NAMAGABA 5 - WƖA TENIŊ

Ŋɩɩ ba sɩ kpʋrɩsɛ baal-la sɩ kɛŋ haala aŋ chɩchɛ nɩaa haalaa dɩgɩlaa

¹ Mɩ bii, suri ŋ dɩgɩlaa a jegile nɩɩ mɩ wʋjɩmɩŋ arɩ ŋɩɩ mɩ sɩ kɛŋ sɩɩ-polluŋ bʋl wɩaa,

² dɩ ŋɩɩ leŋ dɩ ŋ bɩɩnɛ wɩaa woruŋ a ŋɩŋaa, dɩ ŋ wʋbʋlaa kɛŋ bʋbʋɔŋ.

³ Hachɔrʋmʋŋ niiŋ wʋbʋlaa sɩma nagɛ tʋʋŋ nɛ, aŋ mʋllɛ a nagɛ ŋ sɩ kɛŋ nʋʋŋ tɩsɛ kʋa.

⁴ Ama ʋ dɩdɛrɩŋ, ʋ hɛyɛ bagɛbagɛ a nagɛ batu luobiiŋ, aŋ didii nyamanyama a nagɛ sɩa sɩ kɛŋ niiriŋ balɩa.

⁵ Dɩ ŋ nɛ to ʋ harɩŋ, ŋ jaŋ sʋʋ, ʋ jaŋ kɛnɩŋ mʋ lɛlɛɛ-jaŋ.

⁶ Ʋ lɛl wombii-la sɩɩ pɩ nɩaa mɩɩsɩŋ lɛ nɛ, ʋ wombiee golibo nɛ, ama ʋ bɩ jɩŋ.

⁷ Lɛɛlɛ, mɩ biiri, ma jegile nɩɩ mɩ teeŋ, má pʋpɔ ma sɩ́ wɩalɩŋ mɩ sɩ bʋla lɛ begilu.

⁸ Lɩɩsɛ ŋ tɩtɩa hachɔrʋmʋŋ lɛ, pʋpɔ ŋ paala sɩ́ ʋ dɩa boiŋ niiŋ mʋ.

⁹ Dɩ ŋ nɛ ŋaa ŋɩɩ, ŋ jaŋ muuri ŋ tɩtɩa, ŋ jaŋ sʋʋ nɩbɔŋŋɔɔ nɩsɩŋ lɛ dɩ ŋ ha bɩ hɩɛsa,

¹⁰ dɩ nʋhʋɔraa kɛŋ kɩalɩŋ kala ŋ sɩ suolo a dʋa laa dɩ nɩwogo dɩa nɩaa mɩɩra dii ŋ dʋa.

¹¹ Ʋ dɩdɛrɩŋ, ŋ jaŋ pɩna huhuuni, ŋ yaraa nammɩa kala jaŋ dɛrɛ.

¹² Ŋ jaŋ bʋl, “Mɩ fa bɛrɛ dagɩŋ, mɩ bɩ chagɩlɩŋ cho.

¹³ Mɩ fa bɩ nɩalɩŋ sɩ dagɛmɛ niiŋ to, mɩ bɩ jegile nɩɩ ba teeŋ.

¹⁴ Lɛɛlɛ mɩ mɩɩsɩŋ cheye dɛrɛ nɛ, hɩɩsɩŋ diimi nɛ nʋʋkala sɩpaaŋ.”

¹⁵ Mɛrɛ ŋ haala lɛ a nagɛ ŋ sɩɩ nyʋa ŋ tɩtɩa viliŋ lɛ.

¹⁶ Sɩ́ fuoŋ nagɛ dɩ haal na-kala wuo kɔ ŋ teeŋ a ŋaa ŋ lɩɩŋ nyʋnyʋa.

¹⁷ Leŋ dɩ ŋ ŋaa ŋ haala dʋndʋŋa kʋŋ. Pʋpɔ dɩ ma dɩ haal dɔŋ sɩ́ bɔsɔ pɛ.

¹⁸ Leŋ dɩ ŋ tʋɔŋ tɔrɛ ŋ haala nyuŋ, haal-la ŋ sɩ jaa ŋ bapʋɔsʋŋ lɛ.

¹⁹ Ʋ zɔmɔ nɛ woruŋ a nagɛ aamɩŋ, ŋ jaŋ wuo jʋʋ ʋ lahɔrɩmɔ lɛ. Leŋ dɩ ŋ haala chonuŋ vɔgʋŋ.

²⁰ Mɩ bii, bɛɛ nɛ tɩɩ ŋ leŋ haal dɔŋ chonuŋ vɔgʋŋ? Bɛɛ nɛ tɩɩ ŋ dɩ nʋʋ haal pɛ bɔsɔ?

²¹ La Tɩɩna ka na la naavɛnɛɛ kala nɛ, a bibeŋ la wʋŋaalaa.

²² Nɩbɔmʋŋ wʋŋaalaa gʋra kɛŋ ʋ tɩtɩa nɛ. Ʋ wʋbɔŋŋɔɔ vɔbʋ.

²³ Ʋ jaŋ sʋʋ a tɩŋ ʋ sɩ bɩ dagɩŋ ka nɩɩ wɩaa, ʋ tɩtɩa yaarɩŋ nɛ jaŋ leŋ dɩ ʋ lɛl.