NAMBABA 26 - WƖA TENIŊ

Ba bɩra dɩɩsɛ Iziral tɩŋŋaa lɩa

¹ Nyanyal-bɔŋ-la sɩ jʋʋ Iziral tɩŋŋaa, ŋɩɩ harɩŋ La TƖƖNA bʋl wɩaa pɩ Mosis arɩ Elieza, Arɔŋ sɩ ŋaa Wɩɩsʋllɩ sɩpaalaara nanʋala.

² Ʋ sɩ, “Má dɩɩsɛ Iziral tɩŋŋaa dɩa dɩa, baal na-kala sɩ yi jɩsɩŋ mara koo a kɩɩ a jaŋ wuo mʋ laalɩŋ.”

³ Ŋɩɩ nɛ Mosis arɩ Wɩɩsʋllɩ sɩpaalaara Elieza bʋl wɩaa a pɩ Iziral tɩŋŋaa. Bʋa-la lɛ dɩ ba hɛ Mʋab tintee-taalɩsɩ-la sɩ kpagɛ Jɔdaŋ fuo-la, Jeriko cholo.

⁴ Ba sɩ, “Má dɩɩsɛ baal na-kala sɩ yi jɩsɩŋ mara, koo a kɩɩ ŋɩɩ arɩ La TƖƖNA sɩ dagɛ ŋɩɩ.” Iziral tɩmma-la sɩ kʋ lɩɩ Ijipiti tinteeŋ lɛ nɛ ŋ-la:

⁵ Jekɔb bii-bumbuŋ Rubiŋ doho nɩaa nɛ ŋ-la: Hanɔk, ʋ nɛ kʋ ŋaa Hanɔk tɩŋŋaa gentine. Pallu, ʋ nɛ kʋ ŋaa Pallu tɩŋŋaa gentine.

⁶ Hɛzɩrɔŋ, ʋ ma nɛ kʋ ŋaa Hɛzɩrɔŋ tɩŋŋaa gentine. Kaamɩ, ʋ nɛ kʋ ŋaa Kaamɩ tɩŋŋaa gentine.

⁷ Rubiŋ doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ batori arɩ zɔɔ-balɩpɛ arɩ mara arɩ fii nɛ.

⁸ Palu nanʋala nɛ fa Ɛlɩab.

⁹ Ɛlɩab ma hambolibiisiŋ nɛ fa Nɛmʋɛl, Dataŋ arɩ Abɩram. Dataŋ deeŋ arɩ Abɩram fa ŋaa Iziral tɩŋŋaa sɩpaalaaraa nɛ. Ba nɛ pɛ Kora arɩ ʋ harɩ-tooro-la lɛ ba vɩa La TƖƖNA niiŋ, aŋ nyɛsɛ Mosis arɩ Arɔŋ nyuŋ ŋɩɩ.

¹⁰ Ŋɩɩ nɛ tinteeŋ suri a paaba a pɛ Kora lɛ a liŋ. Kora harɩ-tooroo nɛ fa sʋba bʋa-la lɛ nyiniŋ sɩ joŋ baala-la zɔɔ-balɩa arɩ mahɩŋ balɩa arɩ fii dii. Ŋɩɩ ŋaa wɩɩ sɩ pɩna a chɩchagɩlɛ la Iziral tɩŋŋaa.

¹¹ Ama Kora doho nɩaa kala fa dee bɩ sʋba.

¹² Simioŋ doho nɩaa gentisiŋ nɛ ŋ-la: Nɛmʋɛl, ʋ nɛ kʋ ŋaa Nɛmʋɛl tɩŋŋaa gentine. Jamɩŋ, ʋ nɛ kʋ ŋaa Jamɩŋ tɩŋŋaa gentine. Jakɩŋ, ʋ ma nɛ kʋ ŋaa Jakɩŋ tɩŋŋaa gentine.

¹³ Zɛra, ʋ ma nɛ kʋ ŋaa Zɛra tɩŋŋaa gentine. Sawʋl, ʋ nɛ kʋ ŋaa Sawʋl tɩŋŋaa gentine.

¹⁴ Simioŋ doho nɩaa gentisiŋ nɛ ŋɩɩ. Baala-la ba sɩ dɩɩsa fa ŋaa nɩaa bʋɩ mara arɩ balɩa arɩ zɔɔ-balɩa nɛ.

¹⁵ Gad doho nɩaa gentisiŋ nɛ ŋ-la: Zefoŋ, ʋ nɛ kʋ ŋaa Zefoŋ tɩŋŋaa gentine. Hagi, ʋ nɛ kʋ ŋaa Hagi tɩŋŋaa gentine. Suni, ʋ nɛ kʋ ŋaa Suni tɩŋŋaa gentine,

¹⁶ Ozini, ʋ nɛ kʋ ŋaa Ozini tɩŋŋaa gentine. Ɛrɩ, ʋ nɛ kʋ ŋaa Ɛrɩ tɩŋŋaa gentine.

