NAMBABA 14 - WƖA TENIŊ

Iziral tɩŋŋaa vɩa Mosis arɩ Arɔŋ niiŋ

¹ Tɩtaŋ-la Iziral tɩŋŋaa kala tʋɔŋ chei ba faasa yiyel.

² Ba kala gʋrɩmɛ wɩaa Mosis arɩ Arɔŋ teeŋ, a bʋl, “La fa yaara sʋʋ Ijipiti tinteeŋ lɛ koo tintee-hɩlɩŋ deeŋ lɛ, ʋ nɛ kpɩa.

³ Bɛɛ nɛ tɩɩ La TƖƖNA kɛnla kɔ tinteeŋ deeŋ dɩ ba kpʋla laalɩŋ lɛ aŋ kɛsɛ la haalaa arɩ la biiriŋ? Ʋ bɩ jaŋ kpɩa dɩ la nɛ mɩɩra mʋ Ijipiti tinteeŋ?”

⁴ Ŋɩɩ nɛ nɩalɩŋ bʋla pɩ dɔŋɔ, “Má leŋ dɩ la lɩɩsɛ sɩpaalaara dɩ ʋ mɩɩra kɛnla mʋ Ijipiti tinteeŋ.”

⁵ Ŋɩɩ nɛ Mosis arɩ Arɔŋ tuu tele chu Iziral tɩŋŋaa kala sɩpaaŋ.

⁶ Ba sɩ ŋaa ŋɩɩ, Nuŋ nanʋala Josua arɩ Jefuni nanʋala Kalɩb tʋɔŋ chei ba kɛŋ ba gɛnnɩŋ kɩɛsɛ. Ba ma fa hɛ nɩalɩŋ Mosis sɩ tɩma ba mʋ beŋ tintee-la tʋɔŋ nɛ.

⁷ Ŋɩɩ nɛ ba bʋla pɩ Iziral tɩŋŋaa kala, “Tintee-la la sɩ mʋ beŋ chaasa zɔŋ nɛ.

⁸ Dɩ La TƖƖNA tʋɔŋ nɛ tɔrɛ la nyuŋ, ʋ jaŋ kɛnla mʋ tinteeŋ deeŋ sɩ kɛŋ kɩaa woruŋ a joŋu pɩla.

⁹ Má sɩ́ La TƖƖNA wɩɩkala vɩa, a sɩ́ nɩalɩŋ sɩ hɛ tintee-la lɛ ma fá, la jaŋ yuo diiba. La TƖƖNA hɛ la teeŋ nɛ, ba bɩra bɩ kʋŋkala kɛnɛ dɩ ba kaa pɔ ba tɩtɩa, má sɩ́ ba fá.”

¹⁰ Ama Iziral tɩŋŋaa kala bʋl arɩ ba jaŋ yagɛ Josua arɩ Kalɩb kpʋ arɩ tabɩaa. Ŋɩɩ nɛ La TƖƖNA tʋla guu kʋ chaanɛ lɛbɩ-la lɛ ʋ sɩ yie kɔ Iziral tɩŋŋaa teeŋ.

¹¹ La TƖƖNA pɩɛsɛ Mosis, “Ɛɛ nɛ nɩaa deemba chɛ dɩ ba vɩamɛ a diene magɛ? Bɛɛ nɛ tɩɩ nɩaa deemba bɩ mɩ laa dii arɩ mɩ sɩ ŋaa wʋkpuŋkperisiŋ arɩ wʋmagɩlaa magɛ ŋɩɩ ba tʋɔŋ?

¹² Mɩ jaŋ joŋ nyanyal bɔŋŋɔɔ hɛ ba lɛ dɩ ba cheiba, aŋ leŋ dɩ ŋ-na kʋ ŋaa tintee sɩ jaŋ yʋgɛ a kɛŋ doluŋ a kɩɩba.”

¹³ Ŋɩɩ nɛ Mosis bʋla pɩ La TƖƖNA, “Dɩ ŋ nɛ ŋaa ŋɩɩ, Ijipiti tɩŋŋaa jaŋ nɩɩ wɩɩ-la. Ba teeŋ nɛ ŋ joŋ doluŋ laa ŋ nɩaa deemba.

¹⁴ Ijipiti tɩŋŋaa jaŋ bʋl wɩɩ-la pɩ tinteeŋ deeŋ nɩaa. Ba paala nɩɩ arɩ ŋ-na La TƖƖNA hɛ ŋ nɩaa deemba tʋɔŋ nɛ, ba chaasa naŋ nɛ, ŋ duoŋ-bɩlɩmbaaŋ-la sɩ chugilo tɔ ŋ nɩaa lɛ. Ŋ duoŋ-bɩlɩmbaaŋ-la yie laa ba sɩpaaŋ wɩɩhɛyɛ, tɩtaŋɩŋ ma ʋ nagɛ jebiiŋ sɩ ŋaa nyiniŋ.

