋ, ka dɩ Jɔdaŋ wɩɩpɔsʋŋ dɩɩrɩŋ tinteeŋ deeŋ ŋaa la kʋa.”

³³ Ŋɩɩ nɛ Mosis joŋ Amɔrɩ tɩŋŋaa kuoro Sɩhɔŋ tinteeŋ arɩ Basaŋ tɩŋŋaa kuoro Ɔgɩ tinteeŋ arɩ tasɩ-la dɔnsʋŋ sɩ golliba a pɩ Gad doho nɩaa, Rubiŋ doho nɩaa arɩ Josɛf nanʋala Manasɛ doho nɩaa kpaa magɛ dɔŋɔ-la.

³⁴ Ŋɩɩ nɛ Gad doho nɩaa wasa saa Dɩbɔŋ, Atarɔf, Arʋa,

³⁵ Atɩrɔf Sɔfaŋ, Jaza, Jogbeha,

³⁶ Bɛf-Nɩmɩra arɩ Bɛf-Haraŋ, a saa kɛrɛ golli ba kala, aŋ saa ba pʋsʋŋ dɩɩsɩŋ ma.

³⁷ Rubiŋ doho nɩaa ma wasa saa Hɛsɩbɔŋ, Ɛlɩalɩ, Kɩrɩatam

³⁸ a pɛ Nebo, Baal Mɩɔŋ arɩ Sɩbɩma (ba kɛŋ Nebo arɩ Baal Mɩɔŋ yɩraa bɩrɩmɛ nɛ), aŋ pɩba yɩrɩ-falaa.

³⁹ Ŋɩɩ nɛ Manasɛ nanʋala Makɩɩ doho nɩaa ma mʋ yuo dii Gɩlɩad a kiri Amɔrɩ tɩmma-la fa sɩ hɔŋ nɩmɛ.

⁴⁰ Mosis joŋ Gɩlɩad tinteeŋ a pɩ Makɩɩ tɩŋŋaa, Manasɛ doho nɩaa, ba hɔŋ nɩmɛ.

⁴¹ Jaa ma sɩ ŋaa Manasɛ doho nʋʋ, ʋ ma yuo dii tabiisi-la dɔnsʋŋ a hɛ lere-la yɩraa Havɔf Jaa.

⁴² Noba ma yuo dii Kenaf arɩ tabiisi-la sɩ gollu, aŋ joŋ Noba, ʋ tɩtɩa yɩrɩŋ a hɛ pɩ lee-la.