NAMAGABA 8 - WƖA TENIŊ

Wʋjɩmɩŋ nɛ bʋl wɩaa a pɩpɩ nɩaa

¹ Má jegili, wʋjɩmɩŋ nɩɩ ŋaa goŋ. Ʋ suri ʋ yikoro nɛ.

² Ʋ chɩŋ dundolo nyuŋ nɛ, a chɩŋ wombii chɛŋŋɛɛ lɛ.

³ Ʋ chɩŋ taŋ-la boi-baalɩŋ lɛ nɛ, lee-la nʋʋkala sɩ to jʋjʋʋ taŋ-la, nɩmɛ nɛ ʋ hɛ a ŋɩŋaa goŋ a bʋl,

⁴ “Baalaa, ma nɛ mɩɩ yɩrɛ, nʋʋkala nɛ mɩɩ yɩrɛ.

⁵ Ma nɩalɩŋ sɩ bɩ wʋjɩma kɛnɛ, má gʋnnɛ wʋjɩmɩŋ. Ma nɩalɩŋ sɩ yaara, má gʋnnɛ wʋjɩmɩŋ.

⁶ Má jegile nɩɩ, mɩ kɛŋ wʋzɔŋŋɔɔ nɛ dɩ mɩ bʋl. Mɩɩ chɛ mɩ bʋl wɩalɩŋ sɩ tʋʋla nɛ.

⁷ Wʋtɩtɩɩba nɛ mɩ bʋbʋl, mɩ bɛrɛ wʋbɔŋŋɔɔ bʋlʋŋ nɛ.

⁸ Mɩ niiŋ wʋbʋlaa kala kɛŋ wʋtɩtɩɩ, ba kʋŋkala bɩ golibo.

⁹ Dɩ ŋ nɛ jɩŋ wɩaa sɩaa, ŋ jaŋ jɩŋ arɩ wɩalɩŋ mɩ sɩ bʋlaa pɩŋ ŋaa wʋtɩtɩɩba nɛ. Ba tʋʋla nɛ a pɩ nɩalɩŋ sɩ kɛŋ wʋjɩmɩŋ.

¹⁰ Má joŋ wɩalɩŋ mɩ sɩɩ dagɛma aŋ leŋ hɔpʋla. Má cho wʋjɩmɩŋ a kɩɩ sɛlɩmɛ.

¹¹ Wʋjɩmɩŋ nɛ kɩɩ jɩnalɩa. Ŋ bɩ jaŋ wuo kɛŋ kʋŋkala ŋ sɩ cho magɩsʋ.

¹² Mɩ-na wʋjɩmɩŋ arɩ nɩɩ-la sɩ jɩŋ wɩaa sɩaa nɩɩ jʋʋ. Mɩ jɩŋ wɩaa a bɩɩnɛ wɩaa woruŋ a ŋɩŋaa.

¹³ Dɩ ŋ nɩɩ fá La Tɩɩna, ŋɩɩ-na ŋ jaŋ bɛrɛ wʋbɔŋŋɔɔ ŋaanɩŋ. Mɩ bɛrɛ nʋʋ sɩɩ dagɛ ʋ tɩtɩa nɛ, sɩɩ-duoŋ tɩɩna, wʋbɔŋŋɔɔ ŋaara arɩ wʋnyɩɛra.

¹⁴ Mɩ jɩŋ nɩaa chagɩlɩŋ, a jɩŋ wɩaa jense bʋlʋŋ ma, mɩ jɩŋ wɩaa a kɛŋ doluŋ ma.

¹⁵ Mɩ lɛ nɛ kuoroo yie to aa beŋ ba nɩaa, nɩalɩŋ sɩɩ beŋ nɩaa yie to mɩ lɛ nɛ a bil wombiee sɩ zɔmɔ a pɩ ba nɩaa.

¹⁶ Sɩpaalaarʋ kala to mɩ lɛ nɛ aa beŋ ʋ nɩaa, nɩhɩaŋ kala to mɩ lɛ nɛ aa beŋ ʋ nɩaa.

¹⁷ Mɩ cho nɩalɩŋ sɩ chomi nɛ. Nɩalɩŋ kala sɩ bee chɩchɛmɛ yie namɛ nɛ.

¹⁸ Mɩ lɛ nɛ ŋ jaŋ wuo to a kɛŋ kɩaa arɩ yɩrɩŋ. Ŋ dʋa jaŋ hɛ nɩmɛ a kaa mʋ wuu, ŋ wɩɩkala jaŋ vɛŋ woruŋ.