¹⁵ Dɩ ŋ nɛ kpʋ ŋ nɩaa deemba kala bala, tinteye-la sɩ jaŋ nɩɩ wɩɩ-la jaŋ bʋl,

¹⁶ ‘La TƖƖNA bɩ wuo kɛmba mʋ tintee-la ʋ sɩ hɛ niiŋ arɩ ʋ jaŋ joŋo pɩba, aŋ kpʋba ta tintee-hɩlɩŋ lɛ.’

¹⁷ Lɛɛlɛ La TƖƖNA, mɩɩ sʋlʋŋ, dagɛla ŋ doluŋ arɩ ŋ sɩ bʋl ŋɩɩ.

¹⁸ Ŋ-na La TƖƖNA baanɩŋ bɩ lɩma lɩma ka sii, ŋ kɛŋ chonuŋ arɩ wʋtɩtɩɩ, a joŋ nɩaa wʋbɔŋŋɔɔ arɩ ba wʋcheelee aa chɛba, a bɩ nɩalɩŋ sɩ ŋaa wɩaa chei ka leŋ pɛɩ. Ŋ yie dɔgɩsɛ nyɩmmaba biiriŋ arɩ ba nihee arɩ ba nihi-lɩɛrɛba a tɩŋ ba nyɩmmaba wʋbɔŋŋɔɔ wɩaa.

¹⁹ La TƖƖNA, a tɩŋ ŋ sɩ cho nɩaa kɩŋkɛŋ, joŋ nɩaa deemba wʋbɔŋŋɔɔ chɛba arɩ ŋ fa sɩ joŋ ba wʋcheelee chɛba bʋa-la lɛ ba sɩ lɩɩ Ijipiti tinteeŋ lɛ a kaa kɔ jɩnɩŋ.”

²⁰ Ŋɩɩ nɛ La TƖƖNA bʋl, “Ŋ sɩ bʋl ŋɩɩ, mɩ joŋo chɛba nɛ.

²¹ Ama a tɩŋ mɩ-na ma TƖƖNA sɩ sɛnɛ hɛ nɩmɛ, mɩ tʋla bɩ dʋnɩa lee-kala buo,

²² nɩaa deemba sɩ na mɩ tʋla arɩ wʋmagɩla-la kala mɩ sɩ ŋaa Ijipiti tinteeŋ lɛ arɩ wʋmagɩl-la mɩ sɩ ŋaa tintee-hɩlɩŋ lɛ aŋ vɩa mɩ niiŋ wɩaa aŋ magɩsɛmɛ naansɩɩŋ fii ŋ-la,

²³ ba kʋbala ma bɩ jaŋ na tintee-la mɩ sɩ hɛ niiŋ arɩ mɩ jaŋ joŋo pɩ ba naabalɩmaba. Nɩalɩŋ sɩ vɩamɛ bɩ jaŋ na tintee-la.

²⁴ Ama mɩ tɩntɩnna Kalɩb mɛlɛ bɩ ba naga, ʋ kɛŋ ʋ tʋɔŋ kala nɛ aa tomi. Mɩ jaŋ kɛnʋ mʋ tintee-la ʋ sɩ laa sɩpaaŋ mʋ beŋ. Ʋ doho nɩaa jaŋ tɩɩ tintee-la.

²⁵ Amalɛk tɩŋŋaa arɩ Kɛnaŋ tɩŋŋaa sɩ hɔŋ fuonaa-la lɛ ŋɩɩ, chie má mɩɩrɛ harɩŋ a chaasɛ tintee-hɩlɩɩ-la sɩ hɛ wombii-la ba sɩ to a mʋmʋ mʋgʋ-bal-la ba sɩɩ yɩrɛ Mʋgʋ-fɩaŋ.”

²⁶ Ŋɩɩ nɛ La TƖƖNA bɩra bʋla pɩ Mosis arɩ Arɔŋ,

²⁷ “Ɛɛ nɛ nɩbɔŋŋɔɔ deemba jaŋ gʋrɩmɛ mɩ teeŋ a diene magɛ? Mɩ nɩɩ wɩalɩŋ kala Iziral tɩmma-la sɩ gʋrʋma mɩ teeŋ nɛ.”

²⁸ Ŋɩɩ wɩaa bʋla pɩba, “Mɩ-na ma TƖƖNA sɩ hɛ nɩmɛ nɛ bʋla, mɩ jaŋ sɛnɛ ŋaa wɩalɩŋ kala ma sɩ pɩɛsaa chɛ.

²⁹ Ma nɩalɩŋ kala sɩ yi jɩsɩŋ mara koo a kɩɩ ŋɩɩ, ba dɩɩsʋ bʋa-la lɛ ba sɩɩ dɩɩsɛ nɩaa, nɩalɩŋ sɩ gʋrɩmɛ wɩaa mɩ teeŋ, ba jaŋ sʋʋ tintee-hɩlɩŋ deeŋ tʋɔŋ.

³⁰ Ma kʋbala ma bɩ jaŋ jʋʋ tintee-la mɩ sɩ hɛ niiŋ arɩ mɩ jaŋ joŋo pɩma dɩ ma hɔŋ nɩmɛ, see Jefuni nanʋala Kalɩb arɩ Nuŋ nanʋala Josua.

