NAMAGABA 25 - WƖA TENIŊ

Solomoŋ namagaba dɔnsʋŋ

¹ Solomoŋ namagaba dɔnsʋŋ nɛ ŋ-la, Juda kuoro Hezikaaya tɩntɩnnɩ-hɩasɩŋ sɩ naba lee aŋ ma ŋmʋnsɛ:

² La yie zil Wɩa a tɩŋ wɩalɩŋ ʋ sɩ joŋo faala nɛ. Dɩ kuoro nɛ gbille na wɩaa sɩaa, ŋɩɩ lɛ nɛ ʋ yie laa yɩrɩŋ.

³ Wɩa-nyuŋ sɩ bolie ŋɩɩ, tinteeŋ bʋbʋɔŋ ma luŋ, ŋɩɩ nɛ kuoro tʋɔbɩɩnaa nagɛ. Nʋʋ bɩ ba wuo jɩŋ.

⁴ Dɩ ba nɛ lɩɩsɛ hɔbɩnɩŋ ta hɔpʋla lɛ, ba jaŋ wuo kɛŋ hɔpʋla-la libi kʋŋ.

⁵ Dɩ ba nɛ lɩɩsɛ nɩbɔmʋŋ kuoro sɩpaaŋ, wʋtɩtɩɩ jaŋ leŋ dɩ ʋ kuoruŋ chɩŋ kpaŋ kpaŋ.

⁶ Sɩ́ ŋ tɩtɩa kaa ŋaa nɩbal kuoro sɩpaaŋ, a chɩchɛ dɩ ŋ hɔŋ nɩbalaa dɩhɔnʋŋ.

⁷ Ʋ jaŋ kpɩa dɩ ʋ nɛ sɩ, “Kʋ jɩl daha,” a kɩɩ ʋ sɩ jaŋ hɩɩsɩŋ a bʋl dɩ ŋ sii nɩbalaa dɩhɔnʋŋ.

⁸ Wɩɩ-la ŋ sɩ na, sɩ́ pese kaa mʋ sarɩya dɩ-diiliŋ. Ŋ bɩ jɩŋ ʋ dɩdɛrɩŋ sɩ jaŋ nagɛ ŋɩɩ pɩŋ. Dɩ ŋ dɔŋɔ tɩɩna nɛ bʋla loŋ, ɛɛ nɛ ŋ jaŋ ŋaa?

⁹ Dɩ ŋ dɩ ŋ dɔŋɔ tɩɩna nɛ kɛŋ kaalɛrɛ, má bʋl wɩɩ-la wasɛ a leŋ dɩ ʋ magɛ ma dʋndʋŋa, a sɩ́ nʋʋ kaa pɛ.

¹⁰ Dɩ ŋɩɩ dee, nɩalɩŋ sɩ pɛ nɩɩ wɩɩ-la jaŋ wuo hɩɩsɛma, dɩ ma yɩrɩŋ chei a kaa mʋ wuu.

¹¹ Dɩ nʋʋ nɛ bʋl wɩɩŋ woruŋ ʋ bʋa lɛ, ʋ naga ba sɩ kɛŋ sɛlɩmɛ ŋaa kʋŋ a joŋo daŋ hɔpʋla kʋa nyuŋ nɛ.

¹² Wʋjɩnna sɩ kɛŋ nɩaa tʋra kɩɩ ba jegile nɩɩ, ʋ nagɛ ba sɩ kɛŋ sɛlɩmɛ libi dɩgɩlɩŋ-kpɛnsɩŋ arɩ kpɩɛraa dɔnsʋŋ nɛ.

¹³ Tɩndaarɩ-zɔmʋŋ yie leŋ nɩɩ-la sɩ tɩmʋ yaraa kala fɩɛlɛ nɛ, a nagɛ nʋʋ sɩ yie nyʋa lɩɩ-fɩɛla ʋ yaraa fɩɛlɛ ŋɩɩ wulumuŋ bʋa lɛ. Ʋ yie leŋ nɩɩ-la sɩ tɩmʋ tʋɔŋ tɔrɛ nɛ.

¹⁴ Nɩalɩŋ sɩ yie hɛ niiŋ pɩ nɩaa arɩ ba jaŋ ŋaa wɩɩ pɩba aŋ bɩ ŋaa, ba nagɛ duonuŋ sɩ tɩna aŋ ŋaa peliŋ a bɩ nɩa nɛ.

