NAMBABA 24 - WƖA TENIŊ

¹ Balam sɩ kʋ jɩŋ dɩ La TƖƖNA ka chɛ dɩ ʋ bʋl wɩaa a wasɛ Iziral tɩŋŋaa nɛ, ʋ bɩra bɩ mʋa dɩ ʋ chɛ na wɩɩkala arɩ ʋ fa sɩ yie mʋ chɛ ŋɩɩ. Ŋɩɩ nɛ aŋ kɛŋ ʋ sɩaa chaasɛ tintee-hɩlɩɩ-la dɩɩrɩŋ,

² a bee mʋ na Iziral tɩŋŋaa, dɩ ba hɔŋ doho doho. Ŋɩɩ nɛ Wɩa Dɩma kʋ tuu hɛ Balam lɛ.

³ Ʋ bʋl wɩaa deemba Wɩa sɩ joŋo dagʋ: “Mɩ-na Bioo nanʋala Balam sɩ ŋaa nʋʋ, a nɩna wɩaa woruŋ nɩɩ bʋl wɩaa deemba.

⁴ Mɩ nɩɩ wɩalɩŋ Wɩa doluŋ kala Tɩɩna sɩ bʋla nɛ, a na wɩalɩŋ ma ʋ sɩ daga arɩ duosoo tʋɔŋ. Ŋɩɩ nɛ mɩ tuu tele chu, Wɩa suri mɩ sɩaa:

⁵ Iziral tɩŋŋaa dɩjʋʋlʋŋ zɔmɔ nɛ woruŋ,

⁶ a nagɛ fuonaa balaa sɩ jalla pɩpɛ, a nagɛ fuoŋ niiŋ gaarɩŋ, a nagɛ tɩɩ-pugu kʋbala ba sɩɩ yɩrɛ Alɔɩ, La TƖƖNA tɩtɩa sɩ chɔnsɔ, koo a nagɛ kuolu tɩɩsɩŋ sɩ chɩŋ fuoŋ niiŋ.

⁷ Duonuŋ jaŋ nɩɩ woruŋ a pɩ Iziral tɩŋŋaa dɩ ba duu ba kɩaa fɩɛlɩŋ lɛ. Ba kuoro jaŋ kɛŋ doluŋ a kɩɩ kuoru-la ba sɩɩ yɩrɛ Agag. Ba tinteeŋ ma yɩrɩŋ jaŋ sisii.

⁸ Wɩa nɛ kɛmba lɩɩ Ijipiti tinteeŋ lɛ kɔ. Ba kɛŋ doluŋ a nagɛ baga nɛŋ nɛ. Ba jaŋ yuo dii ba dʋndɔŋŋɔɔ a bori ba tosuŋ, aŋ bori ba haŋgbelee ma muno muno.

⁹ Iziral tɩŋŋaa nagɛ naachigi-balaa nɛ. Dɩ ba nɛ pɩna, nʋʋkala tuo sɩ jaŋ wuo chɩsɛba. Dɩ nʋʋ nɛ sʋl Wɩɩ-sʋl zɔmʋŋ a pɩba, Wɩa jaŋ pɛ tɩɩna ma lɛ. Dɩ nʋʋ nɛ kalɩba hɛ ba lɛ ma, Wɩa ma jaŋ kalɩba hɛ tɩɩna lɛ.”

¹⁰ Ŋɩɩ nɛ Balak na baanɩŋ woruŋ Balam nyuŋ a kɛŋ ʋ nɩsɩŋ ŋmoo dɔŋɔ, aŋ bʋla pɩ Balam, “Mɩ yɩrɩŋ dɩ ŋ kʋ kalɩba hɛ mɩ dʋndɔŋŋɔɔ lɛ nɛ, ŋ mɩɩra kʋ sʋl Wɩa pɩba naansɩɩŋ butori.

¹¹ Mɩ fa sɩ mɩ jaŋ timiŋ a yʋgɛ, ama La TƖƖNA bɩ sɛyɛ, sii viiri lɩma.”

¹² Ŋɩɩ nɛ Balam bʋla pɩ Balak, “Ŋ fa sɩ tɩŋ ŋ tɩndaaraa mɩ teeŋ, mɩ bʋla pɩba

¹³ arɩ sɛlɩmɛ arɩ hɔpʋla nɛ paala su ŋ kuoru dɩa ŋ joŋo pɩmɛ ma, mɩ bɩ jaŋ wuo bʋl wʋzɔŋ koo wʋbɔŋ kala a lɩɩ wɩɩ-la La TƖƖNA sɩ bʋla harɩŋ.

