NAMBABA 13 - WƖA TENIŊ

Ba tɩŋ nɩaa dɩ ba mʋ lʋara beŋ Kɛnaŋ tinteeŋ

¹ Ŋɩɩ nɛ La TƖƖNA bʋla pɩ Mosis,

² “Iziral doho doho fii arɩ balɩa-la tʋɔŋ, lɩɩsɛ doho na-kala sɩpaalaarɩ-bala, a leŋ dɩ ba mʋ lʋara beŋ Kɛnaŋ tinteeŋ, lee-la mɩ sɩ jaŋ joŋo pɩma.”

³ Ŋɩɩ nɛ ba hɔŋ Paraŋ tintee-hɩlɩɩ-la lɛ, ka Mosis tɩŋ Iziral tɩŋŋaa sɩpaalaara-la arɩ La TƖƖNA sɩ dagʋ ŋɩɩ.

⁴ Nɩalɩŋ yɩraa nɛ ŋ-la: Zaku nanʋala Samʋa, ʋ lɩɩ Rubiŋ doho nɩaa tʋɔŋ nɛ.

⁵ Hɔrɩ nanʋala Safat, ʋ lɩɩ Simioŋ doho nɩaa tʋɔŋ nɛ.

⁶ Jefuni nanʋala Kalɩb, ʋ lɩɩ Juda doho nɩaa tʋɔŋ nɛ.

⁷ Josɛf nanʋala Ɩgal, ʋ lɩɩ Ɩsaka doho nɩaa tʋɔŋ nɛ.

⁸ Nuŋ nanʋala Hosia, ʋ lɩɩ Efirem doho nɩaa tʋɔŋ nɛ.

⁹ Rafʋ nanʋala Palɩtɩ, ʋ lɩɩ Bɛnjamɩŋ doho nɩaa tʋɔŋ nɛ.

¹⁰ Sodi nanʋala Gadɩɛl, ʋ lɩɩ Zebuluŋ doho nɩaa tʋɔŋ nɛ.

¹¹ Susi nanʋala Gadɩ, ʋ lɩɩ Manasɛ doho nɩaa tʋɔŋ nɛ. (Manasɛ arɩ Josɛf ŋaa do-bala nɛ.)

¹² Gamalɩɛl nanʋala Amɩɛl, ʋ lɩɩ Daŋ doho nɩaa tʋɔŋ nɛ.

¹³ Maakɩl nanʋala Seta, ʋ lɩɩ Asa doho nɩaa tʋɔŋ nɛ.

¹⁴ Vosi nanʋala Nabɩ, ʋ lɩɩ Nafɩtalɩ doho nɩaa tʋɔŋ nɛ.

¹⁵ Makɩ nanʋala Geel, ʋ lɩɩ Gad doho nɩaa tʋɔŋ nɛ.

¹⁶ Nɩalɩŋ Mosis fa sɩ tɩma dɩ ba mʋ lʋara beŋ tintee-la yɩraa nɛ ŋɩɩ. (Nuŋ nanʋala Hosia nɛ Mosis kaa yɩrɛ Josua ŋɩɩ.)

¹⁷ Mosis sɩ tɩmba dɩ ba mʋ lʋara beŋ Kɛnaŋ tintee-la ŋɩɩ, ʋ bʋla pɩba, “Má mʋ to Nɛgɛf a mʋ tintee-la peelee sɩ yʋga,

¹⁸ a na ŋɩɩ tintee-la sɩ naga, a na dɩ nɩalɩŋ sɩ hɛ nɩmɛ ŋaa nɩduoru nɛ koo nɩpʋgʋnʋ nɛ, ba ŋaa nɩ-daŋ nɛ koo ba muuro nɛ,

¹⁹ aŋ pɛ na tintee-la lɛ ba sɩ hɔnɔ, ʋ zɔmɔ nɛ koo ʋ bɩ zɔŋ. Má bee na ba tasɩŋ sɩ nagɛ ŋɩɩ, dɩ ba saa kɛrɩsɩŋ golli nɛ koo ba bɩ saa golli.

²⁰ Má beŋ ba tinteeŋ ma a na dɩ ʋ sɩma nɛ koo ʋ bɩ sɩŋ, dɩ ʋ ŋaa lee sɩ kɛŋ tɩɩsɩŋ nɛ koo ʋ bɩ kɛnɛ. Má hɛ doluŋ aŋ pɛ kɛŋ tintee-la tɩɩnɛnɛɛ dɔnsʋŋ kɔ.” (Bʋa-la lɛ dɩ tɩɩnɛnɛ-la ba sɩɩ yɩrɛ girep ka bɩɩ.)

²¹ Ŋɩɩ nɛ ba mʋ, a chɩŋ Zɩŋ tintee-hɩlɩŋ lɛ a beŋ tintee-la ŋɩɩ a mʋ yi lee-la ba sɩɩ yɩrɛ Rehob sɩ kpagɛ Lebo-Hamaf.

