NAMAGABA 6 - WƖA TENIŊ

Chagɩlɩŋ a mʋ tɩgɛ yaarɩŋ lɛ

¹ Mɩ bii, dɩ ŋ nɛ hɛ niiŋ arɩ ŋ jaŋ laa nʋʋ wɩɩ chʋŋ, dɩ ŋ nɛ ta niiŋ arɩ ŋ jaŋ pɛ nʋʋ lɛ,

² koo dɩ wɩɩ nɛ ŋ bʋl, ʋ kɛŋ ŋ baŋŋaa lɛ koo dɩ ŋ niiŋ nɛ kɛnɩŋ hɛ wɩaa lɛ,

³ wɩɩ-la sɩ maga dɩ ŋ ŋaa nɛ ŋ-la a laa ŋ tɩtɩa, bɛɛ wɩaa ŋ joŋ ŋ tɩtɩa hɛ ŋ naambie nɩsɩŋ lɛ nɛ: Mʋ lɩma a kɛŋ ŋ tɩtɩa tuu tinteeŋ aŋ sʋl ŋ naambile dɩ ʋ joŋ wɩɩ-la ta.

⁴ Sɩ́ doŋ pɩŋ wɩɩ-la wɩaa, guu ŋaa ŋɩɩ lɩma lɩma.

⁵ Laa ŋ tɩtɩa wɩɩ-la lɛ a nagɛ tɛhɩɩ sɩ foro nambagɩla nɩsɩŋ lɛ, koo diibie sɩ foro ʋ kpʋkpʋʋra nɩsɩŋ lɛ.

⁶ Yarɩwɩɩ tɩɩna, mʋ cheliwiisiŋ leriŋ a na ŋɩɩ ba sɩɩ tɩŋ, aŋ gʋnnɛ wʋjɩmɩŋ.

⁷ Ba bɩ kuoro kɛnɛ. Ba bɩ kʋhɩaŋ koo sɩpaalaarʋ ma kɛnɛ,

⁸ ama ba yie chɛ kʋdiilee bil nɛ tafaaŋ, a gbɛrɛ yibiiniŋ.

⁹ Ɛɛ nɛ ŋ jaŋ pɩŋ pɛɩ a diene magɛ? Bʋa bɛɛ lɛ nɛ ŋ jaŋ sii doŋ lɛ?

¹⁰ Ŋ yie bʋl, “Mɩ jaŋ pɩŋ mʋa, mɩ jaŋ dɩɛgɛ mʋa, mɩ jaŋ hɔnɔ wiesi mʋa.”

¹¹ Ama bʋa-la lɛ ŋ sɩɩ pɩŋ doŋ, nyaaŋ jaŋ guu kʋ jʋʋŋ a nagɛ gaara sɩ gaaŋ. Sunnuŋ jaŋ jʋʋŋ a nagɛ gaara sɩ guu kɛŋ ŋ kɩaa laa.

¹² Nɩbɔŋŋɔɔ sɩ bɩ bʋbʋɔ kɛnɛ yie gɔllɔ nyɩɛ wɩaa bɩbal,

¹³ a kɛŋ sɩaa kɛmɩsɛ a kɛŋ neniee bʋbʋl wɩaa ba sɩ jaŋ to a nyɩsɛ nɩaa.

¹⁴ Ba yie bɩbɩɩnɛ wʋbɔŋŋɔɔ a nyɩsɛ nɩaa a hɩhɛ wɩaa lɛ.

¹⁵ A tɩŋ ŋɩɩ wɩaa, wʋlɔrʋnʋŋ jaŋ jʋʋba, a guu cheiba, ka ba bɩ wɩɩ wuo ŋaa.

¹⁶ Wɩaa balɩdʋ nɛ hɛ nɩmɛ La Tɩɩna bɛrɛ, wɩaa balɩpɛ nɛ hɛ nɩmɛ ʋ faasa bɛrɛ:

¹⁷ Nɩalɩŋ sɩɩ dagɛ ba tɩtɩa, nɩalɩŋ sɩɩ nyɩɛ wɩaa, nɩalɩŋ sɩɩ kpʋ nɩaa sɩ bɩ wɩɩ cheye,

¹⁸ nɩalɩŋ sɩɩ bɩɩnɛ dɩ ba ŋaa wʋbɔŋŋɔɔ, nɩalɩŋ sɩ bɩ diene aŋ ŋɩŋaa wʋbɔŋŋɔɔ,

¹⁹ wʋnyɩɛrɩ wʋpɛ-naara, arɩ nɩalɩŋ sɩ cho dɩa nɩaa nyuŋ kaa yagɛ dɔŋɔ lɛ.

