NAMBABA 23 - WƖA TENIŊ

Balam sɩ bʋl wɩalɩŋ bumbuŋ a tɩgɛ Iziral tɩŋŋaa lɛ

¹ Ŋɩɩ nɛ Balam bʋla pɩ Balak, “Saa korunuŋ balɩpɛ a pɩmɛ, aŋ kɛŋ nɛ-belliŋ balɩpɛ arɩ pie-belliŋ balɩpɛ a kaa kɔ.”

² Ŋɩɩ nɛ Balak ŋaa wɩalɩŋ kala Balam sɩ daga. Ba balɩa kpʋ nɛ-bele arɩ pie-bele koru na-kala lɛ a ŋaa Wɩɩsʋlʋŋ.

³ Balam bʋla pɩ Balak, “Chɩŋ ŋ Wɩɩsʋlʋŋ kɩalɩŋ sɛmɛ, ka dɩ mɩ sʋʋsɛ, kapo La TƖƖNA jaŋ kɛŋ ʋ tɩtɩa a kʋ dagɛmɛ. Wɩɩ-la kala ʋ sɩ bʋla pɩmɛ, mɩ jaŋ kʋ bʋla pɩŋ.” Ŋɩɩ nɛ Balam sʋʋsa mʋ chɩŋ dundol-kpɩlɩɩ kʋbala nyuŋ.

⁴ Wɩa kɔ ʋ teeŋ, Balam bʋla pʋ, “Mɩ saa korunuŋ balɩpɛ nɛ a kpʋ nɛ-bele arɩ pie-bele koru na-kala lɛ a ŋaa Wɩɩsʋlʋŋ.”

⁵ Ŋɩɩ nɛ La TƖƖNA bʋl wɩalɩŋ Balam sɩ jaŋ mʋ bʋla pɩ Balak a pʋ.

⁶ Balam mɩɩra mʋ dɩ Balak ha chɩŋ ʋ Wɩɩsʋlʋŋ kɩalɩŋ bʋbʋɔŋ, ʋ dɩ Mʋab nɩhɩasɩŋ.

⁷ Ŋɩɩ nɛ Balam bʋl wɩɩ-la Wɩa sɩ bʋla pʋ. Ʋ sɩ, “Mʋab tɩŋŋaa kuoro Balak nɛ yɩrɛmɛ mɩ lɩɩ Asiiria wɩɩpɔsʋŋ peele-la nyuŋ a kɔ dɩ mɩ kʋ kalɩba hɛ Iziral tɩŋŋaa lɛ.

⁸ Ɛɛ nɛ saa mɩ jaŋ wuo ŋaa a kalɩba hɛ nɩalɩŋ lɛ Wɩa sɩ bɩ kalɩba hɛ? Koo a bʋl wɩaa chei nɩalɩŋ La TƖƖNA sɩ bɩ cheye?

⁹ Mɩ chɩŋ bʋŋ nyuŋ nɛ aŋ na nɩalɩŋ, a bɩra chɩŋ dundolo ma nyuŋ aŋ bibemba. Ba ŋaa nɩaa sɩ chɩŋ ba dʋndʋŋ nɛ, ba bɩ tinteye-la dɔnsʋŋ naga.

¹⁰ Iziral tɩŋŋaa yʋga nɛ woruŋ a nagɛ hagɩlɩ-biee. Kʋbɛɛ nɛ jaŋ wuo dɩɩsɛba? Leŋ dɩ mɩ sʋʋ a nagɛ tʋɔpʋl tɩŋŋaa deemba sɩ jaŋ sʋʋ ŋɩɩ, dɩ mɩ dɩdɛrɩŋ ma nagɛ ba dɩdɛrɩŋ.”

¹¹ Ŋɩɩ nɛ Balak pɩɛsɛ Balam, “Bɛɛ kʋŋ wɩɩ nɛ ŋ ŋaa mɩ lɛ ŋ-la? Mɩ kɛnɩŋ kɔ dɩ ŋ kalɩba hɛ mɩ dʋndɔŋŋɔɔ lɛ nɛ, ŋ vɩa aŋ mɩɩra sʋl Wɩa pɩba.”

¹² Ŋɩɩ nɛ Balam bʋl, “Wɩɩ-la La TƖƖNA sɩ bʋla pɩmɛ, ʋ nɛ mɩ bʋl ŋɩɩ.”

Balam sɩ bʋl wɩalɩŋ lɩa a tɩgɛ Iziral tɩŋŋaa lɛ

¹³ Balak bɩra bʋla pɩ Balam, “Kɔ dɩ la mʋ sɛmɛ dɔŋɔ, ŋ jaŋ na Iziral tɩmma-la dɔnsʋŋ, ŋ bɩ jaŋ na ba kala. Chɩŋ nɩmɛ a kalɩba hɛ ba lɛ a pɩmɛ.”

¹⁴ Ŋɩɩ nɛ ʋ kɛnʋ mʋ Zofim pɔkɔŋ, ba jɩl peel-la ba sɩɩ yɩrɛ Pɩsɩga nyuŋ. Nɩmɛ nɛ ʋ bɩra saa korunuŋ balɩpɛ a kpʋ nɛ-bele arɩ pie-bele koru na-kala nyuŋ a ŋaa Wɩɩsʋlʋŋ.

