NAMAGABA 27 - WƖA TENIŊ

¹ Sɩ́ chiemiŋ kaa ŋmoo bɔyɛ, bɛɛ wɩaa ŋ bɩ jɩŋ ŋɩɩ chie sɩ jaŋ nagɛ.

² Sɩ́ ŋ tɩtɩa lɛ bɛsʋ, leŋ dɩ nʋʋ nɛ bɛsɛ ŋ lɛ, nɩwogo, ŋ tɩtɩa-na dee.

³ Tabɩɩŋ yuŋŋie nɛ, ka hagɩla ŋaa chʋga, ama nɩyaarɩŋ wʋŋaalaa sɩ yie hɛ wɩalɩŋ nɛ yuŋŋie kɩɩ ba kala.

⁴ Baanɩŋ ŋaa kʋbɔŋ nɛ a chichei wɩaa, ama yarɩ-bieri ma nɛ bɩra bɔmɔ kɩɩʋ.

⁵ Dɩ ŋ nɛ kpɩa nɩa lɛ nɩaa tʋɔŋ, ʋ nɛ kpɩa ŋ sɩ sɩ ŋ chou nɛ aŋ kaa faa.

⁶ Dɩ ŋ nandɔŋɔ nɛ ŋaa wɩɩ a jʋʋŋ lɛ ŋ ha jaŋ wuo laa ʋ wɩaa dii, ama dɩ ŋ dʋndɔmɔ-na nɛ guoruŋ ma, ʋ haa nyɩsɩŋ nɛ.

⁷ Dɩ ŋ nɛ vɔgɔ, tʋʋŋ ma yie paalaa sʋɔrɛ nɛ ŋ mɩɩsɩŋ lɛ, ama dɩ losuŋ nɛ kɛnɩŋ, kʋ-la sɩ hɛyɛ bagɛ bagɛ ma paala ŋaa kʋsɩŋ nɛ ŋ teeŋ.

⁸ Dɩ nʋʋ nɛ fá kagɛ ʋ dɩa lɛ, ʋ nagɛ diibie sɩ yeŋŋi ʋ dɛlɛ leriŋ nɛ.

⁹ Dɩ ŋ nɛ tɩsɛ tʋlaalɩɩ arɩ nʋʋ-sʋara, ŋ tʋɔŋ yie tɔrɛ nɛ. Ama dɩ ŋ nandɔŋ fɩamɩŋ nɛ chaasa bʋl wɩaa chagɩlɩŋ, ŋɩɩ nɛ zɔmɔ kɩɩba.

¹⁰ Pʋpɔ ŋ sɩ́ ŋ nandɔŋɔ arɩ ŋ nyɩmma nandɔŋɔ vɩa ta. Dɩ wɩaa nɛ jʋʋŋ, pʋpɔ ŋ sɩ́ ŋ naambie teeŋ sii mʋ a chɩchɛ ʋ pɛ ŋ lɛ. Nɩɩ-la sɩ jʋʋ kpagɩŋ jaŋ wuo pɛ ŋ lɛ a kɩɩ ŋ naambie sɩ hɛ dɩ-bolii.

¹¹ Mɩ bii, kɛŋ wʋjɩmɩŋ, dɩ ŋɩɩ leŋ dɩ mɩ tʋɔŋ tɔrɛ. Ŋɩɩ nɛ mɩ jaŋ wuo na wombiiŋ a bʋl wɩaa nɩalɩŋ sɩɩ chɛ dɩ ba hɩɩsɛmɛ teeŋ.

¹² Wʋjɩnna yie na wʋbɔmʋŋ dɩ ʋʋ kɔ, ʋ gɛbɛ faa, ama nɩɩ-la sɩ bɩ wɩaa jɩŋ woruŋ-na yie vɛnɛ vɛnɛ mʋ jʋʋ-ʋ nɛ, a na hɛɛŋ.

¹³ Laa nɩɩ-la sɩ chɩna pɩ nʋhʋɔra ʋ dii chɩmɩŋ gɛrɩŋ, a bil chɩŋ-la bʋbʋɔŋ lɛ. Ʋ maga dɩ ba laa gɛrɛ-la nʋhʋɔrʋ-la chɩmɩŋ bʋbʋɔŋ lɛ nɛ.

