NAMBABA 22 - WƖA TENIŊ

Balak tɩma yɩrɛ Balam

¹ Iziral tɩŋŋaa bɩra sii a mʋ hɔŋ Mʋab tinteeŋ dɩ-taalɩsɩ-la sɩ hɛ Jɔdaŋ fuo-la wɩɩjʋʋlʋŋ dɩɩrɩŋ a chaasɛ Jeriko.

² Ŋɩɩ nɛ Zipo nanʋala Balak nɩɩ wɩalɩŋ kala Iziral tɩŋŋaa sɩ joŋo ŋaa Amɔrɩ tɩŋŋaa lɛ,

³ fawʋllʋŋ faasa jʋʋ ʋ dɩ ʋ nɩaa kala, bɛɛ wɩaa Iziral tɩŋŋaa fa yʋga.

⁴ Ŋɩɩ nɛ Mʋab tɩŋŋaa bʋla pɩ Midiaŋ tɩŋŋaa nɩhɩasɩŋ, “Nɩ-daŋ deeŋ jaŋ kɔ a dii la tinteeŋ kala a nagɛ nɛ-bele sɩ yie gbegisi yaŋ ŋɩɩ.” Bʋa-la lɛ dɩ Zipo nanʋala Balak nɛ fa ŋaa Mʋab tɩŋŋaa kuoro.

⁵ Ŋɩɩ nɛ ʋ tɩŋ nɩaa dɩ ba mʋ yɩrɛ Bioo nanʋala Balam. Balam fa hɛ ʋ jaŋ Pɛtɔ lɛ nɛ, a kpagɛ fuo-la ba sɩɩ yɩrɛ Yufireti. Balak sɩ, “Nɩaa nɛ lɩɩ Ijipiti tinteeŋ a yʋgɛ woruŋ a kʋ hɔnɔ kpagɛmɛ.

⁶ Mɩ saa chɛ dɩ ŋ kɔ a kalɩba hɛ nɩaa deemba lɛ, bɛɛ wɩaa ba dolie kɩɩmɛ nɛ. Ŋ bɩ pɔ dɩ ŋ nɛ kalɩba hɛ ba lɛ, mɩ jaŋ wuo yuo diiba, a kiriba dɩ ba lɩɩ mɩ tinteeŋ lɛ. Mɩ jɩma dɩ ŋ nɛ bʋl wʋzɔŋŋɔɔ pɩ nʋʋ, wɩalɩŋ yie sɛnɛ ŋaa nɛ. Dɩ ŋ nɛ bɩra ŋmɩɛsa hɛ nʋʋ lɛ ma, ŋmɩaŋ-la yie dii tɩɩna nɛ.”

⁷ Ŋɩɩ nɛ kuoro Balak joŋ moribiiŋ a pɩ Mʋab tɩŋŋaa arɩ Midiaŋ tɩŋŋaa nɩhɩasɩŋ dɩ ba kaa mʋ a pɩ Balam, dɩ ʋ laa a pɛ tabɩɩŋ pɩba. Ŋɩɩ nɛ ba kɔ Balam teeŋ a bʋl wɩalɩŋ kala kuoro Balak sɩ bʋla a pʋ.

⁸ Ŋɩɩ nɛ Balam bʋla pɩba, “Má pɩŋ dɩ taŋ pʋl, mɩ chie jaŋ bʋl wɩɩ-la La TƖƖNA sɩ bʋla pɩmɛ a pɩma.” Ŋɩɩ nɛ nɩalɩŋ chʋa.

⁹ Wɩa kɔ Balam teeŋ tɩtaŋɩŋ a pɩɛsʋ, “Kʋbɛɛba nɛ nɩaa deemba sɩ hɛ ŋ teeŋ?”

¹⁰ Ŋɩɩ nɛ Balam bʋla pɩ Wɩa, “Zipo nanʋala Balak sɩ ŋaa Mʋab tɩŋŋaa kuoro nɛ tɩmba mɩ teeŋ, dɩ ba bʋla pɩmɛ arɩ

¹¹ nɩaa nɛ lɩɩ Ijipiti tinteeŋ a yʋgɛ woruŋ a kʋ tɔ ʋ tinteeŋ kala. Ʋ saa chɛ dɩ mɩ kɔ a kalɩba hɛ ba lɛ, dɩ mɩ nɛ ŋaa ŋɩɩ, ŋ bɩ pɔ, ʋ jaŋ wuo yuo diiba a kiriba dɩ ba lɩɩ ʋ tinteeŋ lɛ.”

¹² Ŋɩɩ nɛ Wɩa bʋla pɩ Balam, “Sɩ́ nɩalɩŋ harɩŋ to mʋ. Ʋ bɩ maga dɩ ŋ ŋmɩɛsa hɛ nɩalɩŋ lɛ, bɛɛ wɩaa ba ŋaa nɩa lɛ mɩ sɩ pɛ nɛ.”

