NAMAGABA 3 - WƖA TENIŊ

Wʋzɔmɔ-la ŋ ha sɩ jaŋ na dɩ ŋ nɛ kɛŋ wʋjɩmɩŋ

¹ Mɩ bii, sɩ́ wɩalɩŋ mɩ sɩ dagɩŋ yʋ, ama joŋ mɩ niiŋ wɩaa hɛ ŋ tʋɔŋ lɛ.

² Ba jaŋ leŋ dɩ ŋ mɩɩsɩŋ duomi, a leŋ dɩ ŋ hɔŋ arɩ yarɩfɩɛlaa.

³ Kɛŋ chonuŋ arɩ wʋtɩtɩɩ bʋa na-kala lɛ, leŋ dɩ ba nɛ ŋaa ŋ banzɔlɔ, leŋ dɩ ba hɛ ŋ tʋɔŋ lɛ.

⁴ Dɩ ŋ nɛ ŋaa ŋɩɩ, Wɩa arɩ nuhuobiine kala jaŋ choŋ.

⁵ Laa La Tɩɩna dii arɩ ŋ tʋɔŋ kala, aŋ sɩ́ ŋ tɩtɩa tʋɔbɩɩnaa lɛ to.

⁶ Leŋ dɩ ʋ nɛ laa ŋ sɩpaaŋ wɩɩkala ŋ sɩɩ ŋaa lɛ. Ʋ jaŋ leŋ dɩ ŋ wombiiŋ tʋʋlɛ.

⁷ Sɩ́ ŋ tɩtɩa joŋ arɩ ŋ ŋaa wʋjɩnnʋ, fá La Tɩɩna aŋ lɩɩsɛ ŋ tɩtɩa wʋbɔŋ kala lɛ.

⁸ Dɩ ŋ nɛ ŋaa ŋɩɩ, ŋ jaŋ kɛŋ yarɩfɩɛlaa a kɛŋ doluŋ ma.

⁹ Kɛŋ ŋ dʋa a zil La Tɩɩna, joŋ ŋ baga kɩaa kʋbumbumba a pʋ.

¹⁰ Dɩ ŋ nɛ ŋaa ŋɩɩ, ŋ virisiŋ jaŋ su a lɩɩ tɩta, dɩ ŋ sɩnɩŋ pupoyee ma su a jɩla tɩgɛ niiŋ lɛ a lɩɩ tɩta.

¹¹ Mɩ bii, sɩ́ La Tɩɩna sɩɩ dagɩŋ ŋɩɩ vɩa. Sɩ́ leŋe dɩ ŋ tʋɔŋ chei dɩ ʋ nɛ kɛnɩŋ tʋraa kɩɩ,

¹² bɛɛ wɩaa, La Tɩɩna yie kɛŋ nɩalɩŋ kala ʋ sɩ cho tʋraa kɩɩ nɛ, arɩ biiriŋ nyɩmmaba sɩ yie choba a kɛmba tʋraa kɩɩ ŋɩɩ.

¹³ Nɩɩ-la kala sɩ kɛŋ wʋjɩmɩŋ tʋɔŋ jaŋ tɔrɛ, nɩɩ-la ma sɩ jɩŋ wɩaa bʋbʋɔŋ tʋɔŋ jaŋ tɔrɛ.

¹⁴ Ʋ wʋjɩmɩɩ-la kɛŋ nyʋʋrʋŋ a kɩɩ hɔpʋla, ʋ nɛ yuŋŋie a kɩɩ sɛlɩmɛ.

¹⁵ Wʋjɩmɩŋ yuŋŋie kɩɩ jɩnalɩaba, kʋŋkala tuo ŋ sɩ jaŋ kaa magɩsʋ.

¹⁶ Wʋjɩmɩŋ nɛ jaŋ leŋ dɩ ŋ kɛŋ mɩɩ-duduoŋ. Ʋ jaŋ leŋ dɩ ŋ kɛŋ dʋa arɩ yɩrɩŋ ma.

¹⁷ Wʋjɩmɩŋ yie leŋ ŋ wɩɩkala fɩɛla pɩŋ nɛ, ŋ wɩaa vɩvɛŋ woruŋ.

¹⁸ Nɩalɩŋ kala sɩ laaʋ dii, ʋ yie nagɛ tɩa-la sɩɩ pɩ mɩɩsɩŋ nɛ ba teeŋ a bɩra ŋaa kʋŋ sɩɩ pɩba tʋɔtɔrʋŋ.