¹⁹ Wɩalɩŋ ŋ sɩ jaŋ na mɩ teeŋ kɩɩ sɛlɩmɛ sɩ chaasa zɔŋ, ʋ nɛ kɩɩ hɔpʋla.

²⁰ Mɩɩ vɛŋ tʋɔpʋl tɩŋŋaa wombiiŋ lɛ nɛ a bɩraa vɛŋ wʋtɩtɩɩ tɩŋŋaa wombiiŋ ma lɛ,

²¹ a joŋ dʋa pɩpɩ nɩalɩŋ sɩ chomi, aŋ leŋ ba chʋgʋsʋŋ dɩɩsɩŋ ma susu.

²² Mɩ-na wʋjɩmɩŋ nɛ La Tɩɩna laa sɩpaaŋ ŋaa, aŋ-na ŋaa wɩalɩŋ ʋ sɩ ŋaa faafaa kala.

²³ Faafaa nɛ ʋ ŋaamɛ. Dɩ-suomuŋ nɛ ʋ ŋaamɛ aŋ-na ŋaa dʋnɩa.

²⁴ Bʋa-la lɛ ʋ sɩ ŋaamɛ, mʋgʋ-bal kala tuo, lɩɩ-bulo ma kala fa tuo.

²⁵ Mɩ hɛ nɩmɛ nɛ ka ʋ-na ŋaa peelee, a hɛ nɩmɛ ka ʋ ŋaa dundolluŋ ma.

²⁶ Mɩ hɛ nɩmɛ nɛ ka ʋ-na ŋaa dʋnɩa, mɩ hɛ nɩmɛ ka ʋ ŋaa tinteeŋ arɩ hagɩla.

²⁷ Mɩ hɛ nɩmɛ nɛ ka ʋ ŋaa wɩa-nyuŋ, a hɛ nɩmɛ ka ʋ ŋaa wɩa-nyuŋ keese tɔ fuonuŋ.

²⁸ Mɩ hɛ nɩmɛ nɛ ka ʋ ŋaa duoŋ-bɩlɩmbaanaa ba hɛ wɩa-nyuŋ, a ŋaa lɩɩ-bul-sɩaa ma dɩ ba bulo hɩhɛ mʋgʋ-balaa lɛ.

²⁹ Mɩ hɛ nɩmɛ nɛ ka ʋ keri leriŋ pɩ mʋgʋ-balɩŋ, dɩ lɩɩ-la sɩ́ wuo kieli lee-la ʋ sɩ kere pʋ. Mɩ hɛ nɩmɛ nɛ ka ʋ bil tinteeŋ gentine.

³⁰ Bʋa-la lɛ dɩ mɩ hɛ La Tɩɩna sɛmɛ a nagɛ gɔgʋ-hɩaŋ. Tapʋlɩɩ kala mɩ tʋɔŋ yie tɔrɛ nɛ, mɩ jʋjʋɔsɛ ʋ sɩpaaŋ.

³¹ Mɩ tʋɔŋ fa tɔrɛ dʋnɩa kala nyuŋ nɛ, a tɔrɛ nuhuobiinee ma nyuŋ.

³² Lɛɛlɛ, mɩ biiri, má jegile nɩɩ mɩ teeŋ, nɩalɩŋ sɩɩ to mɩ niiŋ jaŋ kɛŋ tʋɔtɔrʋŋ.

³³ Má jegile nɩɩ wɩalɩŋ mɩ sɩɩ dagɛma a kɛŋ wʋjɩmɩŋ, má sɩ́ ba vɩa ta.

³⁴ Nɩalɩŋ kala sɩ jegile nɩɩ mɩ teeŋ, a kɔ mɩ dɩa boiŋ niiŋ a bee chɩchɛmɛ, a gbɛrɛmɛ nɩmɛ, ba jaŋ kɛŋ tʋɔtɔrʋŋ.

³⁵ Nɩɩ-la kala sɩ namɛ, ʋ kɛŋ mɩɩsɩŋ nɛ, La Tɩɩna tʋɔŋ tɔrɛ ʋ nyuŋ nɛ.

³⁶ Ama nɩɩ-la kala sɩ vɩa dɩ ʋ chɛmɛ, ʋ dɔgɩsɛ ʋ tɩtɩa nɛ. Nɩalɩŋ sɩ bɛrɩmɛ cho sʋʋŋ nɛ.”