¹⁴ Dɩ nʋʋ nɛ sii chʋchʋɔ-fɩɛla a kpɩa chʋɔlɛ ʋ dɔŋɔ tɩɩna, nɩaa jaŋ joŋu arɩ ʋ kalɩba hɛ ʋ lɛ nɛ.

¹⁵ Haala sɩ cho yuosuŋ nagɛ duonuŋ sɩɩ pʋʋsʋ deeŋ deeŋ a bɩ leŋ nɛ.

¹⁶ Dɩ ŋ nɩɩ walɩmɛ dɩ ʋ leŋ, ʋ nagɛ ŋ sɩɩ chɛ dɩ ŋ kɛrɛ peliŋ nɛ, koo nʋʋ-lɩɩŋ nɛ ŋ chɩchɛ dɩ ŋ gulimi.

¹⁷ A nagɛ ba sɩ yie kɛŋ hɔɔŋ a kaa taa hɔɔŋ ŋɩɩ, ŋɩɩ nɛ nuhuobiinee ma yie dɩdagɛ dɔŋɔ.

¹⁸ Nɩɩ-la kala sɩ chɔnsɛ tɩa-la nɛnɛɛ ba sɩɩ dii a beŋ ʋ nyuŋ, ʋ jaŋ dii ʋ nɛnɛɛ. Nɩɩ-la kala sɩ beŋ ʋ nɩhɩaŋ nyuŋ woruŋ, nɩaa jaŋ zilu.

¹⁹ Ŋ sɩ yie beŋ lɩɩŋ lɛ a na ŋ tɩtɩa ŋɩɩ, ŋɩɩ nɛ ŋ tʋɔbɩɩnaa ma yie leŋ ŋ jɩŋ ŋɩɩ ŋ mɛlɛ sɩ naga.

²⁰ Sʋʋŋ bʋa arɩ lɛlɛɛ-jaŋ sɩ bɩ vɔgɛ ŋɩɩ, ŋɩɩ tɩtɩa nɛ nuhuobiine ma chɩchɛ kɩaa a bɩ vɔgɛ.

²¹ Ba yie joŋ sɛlɩmɛ koo hɔpʋla a hɛ chefuguŋ-bʋa nyiniŋ lɛ nɛ a ŋmɩɛra lɩɩsɛ ʋ disiniŋ. Ama dɩ nɩaa nɩɩ bɛsɛ nʋʋ lɛ, ŋɩɩ lɛ nɛ ŋ jaŋ wuo to a jɩŋ ʋ mɛlɛ.

²² Dɩ ŋ nɛ paala kɛŋ nɩyaarɩŋ a hɛ tɔgʋŋ tʋɔŋ a tugi arɩ tendiiŋ, a joŋo daŋ nɔmʋŋ nyuŋ a nɔŋ a nagɛ ŋɩɩ ba sɩ yie nɔŋ munuŋ, ŋ bɩ jaŋ wuo lɩɩsɛ yaarɩŋ ʋ lɛ.

²³ Jɩŋ ŋ piesee arɩ ŋ bʋʋnaa yarɩfɩɛlaa wɩaa a beŋ ba nyuŋ woruŋ,

²⁴ bɛɛ wɩaa dʋa bɩ jaŋ hɛ nɩmɛ deeŋ deeŋ. Nʋʋ bɩ jaŋ kuori a kaa mʋ wuu.

²⁵ Dɩ ŋ nɛ ku pʋsʋŋ ya-diiliŋ a ku dundolo nyuŋ kɩaa ma pɛ a hiese hɛ dɔŋɔ, ka dɩ ya-falɩŋ bɩra tɔsɛ,

²⁶ piese-la lɛ ŋ jaŋ wuo na gɛnnɩŋ, aŋ yallɛ bʋʋna-la ma a yɔɔ tinteeŋ.

²⁷ Ŋ jaŋ na bʋ-yɩlɩŋ yʋgɛ, a kaa beŋ ŋ dɩa nɩaa, dɩ haala-la sɩɩ tɩŋ ŋ dɩa lɛ ma na dii.