NAMBABA 18 - WƖA TENIŊ

Wɩɩsʋllɩ sɩpaalaaraa arɩ Levi doho nɩaa tɩntɩŋŋaa

¹ La TƖƖNA bʋla pɩ Arɔŋ, “Ŋ dɩ ŋ hambolibiisiŋ arɩ ma Levi doho nɩaa nɛ jaŋ laa cheeriŋ dɩ ba nɩɩ tɩŋ tɩntɩŋŋaa mɩ dɩ-zɔŋ-la lɛ a chei wɩɩ. Ama dɩ wɩɩ nɛ cheye a mʋʋ tɩgɛ Wɩɩsʋllɩ sɩpaalaaraa lɛ, ŋ dɩ ŋ hambolibiisiŋ dʋndʋŋa nɛ jaŋ laa cheeriŋ.

² Leŋ dɩ ŋ naambiiriŋ Levi doho nɩaa kʋ pɛ ŋ dɩ ŋ hambolibiisiŋ lɛ, dɩ ma tɩtɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ tɩntɩŋŋaa.

³ Ba jaŋ tɩŋ tɩntɩmɩɩ-la ma sɩ dagɛba dɩ ba tɩŋ lɛbɩ-la lɛ, ama ʋ bɩ maga dɩ ba digi mɩ tɩntɩnnɩ kʋzɔmɔ-la sɩ hɛ mɩ dɩ-zɔmʋŋ lɛ koo koru-la. Dɩ ba nɛ dige, mɩ jaŋ kpʋ ma kala.

⁴ Levi doho nɩaa dʋndʋŋa nɛ maga dɩ ba pɛ ma lɛ dɩ ma tɩtɩŋ lɛbɩ-la tɩntɩŋŋaa, nʋʋ dɔŋ kala bɩ maga dɩ ʋ kʋ kpagɛ nɩmɛ.

⁵ Ŋ dɩ ŋ hambolibiisiŋ dʋndʋŋa nɛ maga dɩ ma tɩtɩŋ mɩ dɩ-zɔŋ-la tɩntɩŋŋaa arɩ koru-la nyuŋ tɩntɩŋŋaa, dɩ mɩ bɩra sɩ́ baanɩŋ na Iziral tɩŋŋaa nyuŋ.

⁶ Mɩ nɛ lɩɩsɛ ŋ naambiiriŋ Levi doho nɩaa Iziral tɩŋŋaa tʋɔŋ a dii zile pɩŋ. Mɩ lɩɩsɛba nɛ dɩ ba ŋaa mɩ-na ma TƖƖNA nɩaa, a tɩtɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ tɩntɩŋŋaa.

⁷ Ŋ dɩ ŋ hambolibiisiŋ dʋndʋŋa nɛ maga dɩ ma ŋaa Wɩɩsʋllɩ sɩpaalaaraa, a tɩtɩŋ Wɩɩsʋllɩ koru-la nyuŋ arɩ mɩ dɩ-zɔŋ-la sɩpaaŋ lee-la zɔmʋŋ sɩ bɩ magɩa kɛnɛ tɩntɩŋŋaa. Mɩ joŋ Wɩɩsʋllɩ sɩpaalaaraa tɩntɩŋŋaa dii zile pɩma nɛ. Dɩ nɩwogo dɔŋ kala nɛ kʋ kpagɛ mɩ dɩ-zɔŋ-la, ʋ maga dɩ ma kpʋʋ.”

Wɩɩsʋllɩ sɩpaalaaraa arɩ Levi doho nɩaa kpaalɩŋ

⁸ Ŋɩɩ nɛ La TƖƖNA bɩra bʋla pɩ Arɔŋ, “Mɩ joŋ Wɩɩsʋlʋŋ kʋzɔmɔ-la kala Iziral tɩŋŋaa sɩ yie kaa kʋ pɩmɛ a pɩ ŋ dɩ ŋ hambolibiisiŋ nɛ, dɩ ba nɛ ŋaa ma toruŋ bʋa na-kala.

⁹ Wɩɩsʋlʋŋ kɩalɩŋ sɩ zɔmɔ kɩŋkɛŋ ba nyɩgɛ aŋ ka, dɩ mɩaa Wɩɩsʋlʋŋ nɛ, koo wʋbɔŋŋɔɔ joŋo chɛnɩŋ Wɩɩsʋlʋŋ nɛ, koo dɩ cheeriŋ Wɩɩsʋlʋŋ nɛ, kɩalɩŋ sɩ ka, ŋ dɩ ŋ hambolibiisiŋ nɛ jaŋ tɩɩba.