¹⁵ Balam bɩra bʋla pɩ Balak, “Chɩŋ ŋ Wɩɩsʋlʋŋ kɩaa sɛmɛ, ka dɩ mɩ mʋ cheŋ Wɩa.”

¹⁶ Ŋɩɩ nɛ La TƖƖNA kɔ Balam teeŋ a bʋl wɩalɩŋ ʋ sɩ jaŋ mʋ bʋla pɩ Balak a pʋ.

¹⁷ Balam mɩɩraa mʋ dɩ Balak ha chɩŋ ʋ Wɩɩsʋlʋŋ kɩalɩŋ sɛmɛ, ʋ dɩ Mʋab tɩŋŋaa nɩhɩasɩŋ. Ŋɩɩ nɛ Balak pɩɛsɛ Balam, “La TƖƖNA sɩ bɛɛ nɛ?”

¹⁸ Ŋɩɩ nɛ Balam bʋl wɩɩ-la La TƖƖNA sɩ bʋla. Ʋ sɩ, “Balak Zipo nanʋala sii a nɩɩ,

¹⁹ Wɩa bɩ nuhuobiinee naga a nyɩnyɩɛ wɩaa koo a kɛŋ ʋ tʋɔbɩɩnaa a bɩbɩrɩmɛ. Dɩ ʋ nɛ bʋl wɩɩ, ʋ yie sɛnɛ ŋaa wɩɩ-la nɛ, dɩ ʋ nɛ hɛ niiŋ arɩ ʋ jaŋ ŋaa wɩɩ ma, ʋ yie sɛnɛ ŋaa nɛ.

²⁰ Wɩa dagɛmɛ dɩ mɩ sʋlʋ dɩ ʋ pɛ ʋ nɩalɩŋ lɛ nɛ. Ʋ sɩ pɛ ba lɛ ŋɩɩ, mɩ saa bɩ jaŋ wuo kaa bɩrɩmɛ.

²¹ Wʋbɔŋ koo hɛɛ-kala bɩ jaŋ jʋʋ Iziral tɩŋŋaa. Ba Tɩɩna Wɩa chɩŋ ba harɩŋ nɛ. Ba yɩyɩrɛ ʋ yɩrɩŋ a jʋjʋɔsɛ ʋ sɩ ŋaa ba kuoro.

²² Wɩa nɛ kɛmba kaa kʋ lɩɩ Ijipiti tinteeŋ lɛ, ba kɛŋ doluŋ a nagɛ baga nɛŋ nɛ.

²³ Hɩl koo vʋgʋrʋ kala bɩ doluŋ kɛnɛ Iziral tɩŋŋaa lɛ. Nɩaa jaŋ naba a bʋl, ‘Na wɩalɩŋ Wɩa sɩ ŋaa pɩ Iziral tɩŋŋaa.’

²⁴ Iziral tɩŋŋaa nagɛ naachigiŋ nɛ. Dɩ ba nɛ kiri ba dʋndɔŋŋɔɔ, dɩ ba nɛ bɩ ba kpʋa, a chaŋ ba nammɩa a nyʋa ba chalɩŋ, ba bɩ wiesi.”

²⁵ Ŋɩɩ nɛ Balak bʋla pɩ Balam, “Ŋ folo bɩ kalɩba hɛ ba lɛ, saa sɩ́ bʋla wasɛba ma.”

²⁶ Ŋɩɩ nɛ Balam bʋla pʋ, “Mɩ bɩ bʋla pɩŋ arɩ La TƖƖNA sɩ sɩ mɩ ŋaa wɩɩ-la nɛ, mɩ jaŋ ŋaa?”

Balam sɩ bʋl wɩalɩŋ tori a tɩgɛ Iziral tɩŋŋaa lɛ

²⁷ Balak bɩra bʋla pɩ Balam “Leŋ dɩ mɩ kɛnɩŋ mʋ sɛmɛ dɔŋɔ, kapo Wɩa tʋɔŋ jaŋ tɔrɛ dɩ ʋ leŋ dɩ ŋ chɩŋ lee-la aŋ kalɩba hɛ ba lɛ pɩmɛ.”

²⁸ Ŋɩɩ nɛ ʋ kɛŋ Balam ba jɩl peel-la ba sɩɩ yɩrɛ Pio nyuŋ. Ba chɩŋ nɩmɛ aŋ bibeŋ tintee-hɩlɩɩ-la.

²⁹ Balam bʋla pʋ, “Saa korunuŋ balɩpɛ a kɛŋ nɛ-belliŋ balɩpɛ arɩ pie-belliŋ balɩpɛ kɔ.”

³⁰ Ŋɩɩ nɛ Balak ŋaa ŋɩɩ Balam sɩ daga. Ba kpʋ nɛ-bele arɩ pie-bele a ŋaa Wɩɩsʋlʋŋ, koru na-kala nyuŋ.