NAMBABA 25 - WƖA TENIŊ

Mʋab tɩŋŋaa toloo nyɩsa kɛsɛ Iziral tɩŋŋaa baalaa

¹ Bʋa-la lɛ Iziral tɩŋŋaa fa sɩ hɔŋ lee-la ba sɩɩ yɩrɛ Sɩtɩm, ba baala-la suomo chɩchɛ Mʋab tɩŋŋaa toloo a kɛmba pɩpɩŋ.

² Tolie-la yie kɛmba mʋ ba vʋɩyaa dɩ-kpaarɩŋ, ba pɛ didii ba vʋɩyaa kʋdiilee aŋ kpʋkpaarɛ ba vesi-la.

³ Ŋɩɩ nɛ Iziral tɩŋŋaa pɛ a kpʋkpaarɛ ba vene-la ba sɩɩ yɩrɛ Baal, a hɛ Pio lɛ. La TƖƖNA faasa na baanɩŋ ba nyuŋ.

⁴ Ŋɩɩ nɛ La TƖƖNA bʋla pɩ Mosis, “Kɛsɛ Iziral tɩŋŋaa sɩpaalaara-la kala sɩ mʋ pɛ a kpʋkpaarɛ vene-la ba sɩɩ yɩrɛ Baal, a kpʋba wɩɩhɛyɛ mɩ-na ma TƖƖNA sɩpaaŋ. Dɩ ŋ nɛ ŋaa ŋɩɩ, mɩ-na ma TƖƖNA baaŋ-la sɩ faasa sii jaŋ fɩɛlɛ dɩ mɩ leŋ nɩkaana-la.”

⁵ Ŋɩɩ nɛ Mosis bʋla pɩ Iziral tɩŋŋaa nɩhɩasɩŋ, “Má kpʋ baala-la kala sɩ hɛ ma doho nɩaa tʋɔŋ a mʋ pɛ kpʋkpaarɛ vene-la ba sɩɩ yɩrɛ Baal sɩ hɛ Pio lɛ.”

⁶ Ŋɩɩ nɛ Iziral tɩŋŋaa baal kʋbala kɛŋ Midiaŋ tɩŋŋaa tolo a kʋʋ jʋʋ ʋ dɩa, Mosis arɩ Iziral tɩŋŋaa kala sɩɩŋ lɛ. Bʋa-la lɛ dɩ baa yel lɛbɩ-la lɛ La TƖƖNA sɩ yie kɔ Iziral tɩŋŋaa teeŋ boiŋ niiŋ.

⁷ Elieza nanʋala Finihas ma fa hɛ nɩmɛ. Ʋ fa ŋaa Wɩɩsʋllɩ sɩpaalaara Arɔŋ nihiŋ nɛ. Ʋ sɩ na wɩɩŋ deeŋ, ʋ lɩɩ nɩalɩŋ tʋɔŋ a joŋ timiŋ,

⁸ a to Iziral tɩɩna-la harɩŋ a jʋʋ ʋ lɛbɩŋ, a tɔbʋ arɩ tiŋ-la, ʋ luro lɩɩ kɛŋ haal-la luoruŋ lɛ. Ʋ sɩ ŋaa ŋɩɩ, nyanyal-bɔŋ-la fa sɩ jʋʋ Iziral tɩŋŋaa dɛrɛ.

⁹ Nɩalɩŋ nyanyal-bɔŋ-la sɩ kpʋa ŋaa nɩaa bʋɩ mara arɩ banɛsɛ nɛ.

¹⁰ Ŋɩɩ nɛ La TƖƖNA bʋla pɩ Mosis,

¹¹ “Elieza nanʋala Finihas sɩ ŋaa Wɩɩsʋllɩ sɩpaalaara, a ŋaa Arɔŋ nihiŋ sɩ ŋaa wɩɩ-la, leŋe mɩ fa sɩ na baaŋ-la Iziral tɩŋŋaa nyuŋ fɩɛlɛ nɛ. Nɩalɩŋ kala tʋɔŋ, ʋ nɛ joŋ mɩ wɩaa kala a hɛ ʋ nyuŋ lɛ. Ʋ bɩ sɛyɛ dɩ nʋʋkala zil vene kala a pɛ mɩ lɛ. Ŋɩɩ nɛ tɩɩ mɩ bɩ Iziral tɩŋŋaa kpʋ dɛrɛ arɩ mɩ fa sɩ bɩɩnɛ ŋɩɩ.

¹² Ŋɩɩ wɩaa, bʋla pʋ arɩ mɩ hɛ niiŋ nɛ a pʋ, nii-la jaŋ chɩŋ a kaa mʋ wuu.

¹³ Ʋ dɩ ʋ doho nɩaa nɛ jaŋ ŋaa nɩalɩŋ sɩ jaŋ kpʋ pʋsʋŋ pɩpɩmɛ a kaa mʋ wuu, a tɩŋ ʋ sɩ bɩ sɛyɛ dɩ Iziral tɩŋŋaa dɛnnɛ vene kala a pɛ mɩ lɛ, a laaba ta ba wʋbɔŋŋɔɔ lɛ.”

¹⁴ Iziral tɩŋŋaa baal-la fa sɩ kɛŋ Midiaŋ tɩŋŋaa tolo jʋʋ dɩa ba kpʋ yɩrɩŋ nɛ Zimiri. Ʋ fa ŋaa Salu nanʋala nɛ. Salu fa ŋaa Simioŋ doho nɩaa dɩa nɩhɩaŋ nɛ.

¹⁵ Midiaŋ tɩŋŋaa tolo-la ma yɩrɩŋ nɛ Kozibi. Ʋ nyɩmma nɛ Zuu. Zuu fa ŋaa Midiaŋ tɩŋŋaa doho dɔŋɔ sɩpaalaarʋ nɛ.

¹⁶ Ŋɩɩ nɛ La TƖƖNA bɩra bʋla pɩ Mosis,

¹⁷ “Midiaŋ tɩmma-la ŋaa ma dʋndɔmɔ nɛ, má kpʋba,

¹⁸ bɛɛ wɩaa ba ŋaa wɩaa ma lɛ a nagɛ ma ŋaa dʋndɔmɔ nɛ. Ba nyɩsɛma Pio lɛ ma zil ba vene, a pɛ wʋbɔŋ-la ba dɩ-haala Kozibi Midiaŋ tɩŋŋaa sɩpaalaarʋ-la tolo sɩ ŋaa ma kpʋʋ bʋa-la lɛ nyanyal-bɔŋ-la sɩ jʋʋma.”