NAMBABA 11 - WƖA TENIŊ

La TƖƖNA ta nyiniŋ ʋ kʋ tuu

¹ Ŋɩɩ nɛ nɩalɩŋ suomo gʋgʋrɩmɛ wɩaa La TƖƖNA teeŋ a tɩŋ hɛɛ-la ba sɩɩ na. La TƖƖNA nɩɩ, ʋ baanɩŋ sii ba nyuŋ, ʋ joŋ nyiniŋ hɛ ba buguŋ sɛŋ-keree sɛsɩŋ dɔnsʋŋ ʋ dii.

² Ŋɩɩ nɛ nɩalɩŋ ŋmoo niiŋ pɩ Mosis, ʋ sʋl La TƖƖNA, ʋ leŋ nyiŋ-la dɩsɛ.

³ Ŋɩɩ nɛ ba hɛ lee-la yɩrɩŋ Tabɩra, bɛɛ wɩaa nɩmɛ nɛ La TƖƖNA leŋ nyiniŋ dii ba dɩhɔnʋŋ sɛŋ-keree.

La TƖƖNA pɩ Iziral tɩŋŋaa jɩmpɩrɩwɩɩba

⁴ Ŋɩɩ nɛ nammɩa hɩɛnɩŋ faasa kɛŋ nʋhʋɔra-la sɩ hɛ Iziral tɩŋŋaa tʋɔŋ. Iziral tɩmma-la bɩra ŋmoo niiŋ a bʋl, “Kʋbɛɛ nɛ jaŋ pɩla nammɩa dɩ la chaŋ?

⁵ La fa yie chaŋ chenfilee nɛ Ijipiti tinteeŋ lɛ pɛɩ, a dii bʋalaa, kakɩasɩŋ, arɩ kɩalɩŋ ba sɩɩ yɩrɛ liik arɩ alabasaba arɩ tintee-hɛɛlɛ-la ba sɩɩ yɩrɛ Galɩk.

⁶ Ama lɛɛlɛ, la niiŋ kala nɛ kpʋa, ka la bɩ kʋŋkala kɛnɛ a pɛ kʋdiile-la ba sɩɩ yɩrɛ ‘Mana’ lɛ.”

⁷ Mana-la fa ŋaa kʋpʋla nɛ a nagɛ sɛrɛɛ biee.

⁸ Nɩalɩŋ yie lɩɩ paa, a nɔŋ nɔmʋŋ lɛ koo a bugisi tɔgʋŋ lɛ a chɔ, koo a wasɛ muŋgulumoo. Ba yie sɩŋ a nagɛ ba sɩ kɛŋ Olif nʋʋŋ a buu munuŋ a wasɛ boroboro nɛ.

⁹ Dɩ taŋ nɛ bire dɩ nyalɩŋ nyal ba dɩhɔnʋŋ, mana-la ma yie to ʋ lɛ a titel.

¹⁰ Mosis sɩ na dɩ nɩalɩŋ dɩa na-kala nɩaa chɩŋ ba lɛŋŋɛɛ boiŋ niiŋ aa ŋmoo niiŋ, ʋ tʋɔŋ chei, bɛɛ wɩaa La TƖƖNA chaasa na baanɩŋ nɛ ba nyuŋ.

¹¹ Ŋɩɩ nɛ ʋ pɩɛsɛ La TƖƖNA, “Bɛɛ nɛ tɩɩ ŋ ŋaa mɩ-na ŋ tɩntɩnna ŋ-la? Wʋbɛɛ nɛ mɩ ŋaa cheyiŋ ŋ joŋ nɩaa deemba kala a nyagɛmɛ?

¹² Mɩ nɛ ta nɩaa deemba, koo mɩ nɛ lʋlba? Bɛɛ nɛ tɩɩ ŋ sɩ dɩ mɩ paaba nɔgɛ a nagɛ haala sɩ nɔgɛ bii-mulo a kɛmba kaa mʋ tintee-la ŋ sɩ hɛ niiŋ pɩ ba naabalɩmaba arɩ ŋ jaŋ joŋo pɩba?

¹³ Nɩɩ nɛ mɩ jaŋ na nammɩa a pɩ nɩaa deemba kala dɩ ba chaŋ? Ba yele nɩɩmɛ nɛ a bʋl dɩ mɩ pɩba nammɩa dɩ ba chaŋ.

