NAMAGABA 23 - WƖA TENIŊ

¹ Dɩ ŋ nɛ hɔŋ sɩpaalaara teeŋ dɩ ŋ dii kɩaa, jɩŋ nɩɩ-la sɩpaaŋ ŋ sɩ hɔnɔ.

² Dɩ ŋ nɛ ŋaa luobii-tɩɩna ma, keri ŋ luobiiŋ ta.

³ Sɩ́ ʋ kʋdiile-la sɩma lɛ to, ʋʋ chɛ dɩ ʋ kɛmba nyɩsa kɛnɩŋ nɛ.

⁴ Sɩ́ faasa dɔgɩsɛ ŋ tɩtɩa a chɩchɛ dʋa. Kɛŋ wʋjɩmɩŋ a jɩma kɛŋ ŋ tɩtɩa.

⁵ Ŋ jaŋ wuo na dʋa fine, ka dɩ ba lɛl. Ba jaŋ guu nyʋ kɩŋkɛnsɩŋ a file jɩl wɩa-nyuŋ a nagɛ kachuuŋ.

⁶ Sɩ́ nɩɩ-la nɩsɩŋ sɩ dolie kʋdiilee dii. Sɩ́ ʋ kʋdii-sɩŋŋaa hɩɛnʋ.

⁷ Ʋ yie bʋl, “Kʋ dii aŋ nyʋa,” ama ʋ tʋɔŋ bɩ ŋɩɩ cho. Ʋ yie bɩbɩɩnɛ chɩŋ-la ʋ sɩ ŋmobo wɩaa nɛ.

⁸ Ŋ jaŋ tʋɔsɛ mʋa-la kala ŋ sɩ die, wʋsɩma-la kala ŋ sɩ bʋla pʋ jaŋ ŋaa pɛɩ.

⁹ Sɩ́ wɩaa bʋl nɩyaara teeŋ. Ʋ jaŋ sieri wʋjɩŋ wɩalɩŋ ŋ sɩɩ bʋl lɛ.

¹⁰ Pʋpɔ ŋ sɩ́ ma tinteeŋ bʋa magɩlɩ-bɩnɩŋ tabɩɩŋ kaa joŋ, koo a kɛŋ biisinsiŋ tinteeŋ laa,

¹¹ bɛɛ wɩaa Wɩa doluŋ kala Tɩɩna nɛ chɩŋ ba harɩŋ. Ʋ jaŋ laa ba wɩɩŋ bʋla pɩba a leŋ dɩ ŋ laa cheeriŋ.

¹² Suri ŋ tʋɔŋ a sɛɩ dagɩŋ, aŋ jegile nɩɩ wʋjɩnnɩ wɩaa.

¹³ Pʋpɔ ŋ sɩ́ ŋ bie kaa tʋrʋŋ vɩa. Dɩ ŋ nɛ joŋ chɩba dɔgɩsɛ ŋ bie, ʋ bɩ jaŋ sʋʋ.

¹⁴ Dɔgɩsɛ bie arɩ chɩba, a laaʋ ta sʋʋŋ bʋa lɛ.

¹⁵ Mɩ bii, dɩ ŋ nɛ kɛŋ wʋjɩmɩŋ, ŋɩɩ nɛ mɩ tʋɔŋ jaŋ tɔrɛ.

¹⁶ Dɩ ŋ nɩɩ bʋl wʋtɩtɩɩba, mɩ jaŋ jʋɔsɛ woruŋ.

¹⁷ Sɩ́ leŋe dɩ ŋ yaraa bibieri wʋbɔŋ ŋaaraa nyuŋ, ama ŋ-na ha cho dɩ ŋ fá La Tɩɩna.

¹⁸ Dɩ ŋ nɛ ŋaa ŋɩɩ, ʋ kɛŋ maachie nɛ, ŋ yɩɛlaa bɩ jaŋ ŋaa pɛɩ.

¹⁹ Mɩ bii, jegile nɩɩ mɩ teeŋ woruŋ, kɛŋ wʋjɩmɩŋ, a leŋ dɩ ŋ tʋɔbɩɩnaa tʋʋlɛ.