³¹ Ma biiri-la ma fa sɩ bʋla arɩ ba jaŋ kpʋma aŋ kɛsɛ, mɩ jaŋ kɛmba jʋʋ tintee-la ma sɩ vɩa, dɩ ba-na hɔŋ nɩmɛ, a nɩnɩɩ sɩma.

³² Ama ma-na jaŋ sʋʋ tintee-hɩlɩŋ deeŋ lɛ.

³³ Ma biiriŋ jaŋ ŋaa kʋdaaraa daha jɩsɩŋ mahɩŋ balɩa. Ba jaŋ na hɛɛŋ a tɩŋ ma sɩ bɩ wʋtɩtɩɩ kɛnɛ wɩaa, see dɩ ma kala sʋʋ dɛrɛ tintee-hɩlɩŋ deeŋ lɛ.

³⁴ Ma jaŋ na hɛɛŋ jɩsɩŋ mahɩŋ balɩa a tɩŋ ma wʋbɔŋŋɔɔ wɩaa. Tapʋlaa mahɩŋ balɩa-la ma sɩ joŋo a kaa dʋʋra beŋ tintee-la, tapʋl-bala kala ŋaa jɩna nɛ. Dɩ ma nɛ na hɛɛŋ a tɩŋ ma wʋbɔŋŋɔɔ wɩaa, ma jaŋ jɩŋ ŋɩɩ ʋ sɩ naga dɩ mɩ baanɩŋ nɛ sii ma nyuŋ.

³⁵ Mɩ-na ma TƖƖNA nɛ bʋla, mɩ jaŋ sɛnɛ ŋaa wɩɩ-la mɩ sɩ bʋla. Nɩbɔŋŋɔɔ deemba sɩ kʋ hɛ dɔŋɔ a gʋrɩmɛ wɩaa mɩ teeŋ, ba kala jaŋ sʋʋ dɛrɛ tintee-hɩlɩŋ deeŋ lɛ.”

³⁶ Nɩalɩŋ Mosis fa sɩ tɩma ba mʋ a lʋara beŋ tintee-la, aŋ mɩɩra kɔ a dʋʋra nyɩɛ wɩaa a mʋ tɩgɛ tintee-la lɛ a leŋ Iziral tɩŋŋaa gʋrɩmɛ wɩaa La TƖƖNA teeŋ,

³⁷ La TƖƖNA joŋ nyanyal bɔŋ hɛ ba lɛ ba sʋʋ.

³⁸ Ba nɩalɩŋ sɩ mʋ lʋara beŋ tintee-la kala tʋɔŋ, Nuŋ nanʋala Josua arɩ Jefuni nanʋala Kalɩb dʋndʋŋa nɛ bɩ sʋba.

³⁹ Mosis sɩ bʋl wɩalɩŋ kala La TƖƖNA sɩ bʋla a pɩ Iziral tɩŋŋaa, ba faasa yel.

⁴⁰ Taŋ sɩ pʋla chʋchʋɔ-fɩɛla, ba sii a tʋʋlɛ tintee-la peelee sɩ yʋga a mʋmʋ. Ba sɩ, “Má leŋ dɩ la mʋ tintee-la La TƖƖNA sɩ sɩ ʋ jaŋ joŋo pɩla, la jɩma la ŋaa wʋbɔŋ nɛ.”

⁴¹ Ŋɩɩ nɛ Mosis bʋl, “Bɛɛ nɛ tɩɩ ma bɩ chɛ dɩ ma to La TƖƖNA niiŋ? Dɩ ma nɩɩ ŋaa ŋɩɩ, ma bɩ jaŋ na wʋzɔŋ.

⁴² Má sɩ́ mʋ, bɛɛ wɩaa La TƖƖNA tuo ma teeŋ, ma dʋndɔŋŋɔɔ jaŋ yuo diima.

⁴³ Amalɛk tɩŋŋaa arɩ Kɛnaŋ tɩŋŋaa jaŋ yuoma, bɛɛ wɩaa ma mɩɩrɛ La TƖƖNA harɩŋ nɛ. Ʋ bɩ jaŋ to ma harɩŋ, ŋɩɩ jaŋ leŋ ma dʋndɔŋŋɔɔ yuo diima.”

⁴⁴ Arɩ Mosis sɩ bʋl ŋɩɩ kala, ba bɩ ʋ niiŋ nɩa, aŋ sii jɩl tintee-la peelee sɩ yʋga, ka Mosis arɩ Wɩa niiriŋ daga-la-na hɛ ba dɩhɔnʋŋ.

⁴⁵ Ŋɩɩ nɛ Amalɛk tɩŋŋaa arɩ Kɛnaŋ tɩmma-la sɩ hɔŋ tintee-la lɛ peelee sɩ yʋga sii kʋ tuu a yuo diiba, a kiriba ŋɩɩ a kʋ yi taŋ-la ba sɩɩ yɩrɛ Hɔma.