¹⁴ Mɩ dʋndʋŋa bɩ nɩaa deemba wuo beŋ, wɩɩ-la yuŋŋie kɩɩ mɩ nɛ.

¹⁵ Dɩ ŋ nɛ jaŋ ŋaamɛ ŋ-la, kpʋmɛ lɛɛlɛ, dɩ ŋ tʋɔŋ tɔrɛ mɩ nyuŋ. Sɩ́ leŋe dɩ mɩ na hɛɛŋ kɩŋkɛŋ ŋ nɩsɩŋ lɛ.”

¹⁶ Ŋɩɩ nɛ La TƖƖNA bʋla pɩ Mosis, “Kɛŋ Iziral tɩŋŋaa nɩhɩasɩŋ mahɩŋ batori arɩ fii-la sɩ ŋaa ba sɩpaalaaraa arɩ ba tɩntɩnnɩ-hɩasɩŋ kɔ. Kɛmba kɔ lɛbɩ-la lɛ mɩ sɩ yie kɔ Iziral tɩŋŋaa teeŋ dɩ ma kala chɩŋ mɩ sɩpaaŋ.

¹⁷ Mɩ jaŋ kʋ tuu ŋ teeŋ nɩmɛ a bʋl wɩaa pɩŋ, aŋ lɩɩsɛ Dɩma-la mɩ sɩ joŋo hɛ ŋ lɛ mʋa a hɛ ba lɛ, dɩ ba laa nɩalɩŋ wʋwalɩmɩa-la dɔnsʋŋ, dɩ ʋ bɩra sɩ́ ŋ dʋndʋŋa chʋga ŋaa.

¹⁸ Bʋla pɩ nɩalɩŋ, dɩ ba pʋllɛ ba tʋɔŋ a kɛŋ ba tɩtɩa, chie ba jaŋ chaŋ nammɩa, La TƖƖNA nɩa ma sɩ bunso nɛ a bʋl, ‘Kʋbɛɛ nɛ jaŋ pɩla nammɩa dɩ la chaŋ? La faa nɩɩ sɩma nɛ Ijipiti tinteeŋ lɛ.’ Ŋɩɩ wɩaa La TƖƖNA jaŋ pɩma nammɩa dɩ ma chaŋ.

¹⁹ Ma bɩ jaŋ chaŋ nammɩa-la tapʋl-bala koo balɩa koo banɔŋ koo fii koo mara dʋndʋŋ,

²⁰ ama ma jaŋ chaŋʋ chɛŋ piliŋ, dɩ ʋ fɩɩ ma mɩɩsɩŋ, a tɩŋ ma TƖƖNA sɩ hɛ ma tʋɔŋ, ka ma vɩa ʋ wɩaa aŋ yiyel ʋ sɩpaaŋ a bʋl, ‘Bɛɛ nɛ paala tɩɩ la lɩɩ Ijipiti tinteeŋ lɛ?’ ”

²¹ Ŋɩɩ nɛ Mosis bʋla pɩ La TƖƖNA, “La dɩ laalɩyuoro-la sɩɩ vɛŋ ŋaa nɩaa bʋɩ zɔɔ-balɩdʋ nɛ, ka ŋ bʋl ŋ jaŋ pɩba nammɩa dɩ ba chaŋ chɛŋ-piliŋ.

²² Dɩ mɩ nɛ paala kpʋ piese-la arɩ nɛsɩ-la kala la sɩ kɛnɛ ma, ba bɩ baa vɔgɛ, koo dɩ la nɛ kɛsɛ chenfile-la kala sɩ hɛ mʋgʋ-balɩŋ tʋɔŋ a pɩba ma, ba bɩ baa yi.”

²³ Ŋɩɩ nɛ La TƖƖNA bʋla pɩ Mosis, “Ŋ bɩɩna mɩ bɩ doluŋ kɛnɛ nɛ koo? Ŋ jaŋ na wɩɩ-la mɩ sɩ bʋla pɩŋ jaŋ ŋaa koo ʋ bɩ jaŋ ŋaa.”

²⁴ Ŋɩɩ nɛ Mosis mʋ a bʋl wɩalɩŋ kala La TƖƖNA sɩ bʋla pʋ a pɩ nɩalɩŋ, aŋ kɛŋ nɩhɩasɩ-la mahɩŋ batori arɩ fii kʋ hɛ dɔŋɔ lɛbɩ-la bʋbʋɔŋ.

