NAMBABA 21 - WƖA TENIŊ

Iziral tɩŋŋaa yuo dii Kɛnaŋ tɩŋŋaa

¹ Kɛnaŋ tɩŋŋaa baal kʋbala nɛ fa hɛ nɩmɛ, a ŋaa Arad kuoro. Ʋ fa hɛ Nɛgɛf lɛ nɛ. Ʋ sɩ nɩa dɩ Iziral tɩŋŋaa joŋ wombiiŋ a kʋkɔ taŋ-la ba sɩɩ yɩrɛ Atarɩm, ŋɩɩ nɛ ʋ kʋ lɩɩ a yuo kɛsɛ Iziral tɩŋŋaa dɔnsʋŋ.

² Ŋɩɩ nɛ Iziral tɩŋŋaa ta niiŋ La TƖƖNA teeŋ a bʋl, “Dɩ ŋ nɛ leŋe dɩ la yuo dii nɩaa deemba, la jaŋ chei ba tabalaa kala gbelem gbelem.”

³ Ŋɩɩ nɛ La TƖƖNA jegile nɩɩ Iziral tɩŋŋaa teeŋ, a leŋ ba yuo dii Kɛnaŋ tɩŋŋaa, a cheiba arɩ ba tabalaa kala gbelem gbelem. Ba hɛ lee-la yɩrɩŋ Hɔma.

Ba kɛŋ kɔlɩɩŋ libi dɩmɩŋ

⁴ Ŋɩɩ nɛ Iziral tɩŋŋaa sii peel-la ba sɩɩ yɩrɛ Hɔɔ lɛ, a to wombii-la sɩɩ mʋ mʋga-la ba sɩɩ yɩrɛ Mʋgʋ-fɩaŋ dɩɩrɩŋ, dɩ ba golli Ɛdɔm tinteeŋ a mʋ. Ba sɩ mʋ magɛ ŋɩɩ, ba kenyiri kala dɛrɛ.

⁵ Ba ŋaa goŋ Wɩa arɩ Mosis nyuŋ, a bʋl, “Bɛɛ nɛ tɩɩ ma kɛnla lɩɩ Ijipiti tinteeŋ lɛ kɔ tintee-hɩlɩŋ deeŋ dɩ la sʋʋ? Kʋdiilii dɔŋ tuo daha, lɩɩŋ ma tuo, la mɩɩsɩŋ fɩɩ kʋdii-tɔɔŋ deeŋ nɛ.”

⁶ Ŋɩɩ nɛ La TƖƖNA leŋ dɩma kʋbalaba sɩ kɛŋ huoŋ woruŋ kʋ dɩŋ Iziral tɩŋŋaa, ba nɩ-daŋ sʋʋ.

⁷ Nɩalɩŋ sɩ ka kɔ Mosis teeŋ a bʋl, “La ŋaa wʋbɔŋ nɛ la sɩ ŋaa goŋ ŋ dɩ La TƖƖNA nyuŋ. Sʋl La TƖƖNA dɩ ʋ leŋ dɩ dɩma-la lɛl la tʋɔŋ.” Ŋɩɩ nɛ Mosis sʋl La TƖƖNA a pɩba.

⁸ La TƖƖNA bʋla pɩ Mosis, “Kɛŋ kɔlɩɩŋ libi dɩmɩŋ a joŋo mɛrɛ daaterige lɛ a joŋo pɛ. Dɩ dɩma-la kʋŋ nɛ dɩŋ nʋʋkala, dɩ ʋ wʋla beŋ kɔlɩɩŋ dɩŋ-la sɩ mɛrɛ daa-la lɛ, ʋ bɩ jaŋ sʋʋ, ʋ jaŋ kɛŋ mɩɩsɩŋ.”

⁹ Ŋɩɩ nɛ Mosis kɛŋ kɔlɩɩŋ libi dɩmɩŋ a joŋo mɛrɛ daaterige lɛ a joŋo pɛ. Dɩ dɩma-la kʋŋ nɛ dɩŋ nɩalɩŋ dɔŋɔ, ʋ yie wʋla beŋ kɔlɩɩŋ dɩŋ-la nɛ a duori.

Iziral tɩŋŋaa sɩɩ mʋ Mʋab

¹⁰ Ŋɩɩ nɛ Iziral tɩŋŋaa vɛŋ ŋɩɩ a mʋ hɔŋ lee-kʋbala ba sɩɩ yɩrɛ Ɔbɔf.

¹¹ Ŋɩɩ nɛ ba bɩra sii Ɔbɔf lɛ a mʋ hɔŋ lee-kʋbala ma ba sɩɩ yɩrɛ Ɩyɛ-Abarɩm, tintee-hɩlɩɩ-la sɩ chaasɛ taŋ-la ba sɩɩ yɩrɛ Mʋab wɩɩpɔsʋŋ dɩɩrɩŋ.