¹⁵ Dɩ ŋ nɛ kɛŋ kenyiri, ŋ jaŋ wuo sʋl sɩpaalaara dɩ ʋ sɛɩ ŋaa wɩɩŋ. Wʋbʋl sɩŋŋaa nɛ yie kɛŋ nɩbalɩŋ tʋɔbɩɩnaa bɩrɩmɛ.

¹⁶ Dɩ ŋ nɛ na tʋʋŋ, dii magɛ ŋ maŋŋaa. Dɩ ŋ nɛ dii kieli, ŋ jaŋ tʋɔsɛ.

¹⁷ Sɩ́ ŋ dɔŋɔ tɩɩna dɩa mʋmʋ bʋa kala. Dɩ ŋ nɩɩ ŋaa ŋɩɩ, ʋ mɩɩsɩŋ jaŋ fɩɩŋ dɩ ʋ bɛrɩŋ.

¹⁸ Dɩ ŋ nɛ nyɩɛ wɩaa a pɩ ŋ dɔŋɔ tɩɩna, ʋ nagɛ ŋ sɩ joŋ toŋguluŋ a ŋmobu nɛ, koo ŋ sɩ joŋ tokobiiŋ koo to-hɛmɩŋ sɩ kɛŋ niiŋ woruŋ a tɔbʋ.

¹⁹ Dɩ ŋ nɛ joŋ ŋ yɩɛlaa hɛ nʋʋ sɩ bɩ wʋtɩtɩɩ kɛnɛ lɛ, bʋa-la lɛ wɩaa sɩ jʋʋŋ, ʋ nagɛ ŋ nyɩlɩŋ sɩɩ wɩɩ, ka ŋ chɩchɛ ŋ kaa chaŋ kɩaa nɛ, koo ŋ sɩɩ jusu aŋ chɩchɛ dɩ ŋ fá.

²⁰ Dɩ ŋ nɛ yɩɩ yɩɩlaa pɩpɩ nʋʋ tʋɔŋ sɩ faasa chei, ʋ nagɛ ŋ sɩ kɛŋ ʋ gɛrɩŋ laa waarɩŋ bʋa lɛ nɛ, koo ŋ sɩ joŋ sɛhɩyɛ hɛ ʋ naawɩɩlɩŋ lɛ nɛ.

²¹ Dɩ losuŋ nɛ kɛŋ ŋ dʋndɔmɔ, ŋaa kʋdiilee pʋ, dɩ lɩɩnyʋasʋŋ nɛ kɛnʋ, ŋaa lɩɩŋ pʋ dɩ ʋ nyʋa.

²² Dɩ ŋ nɛ wuo ŋaa ŋɩɩ, hɩɩsɩŋ jaŋ kɛnʋ kɩŋkɛŋ. La Tɩɩna jaŋ timiŋ.

²³ Pel-duoŋ sɩ yie kɛŋ duonuŋ kɔ ŋɩɩ, ŋɩɩ tɩtɩa nɛ harɩ-gaaŋ ma yie kɛŋ baanɩŋ kʋkɔ.

²⁴ Dɩ ŋ nɛ yaara chʋchʋa lusuŋ nyuŋ, ʋ nɛ kpɩa ŋ dɩ haala sɩ cho yuosuŋ sɩ pɛ dɩa.

²⁵ Lɩɩ-nyʋasʋŋ sɩ yie kɛnɩŋ ŋ nyʋa lɩɩ-fɩɛla ʋ sɩŋ ŋɩɩ, ŋɩɩ nɛ ŋ yaraa ma yie fɩɛlɛ dɩ ŋ nɛ nɩɩ wʋzɔmʋŋ sɩ lɩɩ dɩ-bolii kʋkɔ.

²⁶ Dɩ tʋɔpʋl tɩɩna nɛ sɛyɛ pɩ nɩbɔmʋŋ a to ʋ niiŋ, ʋ nagɛ vʋchɔɔŋ sɩ tɔ lɩɩ-bʋl-sɩɩŋ nɛ koo ba sɩ chʋŋ nʋsʋrʋŋ hɩhɛ viliŋ lɛ nɛ.

²⁷ Dɩ ŋ nɛ faasa dii tʋʋŋ a yʋgɛ, ʋ bɩ zɔŋ, ŋɩɩ tɩtɩa nɛ ʋ bɩ maga dɩ ŋ chɩchɛ dɩ ba ziziliŋ kɩŋkɛŋ.

²⁸ Nʋʋ sɩ bɩ ʋ tɩtɩa wuo kɛŋ, ʋ nagɛ taŋ ba sɩ saa kɛrɛ golli, ʋ tel aŋ ka taŋ-la nɛ.