¹⁷ Arodi, ʋ nɛ kʋ ŋaa Arodi tɩŋŋaa gentine. Areli, ʋ nɛ kʋ ŋaa Areli tɩŋŋaa gentine.

¹⁸ Gad doho nɩaa gentisiŋ nɛ ŋɩɩ. Baala-la kala ba fa sɩ dɩɩsa ŋaa nɩaa bʋɩ mahɩŋ balɩa arɩ zɔɔ-banɔŋ nɛ.

¹⁹ Ɛɛ arɩ Onaŋ nɛ fa ŋaa Juda hambolibiisiŋ, ama ba sʋba nɛ Kɛnaŋ tinteeŋ lɛ.

²⁰ Juda doho nɩaa gentisiŋ nɛ ŋ-la: Sela, ʋ nɛ kʋ ŋaa Sela tɩŋŋaa gentine. Pɛrɛs, ʋ nɛ kʋ ŋaa Pɛrɛs tɩŋŋaa gentine. Zɛra, ʋ nɛ kʋ ŋaa Zɛra tɩŋŋaa gentine.

²¹ Pɛrɛs doho nɩaa nɛ ŋ-la: Hɛzɩrɔŋ, ʋ nɛ kʋ ŋaa Hɛzɩrɔŋ tɩŋŋaa gentine. Hamʋl, ʋ nɛ kʋ ŋaa Hamʋl tɩŋŋaa gentine.

²² Juda doho nɩaa gentisiŋ nɛ ŋɩɩ. Baala-la kala ba fa sɩ dɩɩsa ŋaa nɩaa bʋɩ mahɩŋ batori arɩ fii arɩ balɩdʋ arɩ zɔɔ-banɔŋ nɛ.

²³ Ɩsaka doho nɩaa gentisiŋ nɛ ŋ-la: Tola, ʋ nɛ kʋ ŋaa Tola tɩŋŋaa gentine. Pʋa, ʋ nɛ kʋ ŋaa Pʋa tɩŋŋaa gentine.

²⁴ Jasub, ʋ nɛ kʋ ŋaa Jasub tɩŋŋaa gentine. Sɩmɩrɔŋ, ʋ nɛ kʋ ŋaa Sɩmɩrɔŋ tɩŋŋaa gentine.

²⁵ Ɩsaka doho nɩaa gentisiŋ nɛ ŋɩɩ. Baala-la kala ba fa sɩ dɩɩsa ŋaa nɩaa bʋɩ mahɩŋ batori arɩ banɛsɛ arɩ zɔɔ-batori nɛ.

²⁶ Zebuluŋ doho nɩaa gentisiŋ nɛ ŋ-la: Sɛrɛd, ʋ nɛ kʋ ŋaa Sɛrɛd tɩŋŋaa gentine. Ɛlɔŋ, ʋ nɛ kʋ ŋaa Ɛlɔŋ tɩŋŋaa gentine. Jalɛl, ʋ nɛ kʋ ŋaa Jalɛl tɩŋŋaa gentine.

²⁷ Zebuluŋ doho nɩaa gentisiŋ nɛ ŋɩɩ. Baala-la kala ba fa sɩ dɩɩsa ŋaa nɩaa bʋɩ mahɩŋ batori arɩ zɔɔ-banɔŋ nɛ.

²⁸ Josɛf biiriŋ nɛ ŋaa Manasɛ arɩ Efirem.

²⁹ Manasɛ doho nɩaa gentisiŋ nɛ ŋ-la: Makɩɩ, ʋ nɛ kʋ ŋaa Makɩɩ tɩŋŋaa gentine (Makɩɩ nɛ fa lʋl Gɩlɩad).

³⁰ Gɩlɩad biiriŋ nɛ ŋ-la: Ieza, ʋ nɛ kʋ ŋaa Ieza tɩŋŋaa gentine. Hɛlɛk, ʋ nɛ kʋ ŋaa Hɛlɛk tɩŋŋaa gentine.

³¹ Asɩrɩɛl, ʋ nɛ ŋaa Asɩrɩɛl tɩŋŋaa gentine. Sɛkɛm, ʋ nɛ ŋaa Sɛkɛm tɩŋŋaa gentine.

