NAMAGABA 26 - WƖA TENIŊ

¹ Ʋ sɩ bɩ wombiiŋ ŋaa dɩ waarɩŋ hɛ nɩmɛ wulumuŋ bʋa lɛ ŋɩɩ koo a bɩ maga dɩ duonuŋ nɩɩ kɩaa kʋmʋŋ bʋa lɛ, ŋɩɩ tɩtɩa nɛ ʋ bɩ maga dɩ ŋ zil nɩyaarɩŋ.

² Dɩ ŋ nɛ bɩ wɩɩ ŋaa ka dɩ nʋʋ ŋmɩɛsa hɛ ŋ lɛ, ŋmɩaŋ-la bɩ jaŋ diiŋ. Ʋ nagɛ zaarɩ-kokobie koo kampiliŋ diibie sɩɩ fil a bɩ togili nɛ.

³ A nagɛ ŋ sɩ yie vɩɩrɛ kakumo ŋɩɩ, koo ŋ sɩ yie joŋ koŋ hɛ jaaba niiŋ, ŋɩɩ nɛ maga ŋ ŋmoo nɩyaara.

⁴ Dɩ nɩyaarɩŋ nɛ pɩɛsɩŋ nɩyaarɩ wɩɩ, sɩ́ wɩɩ-la bʋbʋɔŋ lɩɩsʋ. Dɩ ŋ nɛ ŋaa ŋɩɩ, ŋ ma nagʋ nɛ.

⁵ To ʋ yaarɩŋ lɛ a dagɛ ʋ wɩɩŋ bʋbʋɔŋ pʋ. Ŋɩɩ dee ʋ jaŋ bɩɩnɛ ʋ jɩŋ wɩaa nɛ.

⁶ Dɩ ŋ nɛ tɩŋ nɩyaarɩŋ a bʋl dɩ ʋ mʋ bʋl wɩɩ pɩ nʋʋ, ʋ yie nagɛ ŋ sɩ keri ŋ tɩtɩa naaŋ nɛ, a joŋ ŋ tɩtɩa hɛ wɩaa lɛ.

⁷ A nagɛ gbɛrɩgɛ naasɩŋ bɩra sɩ́ bɩ tɩntɩmɩɩ kɛnɛ ŋɩɩ, ŋɩɩ tɩtɩa nɛ nɩyaarɩŋ sɩ magɛ namaga ma nagɛ.

⁸ Dɩ ŋ nɛ zil nɩyaarɩŋ, ʋ nagɛ ŋ sɩ joŋ tabɩɩŋ vɔɔ mɛrɛ kpalɩŋ lɛ nɛ aŋ chɩchɛ ŋ yuo.

⁹ Nɩyaarɩŋ sɩ magɛ namaga, ʋ nagɛ sɩ-nyʋara sɩɩ chɛ ʋ lɩɩsɛ sɔɔŋ sɩ tɔɔ ʋ nɩsɩŋ lɛ nɛ.

¹⁰ Nɩɩ-la kala sɩ joŋ nɩyaarɩŋ koo nʋʋ na-kala sɩ kʋʋ bal dɩ ʋ tɩŋ ka ʋ timu, ʋ nagɛ to-yuoro sɩ gɔllɔ pɩrɛ nɩaa tɩta nɛ.

¹¹ A nagɛ vaha sɩ yie tʋɔsɛ aŋ gʋra paa dii ŋɩɩ, ŋɩɩ tɩtɩa nɛ nɩyaarɩŋ ma yie ŋaa nɩyaarɩ wɩɩŋ aŋ bɩra ŋaa wɩɩ-la tɩtɩa.

¹² Dɩ ŋ nɛ na nʋʋ sɩ bɩɩna ʋ jɩŋ wɩɩkala nɛ aŋ bɩ wɩɩ jɩŋ, nɩyaarɩŋ nɛ kpɩaʋ.

¹³ Yarɩwɩɩ tɩɩna yie bʋl, “Naachigiŋ nɛ hɛ wombiiŋ lɛ, kpeye yaraa sɩ hoso nɩɩ gɔllɛ jeeŋ harɩŋ.”