¹⁹ Wʋjɩmɩŋ nɛ La Tɩɩna kaa bil dʋnɩa gentine, ʋ sɩ jɩŋ wɩaa bʋbʋɔŋ lɛ nɛ ʋ to a ŋaa wɩa-nyuŋ.

²⁰ Ʋ wʋjɩmɩŋ nɛ leŋe fuonuŋ bubul, duonuŋ ma nɩnɩɩ.

²¹ Mɩ bii, gurigi wʋjɩmɩŋ arɩ ŋɩɩ ŋ sɩ jaŋ bɩɩnɛ wɩaa woruŋ a ŋɩŋaa a kpɛrɛ. Sɩ́ leŋe dɩ ba fori.

²² Ba jaŋ leŋ dɩ ŋ kɛŋ mɩɩ-duduoŋ. Ba jaŋ zɔŋ a nagɛ jɩnalɩa.

²³ Dɩ ŋ nɩɩ ŋaa ŋɩɩ, ŋ wɩɩkala jaŋ vɩvɛŋ woruŋ, ŋ bɩ jaŋ gɛrɛ.

²⁴ Dɩ ŋ nɛ pɩna, fawʋllʋŋ bɩ jaŋ kɛnɩŋ. Dɩ ŋ nɛ pɩŋ doŋ, ŋ jaŋ pɩŋ fɛlɛlɛ.

²⁵ Ŋ bɔyɛ bɩ jaŋ joŋ arɩ wʋlɔrʋ jaŋ wuo guu jʋʋŋ, wʋbɔmɔ-la sɩɩ jʋʋ nɩbɔŋŋɔɔ bɩ jaŋ jʋʋŋ,

²⁶ bɛɛ wɩaa La Tɩɩna nɛ jaŋ pɔŋ. Wɩɩkala bɩ jaŋ ŋaa ŋ lɛ, ʋ bɩ jaŋ leŋ dɩ ŋ jʋʋ bɛrɛ́ kala lɛ.

²⁷ Nɩalɩŋ sɩ maga dɩ ŋ ŋaa wʋzɔmʋŋ pa, sɩ́ ba vɔŋ dɩ ŋ nɛ kɛŋ wɩɩ-la doluŋ.

²⁸ Sɩ́ bʋla pɩ ŋ dɔŋɔ tɩɩna arɩ ʋ mʋ aŋ kɔ chie dɩ ŋ pɛ ʋ lɛ, ka ŋ jaŋ wuo pɛ ʋ lɛ lɛɛlɛ.

²⁹ Sɩ́ bɩɩna dɩ ŋ joŋ wʋbɔmʋŋ ŋaa ŋ dɔŋɔ tɩɩna lɛ, nɩɩ-la sɩ kpagɩŋ a laaŋ dii.

³⁰ Sɩ́ cheeriŋ joŋo pɩ nʋʋ dɩ ŋ nɛ jɩma ʋ bɩ wɩɩ cheye, a bɩ wʋbɔŋ kala ŋaa ŋ lɛ.

³¹ Sɩ́ leŋe dɩ ŋ yaraa bibieri nɩalɩŋ sɩɩ dii doluŋ lɛ, koo a ŋaa wɩalɩŋ ba sɩɩ ŋaa,

³² bɛɛ wɩaa La Tɩɩna bɛrɛ nʋʋ na-kala sɩ bɩ wʋtɩtɩɩ kɛnɛ nɛ, ama nɩalɩŋ-na sɩɩ ŋaa wɩaa ba bʋa lɛ ŋaa ʋ nandɔsʋ nɛ.

³³ La Tɩɩna ŋmɩaŋ ka dii nɩbɔŋŋɔɔ dɩɩsɩŋ nɩaa nɛ, ama ʋ yie pɛ tʋɔpʋl tɩŋŋaa dɩɩsɩŋ nɩaa-na lɛ nɛ.

³⁴ Nɩalɩŋ sɩɩ mɔŋ La Tɩɩna lɛ, ʋ ma yie mʋmɔŋ ba lɛ nɛ. Ama nɩalɩŋ-na sɩ kɛŋ ba tɩtɩa muuri, ʋ yie dagɛ ʋ zile a pɩba nɛ.

³⁵ Nɩalɩŋ sɩ kɛŋ wʋjɩmɩŋ jaŋ laa yɩrɩŋ, ama nɩyaaraa-na jaŋ dii hɩɩsɩŋ.