³² Sɛmɩda, ʋ nɛ ŋaa Sɛmɩda tɩŋŋaa gentine. Hefa, ʋ nɛ ŋaa Hefa tɩŋŋaa gentine,

³³ Hefa nanʋala Zelofihad na fa bɩ hambolibiisiŋ lʋla, toloo dʋndʋŋa nɛ ʋ lʋl. Ba yɩraa nɛ ŋ-la: Mala, Nowa, Hogila, Mɩlɩka arɩ Tɩɩza.

³⁴ Manasɛ doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ fii arɩ balɩa arɩ zɔɔ-balɩpɛ nɛ.

³⁵ Efirem doho nɩaa arɩ ba gentisiŋ nɛ ŋ-la: Sutela, ʋ nɛ kʋ ŋaa Sutela tɩŋŋaa gentine. Bɛka, ʋ nɛ kʋ ŋaa Bɛka tɩŋŋaa gentine. Tahaŋ, ʋ nɛ kʋ ŋaa Tahaŋ tɩŋŋaa gentine.

³⁶ Sutela nanʋala nɛ Ɛraŋ, ʋ nɛ kʋ ŋaa Ɛraŋ tɩŋŋaa gentine.

³⁷ Efirem doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mara arɩ fii arɩ balɩa arɩ zɔɔ-banɔŋ nɛ. Josɛf nanʋala Efirem doho nɩaa nɛ ŋɩɩ.

³⁸ Bɛnjamɩŋ doho nɩaa gentisiŋ nɛ ŋ-la: Bɛla, ʋ nɛ kʋ ŋaa Bɛla tɩŋŋaa gentine. Asɩbɛl, ʋ nɛ kʋ ŋaa Asɩbɛl tɩŋŋaa gentine. Ahɩram, ʋ nɛ kʋ ŋaa Ahɩram tɩŋŋaa gentine.

³⁹ Sufam, ʋ nɛ kʋ ŋaa Sufam tɩŋŋaa gentine. Hufam, ʋ nɛ kʋ ŋaa Hufam tɩŋŋaa gentine.

⁴⁰ Bɛla doho nɩaa gentisiŋ nɛ ŋaa Aad arɩ Naamaŋ. Aad, ʋ nɛ kʋ ŋaa Aad tɩŋŋaa gentine. Naamaŋ, ʋ nɛ kʋ ŋaa Naamaŋ tɩŋŋaa gentine.

⁴¹ Bɛnjamɩŋ doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ banɔŋ arɩ zɔɔ-balɩdʋ nɛ.

⁴² Daŋ doho nɩaa gentisiŋ nɛ ŋ-la: Suham, ʋ nɛ kʋ ŋaa Suham tɩŋŋaa gentine. Daŋ doho nɩaa gentine nɛ ŋɩɩ.

⁴³ Ba kala ŋaa Suham tɩŋŋaa gentisiŋ nɛ. Baala-la ba fa sɩ dɩɩsa ŋaa nɩaa bʋɩ mahɩŋ batori arɩ banɛsɛ arɩ zɔɔ-banɛsɛ nɛ.

⁴⁴ Asa doho nɩaa gentisiŋ nɛ ŋ-la: Imina, ʋ nɛ kʋ ŋaa Imina tɩŋŋaa gentine. Isivi, ʋ nɛ kʋ ŋaa Isivi tɩŋŋaa gentine. Bɛrɩa, ʋ nɛ kʋ ŋaa Bɛrɩa tɩŋŋaa gentine.

⁴⁵ Bɛrɩa biiriŋ nɛ ŋ-la: Hɛba, ʋ nɛ kʋ ŋaa Hɛba tɩŋŋaa gentine. Malɩkɩɛl, ʋ nɛ kʋ ŋaa Malɩkɩɛl tɩŋŋaa gentine.

⁴⁶ (Asa fa kɛŋ tolo nɛ, baa yɩrɛ Sɛra.)

⁴⁷ Asa doho nɩaa gentine nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ fii arɩ batori arɩ zɔɔ-banɛsɛ nɛ.

⁴⁸ Nafɩtalɩ doho nɩaa gentisiŋ nɛ ŋ-la: Jazɛɛl, ʋ nɛ kʋ ŋaa Jazɛɛl tɩŋŋaa gentine. Guni, ʋ nɛ kʋ ŋaa Guni tɩŋŋaa gentine.

⁴⁹ Jeza, ʋ nɛ kʋ ŋaa Jeza tɩŋŋaa gentine. Sɩlɛm, ʋ nɛ kʋ ŋaa Sɩlɛm tɩŋŋaa gentine.

⁵⁰ Nafɩtalɩ doho nɩaa gentisiŋ nɛ ŋɩɩ. Baala-la ba fa sɩ dɩɩsa ŋaa nɩaa bʋɩ mahɩŋ balɩa arɩ banɔŋ arɩ zɔɔ-banɛsɛ nɛ.

