NAMAGABA 7 - WƖA TENIŊŊɩɩ ba sɩ chagɩlɛ haal-la sɩ kɛŋ bala aŋ chɩchɛ nɩaa balaba 1 Mɩ bii, to mɩ niiŋ wɩaa, aŋ leŋ dɩ mɩ wʋdagaa hɛ ŋ tʋɔŋ lɛ bʋa na-kala. 2 Ŋɩŋaa wɩalɩŋ mɩ sɩ daga, dɩ ŋɩɩ leŋ dɩ ŋ kɛŋ mɩɩsɩŋ. Leŋ dɩ mɩ niiŋ wɩaa nɛ ŋaa ŋ sɩɩfɩaŋ kʋa. 3 Leŋ dɩ ba nagɛ nenii-pɩrɩŋ dɩ ŋ joŋo hɛ ŋ neniiŋ. Ŋmʋnsɛba hɛ ŋ tʋɔŋ lɛ. 4 Leŋ dɩ wʋjɩmɩŋ ŋaa ŋ dɩhaala, dɩ wɩaa sɩaa jɩmɩŋ ŋaa ŋ nandɔŋ-fɩɛmɩŋ. 5 Ba jaŋ pɔŋ hachɔrʋmʋŋ lɛ, dɩ ʋ sɩ́ wuo nyɩsa kɛnɩŋ. 6 Tapʋlɩɩ kʋbala, mɩ to mɩ tokoro nyilimi 7 a na bapʋɔsaa sɩ bɩ wɩɩ jɩŋ. Ba tʋɔŋ mɩ na nɩyaarɩ kʋbala 8 dɩ ʋ joŋ wombiiŋ a vɩvɛŋ, a kpagɛ loŋgoru-la lɛ hachɔrʋŋ-la sɩ hɛ a chaasɛ ʋ dɩa a mʋmʋ, 9 dɩ wɩɩ-muluŋ-sɩɩŋ jʋa, leriŋ suomo bibiri. 10 Ŋɩɩ nɛ haal-la kʋ lɩɩ dɩ ʋ chemu, a laalɛ kɩaa a nagɛ hachɔrʋŋ a kɛŋ ʋ tʋɔŋ lɛ dɩ ʋ ŋaa wʋbɔŋ. 11 Ʋ kɛŋ nyuduoŋ a ŋɩŋaa goŋ. Ʋ bɩ dɩa lɛ ka hɔŋ. 12 Ʋ yie gɔllɔɔ vɛŋ wombiiŋ lɛ nɛ, arɩ yɔɔsʋŋ lɛ, aa chɩŋ loŋgorunuŋ lɛ a gbɩgbɛrɛ dɩ ʋ kɛŋ baal. 13 Ʋ kɛnʋ a guoru, a bɩ hɩɩsɩŋ ka fá aŋ bʋl, 14 “Jɩnɩŋ mɩ kpʋ pʋna a ŋaa Wɩɩsʋlʋŋ nɛ a lɩɩsɛ niiri-la mɩ sɩ hɛ. 15 Ŋɩɩ nɛ mɩ kʋ lɩɩ a bee chɩchɛŋ a kʋ naŋ ŋ-la. 16 Mɩ bil bɔsɔ nɛ a kɛŋ gɛrɩpɛ fʋfʋlʋŋ ba sɩ kaa lɩɩ Ijipiti tinteeŋ jɛrɛ. 17 Mɩ mɩsɛ mɩ bɔsɔ nɛ arɩ tʋlaalɩɩba ba sɩ kaa lɩɩ dɩ-bolii kaa kɔ: mɛɛ, alɔɩ arɩ sɩnamɔŋ. 18 Kɔ dɩ la mʋ nɩɩ sɩma ŋɩɩ dɩ taŋ pʋl. La guori dɔŋɔ a nɩɩ sɩma. 19 Mɩ bala tuo dɩa lɛ, ʋ vɛŋ wombii duduoŋ nɛ. 20 Ʋ chʋŋ moribiee su ʋ moribie-lʋaga nɛ a kaa lɩɩ, ʋ bɩ jaŋ mɩɩra kɔ lɛɛlɛ see chɛŋ-piliŋ.” 21 Ʋ kɛŋ nii-sɩma a bʋl wɩaa a ŋaa ʋ nandaasɩŋ yʋɔrɛ, ʋ kɛŋ ʋ nii-sɩma ŋɩɩ a nyɩnyɩsʋ. 22 Ʋ guu to ʋ harɩŋ a nagɛ ba sɩ kɛŋ nɛ-bele mʋmʋ dɩ ba kpʋ, a nagɛ aamɩŋ sɩ kɛŋ naaŋ mʋ hɩhɛ bɛrɛ lɛ. 23 Nɩmɛ nɛ to-hɛmɩŋ kɛnʋ. Ʋ nagɛ diibie sɩ fá mʋ jʋjʋʋ bɛrɛ nɛ. Ʋ bɩ jɩŋ arɩ ʋ mɩɩsɩŋ jaŋ to nɩmɛ lɩɩ. 24 Lɛɛlɛ mɩ biiriŋ, má jegile nɩɩ mɩ teeŋ, má to wɩɩ-la mɩ sɩ bʋla. 25 Má sɩ́ leŋe dɩ ma tʋɔŋ mʋ ha-doho deeŋ lɛ, má sɩ́ yeŋŋe a to ʋ wombiiŋ. 26 Nɩ-daŋ nɛ ʋ chei, nɩalɩŋ ʋ sɩ kpʋa bɩ nii kɛnɛ. 27 Ʋ dɩa ŋaa sʋʋŋ bʋa wombiiŋ nɛ a mʋmʋ lɛlɛɛ-jaŋ. |
©Ghana Institute of Linguistics Literacy and Bible Translation 1984, 2014
Wycliffe Bible Translators, Inc.