NAMBABA 10 - WƖA TENIŊ

Ba kɛŋ hɔpʋla libi banyilliŋ

¹ La TƖƖNA bʋla pɩ Mosis,

² “Kɛŋ hɔpʋla libi banyilliŋ balɩa, a kɛmba ŋmʋʋ a yɩrɛ Iziral tɩŋŋaa kʋ hɩhɛ dɔŋɔ, aŋ bɩra kɛmba ŋmʋʋ a bʋla pɩpɩba bʋa-la lɛ sɩ maga dɩ ba sii ba dɩhɔnʋŋ.

³ Dɩ ba nɛ ŋmʋʋ banyilli-la kala balɩa, Iziral tɩŋŋaa kala maga ba kʋ hilimi ŋ sɩpaaŋ lɛbɩ-la lɛ mɩ sɩ yie kɔ Iziral tɩŋŋaa teeŋ boiŋ niiŋ nɛ.

⁴ Ama dɩ kʋbala nɛ ba ŋmʋʋ, Iziral tɩŋŋaa doho doho sɩpaalaara-la dʋndʋŋa nɛ maga ba kʋ hilimi ŋ sɩpaaŋ.

⁵ Dɩ ba nɛ faasa ŋmʋʋ banyile-la dɔŋɔ, Iziral doho doho-la sɩ hɛ wɩɩpɔsʋŋ dɩɩrɩŋ jaŋ sii ba dɩhɔnʋŋ.

⁶ Dɩ ba nɛ bɩra faasa ŋmʋʋ banyile-la dɔŋɔ lɩa, Iziral doho doho-la sɩ hɔŋ wɩɩpɔsʋŋ nadiiŋ dɩɩrɩŋ ma nɛ jaŋ sii ba dɩhɔnʋŋ. Dɩ ba nɛ fɩɛla ŋmʋʋ banyile-la, ba jaŋ sii ba bugoo lɛ.

⁷ Dɩ ŋ nɩɩ chɛ ŋ yɩrɛ Iziral tɩŋŋaa kala kʋ hɛ dɔŋɔ, ŋ jaŋ faasaa ŋmʋʋ banyilli-la.

⁸ Wɩɩsʋllɩ sɩpaalaara Arɔŋ hambolibiisiŋ nɛ maga ba ŋmʋŋmʋʋ banyilli-la. Ba dɩ ba doho nɩaa nɛ jaŋ ŋɩŋaa wɩɩŋ deeŋ a kaa mʋ wuu.

⁹ Dɩ ma nɛ hɛ ma tinteeŋ lɛ dɩ laalɩŋ sii ma dɩ ma dʋndɔmɔ-la sɩɩ fʋgɛma pɛgɛ, má faasa ŋmʋʋ banyilli-la, mɩ-na ma TƖƖNA Wɩa jaŋ nɩɩ a laama ta ma dʋndɔŋŋɔɔ nɩsɩŋ lɛ.

¹⁰ Dɩ ma nɩɩ gbieli ma tʋɔtɔrɛ-gbielee: chɛŋ-falɩŋ gbielee arɩ ma gbielee dɔnsʋŋ, a ŋaa kʋnyɩgaa Wɩɩsʋlʋŋ arɩ ma nii-magɛ dɔŋɔ Wɩɩsʋlʋŋ, má maga dɩ ma ŋmʋʋ banyilliŋ deemba, a liliisi mɩ wɩaa. Mɩ nɛ ŋaa ma TƖƖNA Wɩa.”

Iziral tɩŋŋaa sii Sɩnaɩ lɛ

¹¹ Iziral tɩŋŋaa sɩ lɩɩ Ijipiti lɛ jɩ-lɩa tʋɔŋ chɛŋ-lɩa tapʋlaa mara chɛɛŋ, duoŋ-bɩlɩmbaaŋ-la sɩ tɔ Wɩa dɩ-zɔŋ-la nyuŋ, lee-la Wɩa niiriŋ daga-la sɩ hɛ, sii.

¹² Ŋɩɩ nɛ Iziral tɩmma-la lɩɩ Sɩnaɩ tintee-hɩlɩɩ-la lɛ a gɔllɔ baarɛ ŋɩɩ deeŋ deeŋ duoŋ-bɩlɩmbaaŋ-la mʋ chɩŋ tintee-hɩlɩɩ-la ba sɩɩ yɩrɛ Paraŋ lɛ.

¹³ Ba bumbuŋ nɛ ŋɩɩ ba sɩ sie arɩ ŋɩɩ La TƖƖNA sɩ bʋla pɩ Mosis.

¹⁴ Laalɩyuoro-la sɩ laa sɩpaaŋ sii arɩ ba magɩlɩŋ nɛ ŋaa Juda buguŋ laalɩyuoroo, Ɩsaka laalɩyuoroo arɩ Zebuluŋ laalɩyuoroo. Amɩnadab nanʋala Nasɔŋ nɛ ŋaa Juda laalɩyuoroo sɩpaalaara.

¹⁵ Zʋaa nanʋala Nɛtanɛl ma nɛ ŋaa Ɩsaka doho nɩaa laalɩyuoroo sɩpaalaara.

¹⁶ Heloŋ nanʋala Ɛlɩab ma nɛ ŋaa Zebuluŋ doho nɩaa laalɩyuoroo sɩpaalaara.

¹⁷ Ŋɩɩ nɛ ba polli Wɩa dɩ-zɔŋ-la. Gɛsɔŋ doho nɩaa arɩ Mɛrarɩ doho nɩaa kʋ lɩɩ paa chʋŋ, a sii to.

