NAMAGABA 24 - WƖA TENIŊ

¹ Sɩ́ leŋe dɩ ŋ yaraa bibieri wʋbɔŋ ŋaaraa nyuŋ. Sɩ́ chɩchɛ dɩ ŋ kɛmba dii nandɔnsʋŋ.

² Ba tʋɔbɩɩnaa nɛ dɩ ba chɩchɛ nɩaa niiŋ lɛ, a bʋbʋl ŋɩɩ ba sɩ jaŋ hɛ nɩaa wɩaa lɛ.

³ Wʋjɩmɩŋ nɛ ba yie kaa saa dɩa, a to ba sɩ jɩŋ wɩaa sɩaa lɛ a leŋ ʋ chɩŋ woruŋ,

⁴ Wʋjɩmɩŋ nɛ ba yie kaa chɛ kɩalɩŋ ŋ sɩ bɩ na tɛtɛ arɩ kʋzɔŋŋɔɔ a su dɩɩsɩ-la tʋɔŋ.

⁵ Wʋjɩnna nɛ kɛŋ doluŋ kɩŋkɛŋ a kɩɩ nɩduoŋ, nɩɩ-la sɩ jɩŋ wɩaa, ʋ doluŋ pʋŋa pɩpɛ nɛ.

⁶ Dɩ ŋ nɩɩ chɛ ŋ yuo laalɩŋ, leŋ dɩ ba dagɩŋ, dɩ nɩ-daŋ nɛ chagɩlɩŋ, ŋ jaŋ yuo dii.

⁷ Wʋjɩmɩŋ yʋga kɩɩ nɩyaara nɛ. Dɩ ba nɛ hilimi wɩaa dɩ-vʋʋrʋŋ, ʋ bɩ wɩɩ kɛnɛ dɩ ʋ bʋl.

⁸ Nɩɩ-la sɩɩ bɩɩnɛ wʋbɔmʋŋ a ŋɩŋaa, nɩaa yɩrʋ wʋhɛɛrʋ nɛ.

⁹ Wɩalɩŋ nɩyaara sɩ bɩɩna a ŋɩŋaa, ba ŋaa wʋbɔŋ nɛ, nɩaa bɛrɛ babii-balɩŋ nɛ.

¹⁰ Dɩ wɩaa nɛ jʋʋŋ, dɩ ŋɩɩ leŋ dɩ ŋ nandaasɩŋ yʋɔrɛ, ŋɩɩ-na ŋ bɩ bɔɩ-duo tɩɩna ŋaa.

¹¹ Lorigo laa nɩalɩŋ sɩ bɩ wɩɩ cheye ka ba chɩchɛ dɩ ba kpʋba ta, laa nɩalɩŋ sɩ gɛrɛɛ mʋ sʋʋŋ bʋa ta.

¹² Dɩ ŋ nɛ sɩ, “Aɩ, mɩ bɩ wɩɩ jɩŋ wɩɩŋ deeŋ lɛ,” Wɩa sɩɩ bagɩsɛ nʋʋkala tʋɔbɩɩnaa na nɛ. Ʋ nɛ sɩɩ beŋ ŋ mɩɩsɩŋ jɩma nɛ, ʋ jaŋ tiŋ nʋʋkala a magɛ ŋɩɩ ʋ sɩ tɩma magɛ.

¹³ Mɩ bii, dii tʋʋŋ, ʋ sɩma. Tʋʋ-nʋʋŋ arɩ jaga sɩma.

¹⁴ Tʋʋŋ sɩ sɩma ŋɩɩ, ŋɩɩ tɩtɩa nɛ wʋjɩmɩŋ ma nagɛ. Ŋɩɩ wɩaa, chɛ wʋjɩmɩŋ. Dɩ ŋ nɛ kɛŋ wʋjɩmɩŋ, ʋ kɛŋ chie nɛ, ŋ yɩɛlaa bɩ jaŋ ŋaa pɛɩ.

¹⁵ Sɩ́ nɩbɔmʋŋ nagʋ, a faa gbɛrɛ dɩ ŋ ŋaa wʋbɔŋ tʋɔpʋl tɩɩna dɩa lɛ, sɩ́ ʋ dɩjʋʋlʋŋ kaa chei.

¹⁶ Wɩaa yie wuo jʋʋ tʋɔpʋl tɩɩna a yi naansɩɩŋ bʋlɩpɛ nɛ, ka ʋ lɩlɩɩ ba lɛ bʋa na-kala. Ama wʋjʋʋlaa jaŋ yigi nɩbɔmʋŋ-na lo.

