NAMAGABA 31 - WƖA TENIŊ

Wɩalɩŋ kuoro Lɛmʋɛl sɩ bʋla

¹ Lɛmʋɛl nɛ fa ŋaa Masa kuoro. Wɩalɩŋ ʋ naaŋ sɩ dagʋ nɛ ŋ-la:

² Mɩ bii-kpɩana, mɩ nɛ lʋlʋŋ. Mɩ sʋl Wɩa nɛ ʋ joŋuŋ pɩmɛ.

³ Sɩ́ ŋ doluŋ joŋo hɛ haalaa chɛnɩŋ lɛ. Ba chei kuoroo yʋgɛ nɛ.

⁴ Mɩ bii Lɛmʋɛl, jegile nɩɩ. Kuoroo bɩ maga dɩ ba nyʋa sɩnɩŋ bubugi. Ba paala bɩ maga dɩ ba hɩhɩɛnɛ sɩnɩŋ.

⁵ Dɩ ba nɛ nyʋa sɩnɩŋ bugi, ba jaŋ yʋ wombiee-la ba sɩ bile dɩ ba tuto, aŋ nyagɛ summoo bil.

⁶ Leŋ dɩ nɩalɩŋ sɩɩ lɛl nɛ nyʋnyʋa sɩnɩŋ, leŋ dɩ nɩalɩŋ tʋɔŋ sɩ faasa chei nɛ nyʋnyʋa.

⁷ Dɩ ŋɩɩ wuo leŋ dɩ ba yʋ ba sunnuŋ lɛ, a bɩra sɩ́ hɛɛ-la ba sɩɩ na wɩaa liisu.

⁸ Bʋla laa nɩalɩŋ sɩ bɩ ba tɩtɩa wuo bʋlaa laa ta, aŋ pɔ laa nɩalɩŋ kala sɩ bɩ lee kɛnɛ dɩ ba wuo na wɩalɩŋ sɩ maga dɩ ba na.

⁹ Dii sarɩya arɩ wʋtɩtɩɩ, a bʋla laa summoo arɩ nɩalɩŋ sɩ bɩ ba tɩtɩa lɛ wuo pɛ ta.

Haala sɩ kɛŋ mɛlɛ

¹⁰ Dɩ ŋ nɩɩ chɛ dɩ ŋ na haal-la mɛlɛ sɩ zɔmɔ, ʋ hɛyɛ, ʋ nɛ yuŋŋie a kɩɩ yaraa kpɩɛrɩ kala yalɩŋ sɩ hɛyɛ.

¹¹ Ʋ bala yɩɛlaa kala daŋ ʋ lɛ nɛ, ʋ bɩ kʋ-yuŋii kala chɛɛ ka.

¹² Ʋ mɩɩsɩŋ kala lɛ ʋ yie ŋaa wʋzɔŋŋɔɔ nɛ ʋ bala lɛ, ʋ bɩ wʋbɔŋ ŋaa.

¹³ Ʋ yie kɛŋ pie-pʋnaa arɩ tɩɩ-pugubie-la nɛnɛɛ ba sɩ kaa ŋaa gɛnnɩŋ a ŋɩŋaa gɛnnɩŋ nɛ, bʋa kala.

¹⁴ Ʋ nagɛ bayalaa sɩ kɛŋ lɩɩŋ-daborusuŋ tɩtɩŋ nɛ, a yie mʋ dɩ-bolii a chɛ kʋdiilee kʋkɔ.

¹⁵ Ʋ yie sii dɩ leriŋ ha bire nɛ, a ŋaa kʋdiilee pɩ ʋ dɩa nɩaa, aŋ dagɛ haala-la sɩɩ tɩŋ ʋ dɩa lɛ wɩalɩŋ ba sɩ jaŋ ŋaa.

¹⁶ Ʋ yie na tinteeŋ a yɔɔ, a kɛŋ moribie-la ʋ sɩ tɩma na a chɔnsɛ girep tɩɩsɩŋ baga.

¹⁷ Ʋ kɛŋ doluŋ nɛ woruŋ, a chaasa tɩtɩŋ tɩntɩŋŋaa.

¹⁸ Ʋ yie na dɩ tɩntɩmɩɩ-la ʋ sɩɩ tɩŋ kɛŋ nyʋʋrʋŋ. Ʋ tɩŋ ŋɩɩ halɩɩ taŋ siesi.

¹⁹ Ʋ yie kori kuŋkunuŋ arɩ mɔrʋŋ aŋ kɛŋ neniee ma kɛŋ jendaaŋ.

²⁰ Ʋ yie pɩpɛ summoo arɩ nɩalɩŋ sɩ bɩ ba tɩtɩa lɛ wuo pɛ lɛ nɛ.

²¹ Dɩ waarɩŋ nɛ kʋ hɛ nɩmɛ, fawʋllʋŋ bɩ ʋ kɛŋ a tɩŋ ʋ dɩa nɩaa wɩaa, bɛɛ wɩaa ba kala kɛŋ waarɩŋ gɛnnɩŋ nɛ.

²² Ʋ yie ŋaa gɛnnɩŋ ʋ sɩ jaŋ kaa jɩjɛrɛ ʋ kʋpɩnaa nyuŋ nɛ, aŋ kɛŋ gɛrɩpɛ fʋfʋlʋŋ arɩ gɛrɩpɛ-vachalɩŋ a yɛrɛ gɛnnɩŋ lɩlaalɛ.

²³ Ʋ bala yie ŋaa nɩ-jɩmɩɩ nɛ a guoli ba jaŋ nɩ-hɩasɩŋ tʋɔŋ.

²⁴ Ʋ yie kɛŋ gɛrɩpɛ fʋfʋlʋŋ yɛrɛ gɛnnɩŋ aa yallɛ, aŋ yallɛ dɔnsʋŋ ma pɩpɩ nɩalɩŋ sɩɩ yallɛ kɩaa.

²⁵ Ʋ kɛŋ doluŋ nɛ nɩaa zizilu. Ʋ bɔyɛ bɩ joŋ a mʋʋ tɩgɛ maachie lɛ.

²⁶ Ʋ yie bʋbʋl wɩaa arɩ wʋjɩmɩŋ nɛ, a kɛŋ zile a dɩdagɛ nɩaa woruŋ.

²⁷ Ʋ yie bibeŋ ʋ dɩa wɩɩkala nyuŋ woruŋ nɛ. Ʋ bɩ yarɩ-wɩɩ tɩɩna ŋaa.

²⁸ Ʋ biiriŋ yie sii a kɛnʋ yɩyɩrɛ tʋɔtɔrɛ tɩɩna nɛ. Ʋ bala ma yie bɛsɛ ʋ lɛ a bʋl,

²⁹ “Haalaa yʋga nɛ a ŋɩŋaa wʋzɔŋŋɔɔ, ama ŋ nɛ kɩɩ ba kala.”

³⁰ Zɔmʋŋ nyɩsɛ nɩaa nɛ, aŋ lɩlɩɩ ma, ama haal-la sɩɩ fá La Tɩɩna maga dɩ nʋʋkala bɛsɛ ʋ lɛ nɛ.

³¹ Tɩntɩmɩɩ-la kala ʋ sɩ tɩma, ʋ maga dɩ ma zilu nɛ, a bɛsɛ ʋ lɛ nɩaa tʋɔŋ.