¹⁸ Laalɩyuoro-la sɩ sii tɩgɛ Gɛsɔŋ tɩŋŋaa arɩ Mɛrarɩ tɩŋŋaa lɛ arɩ ba magɩlɩŋ nɛ ŋaa Rubiŋ buguŋ laalɩyuoroo, Simioŋ laalɩyuoroo arɩ Gad laalɩyuoroo. Sediu nanʋala Elizu nɛ ŋaa Rubiŋ doho nɩaa laalɩyuoroo sɩpaalaara.

¹⁹ Zurisadai nanʋala Sɛlʋmɩɛl ma nɛ ŋaa Simioŋ doho nɩaa laalɩyuoroo sɩpaalaara.

²⁰ Dʋɛl nanʋala Ɛlɩasaf ma nɛ ŋaa Gad doho nɩaa laalɩyuoroo sɩpaalaara.

²¹ Ŋɩɩ nɛ Kohaf doho nɩaa ma sii a paa Wɩa dɩ-zɔŋ-la tʋɔŋ kʋzɔmɔ-la a chʋŋ. Ʋ maga dɩ ba mʋ yiyi lee-la ba sɩ jaŋ hɔŋ, dɩ ba pɛ Wɩa dɩ-zɔŋ-la dɛrɛ nɛ.

²² Laalɩyuoro-la ma sɩ sii tɩgɛ arɩ ba magɩlɩŋ nɛ ŋaa Efirem buguŋ laalɩyuoroo, Manasɛ laalɩyuoroo arɩ Bɛnjamɩŋ laalɩyuoroo. Amihud nanʋala Ɛlɩsama nɛ ŋaa Efirem doho nɩaa laalɩyuoroo sɩpaalaara.

²³ Pedazu nanʋala Gamalɩɛl ma nɛ ŋaa Manasɛ doho nɩaa laalɩyuoroo sɩpaalaara.

²⁴ Gidioni nanʋala Abɩdaŋ ma nɛ ŋaa Bɛnjamɩŋ doho nɩaa laalɩyuoroo sɩpaalaara.

²⁵ Laalɩyuoro-la ma sɩ sii to ba kala harɩŋ arɩ ba magɩlɩŋ nɛ ŋaa Daŋ buguŋ laalɩyuoroo, Asa laalɩyuoroo arɩ Nafɩtalɩ laalɩyuoroo. Amɩsadaɩ nanʋala Ahieza nɛ ŋaa Daŋ doho nɩaa laalɩyuoroo sɩpaalaara.

²⁶ Ɔkɩraŋ nanʋala Pagɩɛl ma nɛ ŋaa Asa doho nɩaa laalɩyuoroo sɩpaalaara.

²⁷ Ɛnaŋ nanʋala Ahɩra ma nɛ ŋaa Nafɩtalɩ doho nɩaa laalɩyuoroo sɩpaalaara.

²⁸ Ŋɩɩ Iziral tɩŋŋaa laalɩyuoroo sɩ sii vɛŋ nɛ ŋɩɩ.

²⁹ Mosis ba-jene nɛ fa Rʋɛl. Rʋɛl ŋaa Midiaŋ tɩɩna nɛ. Ʋ nanʋala nɛ Hobab. Ŋɩɩ nɛ Mosis bʋla pɩ Hobab, “La kɛŋ la tɩtɩa nɛ dɩ la mʋ tintee-la La TƖƖNA sɩ sɩ ʋ jaŋ joŋo pɩla. Kɔ dɩ la mʋ, la jaŋ kɛnɩŋ woruŋ. La TƖƖNA hɛ niiŋ nɛ arɩ ʋ jaŋ ŋaa wʋzɔŋŋɔɔ pɩ la Iziral tɩŋŋaa.”

³⁰ Ŋɩɩ nɛ Hobab bʋl, “Aɩ, mɩ bɩ mʋ, mɩ jaŋ mɩɩra mʋ mɩ tinteeŋ, mɩ nɩaa teeŋ.”

³¹ Ama Mosis bʋl, “Mɩɩ sʋlʋŋ, sɩ́ la harɩŋ mɩɩrʋ, ŋ nɛ jɩŋ tintee-hɩlɩɩ-la tʋɔŋ lee-la la sɩ jaŋ hɔŋ, ŋ nɛ jaŋ dagɛla.

³² Dɩ ŋ nɛ to la harɩŋ mʋ, wʋzɔŋ na-kala La TƖƖNA sɩ jaŋ joŋo ŋaa la lɛ, ŋ ma jaŋ kɛŋ kpaalɩŋ ba tʋɔŋ.”

³³ Ŋɩɩ nɛ ba sii La TƖƖNA peel-la nyuŋ, a joŋ Wɩa niiriŋ daga-la, daga-la laa ba sɩpaaŋ ba vɛŋ tapʋlaa batori dɩ ʋ dagɛba lee-la ba sɩ jaŋ hɔnɔ wiesi.

³⁴ Dɩ taŋ nɛ pʋla, dɩ ba sii dɩ ba vɛŋ na-kala, La TƖƖNA duoŋ-bɩlɩmbaaŋ-la yie chugili ba nyuŋ nɛ.

³⁵ Dɩ ba nɛ joŋ Wɩa niiriŋ daga-la dɩ ba mʋ, Mosis yie bʋl, “La TƖƖNA, sii, a ŋmoo ŋ dʋndɔŋŋɔɔ kala pɩsɛ. Leŋ dɩ nɩalɩŋ sɩ bɩŋ cho nyɩɩgɛ ŋ sɩpaaŋ.”

³⁶ Dɩ ʋ nɛ bɩra mʋa dɩ ʋ chɩŋ ma, Mosis yie bʋl, “La TƖƖNA, mɩɩra kɔ, a hɛ ŋ nɩaa Iziral tɩŋŋaa nɩ-dandaŋ-la teeŋ.”