¹⁴ Ba sɩ yie suri boro ʋ chɩna viviisi ŋɩɩ, ŋɩɩ tɩtɩa nɛ yarɩwɩɩ tɩɩna ma yie pɩna bibilimi ʋ kʋpɩnaa nyuŋ.

¹⁵ Yarɩwɩɩ tɩɩna yie joŋ nɩsɩŋ a nʋrɛ kʋdiilee lɛ nɛ, ama yarɩwɩɩŋ bɩ sɛɩ dɩ ʋ kaa jɩl niiŋ.

¹⁶ Yarɩwɩɩ tɩɩna bɩɩna ʋ nɛ kɛŋ wʋjɩmɩŋ a kɩɩ nɩaa balɩpɛ sɩ jaŋ wuo lɩɩsɛ wɩaa sɩaa woruŋ.

¹⁷ Nɩaa sɩ kɛŋ yuosuŋ ŋ wɩɩ tuo nɩmɛ, ka ŋ joŋ ŋ niiŋ hɛ, ʋ nagɛ vaha sɩ kʋʋ bal, ŋ kɛŋ ʋ dɩgɩlaa lɛ lɛrɛ nɛ.

¹⁸ A nagɛ nyɩnyɛ tɩɩna sɩɩ yuo to-hɛŋŋɛɛ sɩɩ chol nyiniŋ koo hɛ-sʋʋlaa,

¹⁹ ʋ nagɛ nɩɩ-la sɩ yie nyɩsɛ ʋ dɔŋɔ tɩɩna aŋ bʋl, “Mɩ ta kaa gbieli nɛ.”

²⁰ Dɩ daasɩŋ nɛ tuo, nyiniŋ dɩsɛ nɛ, dɩ zɛmbɛ ma nɛ tuo, yuosuŋ jaŋ fɩɛlɛ.

²¹ Hɔlɔɔ sɩ yie ŋaa nyiŋ-muluŋ ŋɩɩ ka daasɩŋ ma nɛ ŋaa nyiniŋ, ŋɩɩ tɩtɩa nɛ yuo-hɛɛrɛ ma yie leŋ yuosuŋ pupusi.

²² Zɛmbɛ tɩɩna wʋbʋlʋŋ sɩma a nagɛ kʋdii-sɩŋŋaa nɛ, baa tuu tʋɔŋ nɛ woruŋ.

²³ Niiŋ sɩɩ bʋl wʋsɩŋŋaa aŋ kɛŋ tʋɔbɔmʋŋ, ʋ nagɛ ba sɩ kɛŋ chʋrʋŋ mɛ pupoiŋ aŋ joŋ hɔpʋla bɩnɩŋ taara nɛ.

²⁴ Nɩa yie bɛrɩŋ aŋ fugoo bʋl wʋsɩŋŋaa ŋ teeŋ, aŋ ka ʋ tʋɔŋ biri.

²⁵ Ʋ wʋbʋla yie sɩŋ nɛ, ama sɩ́ ʋ laa dii, bɛɛ wɩaa ʋ tʋɔŋ kala nɛ suo arɩ wʋbɔŋŋɔɔ.

²⁶ Ʋ jaŋ wuo kɛŋ ʋ tʋɔ-bɔŋ-la faa a nyɩsɩŋ, ama ʋ bʋbʋɔŋ jaŋ lɩɩ nɩaa tʋɔŋ.

²⁷ Nɩɩ-la kala sɩ lu buotuoŋ bil ʋ dɔŋɔ lɛ, ʋ jaŋ gʋra tuu bʋa-la. Dɩ nʋʋ nɩɩ bilimi tabɩɩŋ dɩ ʋ nyagɛ ʋ dɔŋɔ, tabɩɩ-la jaŋ mɩɩra kʋ nyagʋ.

²⁸ Nɩɩ-la sɩɩ nyɩɛ wɩaa bɛrɛ nɩalɩŋ ʋ sɩ nyɩɛ wɩaa pɩpa nɛ, nii-sɩma ka chei nɩaa nɛ.