¹⁰ Má diiba dɩ-zɔŋ, ba ŋaa kɩaa sɩ chaasa bɩ disiniŋ kɛnɛ nɛ. Baal na-kala jaŋ wuo diiba. Má jomba dɩ ba ŋaa kɩaa sɩ bɩ disiniŋ kɛnɛ.

¹¹ Ma nɛ tɩɩ kɩaa deemba ma: Kʋŋ na-kala Iziral tɩŋŋaa sɩ kaa kʋ je a zaara sʋl Wɩɩsʋlʋŋ pɩmɛ. Mɩ jomba pɩ ŋ dɩ ŋ hambolibiisiŋ arɩ ŋ toloo nɛ, ma toruŋ nɛ ŋɩɩ bʋa na-kala lɛ. Ŋ dɩa nʋʋkala sɩ bɩ disiniŋ kɛnɛ jaŋ wuo diiba.

¹² Ma nɛ ha tɩɩ kɩaa deemba ma sɩ chaasa zɔŋ Iziral tɩŋŋaa sɩ yie kaa kʋ ŋaa Wɩɩsʋlʋŋ pɩmɛ: olif nʋʋŋ, tɩɩnɛnɛɛ sɩnɩŋ arɩ mɩaa ba sɩ yie kaa kʋ ŋaa kʋdii falaa Wɩɩsʋlʋŋ.

¹³ Ba tinteeŋ kʋdii fala-la kala ba sɩ yie kaa kʋ sʋl Wɩɩsʋlʋŋ pɩ mɩ-na ma TƖƖNA ŋaa ma kɩaa nɛ. Ŋ dɩa nʋʋ na-kala sɩ bɩ disiniŋ kɛnɛ jaŋ wuo diiba.

¹⁴ Kʋŋ na-kala Iziral tɩŋŋaa sɩ maga dɩ ba joŋ ʋ kala pɩ mɩ-na ma TƖƖNA, ma nɛ jaŋ tɩɩʋ.

¹⁵ Nuhuobiinee arɩ pʋsʋŋ kala bii-bumbumba-la ba sɩ joŋo pɩ mɩ-na ma TƖƖNA, ma nɛ tɩɩba, ama má leŋ dɩ ba time laa hambolibii bumbumba arɩ pʋsʋ-la sɩ kɛŋ disiniŋ bii-bumbumba sɩ ŋaa belliŋ.

¹⁶ Dɩ bii-bumbumba-la nɛ yi chɛnɛ, ba jaŋ time laa arɩ warɩpʋla banɔŋ arɩ ba sɩɩ tiŋ ŋɩɩ Wɩa dɩa lɛ.

¹⁷ Ʋ bɩ maga dɩ ba time laa nɛ-bele, piese koo bʋʋna, ba ŋaa kʋzɔmɔ nɛ mɩ teeŋ. Kpʋ ba-na a ŋaa Wɩɩsʋlʋŋ a laa ba chalɩŋ mɩsɛ mɩ koru-la, aŋ kʋɔrɛ ba nʋʋŋ a nyɩgɛ. Ba sʋɔra sɩma nɛ a pɩ mɩ-na ma TƖƖNA.

¹⁸ Ma nɛ tɩɩ ba nammɩa arɩ ma sɩ tɩɩ vaa-la arɩ nadiiŋ hui-la ba sɩ kaa je a zaarɛ a sʋl Wɩɩsʋlʋŋ ŋɩɩ.

¹⁹ Wɩɩsʋlʋŋ kʋzɔmɔ-la Iziral tɩŋŋaa sɩ yie kaa kʋ pɩ mɩ-na ma TƖƖNA, ba jaŋ ŋaa ŋ dɩ ŋ hambolibiisiŋ arɩ ŋ toloo kpaalɩŋ. Ʋ jaŋ ŋaa nii a pɩŋ mɩ dɩŋ arɩ ŋ doho nɩaa pɛgɛ a kaa mʋ wuu.”

²⁰ Ŋɩɩ nɛ La TƖƖNA bʋla pɩ Arɔŋ, “Ŋ bɩ toruŋ kɛnɛ Iziral tɩŋŋaa tintee-la lɛ, ŋ bɩ kpaal ma kɛnɛ ba dʋa tʋɔŋ, mɩ nɛ ŋaa ŋ kpaalɩŋ arɩ ŋ dʋa Iziral tɩŋŋaa tʋɔŋ.

²¹ Mɩ joŋ Iziral tɩŋŋaa sɩ yie kɛŋ kɩaa kpaa leree fii a joŋ kʋbala-la pɩmɛ, a pɩ Levi doho nɩalɩŋ sɩɩ tɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ nɛ. Ba ma time nɛ ŋɩɩ.