¹² Ba bɩra sii nɩmɛ a mʋ hɔŋ fuonaa-kʋbala lɛ ba sɩɩ yɩrɛ Zɛrɛd.

¹³ Ba bɩra sii nɩmɛ ma, a mʋ hɔŋ fuo-kʋbala niiŋ ba sɩɩ yɩrɛ Anɔŋ. Ʋ ma hɛ tintee-hɩlɩɩ-la tʋɔŋ nɛ. Fuo-la fa pɩŋ ŋɩɩ nɛ a mʋ jʋʋ Amɔrɩ tɩŋŋaa tinteeŋ. Anɔŋ fuo-la nɛ ŋaa Mʋab tɩŋŋaa arɩ Amɔrɩ tɩŋŋaa tinteeŋ bʋa.

¹⁴ Ŋɩɩ nɛ tɩɩ ba bʋl wɩaa La TƖƖNA laalɩŋ teniŋ tʋɔŋ a mʋʋ tɩgɛ taŋ-la ba sɩɩ yɩrɛ Wahɛb sɩ hɛ lee-la ba sɩɩ yɩrɛ Sufa arɩ fuonaasɩ-la arɩ fuo-la ba sɩɩ yɩrɛ Anɔŋ wɩaa,

¹⁵ arɩ fuonaa-luŋii-la sɩ pɩŋ ŋɩɩ a mʋ yi taŋ-la ba sɩɩ yɩrɛ Aa, a mʋmʋ Mʋab tɩŋŋaa tinteeŋ bʋa.

¹⁶ Ŋɩɩ nɛ ba bɩra sii Anɔŋ lɛ a mʋ vil-la ba sɩɩ yɩrɛ Bɛɛ. Vil-la leriŋ nɛ La TƖƖNA bʋla pɩ Mosis, “Kɛŋ Iziral tɩŋŋaa kala kʋ hɛ dɔŋɔ dɩ mɩ pɩba lɩɩŋ.”

¹⁷ Ŋɩɩ nɛ Iziral tɩŋŋaa yɩɩ yɩɩlɩŋ a bʋl, “Viliŋ bul lɩɩŋ dɩ la yɩɩ yɩɩlɩŋ a dɛnnʋ,

¹⁸ vil-la kuori-biiriŋ sɩ kɛŋ ba kuori-dantɩgɩsɩŋ lu, arɩ Iziral tɩŋŋaa sɩpaalaaraa sɩ kɛŋ ba dantɩgɩsɩŋ lu.” Ŋɩɩ nɛ ba sii tintee-hɩlɩɩ-la lɛ a mʋ lee-la ba sɩɩ yɩrɛ Matana.

¹⁹ Ba bɩra sii Matana lɛ a mʋ Nahalɩɛl, a sii Nahalɩɛl lɛ a mʋ Bamɔf.

²⁰ Ba sii Bamɔf lɛ a mʋ fuonaa-la sɩ hɛ Mʋab lɛ, lee-la ŋ sɩ jaŋ chɩŋ peel-la ba sɩɩ yɩrɛ Pɩsɩga bʋbʋɔŋ aŋ bibeŋ tintee-hɩlɩɩ-la.

Iziral tɩŋŋaa yuo dii Amɔrɩ tɩŋŋaa kuoro Sɩhɔŋ arɩ Basaŋ tɩŋŋaa kuoro Ɔgɩ

²¹ Iziral tɩŋŋaa tɩŋ nɩaa dɩ ba mʋ bʋla pɩ Amɔrɩ tɩŋŋaa kuoro Sɩhɔŋ,

²² “Leŋ dɩ la kʋ to ŋ tinteeŋ a bal. La bɩ jaŋ gɛbɛ jʋʋ ma bagɩsɩŋ kʋŋ, koo a nyʋa ma vilee kʋŋkala lɩɩŋ. La jaŋ to womporuŋ ŋɩɩ a mʋ lɩɩ ma tinteeŋ lɛ.”

²³ Ama Sɩhɔŋ bɩ sɛyɛ dɩ Iziral tɩŋŋaa kʋ to ʋ tinteeŋ a bal. Ʋ kɛŋ ʋ laalɩyuoroo kala ba lɩɩ dɩ ba yuo Iziral tɩŋŋaa tintee-hɩlɩɩ-la lɛ. Ba sɩ mʋ yi lee-la ba sɩɩ yɩrɛ Jahas, ba dɩ Iziral tɩŋŋaa yuo laalɩŋ nɩmɛ.