¹⁴ Mɩ-na mɩɩraa mʋ mɩ nɩaa teeŋ nɛ, ama mɩ jaŋ leŋ dɩ ŋ jɩŋ wɩɩ-la Iziral tɩŋŋaa maachie sɩ jaŋ ŋaa ŋ nɩaa lɛ.”

Balam sɩ bʋl wɩalɩŋ nɛsɛ a tɩgɛ Iziral tɩŋŋaa lɛ

¹⁵ Wɩalɩŋ Wɩa sɩ joŋo dagʋ, ʋ bʋl nɛ ŋ-la: “Mɩ-na Bioo nanʋala Balam, sɩ ŋaa nʋʋ, a nɩna wɩaa woruŋ nɩɩ bʋl wɩaa deemba.

¹⁶ Mɩ ŋaa nʋʋ sɩɩ nɩɩ wɩalɩŋ Wɩa sɩɩ bʋl nɛ, a kɛŋ wʋjɩmɩɩ-la ma sɩ lɩɩ Wɩa sɩ kɩɩ kʋŋkala teeŋ, a na wɩalɩŋ kala Wɩa doluŋ Tɩɩna sɩ joŋo dagɛmɛ arɩ duosoo tʋɔŋ. Ŋɩɩ nɛ mɩ tuu tele chu, La TƖƖNA suri mɩ sɩaa.

¹⁷ Mɩ na wɩɩ nɛ, ama lɛɛlɛ dee wɩɩ-la jaŋ ŋaa. Mɩ na arɩ kuoro jaŋ lɩɩ Iziral tɩŋŋaa tʋɔŋ a chaanɛ a nagɛ chɛnwʋlʋŋ, a kori kuoru dantɩga. Ʋ jaŋ yuo dii Mʋab tɩŋŋaa arɩ Sɛf doho nɩaa kala.

¹⁸ Iziral tɩŋŋaa jaŋ kɛŋ doluŋ a yuo dii ba dʋndɔŋŋɔɔ Ɛdɔm tɩŋŋaa.

¹⁹ Kuoro jaŋ lɩɩ Jekɔb doho nɩalɩŋ tʋɔŋ a yuo dii nɩkaana-la sɩ hɛ ba tasɩŋ lɛ.”

Balam sɩ to harɩŋ a bʋl wɩalɩŋ tɩgɛ Iziral tɩŋŋaa lɛ

²⁰ Ŋɩɩ nɛ Balam na Amalɛk tɩŋŋaa arɩ duosoo tʋɔŋ, a bʋl wɩaa deemba Wɩa sɩ joŋo dagʋ a tɩgɛ ba lɛ: Ʋ sɩ, “Tinteyee kala tʋɔŋ Amalɛk tɩŋŋaa nɛ fa dolie a kɩɩ ba kala, ama ʋ dɩdɛrɩŋ kala ba tinteeŋ jaŋ pɩŋ jikpeeŋ.”

²¹ Ʋ bɩra na Keni tɩŋŋaa arɩ duosoo tʋɔŋ, a bʋl wɩaa deemba Wɩa sɩ joŋo dagʋ a tɩgɛ ba lɛ. Ʋ sɩ, “Wʋwalɩmɩɩ kala tuo lee-la Keni tɩŋŋaa sɩ hɔnɔ. Ba nagɛ nʋʋ sɩ saa ʋ dɩa bʋŋ nyuŋ nɛ.

²² Ama Asiiria tɩŋŋaa ha jaŋ yuo dii Keni tɩŋŋaa a chei ba tinteeŋ aŋ kɛsɛba viiri.”

²³ Ŋɩɩ nɛ Balam bɩra bʋl wɩɩŋ deeŋ Wɩa sɩ joŋo dagʋ. Ʋ sɩ, “Kʋbɛɛ nɛ jaŋ hɛ ʋ mɩɩsɩŋ lɛ dɩ Wɩa nɛ leŋe dɩ wɩaa deemba kʋ ŋaa?

²⁴ Lɩɩŋ daborusuŋ jaŋ lɩɩ Sapɩrɔs fuoŋ-niiŋ a kʋ yuo dii Asiiria tɩŋŋaa arɩ Ɛbɛ tɩŋŋaa, ama nɩalɩŋ sɩ kʋ yuo diiba ma kala jaŋ sʋʋ.”

²⁵ Ŋɩɩ nɛ Balam mɩɩra mʋ ʋ jaŋ, ka Balak ma viiri.