²² A chɩŋ lɛɛlɛ a kaa mʋ, Iziral tɩmma-la sɩ bɩ Levi doho nɩaa ŋaa bɩ maga dɩ ba kʋ kpagɛ lɛbɩ-la lɛ mɩ sɩ yie kɔ Iziral tɩŋŋaa teeŋ. Dɩ ba nɛ ŋaa ŋɩɩ, ŋɩɩ jaŋ ŋaa wʋbɔŋ a leŋ dɩ ba sʋʋ.

²³ Levi doho nɩaa dʋndʋŋa nɛ jaŋ tɩtɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ tɩntɩŋŋaa, a bibeŋ ʋ nyuŋ. Dɩ wɩɩkala nɛ bɩ woruŋ vɛnɛ nɩmɛ, ba nɛ jaŋ laa cheeriŋ. Wɩɩŋ deeŋ jaŋ pɩŋ a pɩ ba dɩ ba doho kala, a kaa mʋ wuu. Ba bɩ jaŋ laa kpaalɩŋ Iziral tɩŋŋaa tʋɔŋ.

²⁴ Mɩ sɩ joŋ Iziral tɩŋŋaa sɩ yie kɛŋ ba kɩaa kpaa leree fii a joŋ kʋbala-la pɩ mɩ-na ma TƖƖNA a pɩ Levi doho nɩaa ŋɩɩ, ŋɩɩ nɛ tɩɩ mɩ sɩ ba bɩ jaŋ laa kpaal kala Iziral tɩŋŋaa dʋa tʋɔŋ.”

²⁵ La TƖƖNA bʋla pɩ Mosis,

²⁶ “Bʋla pɩ Levi doho nɩaa, dɩ ba nɛ laa Iziral tɩŋŋaa sɩ yie kɛŋ ba kɩaa kpaa leree fii a joŋ kʋbala-la pɩmɛ, mɩ sɩ joŋo pɩba ʋ ŋaa ba kpaalɩŋ, ba ma bɩra kaa kpaa leree fii a joŋ kʋbala a ŋaa Wɩɩsʋlʋŋ pɩmɛ.

²⁷ Ba Wɩɩsʋlʋŋ deeŋ jaŋ nagɛ paara sɩ kɛŋ ʋ mɩɩ-falaa arɩ ʋ tɩɩ-nɛŋ-falaa sɩnɩŋ kʋ sʋl Wɩɩsʋlʋŋ pɩmɛ.

²⁸ Ŋ-la nɛ maga dɩ ba to a joŋ ba sɩ laa Iziral tɩŋŋaa sɩ kɛŋ ba kɩaa kpaa leree fii a joŋ kʋbala-la pɩ mɩ-na ma TƖƖNA a ŋaa Wɩɩsʋlʋŋ pɩmɛ. Ʋ maga ba lɩɩsɛ lere-la sɩ ŋaa mɩ-na ma TƖƖNA toruŋ, a joŋo pɩ Wɩɩsʋllɩ sɩpaalaara Arɔŋ.

²⁹ Kpaal na-kala ba sɩ laa, ʋ maga dɩ ba lɩɩsɛ ba tʋɔŋ kɩalɩŋ sɩ chaasa zɔŋ a bɩ disiniŋ kɛnɛ a pɩ mɩ-na ma TƖƖNA.

³⁰ Bʋla pɩ Levi doho nɩaa, dɩ ba nɛ kɛŋ lere-la sɩ chaasa zɔŋ kɔ, ʋ jaŋ nagɛ ba sɩ yie kɛŋ mɩɩ-falaa arɩ tɩɩ-nɛŋ-falaa sɩnɩŋ kʋ ŋaa Wɩɩsʋlʋŋ.

³¹ Ba dɩ ba dɩa nɩaa jaŋ wuo dii kɩalɩŋ lee na-kala. Ba sɩɩ tɩŋ lɛbɩ-la lɛ mɩ sɩ yie kɔ Iziral tɩŋŋaa teeŋ tɩntɩŋŋaa ŋɩɩ, ba time nɛ ŋɩɩ.

³² Dɩ ba nɛ kɛŋ kɩalɩŋ lere-la sɩ chaasa zɔŋ kʋ pɩmɛ, ba bɩ cheeri kala kɛnɛ. Ʋ ŋɩɩ bɩ disiŋ ma kɛnɛ Iziral tɩŋŋaa Wɩɩsʋlʋŋ kɩalɩŋ sɩ chaasa zɔŋ lɛ. Ba bɩ jaŋ sʋʋ.”