¹³ Taŋ sɩ pʋla, Balam sii a bʋla pɩ kuoro Balak tɩndaara-la, “Má mɩɩra mʋ ma tinteeŋ, bɛɛ wɩaa La TƖƖNA bɩ mɩ wombiiŋ pa dɩ mɩ to ma harɩŋ mʋ.”

¹⁴ Ŋɩɩ nɛ Mʋab tɩŋŋaa sɩpaalaaraa mʋ Balak teeŋ a bʋla pʋ, “Balam vɩa dɩ ʋ to la harɩŋ kɔ nɛ.”

¹⁵ Balak bɩra wasa tɩŋ sɩpaalaaraa ba yʋga kɩɩ bumbuŋ nɩalɩŋ a kɛŋ yɩrɩŋ ma a kɩɩba.

¹⁶ Ba mʋ Balam teeŋ, a bʋla pʋ, “Ŋ-la nɛ Zipo nanʋala Balak bʋl: Mɩɩ sʋlʋŋ, hɛ doluŋ aŋ kɔ mɩ teeŋ, sɩ́ leŋe dɩ wɩɩkala kɛrɩŋ.

¹⁷ Mɩ jaŋ timiŋ a yʋgɛ, aŋ pɛ ŋaa wɩɩ-la ma kala ŋ sɩɩ chɛ. Ŋ-na kʋ kalɩba hɛ nɩaa deemba lɛ a pɩmɛ.”

¹⁸ Ŋɩɩ nɛ Balam bʋla pɩ Balak tɩndaara-la, “Dɩ Balak nɛ paala joŋ sɛlɩmɛ arɩ hɔpʋla-la kala sɩ hɛ ʋ kuori dɩa lɛ pɩmɛ ma, mɩ bɩ jaŋ wuo vɩa La TƖƖNA niiŋ aŋ ŋaa wɩɩkala pʋ.

¹⁹ Ma jaŋ wuo pɩŋ arɩ bumbuŋ nɩalɩŋ sɩ pɩŋ ŋɩɩ, dɩ taŋ pʋl, dɩ mɩ na wɩɩ-la La TƖƖNA sɩ jaŋ bʋla pɩmɛ.”

²⁰ Ŋɩɩ nɛ Wɩa kɔ Balam teeŋ tɩtaŋɩŋ a bʋla pʋ, “Nɩaa deemba bɩra sɩ kɔ dɩ ba yɩrɩŋ, sii to ba harɩŋ mʋ, ama ŋaa wɩɩ-la mɩ sɩ dagɩŋ dʋndʋŋa. Sɩ́ wʋwogo kala ŋaa.”

Balam arɩ ʋ kakumo

²¹ Taŋ sɩ pʋla, Balam sii a kpɩɛrɛ ʋ kakumo a to Mʋab tɩŋŋaa nɩhɩasɩ-la harɩŋ.

²² Balam sɩɩ mʋ ŋɩɩ, Wɩa na baanɩŋ woruŋ ʋ nyuŋ, a leŋ ʋ-na La TƖƖNA tɩndaara lɩɩ kɛrʋ wombiiŋ lɛ. Balam fa jɩl kakumo nɛ, ʋ tɩntɩnnaa balɩa ma faa to ʋ harɩŋ.

²³ Kakumo-la sɩ na La TƖƖNA tɩndaarʋ-la dɩ ʋ chɩŋ wombiiŋ lɛ a kori tokobiiŋ, ʋ gɛbɛ to gɩrɩŋ. Balam ŋmoo kakumo-la dɩ ʋ kʋ lɩɩ wombiiŋ.

²⁴ La TƖƖNA tɩndaarʋ-la fa chɩŋ wombii-fʋgʋgʋ-bie lɛ nɛ girep tɩɩsɩŋ bagɩsɩŋ balɩa pɛgɛ, jebiiŋ hɛ sɛmɛ dɔŋɔ a hɛ sɛmɛ dɔŋɔ ma.

²⁵ Kakumo-la sɩ na La TƖƖNA tɩndaarʋ-la ŋɩɩ, ʋ kɛŋ ʋ tɩtɩa mʋ tɩɩgɛ jebii-la dɔŋɔ, a pɛ kɛŋ Balam naaŋ kaa tɩɩgɛ jee-la. Ŋɩɩ nɛ Balam bɩra ŋmoo kakumo-la.

²⁶ Ŋɩɩ nɛ La TƖƖNA tɩndaarʋ-la bɩra mʋ chɩŋ wombii-la, lee sɩ faasa fʋgɛ, lee-la kakumo-la sɩ bɩ jaŋ wuo pɩɛga bal.

