NAMAGABA 29 - WƖA TENIŊ

¹ Dɩ ŋ nyuŋ nɛ dolie, dɩ ba tʋrʋŋ tʋrʋŋ lɔl, ŋ jaŋ kʋʋ jɩŋ dɩ ba guu chei ŋ kala. Wɩɩkala tuo sɩ jaŋ laaŋ ta.

² Dɩ tʋɔpʋl tɩɩna nɛ laa nɩaa sɩpaaŋ, ba yie jʋjʋɔsɛ nɛ, ama dɩ nɩbɔmʋŋ nɛ laa ba sɩpaaŋ, ba gʋgʋrɩmɛ wɩaa.

³ Dɩ nʋʋ nɛ cho wʋjɩmɩŋ, ŋɩɩ yie leŋ ʋ nyɩmma tʋɔŋ tɔrɛ nɛ, ama nɩɩ-la sɩɩ to ha-lɩɩ-la harɩŋ, ʋ jaŋ ŋmoo chɩmɩŋ.

⁴ Dɩ kuoro nɛ kɛŋ wʋtɩtɩɩ, ʋ jaŋ yie chɩŋ nɛ kpaŋ kpaŋ, ama nɩɩ-la sɩ cho kpalaa diiniŋ yie yigi taŋ lo nɛ.

⁵ Nɩɩ-la kala sɩ dii nii-sɩma ʋ dɔŋɔ tɩɩna teeŋ, bɛrɛ́ nɛ ʋ hɛ bil ʋ lɛ ŋɩɩ.

⁶ Nɩbɔmʋŋ wʋbɔŋŋɔɔ nɛ yie gʋra bɛrɛ kɛnʋ, ama tʋɔpʋl tɩɩna-na jaŋ wuo yɩɩ yɩɩlaa a jʋɔsɛ.

⁷ Tʋɔpʋl tɩŋŋaa chɩl wɩalɩŋ sɩ maga dɩ ba ŋɩŋaa summoo lɛ wɩaa nɛ, ama nɩbɔŋŋɔɔ-na sɩpaa tuo.

⁸ Babiibalaa yie kɛŋ taŋ hosi nɛ, ama wʋjɩnnaa-na yie leŋ nɩaa baanɩŋ fɩɛlɛ nɛ.

⁹ Dɩ wʋjɩnna arɩ nɩyaara nɛ mʋ wɩaa dɩ-bʋlʋŋ, nɩyaarɩ-la yie na baanɩŋ a yigi wɩaa lo nɛ a ŋɩŋaa goŋ. Leriŋ bɩ fɩɛlaa pɩŋ.

¹⁰ Nɩkpʋʋra bɛrɛ nɩɩ-la sɩ bɩ wʋcheeli kɛnɛ nɛ. Ʋ yie chɩchɛ dɩ ʋ lɩɩsɛ ʋ mɩɩsɩŋ nɛ.

¹¹ Dɩ nɩyaarɩŋ baanɩŋ nɛ sie, ʋ yie ŋaa wɩaa nɛ nʋʋkala jɩŋ, ama wʋjɩnna-na yie jɩma kɛŋ ʋ tɩtɩa nɛ.

¹² Dɩ kuoro nɛ jegilee nɩɩ wʋnyɩɛrɩŋ, ʋ tɩntɩnnɩ-hɩasɩŋ kala yie bɩrɩmɛ nɩbɔmɔ nɛ.

¹³ Wʋbala nɛ summo arɩ nɩɩ-la sɩɩ dɔgɩsʋ kala kaa magɛ dɔŋɔ: La Tɩɩna nɛ pɩ ba kala mɩɩsɩŋ.

¹⁴ Dɩ kuoro nɛ dii sarɩya dɩ summoo ma wuo nɩna ba wʋchɛɛlɛɛ, ʋ kuoruŋ jaŋ dieni.

¹⁵ Dɩ ŋ nɛ joŋ chɩba dagɛ bie, ʋ jaŋ kɛŋ wʋjɩmɩŋ, ama dɩ ŋ nɛ leŋ bie ta ʋ dʋndʋŋa, ʋ jaŋ hɩɩsɛ ʋ naaŋ.

¹⁶ Dɩ nɩbɔŋŋɔɔ nɛ laa nɩaa sɩpaaŋ, wʋbɔŋŋɔɔ yie pʋrɩgɛ nɛ. Ama tʋɔpʋl tɩŋŋaa-na jaŋ na ba dɩ-teliŋ.

¹⁷ Tʋrɛ ŋ bie, ʋ jaŋ leŋ dɩ ŋ tʋɔŋ pɩŋ dɩ-bala, dɩ ŋ kɛŋ tʋɔtɔrʋŋ.

¹⁸ Dɩ nɩaa nɛ hɛ nɩmɛ a bɩ bee na wɩaa sɩpaaŋ, ba yie berimi nɛ, ama nɩalɩŋ sɩɩ to wɩalɩŋ ba sɩ bile dɩ baa to, Wɩa jaŋ leŋ dɩ ba tʋɔŋ tɔrɛ.

¹⁹ Ŋ bɩ jaŋ wuo kɛŋ niiŋ dʋndʋŋa kɛŋ tɩntɩnna bil wombiiŋ lɛ. Ʋ yie jɩŋ ba sɩaa ma nɛ aŋ bɩ jaŋ sɛɩ.

²⁰ Dɩ ŋ na nʋʋ sɩ pese bʋbʋl wɩaa, nɩyaarɩŋ nɛ kɛŋ yɩɛlaa a kɩɩʋ.

²¹ Dɩ ŋ nɛ kɛŋ ŋ tɩntɩnna pɩɛnɛ ʋ hambiriŋ kala lɛ, ʋ dɩdɛrɩŋ ʋ jaŋ leŋ dɩ ŋ tʋɔŋ chei.

²² Baaŋ-tɩɩna ka hɛ yuosuŋ nɛ, nɩɩ-la baanɩŋ sɩɩ sii lɩma lɩma yie ŋaa wʋbɔŋŋɔɔ yʋgɛ nɛ.

²³ Nɩɩ-la sɩɩ bigisi ʋ tɩtɩa lɛ yie dii hɩɩsɩŋ nɛ, ama nɩɩ-la sɩ kɛŋ ʋ tɩtɩa muuri, nɩaa yie zizilu nɛ.

²⁴ Nɩɩ-la sɩ pɛ gaara lɛ, bɛrɛ ʋ tɩtɩa mɩɩsɩŋ nɛ. Ʋ nɛ paala ŋmɩɛsɛ ma, ʋ ha bɩ wʋtɩtɩɩ ka bʋl.

²⁵ Dɩ nʋʋ nɩɩ fá nuhuobiinee, ŋɩɩ ŋaa bɛrɛ́ nɛ ʋ lɛ, ama nɩɩ-la sɩ laa La Tɩɩna dii, wɩɩkala bɩ jaŋ jʋʋ ʋ lɛ.

²⁶ Nʋʋkala yie chɩchɛ dɩ nɩbalɩŋ cho ʋ wɩaa nɛ, ama La Tɩɩna teeŋ nɛ nʋʋkala yie na wʋtɩtɩɩ.

²⁷ Tʋɔpʋl tɩɩna bɛrɛ nɩɩ-la sɩ bɩ wʋtɩtɩɩ kɛnɛ nɛ. Nɩbɔmʋŋ ma bɛrɛ nɩɩ-la sɩɩ ŋaa wɩaa ba bʋa lɛ.