²⁴ Ŋɩɩ nɛ Iziral tɩŋŋaa yuo diiba a laa ba tinteeŋ, a chɩŋ fuo-la ba sɩɩ yɩrɛ Anɔŋ lɛ a kaa mʋ yi fuo-la ba sɩɩ yɩrɛ Jabɔk. Ama ba fa bɩ wuo mʋ jʋʋ Amɔŋ tɩŋŋaa tinteeŋ, bɛɛ wɩaa ba-na gɩba fa dolie nɛ woruŋ.

²⁵ Ŋɩɩ nɛ Iziral tɩŋŋaa yuo dii Amɔrɩ tɩŋŋaa tabalaa kala, a pɛ Hɛsɩbɔŋ arɩ tabiisi-la kala sɩ gollu, a hɔŋ ba lɛ.

²⁶ Amɔrɩ tɩŋŋaa kuoro Sɩhɔŋ tabalɩŋ nɛ fa ŋaa Hɛsɩbɔŋ. Sɩhɔŋ nɛ fa yuo dii Mʋab tɩŋŋaa kuoru-bɩnɩŋ a laa ʋ tinteeŋ kala a mʋ yi Anɔŋ fuo-la.

²⁷ Ŋɩɩ nɛ tɩɩ gɔgʋ-dɩndɛnnɛɛ bʋl, “Má kɔ kuoro Sɩhɔŋ tabalɩŋ Hɛsɩbɔŋ, dɩ la wasa saaʋ.

²⁸ Amɔrɩ tɩŋŋaa kuoro Sɩhɔŋ laalɩyuoroo sii ʋ tabalɩŋ Hɛsɩbɔŋ lɛ a nagɛ nyiniŋ a mʋ dii Aa. Mʋab tinteeŋ tabalɩŋ nɛ ŋɩɩ, a dii fuo-la ba sɩɩ yɩrɛ Anɔŋ dundolluŋ kala.

²⁹ Wɩɩŋ puuma, ma-na Mʋab tɩŋŋaa, ma nɩalɩŋ sɩ laa vene-la ba sɩɩ yɩrɛ Chɛmɔs dii a kpʋkpaarʋ, ma dɛrɛ nɛ ŋɩɩ. Ma hambolibiisiŋ kala fá nɛ, aŋ ka ba kɛsɛ ma toloo a kaa mʋ pɩ Amɔrɩ tɩŋŋaa kuoro.

³⁰ Ama la-na yuo diiba nɛ, a chɩŋ Hɛsɩbɔŋ lɛ a kaa mʋ yi taŋ-la ba sɩɩ yɩrɛ Dɩbɔŋ, a bɩra lɩɩ taŋ-la ba sɩɩ yɩrɛ Nasɩm lɛ a mʋ yi taŋ-la ba sɩɩ yɩrɛ Nofa, a kaa mʋ taŋ-la ba sɩɩ yɩrɛ Mediba.”

³¹ Ŋɩɩ nɛ Iziral tɩŋŋaa hɔŋ Amɔrɩ tɩŋŋaa tinteeŋ lɛ.

³² Mosis tɩŋ baalaa ba mʋ lʋara beŋ ŋɩɩ ba sɩ jaŋ to a yuo dii tabal-la ba sɩɩ yɩrɛ Jaza. Ŋɩɩ harɩŋ nɛ Iziral tɩŋŋaa mʋ yuo dii taŋ-la arɩ tabiisi-la kala sɩ gollu, a kiri Amɔrɩ tɩmma-la kala fa sɩ hɔŋ nɩmɛ.

³³ Iziral tɩŋŋaa bɩra lɩɩ nɩmɛ a joŋ wombiiŋ a chaasɛ Basaŋ tinteeŋ dɩɩrɩŋ. Ŋɩɩ nɛ Basaŋ kuoro ba sɩɩ yɩrɛ Ɔgɩ, ʋ dɩ ʋ laalɩyuoroo kala kʋ lɩɩ dɩ ba chemba Ɛdɩrɛ lɛ a yuoba.

³⁴ Ŋɩɩ nɛ La TƖƖNA bʋla pɩ Mosis, “Sɩ́ leŋe dɩ ŋ bɔyɛ joŋ, mɩ joŋ Basaŋ kuoro Ɔgɩ arɩ ʋ laalɩyuoroo arɩ ʋ tinteeŋ kala hɛ ŋ nɩsɩŋ lɛ nɛ. Ŋɩɩ ŋ sɩ joŋo ŋaa Amɔrɩ tɩŋŋaa kuoro Sɩhɔŋ sɩ hɛ Hɛsɩbɔŋ lɛ, joŋ ŋɩɩ tɩtɩa ŋaa ba ma lɛ.”

³⁵ Ŋɩɩ nɛ Iziral tɩŋŋaa kpʋ kuoro Ɔgɩ arɩ ʋ hambolibiisiŋ arɩ ʋ nɩaa kala, ba kʋbala ma bɩ ka, aŋ laa tintee-la kala a tɩɩ.