²⁷ Kakumo-la bɩra sɩ na La TƖƖNA tɩndaarʋ-la ʋ tuu tel, Balam hɔŋ ʋ nyuŋ. Balam baanɩŋ sii, ʋ ŋmoo kakumo-la arɩ ʋ daaŋ.

²⁸ Ŋɩɩ nɛ La TƖƖNA pɩ kakumo-la doluŋ ʋ wuo bʋl wɩaa. Ʋ pɩɛsɛ Balam, “Bɛɛ nɛ mɩ ŋaa cheyiŋ, ŋ ŋmoomi naansɩɩŋ butori kala?”

²⁹ Ŋɩɩ nɛ Balam bʋl, “Ŋ jommi arɩ mɩ ŋaa nɩyaarɩ nɛ. Dɩ mɩ nɛ fa kori tokobiiŋ, mɩ fa jaŋ kpʋŋ lɛɛlɛ.”

³⁰ Ŋɩɩ nɛ kakumo-la pɩɛsɛ Balam, “Mɩ dee kakumo-la ŋ sɩ vɛnɛɛ jɩl? Mɩ ha ŋaa wɩɩŋ deeŋ doho ŋ lɛɛ?” Ŋɩɩ nɛ Balam bʋl, “Aɩ.”

³¹ La TƖƖNA leŋ Balam sɩaa suri ʋ na Wɩa tɩndaarʋ-la sɩ chɩŋ wombiiŋ lɛ a kori tokobiiŋ. Ŋɩɩ nɛ ʋ tuu tele chu.

³² La TƖƖNA tɩndaarʋ-la pɩɛsɛ Balam, “Bɛɛ nɛ tɩɩ ŋ ŋmoo ŋ kakumo naansɩɩŋ butori-la? Mɩ kɔ dɩ mɩ kɛrɩŋ nɛ, mɩ bɩ cho dɩ ŋ mʋ lee-la.

³³ Kakumo-la na mɩ nɛ, ŋɩɩ nɛ tɩɩ ʋ gɛbɛ naansɩɩŋ butori-la kala. Dɩ ʋ nɛ fa bɩ gɛbɛ, mɩ fa jaŋ kpʋŋ aŋ leŋu.”

³⁴ Ŋɩɩ nɛ Balam bʋla pɩ La TƖƖNA tɩndaarʋ-la, “Mɩ ŋaa wʋbɔŋ nɛ, mɩ bɩ jɩŋ arɩ ŋ kɛrɛ mɩ wombiiŋ nɛ a bɩ chɛ dɩ mɩ mʋ lee-la. Dɩ ŋ tʋɔŋ nɛ bɩ tɔrɔ, mɩ jaŋ mɩɩrɛ.”

³⁵ La TƖƖNA tɩndaarʋ-la bɩra bʋla pɩ Balam, “Kɛŋ nɩalɩŋ dɩ ma mʋ, ama wɩɩ-la mɩ sɩ bʋla pɩŋ dʋndʋŋa nɛ maga dɩ ŋ bʋl.” Ŋɩɩ nɛ Balam to nɩhɩasɩ-la harɩŋ ba mʋ.

³⁶ Balak sɩ nɩa arɩ Balam ka kɔ, ʋ sii mʋ chemu taŋ-la ba sɩɩ yɩrɛ Aa lɛ, Anɔŋ fuo-la leriŋ, Mʋab tɩŋŋaa arɩ Amɔrɩ tɩŋŋaa bʋa nɛ ŋɩɩ.

³⁷ Ŋɩɩ nɛ Balak pɩɛsɛ Balam, “Mɩ sɩ tɩma yɩrɩŋ, bɛɛ nɛ tɩɩ ŋ vɩa? Koo ŋ bɩɩna mɩ bɩŋ wuo tiŋ nɛ?”

³⁸ Balam sɩ, “Lɛɛlɛ mɩ kɔ nɛ, ama mɩ bɩ jaŋ wuo bʋl wɩɩkala, see wɩɩ-la Wɩa sɩ daga.”

³⁹ Ŋɩɩ nɛ Balam to Balak harɩŋ ba mʋ taŋ kʋbala ba sɩɩ yɩrɛ Kɩrɩaf Hʋzɔf.

⁴⁰ Nɩmɛ nɛ Balak kpʋ nɛsɩŋ arɩ piesee a ŋaa Wɩɩsʋlʋŋ a chɔgɛ ba nammɩa a pɩ Balam arɩ nɩhɩasɩ-la sɩ hɛ ʋ teeŋ.

⁴¹ Taŋ sɩ pʋla, Balak kɛŋ Balam ba jɩl lee-la ba sɩɩ yɩrɛ Bamɔf Baal. Nɩmɛ nɛ ʋ chɩŋ aŋ bee mʋ na Iziral tɩmma-la dɔnsʋŋ.