Ŋɩɩ ba sɩ kpʋrɩsɛ baal-la sɩ kɛŋ haala aŋ chɩchɛ nɩaa haalaa dɩgɩlaa

²⁰ Mɩ bii, to wɩalɩŋ ŋ nyɩmma sɩɩ dagɩŋ a sɩ́ ŋ naaŋ niiŋ wɩaa vɩa.

²¹ Jomba hɛ ŋ tʋɔŋ lɛ a kaa mʋ wuu, leŋ dɩ ba nagɛ ŋmɛnɩŋ a vɔɔ laalɛ ŋ baŋŋaa lɛ.

²² Dɩ ŋ nɩɩ vɛŋ, ba jaŋ laa ŋ sɩpaaŋ, dɩ ŋ nɛ pɩŋ doŋ ma, ba jaŋ pɔŋ, dɩ ŋ nɛ sii doŋ lɛ, ba jaŋ bʋl wɩaa pɩŋ.

²³ Wɩalɩŋ nagɛ chaanɩŋ nɛ, a nagɛ pʋlʋmʋŋ. Dɩ ŋ nɛ sɛyɛ baa dagɩŋ, ŋ jaŋ kɛŋ mɩɩsɩŋ.

²⁴ Ba jaŋ pɔŋ dɩ ŋ sɩ́ halɩɩlɩŋ nɩsɩŋ jʋʋ, ba jaŋ pɔŋ ba nii-sɩŋ wʋbʋlaa lɛ.

²⁵ Sɩ́ ʋ zɔmʋŋ beŋ a hɩɛnʋ, sɩ́ leŋe dɩ ʋ kɛŋ ʋ sɩaa nyɩsa kɛnɩŋ.

²⁶ Halɩɩ-la yallɩŋ muuro a magɛ boroboro yallɩŋ nɛ, ama haala sɩ kɛŋ bala aŋ ŋɩŋaa hachɔrʋŋ wɩaa, ʋ jaŋ wuo kpuŋ.

²⁷ Nʋʋ jaŋ wuo chaanɛ nyiniŋ daŋ ʋ naapuiŋ lɛ ka ʋ gɛnnɩŋ bɩ nyiniŋ ka dii?

²⁸ Nʋʋ jaŋ wuo vɛŋ nyiŋ-halaa lɛ, ka ba bɩ ʋ naasɩŋ ka nyɩgɛɛ?

²⁹ Ŋɩɩ nɛ saa ʋ nagɛ nɩɩ-la sɩ kɛŋ ʋ dɔŋɔ haala pɩŋ lɛ. Ŋ bɩ jaŋ wuo ŋaa ŋɩɩ aŋ mʋ pɛɩ, dɩ ba bɩŋ dɔgʋsɔ.

³⁰ Dɩ losuŋ nɛ kɛŋ gaara dɩ ʋ gaa kɩaa dii, ba bɩ ʋ yɩrɩŋ ka chei.

³¹ Ama dɩ ba nɛ kɛnʋ, ʋ maga dɩ ʋ tiŋ kʋ-la ʋ sɩ gaa naansɩɩŋ bʋlɩpɛ, dɩ ʋ dɩa kɩaa kala dɛrɛ.

³² Nɩɩ-la sɩ yie kɛŋ ʋ dɔŋɔ tɩɩna haala pɩŋ bɩ wʋjɩmɩɩ kala kɛnɛ. Dɩ ŋ nɛ ŋaa ŋɩɩ, ŋ jaŋ chei ŋ tɩtɩa.

³³ Ba jaŋ ŋmobu dɩ hɩɩsɩŋ diiu. Hɩɩsɩ-la bɩ jaŋ kɛŋ dɩdɛrɩŋ.

³⁴ Hadɔrʋŋ nɛ yie leŋ baala baanɩŋ faasa sii. Dɩ ʋ nɩɩ chɛ dɩ ʋ joŋ ʋ baanɩŋ fɩɩsɛ, ʋ yie paala bɩ tɩɩna nisusuŋ ka fá mʋa ma.

³⁵ Dɩ ŋ nɛ paala joŋ kʋŋkala kpɩkpalʋ ma, ʋ bɩ jaŋ sɛɩ, kʋ-la cho ʋ magɛ ɛɛ kala ma.