²² Ba to ŋɩɩ a jɩl Nɛgɛf dɩɩrɩŋ, a joŋ ŋɩɩ mʋ Hɛbʋrɔŋ. Ahɩmaŋ, Sɛsaɩ arɩ Talɩmaɩ ŋaa Anakɩ doho nɩaa nɛ, ba nɛ fa hɛ Hɛbʋrɔŋ lɛ. (Ba saa Hɛbʋrɔŋ taŋ-la jɩsɩŋ balɩpɛ harɩŋ nɛ ka ba-na saa taŋ-la ba sɩɩ yɩrɛ Zʋaŋ sɩ hɛ Ijipiti tinteeŋ lɛ.)

²³ Ba sɩ mʋ yi fuonaa-la ba sɩɩ yɩrɛ Ɛsɩkɔl, ba keri girep nɛnɛɛ jaga kʋbala. Ba joŋo hɛ daaterige lɛ, ba nɩaa balɩa baasɛ, a pɛ tɩɩnɛnɛɛ dɔnsʋŋ sɩ nagɛ kampoi nɛnɛɛ arɩ tutogi nambɩlaa.

²⁴ Iziral tɩŋŋaa sɩ keri girep nɛnɛɛ jaga-la nɛ tɩɩ ba kɛŋ fuonaa-la yɩyɩrɛ Ɛsɩkɔl fuonaaŋ ŋɩɩ.

²⁵ Ba joŋ tapʋlaa mahɩŋ balɩa nɛ a beŋ tintee-la dɛrɛ aŋ mɩɩrɛ.

Duoso-la nɩalɩŋ sɩ mʋ lʋara beŋ tintee-la sɩ kaa kɔ

²⁶ Ba kɔ Mosis, Arɔŋ arɩ Iziral tɩmma-la kala teeŋ Kɛdɛs sɩ hɛ Paraŋ tintee-hɩlɩŋ lɛ. Ba bʋl wɩalɩŋ kala ba sɩ na lee-la a pɩba aŋ pɛ kɛŋ tintee-la tɩɩnɛnɛ-la ma dagɛba.

²⁷ Wɩalɩŋ ba sɩ bʋla pɩ Mosis nɛ ŋ-la, ba sɩ, “La sɩ jʋʋ tintee-la ma sɩ tɩnla dɩ la mʋ lʋara beŋ, wʋtɩtɩɩ, tintee-la sɩma. Ʋ kɛŋ kɩaa nɛ woruŋ, na ʋ kɩaa nɛ ŋ-la.

²⁸ Ama nɩalɩŋ sɩ hɛ nɩmɛ dolie, ba tabalaa jalɩa ka ba saa kɛrɩsɩŋ golli ba kala. La paala na Anakɩ doho nɩaa nɩwaayiilee nɩmɛ.

²⁹ Amalɛk tɩŋŋaa nɛ hɔŋ Nɛgɛf tinteeŋ lɛ, ka Hiti tɩŋŋaa, Jebus tɩŋŋaa arɩ Amɔrɩ tɩŋŋaa hɔŋ tintee-la peelee sɩ yʋga lɛ, ka Kɛnaŋ tɩŋŋaa ma hɔŋ a kpagɛ mʋgʋ-bal-la ba sɩɩ yɩrɛ Mediterenia arɩ Jɔdaŋ fuo-la niiŋ.”

³⁰ Ŋɩɩ nɛ Kalɩb ŋaa nɩalɩŋ kala sɩ bʋl wɩalɩŋ pɩpɩ Mosis tɔrɛ ba niiŋ, ka ʋ bʋl, “Má leŋ dɩ la mʋ a yuo laa tintee-la, la jaŋ wuo yuo laaʋ.”

³¹ Ama ʋ dɩ nɩalɩŋ sɩ to dɔŋɔ mʋ tintee-la ma sɩ, “La bɩ nɩalɩŋ sɩpaaŋ wuo chɩŋ, ba dolie kɩɩla nɛ.”

³² Nɩalɩŋ dʋʋra nyɩɛ wɩaa a mʋʋ tɩgɛ tintee-la ba sɩ mʋ lʋara beŋ lɛ, a bʋl, “Tintee-la la sɩ mʋ lʋara beŋ, ʋ bɩ kʋdiilee kɛnɛ woruŋ dɩ ʋ nɩaa dii. Nɩalɩŋ ma la sɩ na nɩmɛ waa nɛ woruŋ.

³³ La paala na Anakɩ doho nɩaa nɩwaayiilee nɛ nɩmɛ. Anakɩ doho nɩalɩŋ nɛ ba ha yɩyɩrɛ Nefilim. La beŋ la tɩtɩa a nagɛ nyaŋgɩrɩgɛba nɛ ba sɩaa lɛ. Ŋɩɩ tɩtɩa nɛ la sɛnɛ nagɛ ba teeŋ.”