NAMBABA 17 - WƖA TENIŊ

Arɔŋ dantɩga tɔsɔ

¹ La TƖƖNA bʋla pɩ Mosis,

² “Bʋla pɩ Iziral tɩŋŋaa dɩ doho doho fii arɩ balɩa-la sɩpaalaarʋ kala kɛŋ dantɩga kʋ pɩŋ, dɩ ŋ ŋmʋnsɛ ʋ yɩrɩŋ hɛ.

³ Levi doho nɩaa dantɩga lɛ, ŋmʋnsɛ Arɔŋ yɩrɩŋ hɛ. Doho na-kala sɩpaalaarʋ maga dɩ ʋ kɛŋ dantɩgɛ bala nɛ.

⁴ Joŋ dantɩgɩsɩ-la bil lɛbɩ-la lɛ mɩ sɩ yie kɔ Iziral tɩŋŋaa teeŋ tʋɔŋ, mɩ niiriŋ daga-la sɩpaaŋ lee-la mɩ sɩ yie kɔ ma teeŋ.

⁵ Nɩɩ-la mɩ sɩ lɩɩsa dantɩga jaŋ tɔsɛ. Dɩ ŋɩɩ nɛ ŋaa, ʋ jaŋ giri wɩalɩŋ Iziral tɩŋŋaa sɩ yie vɛnɛɛ gʋrɩmɛ ma teeŋ a ta.”

⁶ Mosis sɩ bʋl wɩalɩŋ pɩ Iziral tɩŋŋaa, ba doho doho fii arɩ balɩa-la sɩpaalaarʋ kala kɛŋ ʋ dantɩga kɔ, Arɔŋ ma kʋa pɛ.

⁷ Ŋɩɩ nɛ Mosis kɛŋ dantɩgɩsɩ-la jʋʋ bil lɛbɩ-la lɛ La TƖƖNA sɩ yie kɔ Iziral tɩŋŋaa teeŋ, La TƖƖNA niiriŋ daga-la sɩpaaŋ.

⁸ Taŋ sɩ pʋla, Mosis jʋʋ lɛbɩ-la lɛ La TƖƖNA niiriŋ daga-la sɩ hɛ, dɩ Arɔŋ dantɩga sɩ ŋaa Levi doho nɩaa kʋa tɔsɔ a fɩɩlɛ, a nɛŋ fʋfʋlaa.

⁹ Ŋɩɩ nɛ Mosis paa dantɩgɩsɩ-la kala La TƖƖNA sɩpaaŋ a kaa kʋ lɩɩ dagɛ Iziral tɩŋŋaa, ba na wɩɩ-la sɩ ŋaa. Nʋʋkala joŋ ʋ kʋa.

¹⁰ Ŋɩɩ nɛ La TƖƖNA bʋla pɩ Mosis, “Mɩɩra kɛŋ Arɔŋ dantɩga jʋʋ bil mɩ niiriŋ daga-la sɩpaaŋ dɩ ʋ ŋaa magɩl a chɩchagɩlɛ Iziral tɩmma-la sɩ bɩ mɩ niiŋ ka sɛɩ, dɩ ba bɩra sɩ́ wɩaa gʋrʋmʋ dɩ ŋɩɩ leŋ dɩ ba sʋʋ.”

¹¹ Mosis ŋaa ŋɩɩ tɩtɩa La TƖƖNA sɩ dagʋ.

¹² Ŋɩɩ nɛ Iziral tɩŋŋaa bʋla pɩ Mosis, “Ŋɩɩ-na la lɛlɛ nɛ, la kala jaŋ sʋʋ.

¹³ Dɩ la nɛ mʋ kpagɛ La TƖƖNA dɩ-zɔŋ-la la jaŋ sʋʋ-na, ŋɩɩ-na la kʋŋ bɩra bɩ ka.”