¹⁷ Dɩ wɩaa nɛ jʋʋ ŋ dʋndɔmɔ, sɩ́ leŋe dɩ ŋ tʋɔŋ tɔrɛ, dɩ ʋ nɛ gɛrɛ ma, sɩ́ jʋɔsʋ.

¹⁸ La Tɩɩna jaŋ wuo na ŋɩɩ dɩ ʋ tʋɔŋ chei, dɩ ʋ baanɩŋ fɩɛlɛ dʋndɔŋ-la nyuŋ.

¹⁹ Sɩ́ leŋe dɩ nɩbɔŋŋɔɔ wʋŋaalaa walɩmɩŋ, sɩ́ leŋe dɩ ŋ yaraa bibieri nɩalɩŋ sɩɩ ŋaa wʋbɔŋŋɔɔ lɛ.

²⁰ Nɩbɔmʋŋ bɩ chie kɛnɛ. Ʋ jaŋ lɛl a nagɛ ba sɩ fuuni chaanɩŋ dɩsɛ ŋɩɩ.

²¹ Mɩ bii, fɩfá La Tɩɩna arɩ kuoro, aŋ pʋpɔ ŋ sɩ́ ŋ tɩtɩa kaa mʋ mɛrɛ nɩalɩŋ sɩ bɩ ba niiŋ ka to lɛ.

²² Ba jaŋ wuo guu joŋ wʋlɔrʋnʋŋ hɛ nɩalɩŋ lɛ. Kʋbɛɛ nɛ saa jɩŋ wʋlɔrʋ-la doho ba sɩ jaŋ joŋo hɛ ba lɛ.

Wʋjɩnnaa wʋbʋlaa dɔnsʋŋ

²³ Wʋjɩnnaa wʋbʋlaa dɔnsʋŋ nɛ ŋ-la: Dɩ ma nɛ dii sarɩya a kɛŋ nɩaa pʋpɔrɛ, ŋɩɩ bɩ zɔŋ.

²⁴ Sarɩya diiru-la kala sɩ laa wʋcheere ta, nɩaa jaŋ ŋmɩɛsa hɛ ʋ lɛ, ka dɩ tinteyee nɩaa dɔnsʋŋ ma bɛrʋ.

²⁵ Ama sarɩya diire-la sɩɩ dɔgɩsɛ wʋcheeree, nɩaa jaŋ sʋl Wɩa dɩ ʋ na wʋzɔŋŋɔɔ a yʋgɛ.

²⁶ Dɩ nʋʋ nɛ pɩɛsɩŋ wɩɩ, dɩ ŋ bʋl wʋtɩtɩɩ pʋ, ŋɩɩ daga arɩ ŋ chou nɛ.

²⁷ Laa sɩpaaŋ tɩŋ ŋ ŋmaŋkaaŋ tɩntɩŋŋaa, a ŋaa ŋ baga kɩaa hɛ dɔŋɔ, aŋ-na saa dɩa.

²⁸ Sɩ́ nʋʋ yɩrɩŋ chei pɩ ŋ dɔŋɔ tɩɩna dɩ ŋ nɛ jɩma ʋ bɩ wɩɩ cheye. Sɩ́ wɩaa nyɩa pʋ.

²⁹ Pʋpɔ ŋ sɩ́ bʋl, “Mɩ jaŋ joŋ wʋbɔŋ-la tɩtɩa ʋ sɩ ŋaa mɩ lɛ a ŋaa ʋ lɛ, mɩ jaŋ joŋ wɩɩ-la ʋ sɩ ŋaa chɩmɩŋ tiŋ ʋ lɛ.”

³⁰ Mɩ to yarɩwɩɩ tɩɩna ŋmaŋkaaŋ tʋɔŋ bal, a to nɩyaarɩŋ ma tɩɩnɛnɛɛ baga tʋɔŋ a bal,

³¹ a na dɩ sɔsʋŋ nyʋ tɔ lee-la kala. Tinteeŋ kala tɔ arɩ yaŋ. Ba sɩ kɛŋ tabɩaa saa jebii-la ma tel.

³² Ŋɩɩ nɛ mɩ joŋ wɩɩ-la mɩ sɩ na hɛ mɩ tʋɔŋ lɛ a bɩɩnɛ, a gʋnnɛ wɩɩ ʋ tʋɔŋ:

³³ Dɩ ŋ nɛ dɩɛgɛ doŋ mʋa, dɩ ŋ nɛ pɩŋ doŋ mʋa, dɩ ŋ nɛ paa ŋ vaasɩŋ gɩrɛ dɩ ŋ wiesi mʋa,

³⁴ ŋ jaŋ jɩjɩŋ dɩ nyaaŋ kʋ jʋʋŋ, a nagɛ gaara koo nʋʋ sɩ nyɩgɩla a kɔ dɩ ʋ guruguŋ.