NAMAGABA 9 - WƖA TENIŊ

Wʋjɩmɩŋ yɩrɛ nɩaa, nɩyaarɩŋ ma yɩrɛ nɩaa

¹ Wʋjɩmɩŋ saa ʋ dɩa nɛ a hɛ jebii duduosuŋ balɩpɛ.

² Ʋ kpʋ pʋna a ŋaa kʋdiilee, a ŋaa ʋ tɩɩnɛnɛɛ sɩnɩŋ ma siri a bile gbɛrɛ nʋhʋɔraa.

³ Ʋ hɔŋ jaŋ tʋɔŋ nɛ, lee-la nɩaa sɩ jaŋ naʋ aŋ heele yɩrɛ nɩaa, aŋ tɩŋ ʋ dɩa tɩntɩnnaa ma, a bʋl,

⁴ “Ma nɩalɩŋ kala sɩ bɩ wɩaa jɩŋ woruŋ, má kɔ.” Nɩalɩŋ ma sɩ chʋʋla, ʋ sɩ,

⁵ “Má kʋ dii mɩ kʋdiile-la aŋ nyʋa mɩ sɩŋ-la mɩ sɩ ŋaa bil.

⁶ Má leŋ nɩalɩŋ sɩ bɩ wɩaa jɩŋ wombiiŋ aŋ kɛŋ mɩɩsɩŋ, má to wombii-la sɩ jaŋ leŋ dɩ ma jɩŋ wɩaa sɩaa.

⁷ Dɩ ŋ nɛ kɛŋ babii-balɩŋ tʋra kɩɩ, ʋ-na yie mɩɩra tʋʋsʋŋ nɛ. Dɩ ŋ nɛ chagɩlɛ nɩbɔmʋŋ, ʋ-na yie mɩɩra ŋaa wɩɩ nɛ a jʋʋ ŋ lɛ.

⁸ Pʋpɔ ŋ sɩ́ nɩɩ-la sɩ kɛŋ babii-ballɩŋ lɛ kpɩa. Dɩ ŋ nɛ ŋaa ŋɩɩ, ʋ jaŋ bɛrɩŋ. Ama dɩ ŋ nɛ chagɩlɛ nʋʋ sɩ jɩŋ wɩaa, ʋ jaŋ choŋ.

⁹ Dɩ ŋ nɛ bʋl wɩɩkala a pɩ nʋʋ sɩ jɩŋ wɩaa, ŋɩɩ yie leŋ ʋ wʋjɩmɩŋ wasa pʋŋa pɛ nɛ. Dɩ ŋ nɛ dagɛ tʋɔpʋl tɩɩna wɩɩ, ʋ yie gʋnnɛ wɩɩ-la nɛ a pɛ wɩalɩŋ ʋ sɩ jɩma lɛ.

¹⁰ Dɩ ŋ nɩɩ fá La Tɩɩna, wʋjɩmɩŋ dɩ-suomuŋ nɛ ŋɩɩ. Dɩ ŋ nɛ jɩŋ Wɩa sɩ bɩ disiniŋ kɛnɛ, ŋɩɩ-na, ŋ jɩŋ wɩaa sɩaa nɛ.

¹¹ Mɩ-na wʋjɩmɩŋ, dɩ ŋ nɛ tomi, ŋ mɩɩsɩŋ jaŋ duomi, dɩ ŋ jɩsɩŋ pʋŋa pɛ.

¹² Dɩ ŋ nɛ kɛŋ wʋjɩmɩŋ, ʋ jaŋ pɛ ŋ lɛ, ama dɩ ŋ nɛ ŋaa babiibal, ŋ jaŋ na hɛɛŋ.”

¹³ Yaarɩŋ nagɛ haala sɩ ŋaa goŋ tɩɩna nɛ. Ʋ bɩ wɩɩkala jɩŋ, wʋjɩmɩŋ tuo ʋ lɛ.

¹⁴ Ʋ yie hɔŋ ʋ dɩa boiŋ niiŋ, koo ʋ hɔŋ jaŋ tʋɔŋ, lee-la nɩaa sɩ jaŋ naʋ,

¹⁵ aa yɩrɛ nɩalɩŋ sɩ to lee-la aa bal, nɩalɩŋ sɩ to lee-la a mʋmʋ ba tɩtɩa dɩ-mʋʋlaa.

¹⁶ Ʋ sɩ, “Ma nɩalɩŋ kala sɩ bɩ wɩaa jɩŋ woruŋ, má kɔ.” Ʋ bɩra bʋla pɩ nɩalɩŋ ma sɩ bɩ wʋjɩmɩŋ kɛnɛ,

¹⁷ “Dɩ ŋ nɛ gaa nyʋa lɩɩŋ, ʋ sɩma, dɩ ŋ nɛ lʋara dii kʋdiilee ma, ba sɩma nɛ woruŋ.”

¹⁸ Ama nɩalɩŋ sɩɩ mʋ haal-la teeŋ bɩ jɩŋ arɩ nʋʋ na-kala sɩ mʋ ʋ teeŋ ŋaa nɩsʋʋ nɛ, nɩalɩŋ fa sɩ mʋ nɩmɛ kala hɛ lɛlɛɛ-jaŋ lɛ.