⁵¹ Iziral tɩŋŋaa baala-la kala ba sɩ dɩɩsa fa ŋaa nɩaa bʋɩ zɔɔ-balɩdʋ arɩ kʋbala arɩ zɔɔ-balɩpɛ arɩ mara arɩ fii nɛ.

⁵² La TƖƖNA bʋla pɩ Mosis,

⁵³ “Nɩaa deemba ŋ sɩ dɩɩsa, kɛŋ tintee-la kpaa pɩba a magɛ doho kala sɩ magɛ ŋɩɩ.

⁵⁴ Doho-la sɩ yʋga, leŋ dɩ ba kpaalɩŋ yʋgɛ. Doho-la sɩ muuro, leŋ dɩ ba kʋa muuri. Doho kala maga dɩ ʋ laa magɛ ʋ nɩaa sɩ magɛ ŋɩɩ nɛ.

⁵⁵ Má tɔnsɛ a kɛŋ tintee-la kpaa. Nʋʋkala doho nɩaa sɩ magɛ ŋɩɩ nɛ ba jaŋ laa.

⁵⁶ Dɩ ma nɛ tɔnsɔ dɛrɛ, nɩalɩŋ sɩ yʋga, ba jaŋ laa kʋbalɩŋ, nɩalɩŋ ma sɩ bɩ yʋgɛ jaŋ laa kʋbie.”

⁵⁷ Levi doho nɩaa gentisiŋ ba sɩ dɩɩsa nɛ ŋ-la: Gɛsɔŋ, ʋ nɛ kʋ ŋaa Gɛsɔŋ tɩŋŋaa gentine. Kohaf, ʋ nɛ kʋ ŋaa Kohaf tɩŋŋaa gentine. Mɛrarɩ, ʋ nɛ kʋ ŋaa Mɛrarɩ tɩŋŋaa gentine.

⁵⁸ Levi doho nɩaa gentisi-la kʋbiisiŋ ma nɛ ha ŋ-la: Libini tɩŋŋaa gentine, Hɛbʋrɔŋ tɩŋŋaa gentine, Mali tɩŋŋaa gentine, Musi tɩŋŋaa gentine, Kora tɩŋŋaa gentine. Kohaf naabalɩma nɛ Amɩram.

⁵⁹ Amɩram haala yɩrɩŋ nɛ Jokɛbɛd. Ʋ ŋaa Levi doho nʋʋ nɛ. Ba lʋlʋ Ijipiti tinteeŋ lɛ nɛ. Jokɛbɛd nɛ lʋl Arɔŋ, Mosis arɩ ba dɩhaala Mɩrɩam a pɩ Amɩram.

⁶⁰ Ŋɩɩ nɛ Arɔŋ ma lʋl Nadab, Abihu, Elieza arɩ Itama.

⁶¹ Ama Nadab arɩ Abihu nɛ fa sʋba ba sɩ nyɩgɛ kʋsʋɔrʋsʋŋ La TƖƖNA sɩpaaŋ, ka ʋ bɩ ba ŋɩɩ daga.

⁶² Levi doho nɩaa hambolibiisi-la kala sɩ yi chɛnɛ koo a kɩɩ ŋɩɩ, ba fa sɩ dɩɩsa ŋaa nɩaa bʋɩ mara arɩ batori nɛ. Ba fa bɩ ba-na dɩɩsa pɛ Iziral tɩmma-la dɔnsʋŋ lɛ, bɛɛ wɩaa ba-na bɩ kpaalɩŋ laa ba sɩ kɛŋ tintee-la kpaa tʋɔŋ.

⁶³ Nɩaa deemba kala Mosis arɩ Wɩɩsʋllɩ sɩpaalaara Elieza nɛ dɩɩsa, bʋa-la lɛ ba sɩ dɩɩsɛ Iziral tɩŋŋaa Mʋab tintee-taalɩsɩ-la lɛ, dɩ ba kpagɛ Jɔdaŋ fuo-la Jeriko cholo.

⁶⁴ Nɩaa deemba kʋŋkala fa tuo bʋa-la lɛ Mosis arɩ Wɩɩsʋllɩ sɩpaalaara Arɔŋ sɩɩ dɩɩsɛ Iziral tɩŋŋaa Sɩnaɩ tintee-hɩlɩɩ-la lɛ.

⁶⁵ La TƖƖNA fa bʋla pɩ Iziral tɩmma-la arɩ ba jaŋ sʋʋ tintee-hɩlɩɩ-la tʋɔŋ. Ba kala sɛnɛ sʋʋ aŋ ka Jefuni nanʋala Kalɩb arɩ Nuŋ nanʋala Josua dʋndʋŋa.