NAMAGABA 22 - WƖA TENIŊ

¹ Yɩrɩ zɔmʋŋ nɛ kpɩa dʋa. Dɩ nɩaa nɩɩ ziliŋ, ŋɩɩ nɛ kɛŋ yuŋuŋ a kɩɩ ŋ sɩ kɛŋ sɛlɩmɛ koo warɩpʋla.

² Wʋbala nɛ kɩaa tɩŋŋaa arɩ summoo kaa magɛ dɔŋɔ: La Tɩɩna nɛ ŋaa ba kala.

³ Wʋjɩnna yie na wʋbɔmʋŋ dɩ ʋʋ kɔ ʋ gɛbɛ faa, ama nɩɩ-la sɩ bɩ wɩaa jɩŋ woruŋ-na yie vɛnɛ vɛnɛ mʋ jʋʋ, a na hɛɛŋ.

⁴ Dɩ ŋ nɛ muuri ŋ tɩtɩa, a fɩfá La Tɩɩna, ŋ jaŋ kɛŋ dʋa, nɩaa jaŋ ziziliŋ, ka dɩ ŋ mɩɩsɩŋ ma pɛ duomuŋ.

⁵ Nɩbɔmʋŋ wombiiŋ lɛ sɔsʋŋ arɩ bɛrɩsɩŋ nɛ hɛ nɩmɛ. Ama nɩɩ-la sɩ jɩŋ ʋ tɩtɩa kɛnɩŋ jaŋ bol arɩ ba.

⁶ Dagɛ ŋ bie wombii-la sɩ maga dɩ ʋ to. Dɩ ʋ nɛ waa ma, ʋ bɩ jaŋ joŋo ta.

⁷ Summoo ŋaa kɩaa tɩŋŋaa yosi nɛ, chɩŋ-diiree ma ŋaa nɩalɩŋ teeŋ ba sɩ dii chɩŋŋaa yosi.

⁸ Nɩɩ-la kala sɩɩ hɛ wɩaa yie jʋʋ wɩaa nɛ. Ʋ baaŋ-la ʋ sɩ na nɩaa nyuŋ jaŋ ŋaa pɛɩ.

⁹ Wɩa jaŋ pɛ nɩɩ-la sɩ kɛŋ zile lɛ, a tɩŋ ʋ sɩ ŋaa kɩaa pɩpɩ summoo.

¹⁰ Kiri babii-balɩŋ ta, dɩ nii-doluŋ, yuosuŋ, arɩ nɩaa joŋŋoo tʋʋsʋŋ dɛrɛ.

¹¹ Nɩɩ-la sɩ cho tʋɔpʋla, a jɩŋ wɩaa bʋlʋŋ nɛ jaŋ dii kuoro nandɔnsʋŋ.

¹² La Tɩɩna sɩaa pɛ nɩɩ-la sɩ jɩŋ wɩaa lɛ nɛ, ama ʋ yie leŋ nɩɩ-la sɩ bɩ wʋtɩtɩɩ kɛnɛ wɩaa vʋgʋmɛ nɛ.

¹³ Yarɩwɩɩ tɩɩna yie bʋl, “Naachigiŋ nɛ hɛ jeeŋ harɩŋ, dɩ mɩ nɛ lɩa, ʋ jaŋ kɛmmɛ chaŋ wombiiŋ lɛ.”

¹⁴ Hachɔrʋmʋŋ niiŋ nagɛ buotuo-luŋuŋ nɛ. Nɩɩ-la kala nyuŋ La Tɩɩna sɩ na baanɩŋ jaŋ foro tuu bʋa-la.

¹⁵ Yaarɩŋ hɛ hambie kala lɛ nɛ, ama dɩ ŋ nɛ joŋ chɩba daŋ ʋ lɛ, ŋɩɩ jaŋ wuo kiri yarɩɩ-la ta ʋ lɛ.

¹⁶ Nɩɩ-la sɩ nyagɛ summoo bil ka dɩ ʋ dʋa pʋŋ, arɩ nɩɩ-la sɩ joŋ kɩaa ŋaa zile pɩpɩ kɩaa tɩɩna, ba nɩalɩŋ balɩa kala jaŋ summi.

Wʋjɩnnaa wʋbʋlaa

¹⁷ Suri dɩgɩlaa a jegile nɩɩ wɩalɩŋ wʋjɩnnaa sɩɩ bʋl. Joŋ ŋ tʋɔŋ kala hɛ wɩalɩŋ mɩ sɩɩ chɛ dɩ mɩ dagɛ lɛ.

¹⁸ Ŋ jaŋ kɛŋ tʋɔtɔrʋŋ dɩ ŋ nɛ joŋ wɩalɩŋ hɛ ŋ tʋɔŋ lɛ, a ŋaa siri dɩ ŋ bʋlba.

¹⁹ Mɩɩ dagɩŋ wɩaa deemba jɩnɩŋ, a paalaa dagɩŋ dɩ ŋɩɩ leŋ dɩ ŋ laa La Tɩɩna wɩaa dii nɛ.

²⁰ Mɩ ŋmʋnsɛ wʋbiee mara arɩ fii nɛ a paala pɩŋ a mʋʋ tɩgɛ nɩaa chagɩlɩŋ arɩ wʋjɩmɩŋ lɛ,

²¹ dɩ ŋ wuo jɩŋ wʋtɩtɩɩ sɩ nagɛ ŋɩɩ, dɩ ŋɩɩ leŋ dɩ ŋ wuo bʋl wʋtɩtɩɩ a pɩ nɩɩ-la sɩ tɩmɩŋ.

²² Sɩ́ summoo gʋrʋ a tɩŋ ba sɩ summo wɩaa. Sɩ́ nɩalɩŋ sɩ bɩ ba tɩtɩa lɛ wuo pɛ gʋrʋ sarɩya dɩ-diiliŋ,

²³ bɛɛ wɩaa, La Tɩɩna jaŋ laa bʋla pɩba a chei nɩalɩŋ sɩɩ cheiba.

²⁴ Sɩ́ baaŋ tɩɩna kaa dii nandɔnsʋŋ. Sɩ́ ŋ tɩtɩa kaa mɛrɛ nɩɩ-la baanɩŋ sɩ bɩ diene aŋ sisii lɛ.

²⁵ Dɩ ŋɩɩ dee, ŋ jaŋ gʋnnɛ ʋ wʋŋaalaa a joŋ ŋ tɩtɩa hɛ daabɛrɩ-ŋmɛnɩŋ lɛ.

²⁶ Sɩ́ chɩna pɩ nʋʋkala dɩ ʋ dii chɩmɩŋ koo a joŋ kʋŋ bil chɩmɩŋ bʋbʋɔŋ lɛ.

²⁷ Dɩ ŋ nɛ bɩ wuo tiŋ, ba jaŋ kɛŋ ŋ kʋpɩnɩŋ laa.

²⁸ Pʋpɔ ŋ sɩ́ kʋ-la ŋ naabalɩmaba sɩ joŋo magɩlɛ tinteeŋ bʋa kaa joŋ.

²⁹ Nɩɩ-la kala sɩ jɩŋ ʋ tɩntɩŋŋaa woruŋ, ʋ jaŋ tɩŋ kuoro sɩpaaŋ. Ʋ bɩ jaŋ tɩŋ nɩalɩŋ sɩ bɩ nɩfɩɛma ŋaa teeŋ.