²⁰ Sɩ́ nɩalɩŋ sɩ faasaa nyʋa sɩnɩŋ kɩŋkɛŋ tʋɔŋ guolu koo nɩalɩŋ sɩ faasaa chaŋ nammɩa.

²¹ Sɩ-nyʋaraa arɩ nɩalɩŋ sɩ faasa cho kʋdiilee jaŋ nyaabɛ. Doŋ pɩnɩŋ kɩŋkɛŋ jaŋ leŋ dɩ ba laalɛ gɛrɩ-kɔsʋmɔɔ.

²² Jegile nɩɩ ŋ nyɩmma niiŋ, ʋ nɛ lʋlʋŋ. Dɩ ŋ naaŋ hɩɛsa, sɩ́ ʋ kaa gbesi.

²³ Chɛ wʋtɩtɩɩ, a sɩ́ joŋo yallɛ. Chɛ wʋjɩmɩŋ a sɛɩ dɩ ba kɛnɩŋ tʋrɛ, arɩ ŋɩɩ ŋ sɩ jaŋ to jɩŋ wɩaa sɩaa.

²⁴ Tʋɔpʋl tɩɩna nyɩmma yie jʋjʋɔsɛ nɛ. Nɩɩ-la kala sɩ kɛŋ bii wʋjɩnna, ʋ tʋɔŋ yie tɔrɛ ʋ nyuŋ nɛ.

²⁵ Leŋ dɩ ŋ nyɩmma arɩ ŋ naaŋ tʋɔŋ tɔrɛ. Leŋ dɩ ŋ naaŋ sɩ lʋlʋŋ jʋjʋɔsɛ.

²⁶ Mɩ bii, suri ŋ tʋɔŋ pɩmɛ, aŋ leŋ dɩ ŋ sɩaa hɛ mɩ wʋŋaalaa lɛ.

²⁷ Halɩɩla nagɛ buotuo-luŋuŋ nɛ. Hachɔrʋmʋŋ ma nagɛ viliŋ sɩ bɩ jal.

²⁸ Ʋ yie pɩna gbɛrɛ nɛ a nagɛ gaara, a leŋ baala-la sɩ bɩ wʋtɩtɩɩ kɛnɛ pʋŋa pɩpɛ.

²⁹ Kʋbɛɛ nɩɩ na hɛɛŋ? Kʋbɛɛ tʋɔŋ nɛ cheye? Kʋbɛɛ nɛ ba kaa yuo yuosuŋ? Kʋbɛɛ nɩɩ gʋrɩmɛ wɩaa? Kʋbɛɛ nɛ firise aŋ bɩ ʋ bʋbʋɔŋ jɩŋ? Kʋbɛɛ sɩaa nɛ keri chalɩŋ?

³⁰ Nɩalɩŋ sɩ yie hɔnɔɔ nyʋa sɩnɩŋ a bɩ sii, nɩalɩŋ sɩ gɔllɔ laa sɩnɩŋ nyʋa guguoli dɔŋɔ lɛ.

³¹ Sɩ́ sɩnɩŋ sɩ fɩɛsɛ ŋɩɩ lɛ beŋ. Ʋ hɛ gbaŋa lɛ nɛ aŋ sisii fʋnfʋga, ʋ jaŋ tuu yikoro fɛlɛlɛ.

³² Ʋ dɩdɛrɩŋ, ʋ jaŋ kɛnɩŋ a nagɛ dɩmɩŋ sɩ ta nɩa, ʋ huoŋ nagɛ kataha nɛ.

³³ Ŋ jaŋ nɩna wʋkpuŋkperisiŋ, a bɩbɩɩnɛ wɩalɩŋ ŋ sɩ bɩ ba sɩaa jɩŋ.

³⁴ Ŋ jaŋ nagɛ nʋʋ sɩ pɩŋ lɩɩŋ daboro tʋɔŋ mʋgʋ-balɩŋ lɛ, peliŋ kɛŋ lɩɩŋ daboro-la viviisi.

³⁵ Ŋ jaŋ bʋl, “Ba ŋmoomi nɛ, ama mɩ bɩ pɩra. Ba ŋmoomi nɛ ka ʋ bɩ mɩ lɛ jʋa. Bʋa bɛɛ lɛ nɛ mɩ jaŋ sii a bɩra wuo chɛ sɩnɩŋ nyʋa?”