²⁵ Ŋɩɩ nɛ La TƖƖNA to duoŋ-bɩlɩmbaanɩŋ lɛ kʋ tuu a bʋl wɩaa Mosis teeŋ, aŋ lɩɩsɛ Dɩma-la sɩ hɛ Mosis lɛ mʋa, a hɛ nɩhɩasɩ-la mahɩŋ batori arɩ fii lɛ. Ʋ sɩ ŋaa ŋɩɩ, ba suomo bʋbʋl wɩaa a nagɛ Wɩa wʋlaabʋllaa. Ama ba bɩ ŋɩɩ ŋaa dieni.

²⁶ Nɩhɩasɩ-la mahɩŋ batori arɩ fii-la tʋɔŋ, baalaa balɩa ma nɛ fa hɛ nɩmɛ, dɔŋɔ yɩrɩŋ nɛ Elidad, dɔŋɔ ma yɩrɩŋ nɛ Mɛdad. Ba-na fa bɩ lɛbɩ-la bʋbʋɔŋ mʋa, aŋ hɛ ba dɩ-hɔnɩɩ-la lɛ. Ba hɔŋ nɩmɛ nɛ aŋ ka Dɩma-la pɛ jʋʋba, ba ma bʋl wɩaa a nagɛ Wɩa wʋlaabʋllaa.

²⁷ Ŋɩɩ nɛ bapʋɔsɩ-bie kʋbala lɩɩ ba dɩhɔnʋŋ a fá mʋ bʋla pɩ Mosis, “Elidad arɩ Mɛdad nɩɩ bʋl wɩaa Wɩa doluŋ lɛ la dɩhɔnʋŋ.”

²⁸ Bʋa-la lɛ, dɩ baal kʋbala hɛ nɩmɛ baa yɩrɛ Josua. Ʋ nyɩmma yɩrɩŋ nɛ Nuŋ. Ʋ bapʋɔsʋŋ kala lɛ nɛ ʋ pɛ Mosis lɛ ba tɩtɩŋ. Ŋɩɩ nɛ ʋ bʋl, “Mɩ nɩhɩaŋ Mosis, kiri nɩalɩŋ balɩa dɩ ba sɩ́ ŋɩɩ ŋaa.”

²⁹ Ŋɩɩ nɛ Mosis pɩɛsʋ, “Mɩ wɩaa ka wɩɩŋ nɛɛ? Mɩ-na tʋɔtɔrʋŋ nɛ dɩ La TƖƖNA fa joŋ ʋ Dɩma-la a hɛ ʋ nɩaa kala lɛ dɩ ba ŋaa ʋ wʋlaabʋllaa.”

³⁰ Ŋɩɩ nɛ Mosis arɩ Iziral tɩŋŋaa nɩhɩasɩ-la mɩɩra mʋ ba dɩhɔnʋŋ.

³¹ La TƖƖNA guu leŋ peliŋ lu a paa jɩmpɩrɩwɩɩba, a kaa lɩɩ mʋgʋ-balɩŋ kʋ kpagɛ ba dɩhɔnʋŋ a golli sɛmɛ na-kala, ba zɩzaarɛ tinteeŋ a magɛ naakieli bala. Tapʋl-piliŋ nɛ ŋ jaŋ vɛŋ aŋ-na yi ba dɩdɛrɩŋ.

³² Tapʋlɩɩ-la, nɩalɩŋ lɩɩ kɛsɛ jɩmpɩrɩwɩɩba-la wɩɩhɛyɛ arɩ tɩtaŋɩŋ kala arɩ chɛ-lɩamɩŋ kala. Diibiisi-la nʋʋkala sɩ kɛsɛ yi bɔtɔ fii nɛ. Ba yie joŋo yieni a golli ba dɩhɔnʋŋ kala.

³³ Ba chɩna dɩ ba chaŋ nammɩa-la nɛ, ka La TƖƖNA na baanɩŋ ba nyuŋ, a joŋ nyanyal bɔŋ kʋbala hɛ ba lɛ.

³⁴ Ŋɩɩ nɛ ba hɛ lee-la yɩrɩŋ Kɩbʋrɔf-Hataava, bɛɛ wɩaa nɩalɩŋ niiŋ fa sɩ sɩma sʋba nɛ woruŋ, ba hugiba nɩmɛ.

³⁵ Ŋɩɩ nɛ nɩalɩŋ sii Kɩbʋrɔf-Hataava lɛ a mʋ Hazɛrɔf, a hɔŋ nɩmɛ.